B kõo tõnd koe-noogã mooneg tʋʋmde
1 Ad Wẽnnaam sɩd waooga tõnd a sẽn kõ-d koe-noogã mooneg tʋʋmdã! (1 Tes. 2:4, Kãab-paalgã Koe-noogo) Neb kẽer tõeeme n ka rat n sak koe-kãngã sẽn tar pãngã ye, la a bee yamleoog ne pʋ-peelem dãmbã wala tɩ-puud sẽn tar yũ-noog sẽn be yamleoog ne nebã. (2 Kor. 2:14-16) Koe-noogã na n waa ne fãagr n kõ neb nins sẽn kelgd-a la b sakd-a wã. (Rom 1:16) Wãn to la d segd n ges tʋʋm kãngã b sẽn kõ-dã?
2 A Zezi ne a tʋm-tʋmdbã: Koe-noogã mooneg n da pak a Zezi n yɩɩda. (Luk 4:18, 43) Baa yaams la kom sã n da tar-a, a sẽn da nong nebã la a nand koɛɛgã yĩng kɩtdame t’a taasd neb a taabã koe-noogã. (Mark 6:30-34) Ne a goam la a tʋʋma, a ninga a karen-biisã yamẽ vẽeneg tɩ Rĩungã mooneg tʋʋmd tara yõod wʋsgo.—Mat. 28:18-20; Mark 13:10.
3 Tʋm-tʋmdbã rɩka togs-n-taar ne a Zezi n moon Rĩungã koɛɛg ne yẽesem. Baa b sẽn pãb-b la b yeel-b tɩ b bas moonegã, ‘b kell n zãmsa nebã la b moon a Zezi Kirist koe-noogã n ka bas ye.’ (Tʋʋ. 5:40-42) Tʋm-tʋmd a Poll tʋma wa a na n kiime n moon koe-noogã. (1 Kor. 15:9, 10; Kol. 1:29) A gesa zu-noog ning sẽn yaa koe-noogã mooneg wala ned samd a sẽn tara, t’a ra sak n na n bas yɛl sẽn noom yẽ meng balã, sẽn na yɩl n pids tʋʋm-kãngã.—Tʋʋ. 20:24; Rom 1:14-16.
4 Yaa zu-noog tʋʋmd b sẽn kõ tõnd rũndã-rũndã: Tõnd sẽn nand tʋʋm-sõng kãngã b sẽn kõ-dã yĩngã, rẽ na n kɩtame tɩ d bao soay n moon n paase. (Rom 15:16) A Edward sẽn da kẽnd ne põor weefã ra nong n zĩi lotɛll rig-noorẽ n sõsd ne sẽn gãe-b lotɛllẽ wã. La a sẽn da rat n moon n paasã, a kɩtame tɩ b maneg zĩig baase pʋgẽ n kõ-a. A kẽna ne baase kãng kɩlo tusa yʋʋm wʋsg pʋgẽ n maan a so-pakrã tʋʋmde. Rũndã-rũndã me, wala a Edward, neb wʋsg sigla b yɛlã n tõog n moon koe-noogã n paase.
5 Rũndã-rũndã, bɩ tõnd rɩk togs-n-taar ne a Zezi la a tʋm-tʋmdbã n ning moonegã tʋʋmd pipi zĩigẽ d vɩɩmã pʋgẽ. D sã n maan woto, d wilgdame tɩ d nonga nebã la tɩ d nanda koe-noogã mooneg tʋʋmd b sẽn kõ-dã.