“M pa rat n kelg ye”
1 Kẽer mii n leokda woto koe-moonegã sasa. Nebã sã n pa rat n kelg koɛɛgã, bõe n na n sõng tõnd tɩ d sũur da sãame? Bõe la d tõe n maan n kɩt tɩ nebã tʋlg n kelg koe-noogã?
2 D kell n tall sũ-noogo: D sã n tẽegd bũmb ning sẽn kɩt tɩ neb wʋsg pa rat n kelg tõndã, tõe n sõng-d lame tɩ d kell n tall sũ-noogo. Neb nins b sẽn zãms tɩ bũmb fãa waa yaarã, wall b sẽn wub-b rãmb zĩis nins nebã sẽn pa tẽed tɩ Wẽnnaam beeme wã tõeeme n pa nand Biiblã ye. Zãmbã sẽn be tũudum dãmbã pʋsẽ wã kɩtame tɩ neb a taab me sũur sãamd wʋsgo. Kẽer me sẽn pa kelgdã yaa b sẽn pa tar saagrã yĩnga. (Ef. 2:12) Vɩɩmã zu-loees lima sãnda me tɩ kɩt tɩ b pa kelgd ye.—Mat. 24:37-39.
3 Baa ne neb kẽer sẽn pa sakd n kelgd tõndã, d tõe n paama sũ-noog d koe-moonegã pʋgẽ, bala d miime tɩ d sẽn modgdã waoogda a Zeova. (1 Pɩɛ. 4:11) Sẽn paase, koɛɛgã mooneg kengda tõnd tẽebã, baa yaa neb nins sẽn pa nand sɩdã la d moonda. D koe-moonegã zĩisẽ, bɩ d modg n ges nebã wa a Zeova sẽn get-b to-to wã. A Zeova zoee Niniiv nebã ‘sẽn da pa mi b nensã’ nimbãanega. (Zonas 4:11) Neb nins sẽn be d moonegã zĩisẽ wã segd n wʋma koe-noogã! Rẽ n so tɩ d pa segd n bas n pa ye moondẽ ye. D segdame n maan d sẽn tõe fãa n kɩt tɩ b tʋlg n kelg koɛɛg ning sẽn be Biiblã pʋgẽ wã.
4 Sõs-y bũmb nins sẽn pak nebã yelle: Y sɩngr goamã pʋgẽ, y tõe n goma bũmb sẽn pak nebã yell la y kɩt tɩ y kelgdã wilg a tagsgo. A sã n wa gomd bɩ y kelg-a, la rẽ poor bɩ y wilg-a Biiblã sẽn yet bũmb ningã, tɩ keng a raoodo. Sabaab a ye loogr poore, Kaset soab a ye kẽe zak ne zak n ges nebã n pʋʋs-b zaamẽ toogo. A yeela woto: “Tao-tao bala nebã sɩnga goamã, mam paam n sõssa ne neb wʋsg sõma ra-kãnga, bala mam wilgame tɩ b yell pak-m lame.”
5 Yaa Wẽnnaam Rĩungã n na n welg yell buud fãa sẽn pak ninsaalbã. Bɩ y modg n bãng yell ning sẽn pak y kelgdã n yɩɩdã. Tõe n kɩtame t’a bas tɩ y wilg-a Biiblã sẽn kõt saagr ningã. La baa t’a sã n pa kõ-y sor tɩ y wilg-a, tõe t’a na n sak n “kelga yãmb nindaare.”—Tʋʋ. 17:32.