D tũnug ne zʋrno rãmbã n taas neb a taabã koe-noogã
1 Tʋm-tʋmd a Poll ra sakame n na n taas neb a taabã koe-noogã. (1 Kor. 9:23) Rũndã-rũndã, yaa ne sũ-noog la a Zeova Kaset rãmbã taasd neba fãa koe-noogã. Tʋʋm-teed nins d sẽn tar n tʋmdẽ tɩ womd biis n tɩ yɩɩd rũndã-rũndã yaa Gũusg Gasgã la Réveillez-vous ! wã. Yaa zak-zak la butik-butik la d pʋɩt zʋrno rãmbã sõma n yɩɩda. Yaa rẽ yĩng la b sẽn sagend tõnd tɩ d nong n pʋɩt zʋrno rãmbã woto zʋrno rãmbã pʋɩɩb raarã. Tigimsã tõe n yãka zʋrno rãmb pʋɩɩb raar semennã pʋgẽ, tɩ ra-kãng yaa zʋrno rãmb pʋɩɩb raar bala. Tigims wʋsg sẽn yɩɩd gesame tɩ sibr n zems ne rẽ maanego. Woto, bɩ tiging fãa yãk ray bɩ zaaba takɩ zʋrno rãmbã pʋɩɩb yĩnga. Tõe n yaa kasetã kũun ne zʋrno rãmbã zak-zaka, butik-butiki, sorã noore, bɩ neb b sẽn tʋgd n kɩt zʋrno rãmbã n ka vaandẽ ye. Sẽn paase, bõe la yãmb sẽn yaa Rĩungã koe-moondã tõe n maan n sõng tɩ d pʋɩ zʋrno rãmbã wʋsg n paase?
2 Bũmb d sẽn segd n maan pipi yaa d sẽn na n nong n yɩt tao-tao n kãabd nebã Gũusg Gasgã la Réveillez-vous ! wã. Reng-y pĩnd n karem zʋrno rãmbã. Y sã n wa karemd sõasg fãa bɩ y sok y menga, ‘Ãnd dãmb la bũmb ning yell b sẽn gomd ka wã pak-yã?’ Tags-y goam a wãn y sẽn tõe n yeel tɩ kɩt t’a soabã tʋlg n karem sõasgã yelle. Zʋrno rãmbã pʋɩɩb raar teelg sẽn yãk a toogo, y tõe n zãa zʋrno rãmb sẽn na yɩl tɩ y sã n paam segb fãa bɩ y tõog n kãab-b neb a taaba. Tõe n yaa y sẽn na n be kẽnd zug ne neb a taaba, bɩ y sã n daad teedo, n sõsd ne y tʋmd-n-taase, y yagse, y karen-bi-taase, bɩ ne y karen-saam dãmb sasa.
3 B sagend-y lame me tɩ y tũnug ne goam sẽn yaa nana. Y sã n wa kãabd zʋrno rãmba, sẽn zems n yɩɩd yaa y goamã sẽn na n yɩ koɛɛg la vẽenese. D sẽn data yaa d tõog tɩ zʋrno rãmb wʋsg ta nebã nusẽ, la d bas tɩ zʋrno rãmbã “gom” ne-ba. Koe-moondb kẽer gesame tɩ b sã n yãk tagsg a ye sẽn yit zʋrnall pʋgẽ n tũnug ne gom-biis a wãn n kãab ned zʋrno rãmbã, womda biisi. D tõe n karma zĩ-gũbr ning gom-zug sẽn yaa: “Bõe la d na n yeel n wilg zʋrno rãmbã” n paam sagls sẽn zems n tõog n maan dẽ. Nebã sã n deeg zʋrno rãmbã, sẽn deeg-bã toor sẽn kae, tagsa nins sẽn be zʋrno rãmbã pʋsẽ wã leb n tõe n nafa neb a taaba. Irlãnde, pʋg-sad sẽn yaa inivɛrsite karen-biig n karem yʋʋmd 1991 bõn-bɩʋʋng kiuug 1 daar Gũusg Gasgã a baaba sẽn dag n paam Kaset soab nengẽ. A sẽn karem zʋrnallã n sa bala, a baoo Kaset rãmbã telefõn nimero telefonnã aniyɛɛr pʋgẽ n bool-ba. Pa kaoos la b sɩng Biibl zãmsg ne-a ye. A reega lisg “Wẽnnaam zãmsgã” tigims gĩnd tigis-kãsengẽ yʋʋmd 1993 wã sẽoog kiuugã pʋgẽ. Sẽn yaa a soab fãa, bɩ d tall zʋrno rãmbã n kẽng neba nengẽ, tɩ zʋrno rãmbã tõe n “sõsa” ne-ba! Kaagr yel-gɛt a yembr n kõ saglg a to sẽn yaa nana: “Yiis-y zʋrno rãmbã y korgã pʋgẽ.” Sɩda, baa yãmb sẽn yetã sã n pa kɩt tɩ nedã tʋlg n deeg zʋrno rãmbã, tõe tɩ fot neebã sẽn be zʋrnallã zugã kɩt t’a reeg-ba.
4 Saglg a tãab-n-soab yaa tɩ d sã n wilgd zʋrno rãmbã bɩ d ra gãd tags-yɛng dem-dem n ka rat n toeem ye. (Ges-y 1 Korẽnt dãmba 9:19-23.) Segl-y kãabg goam sẽn yaa koeese. Tags-y sõasg a yembr zʋrnallã pʋgẽ sẽn na n zĩnd yamleoog ne rapã, la a to sẽn na n zĩnd yamleoog ne pagbã yelle. Sã n yaa kom-bɩɩse, y tõe n wilg-b-la “Les jeunes s’interrogent . . . ” sõasgã. Y sã n wa kãabd nebã zʋrno rãmbã bɩ y ra gãd tags-yɛng dem-dem n ka rat n toeem ye. Zʋrno rãmbã pʋɩɩb raar sẽn yãk a toogo, tõe tɩ y mik tɩ kasetã kũun zaabr kõ-y segb tɩ y tõog n kãab zʋrno rãmbã zak-zaka.
5 Saglg a naas-n-soab yaa tɩ d yãk bõn-datl d meng yĩnga. Koe-moondba tõe n yãka bõn-datl tɩ b na n basa zʋrno rãmb 10 kiuug pʋgẽ, sẽn zems ne b yɛlã sẽn yaa to-to, tɩ so-pakdbã tõe n modg n bas zʋrno rãmb 90. Yaa sɩda, tõeeme tɩ koe-moondb kẽer tõe n basa zʋrno rãmb sõor sẽn yɩɩd piig kiuug fãa, tɩ b tõe n yãk bõn-datl n bas zʋrno rãmb sõor sẽn yɩɩd rẽ. Baasg zãnga, yɛl wala ka-laafɩ, moonegã zĩig sẽn yaa to-to wã yĩnga, bɩ yɛl a taab tõe n kɩtame tɩ bõn-datl ning kẽer sẽn na n yãkã pa na n ta zʋrno rãmb piig basg ye. Ne rẽ fãa, tʋʋmd ning b sẽn maand a Zeova balengã pʋgẽ wã me tara yõodo. (Mat. 13:23; Luk 21:3, 4) Sẽn tar yõod n yɩɩdã yaa d wee n tall bõn-datla.
6 Wẽnnaam Rĩungã koe-noog la koɛɛg ning sẽn tar yõod n yɩɩdã, nebã sẽn segd n wʋm n paam yolsg la fãagr wakat fãa yĩngã. Wala tʋm-tʋmd a Polle, bɩ d rɩk sard sẽn ka vigsd n tũnug ne zʋrno rãmbã n taas ‘Wẽnnaam koe-noogã’ sik-m-mens rãmbã la d teel Rĩungã sɩda.—1 Tes. 2:8.