D wilg nebã tɩ b yell pak-d lame
1 Pag a ye sẽn da tar tags-kɛg a Zeova Kaset rãmbã zug tẽra a sẽn seg Kaset soab a ye pipi. A yeelame: “Mam pa ye tẽr bũmb ning zug tõnd sẽn da sõsã ye. La m ket n tẽrame t’a yɩɩ nin-sõngo, la sik-m-meng soaba. A zʋgã yamleoog sɩd yõka maam wʋsgo.” Gom-kãensã wilgda vẽeneg tɩ tara yõod tɩ d wilg tɩ neb nins d sẽn moond koɛɛgã yell sɩd pak-d lame.—Fil. 2:4.
2 Nonglem baooda neb a taabã neere: Bũmb d sẽn tõe n maan n wilg tɩ d nonga neb a taabã, yaa d sẽn na n yɩ nin-sõngo. (1 Kor. 13:4) Nin-sõng tʋmda a taabã nafr yĩnga, n baood n na n maan bũmb nins sẽn na n sõng-bã. Yaa sɩd tɩ koɛɛgã mooneg zoe n yaa nonglem tʋʋmde, la d sã n sɩd wilgd ne d manesmã tɩ nebã yell pak-d lame, nonglmã na n puka vẽeneg n yɩɩd d sẽn na n moond-b bala. Wala makre, d zood manesmã, d sẽn waoogd-b la d sẽn kelgd-b to-to wã, bũmb nins d sẽn yetã la d sẽn yet-b to-to wã, la baa d sẽn get nebã to-to wã menga.—Mat. 8:2, 3.
3 Nebã yell sã n sɩd pak-do, na n kɩtame me tɩ d bao n sõng-b vẽenega. Saam-biig a ye sẽn yaa so-pakd sẽn wa n moond zak-zaka, a taa pʋg-kõor sẽn kʋʋl zakẽ, la pagã sẽn bãng tɩ yaa Kaset soabã a yɩɩ tao-tao n na n dig-a. A yeel-a lame tɩ yẽ ra rʋʋ bũmb n dat n toeem ãmpull a ragendã pʋgẽ, la a sẽn wʋm sallmã wẽebã. Tɩ koe-moondã yeele: “Yãmb ra pa segd n toeem ãmpullã y toor ye.” Tɩ pagã yeel-a tɩ bɩ a wa kẽ. A kẽ n toeema ãmpullã n kõ-a, la a yi n looge. Rẽ poor bilfu, pagã biribl n wa n na n ges-a, t’a togs-a bũmb ning sẽn maanã. Pagã biig sũur yɩɩ noog wʋsgo, t’a bao saam-biigã n na n pʋʋs-a barka. B sõsa ne taab sõma, hal tɩ pagã biig wa baas n sak Biibl zãmsgo.
4 Tõnd sẽn wilgd nebã tɩ b yell pak-d lame wã, d rɩkda a Zeova nonglem ne nebã togs-n-taare, la leb n paasda Rĩungã koɛɛg rasãnde. Woto, bɩ d wilg wakat fãa tɩ “tõnd maanda sẽn zems Wẽnnaam tʋm-tʋmdba, . . . ne nonglem.”—2 Kor. 6:4, 6.