Kom-bɩɩse, karm-y Wẽnnaam Gomdã!
1 Bi-bɩɩlmã wakat yaa zu-loees la sard kãsems dɩkr wakate. Daar fãa, yɛl wʋsg n tusd yãmb sẽn yaa kom-bɩɩsã wʋsg sẽn na yɩl tɩ y kɩɩs Wẽnnaam noyã. Yãmb segd n deng n yãka y bõn-datɩ wã tẽebã wɛɛngẽ n yaool n yãk y sẽn na n maan a soab karengã, tʋʋmã, la kãadmã wɛɛngẽ. Yaa y sẽn na n maan woto bal la y na n tõog n dɩk sard a taab sẽn na n naf-y y vɩɩmã pʋgẽ. Yãmb sã n tar tẽeb bõn-datɩ takɩ, na n sõng-y lame tɩ y tʋm ne yam la y tõog y tʋʋmã pʋsẽ. Y sã n karemd Wẽnnaam Gomdã la y bʋgsd a zug wakat fãa, rẽ na n kɩtame tɩ y tõog n tũ a saglsã Wẽnnaam sẽn vẽneg tɩ b gʋlsã y vɩɩmã pʋgẽ, tɩ bõn-sõma nins y sẽn maandã zĩnd barka.—Zoz. 1:8; Yɩɩl 1:2, 3.
2 Wãn to la rẽ na n naf-yã? A Sʋɩtãan dũniyã pida ne yɛl wʋsg sẽn tusd tõnd tɩ d maan wẽnga. (1 Zã 2:15, 16) Tõeeme tɩ y mi karen-bi-taas bɩ y kom-taas a taab sẽn paam yel-beedo, b sẽn bas tɩ b taab tus-b tɩ b maan wẽngã yĩnga. Y sã n tũ Biiblã saglse, y na n paama pãng la raood tẽebã wɛɛngẽ n zãgs yel-wẽnã maanego. Sẽn paase, Wẽnnaam Gomdã sagls tõe n sõng-y lame tɩ y ra lʋɩ a Sʋɩtãan bẽdsã pʋsẽ ye. (2 Kor. 2:11; Heb. 5:14) Y sã n tũud Wẽnnaam noyã, y na n paama sũ-noog hakɩk y vɩɩmã pʋgẽ.—Yɩɩl 119:1, 9, 11.
3 Wẽnnaam noyã sẽn ka toeemdã yɩɩda ninsaal yam. (Yɩɩl 119:98-100) Biiblã noy bãngr sõma la a Zeova raabã a sẽn vẽnegã zug bʋgsgo, la pʋʋsgã na n sõng-y lame tɩ y tall zems-n-taar sõma ne Biiblã Soaba, sẽn yaa Wẽnnaam a Zeova sẽn mi bũmb fãa wã. A kãaba woto: “Mam na n zãmsa foom n wilg foom sor ninga fo sẽn tog n tũ. Mam nif geta foom, la mam yaa fo sagenda.”—Yɩɩl 32:8.
4 Bao-y sẽk sẽn na yɩl n karemd-a: Bi-bɩɩg a yembr sẽn yaa kiris-ned yãka yam n na n karem Biiblã tõre, la a karm-a lame n sa yʋʋm yɛng pʋgẽ. Wãn-wãn la rẽ naf-a? A yeela woto: “Mam zãmsa yɛl wʋsg a Zeova wɛɛngẽ, sẽn kɩt tɩ mam pẽneg-a, la kɩt tɩ m na n zoe-a m vɩɩmã pʋgẽ.” (Zak 4:8) Yãmb karma Biiblã zãng bɩ? Y sã n nan pa karm-a zãnga, rẽ yĩnga y tõe n yãka yam n maan dẽ bɩ? Sãmbg sẽn ka be, a Zeova na n barka y modgrã, tɩ y paam nafa wʋsg a pʋgẽ.