Ra bas-y nonglem ning y sẽn da tar sɩngrẽ wã ye
1 A Zezi sẽn dʋ saasẽ wã poore, a yeela pipi kiris-neb nins sẽn da be Efɛɛz tigingã pʋgẽ wã woto: “Yell ninga mam sẽn tar ne yãmba, yaa tɩ yãmb basa yãmb pipi nonglem.” (Wil. 2:4) Vẽenega, neb wʋsg ra pa le nong a Zeova wa b sẽn da nong-a to-to sɩngrẽ wã ye. Tõnd sẽn wa n bãng sɩdã paalmã kɩtame tɩ d ra nong Wẽnnaam la neb a taabã hal wʋsgo. Leb n kɩtame tɩ d ra moond bũmb nins d sẽn bãng paalmã ne yẽesem. Bõe n na n sõng tõnd tɩ d kell n tall nonglem ning d sẽn da tar sɩngrẽ wã la d kell n tall d yẽesmã koe-moonegã pʋgẽ?
2 Meng Biibl zãmsg la tigissã kẽnde: Tõnd sẽn wa n bãng sɩdã, bõe n kɩt tɩ d nong Wẽnnaam la neb a taabã? Rẽ yĩnga pa tõnd sẽn zãms Biiblã n bãng bũmb ning a Zeova zugã sɩda? (1 Zã 4:16, 19) Dẽnd tõnd sã n dat tɩ d nonglmã ‘paasd daar fãa,’ d segd n ket n baood n bãngda “Wẽnnaam yel-zulumsã” sẽn na yɩl n paam bãngr hakɩkã.—Fil. 1:9-11; 1 Kor. 2:10, NW.
3 Yaoolem wakat kãensã sẽn pid ne sũ-sãams la yɛl a taab sẽn tiisd tõndã yĩnga, tõog n zãmsd Biiblã wakat fãa tõe n yɩɩ toogo. (2 Tɩm. 3:1) Tõnd segd n yãka wakat takɩ n dɩlgd d mens tẽebã wɛɛngẽ. Tigimsã me kẽnd wakat fãa tara yõod wʋsgo, sẽn yɩɩd fãa d sẽn mi “tɩ daarã kolgdame wã yĩnga.”—Heb. 10:24, 25.
4 Koe-moonegã: D sã n moond koɛɛgã ne yẽesem na n sõng-d lame tɩ d kell n tall nonglem ning d sẽn da sɩng n tar ne Wẽnnaamã. D sã n moond koe-noogã d tẽegda bũmb nins a Zeova sẽn kãab ne nonglmã, tɩ paasd tõnd saagrã la d nonglmã pãngã. Tõog n zãms neb a taabã tɩ b bãng sɩd ning sẽn be Biiblã pʋgẽ wã baoodame tɩ d maand vaeesg sẽn na yɩl n wʋm bũmb nins d sẽn dat n zãms-bã võor sõma, tɩ woto kengd tõnd tẽebã.—1 Tɩm. 4:15, 16.
5 A Zeova segda ne pẽgr la waoogre, la d segd n nong-a lame me. (Wil. 4:11) D pa segd n bas tɩ nonglem kãng boog ye. D sã n zãmsd Biiblã sõma, n kẽnd tigissã wakat fãa, la d moond neb a taabã bũmb ning d sẽn nong n yɩɩdã ne yẽesem, d na n kell n talla nonglem ning d sẽn da tar sɩngrẽ wã.—Rom 10:10.