Video sẽn na n kõ-y vẽnegre, la kɩt tɩ y yẽesmã paase!

Ra yaa yʋʋmd 1951 wã tʋʋl-nif kiuugu. Pĩnd Iniyõ Sovietikã pʋgẽ b wʋka a Zeova Kaset rãmb tusa, zags tõyã, n kẽes-b tẽr dãmb pʋsẽ n tall-b ne pãng n kẽng Siberi. Bõe yĩng tɩ Iniyõ Sovietik goosneema sẽn tar pãngã da rɩk sard sẽn ka vigsd n na n sãam-ba? Baa ne b sẽn tall d saam-biisã namsg yʋʋm pi-gĩna n ka basã, b maana wãn n põse, bɩ n yidg menga? Y na n paama sogs-kãensã fãa leoor video ning gom-zug sẽn yaa Fidèles dans les épreuves — Les Témoins de Jéhovah en Union soviétique pʋgẽ. Ges-y-yã-a la y bas t’a koɛɛgã sẽn kõt vẽnegrã paas y yẽesem tɩ y kell n tall kɩs-sɩd ne a Zeova, baa sẽn yaa yell ning fãa pʋgẽ!

Y tõe n leoka sogs-kãensã bɩ? 1) Wakat bʋg la Risi goosneema sak a Zeova Kaset rãmbã tũudum b tẽngẽ wã? 2) Sẽn deng dũni gill zabr a yiib soabã la a poore, wãn-wãn la Iniyõ Sovietik wa n paam zags wʋsg neb sẽn yaa Kaset rãmba? 3) Wãn-wãn la b tẽebã zãmsg ra kɩɩsd a Lenin zãmsgã? 4) Bõe la b sẽn da boond tɩ Operasiõ Noorã, la bõe la a Stalin ra saagd n na n pids ne rẽ maasem? 5) B sẽn tall Kaset rãmbã ne pãng n tɩ zĩnig tẽng a to wã bõe n paam-ba, la bõe la b yeel-b tɩ b maan sẽn na yɩl tɩ b ra tall-b ne pãng n kẽng tẽng a to? 6) Tẽrã sẽn da rebd ne-b Siberi wã sasa, wãn to la tõnd saam-biisã la d saam-bi-pogsã keng taab raood tɩ ling b yõagdbã? 7) Bõe nimbãaneg la Kaset rãmbã yã Siberi? 8) Bõe la a Zeova nin-buiidã paam tẽebã wɛɛngẽ n sɩd nand hal wʋsgo, la bõe yĩnga? 9) Bõe yĩng tɩ d saam-biisã sak n na n gẽneg b yõy b sɛbã yĩnga, la wãn-wãn la b tõog n paam sɛbã, baa ne pãn-soaadbã sẽn da modgd wakat fãa n na n gɩdg rẽ wã? 10) Wãn to la a Khrushchev kell n zab ne Wẽnnaam nin-buiidã? 11) Wãn to la pãn-soaadbã mak n na n sãam kamb nins sẽn yaa Kaset rãmbã tẽebo? 12) Tõnd saam-biisã ra wʋmda bõe võor vẽenega, sã n yaa ne bũmb ning sẽn da wa ne b namsgã? (Annuaire 2002, seb-neng 203-4) 13) Wãn to la yɛlã yɩ lebend ne sẽn da zabd-b ne Wẽnnaam siglgã ne b sũur fãa wã raabo? (Annuaire 2002, seb-neng 220-1) 14) Bõe la b ra tõog n maane, tɩ yaa bũmb pĩnd Iniyõ Sovietik Kaset rãmbã sẽn da ka tagsd tɩ b na n wa tõog n maaname? 15) Bõe n sõng tõnd saam-biisã tɩ b tõog n yals kãn-kãe b makrã taoore, la wãn to la video wã baasgã wilgd tɩ Zeremi 1:19 wã goam yaa sɩda? 16) Togs-y kɩbar a yembr sẽn wilgd ned sẽn tall burkĩnd makr taoore, tɩ rẽ paasd yãmb yẽesem n tɩ yɩɩda.