Kɩɩs-y Sʋɩtãanã ne a sɩlmã fãa

1, 2. Ned sã n deeg lisgu, ãnd dãmb sũy n yaa noogo?

YÃMB sã n sɩng n tũuda a Zeova hal sẽn kaoose, yaa vẽeneg tɩ y kelga lisgã sõsg naoor wʋsg d tigis-kãsemsẽ wã. La baa ne rẽ fãa, tigis-kãseng sasa fãa, yãmb sã n wa yã neb nins sẽn dat n deeg lisgã sẽn yik n yas nebã taoore, y sũur yaa noog wʋsgo. Nebã fãa sũy yaa noogo, tɩ b wẽed nu-pogse. Yãmb sũur tõe n yɩɩ noog hal tɩ y nintãmã meng yita, nin-kãensã sẽn yãk yam n na n tũ a Zeova wã yĩnga. Sasa kãensã d fãa sũy sɩd yaa noog wʋsgo!

² Tõeeme tɩ yʋʋmd fãa, pa naoor wʋsg la tõnd yãt neb sẽn deegd lisg ye. La malɛgsã yẽ yãta rẽ naoor wʋsg n yɩɩd tõndo. Tags-y n ges-y sũ-noog ning sẽn be saasẽ, malɛgsã sẽn ne neb tusa sẽn wat a Zeova siglgã pʋgẽ semen fãa dũniyã gill zugã. (Luk 15:7, 10) Yaa vẽeneg tɩ malɛgsã sũy yaa noog wʋsgo, b sẽn ne nebã sõor sẽn tar paasg woto wã!—Aze 2:7.

A SƲƖTÃAN “GÕODA WA GƖGEMD SẼN KELEMDE”

3. Bõe yĩng t’a Sʋɩtãan “gõod wa gɩgemd sẽn kelemde”?

³ A Sʋɩtãan ne a zĩn-dãmbã yẽ sũy puuda ne neb nins sẽn deegd lisgã. B sũy sɩd puuda wʋsgo, nin-kãensã sẽn lak b mens ne dũni kãngã sẽn yaa wẽngã. Bõe yĩnga? Bala a Sʋɩtãan yeelame tɩ nebã pa tũud a Zeova b sẽn nong-a yĩng ye. A wilgame tɩ b sã n paam toogo b na n kɩɩs-a lame. (Zoob 2:4, 5) La ned sã n sak n dɩk a meng n kõ a Zeova n deeg lisgu, a wilgdame t’a Sʋɩtãan yaa pʋ-yagda. Ned sã n deeg lisgu, yaa wala a wẽe a Sʋɩtãan pɛka. Woto yĩnga, d tõe n yeelame t’a Sʋɩtãan reegda pegs tusa semen fãa. Dẽnd b sẽn yeel t’a Sʋɩtãan “gõoda wa gɩgemd sẽn kelemd n baood a sẽn tõe n paam a soab n sãamã” pa ling tõnd ye. (1 Pɩɛɛr 5:8) “Gɩgemdã” ratame n koms tõnd tẽebã, bɩ n pʋd n sãam zood ning sẽn be tõnd ne Wẽnnaam sʋkã fasɩ.—Yɩɩl Sõamyã 7:2, 3; 2 Tɩmote 3:12.

4, 5. a) Bõe n wilgd t’a Zeova pa na n bas t’a Sʋɩtãan sãam a nin-buiidã gilli? b) Kiris-neb hakɩkã tõe n kɩsa sɩd ne bõe?

⁴ Baa ne a Sʋɩtãan sẽn yaa tõnd bɛ-kãsengã, d pa segd n zoe rabeem ye. Bala bũmb a yiib n wilgd t’a Zeova pa na n bas t’a Sʋɩtãan sẽn yaa wa “gɩgemd sẽn kelemdã” sãam a nin-buiidã fãa ye. Pipi, yaa t’a reng n togsame tɩ kiris-neb hakɩk sẽn yaa kʋʋn-kãseng n na n põs “to-kãsengã” sasa. (Wilgri 7:9, 14) Wẽnnaam gomd pa vaand ye. Rẽnd a Sʋɩtãan meng mii vẽeneg t’a pa tõe n tudg Wẽnnaam nebã fãa ye.

⁵ Yiib-n-soaba, bũmb ning no-rɛɛs a Azaria sẽn yeel rĩm a Aza wã wilgdame t’a Zeova pa na n bas t’a Sʋɩtãan sãam tõnd fãa ye. A yeelame tɩ “yãmb sã n be ne [a Zeova], bãmb bee ne yãmba.” (2 Kibaya 15:2; 1 Korẽnt dãmba 10:13) Kibay wʋsg sẽn be Biiblã pʋgẽ wilgdame tɩ pĩnd wẽndẽ wã, a Sʋɩtãan pa tõog n sãam neb nins sẽn da teeg Wẽnnaam wakat fãa wã ye. (Hebre dãmba 11:4-40) Rũndã-rũndã me, kiris-ned sã n teeg Wẽnnaam wakat fãa, a Sʋɩtãan pa na n tõog-a ye. Wẽnnaam Gomdã yeta vẽeneg woto: “Kɩɩs-y Sʋɩtãanã, la yẽ na zoe n bas yãmba.”—Zak 4:7.

“TÕND ZABR . . . YAA NE SƖƖS WẼNS BUUD FÃA”

6. Wãn to la a Sʋɩtãan zabd ne kiris-nebã yembr-yembre?

⁶ A Sʋɩtãan pa tõe n tõog zabrã a sẽn zabd ne Wẽnnaam nebã fãa wã ye. La d sã n pa gũusi, a tõe n tõog-d-la yembr-yembre. A miime t’a sã n tõog n sãam zood ning kiris-ned sẽn tar ne a Zeova wã, a tõog-a-la fasɩ. La wãn to la a maanda? A zabda ne-d n pa basdẽ, a zabda ne ned kam fãa yembr-yembre, la a mi n tũnugda ne sɩlem me. Bɩ d gom rẽ yell bal-balle.

7. Bõe yĩng t’a Sʋɩtãan nangd pãng n zabd ne a Zeova nebã?

⁷ A zabda ne-d n pa basdẽ ye. Tʋm-tʋmd a Zã yeelame tɩ “dũniyã fãa bee wẽng soabã nugẽ.” (1 Zã 5:19) Gom-kãensã wilgdame tɩ kiris-neb hakɩkã segd n maana gũusg wʋsgo. Sẽn mik t’a Sʋɩtãan tõogame tɩ dũniyã nebã wʋsg tũud-a wã yĩnga, a nangda pãng masã n zabd ne a Zeova Kaset rãmbã sẽn yaa neb nins sẽn pa tũud-a wã. (Miise 4:1; Zã 15:19; Wilgri 12:12, 17) A Sʋɩtãan sũurã sɩd puuda wʋsgo, bala a miime t’a wakatã sẽn ketã yaa bilfu. Rẽ kɩtame t’a zabd zabrã ne a pãng fãa n yɩɩd pĩndã. Rũndã-rũndã, a modgda ne a pãng tɛk n dat n sãam zood ning sẽn be tõnd ne a Zeova sʋkã. Dẽnd yaa masã la d segd n bao n bãng tõnd “sẽn tog n maan to-to.”—1 Kibaya 12:33

8. Tʋm-tʋmd a Poll sẽn yeel tɩ tõnd tara “zabr” bɩ maoor ne malɛg-wẽnsã, a ra rat n yeelame tɩ bõe?

⁸ A zabda ne ned kam fãa. Tʋm-tʋmd a Poll yeela a tẽed-n-taasã woto: “Tõnd zabr . . . yaa ne sɩɩs wẽns buud fãa sẽn be yĩngri.” (Efɛɛz rãmba 6:12) Gɛrk gom-bil ning b sẽn lebg tɩ “zabrã” yaa maoore. Dẽnd a Poll goamã wilgdame tɩ tõnd ned kam fãa tara zabr bɩ maoor ne sɩɩs wẽns bɩ malɛg-wẽnse. Baa d sẽn be tẽng ning pʋgẽ wã neb tẽed tɩ malɛg-wẽns beeme tɩ b pa tẽed me, d pa segd n yĩm abada tɩ d sẽn dɩk d mens n kõ a Zeova n deeg lisgã tɛka, d sɩnga zabr ne malɛg-wẽnsã ye. Rẽ n so t’a Poll yeel Efɛɛz kiris-nebã n yɩlem tɩ b “yals kãn-kãe.”—Efɛɛz rãmba 6:11, 13, 14.

9. a) Bõe yĩng t’a Sʋɩtãan ne zĩn-dãmbã tũnugd ne sɩlem buud toor-toore? b) Bõe yĩng t’a Sʋɩtãan makd n dat n kɩt tɩ d tall tagsg sẽn pa sõma, la bõe la d tõe n maan t’a ra tõog-do? (Ges-y seb-neng 192-3 zĩ-gũbrã.) d) A Sʋɩtãan sɩlem bʋg yell la d na n gome?

⁹ A tũnugda ne sɩlem. A Poll sagla kiris-nebã tɩ b yals kãn-kãe sẽn na yɩl n tõog a Sʋɩtãan “sɩlem fãa.” (Efɛɛz rãmba 6:11) A Poll sẽn yeel tɩ “sɩlem fãa” wã rat n yeelame t’a Sʋɩtãan sɩlmã pa a yembr bal ye. Malɛg-wẽnsã tũnugda ne sɩlem buud toor-toore, la pa zaalem yĩng ye. A Zeova Kaset rãmb kẽer tõog n yalsa kãn-kãe makr ning pʋgẽ, la makr a to pʋgẽ b lʋɩɩme. Woto wilgdame t’a Sʋɩtãan ne zĩn-dãmbã gũusdame n get tõnd ned kam fãa manesem, sẽn na yɩl n bãng d pãn-komsem. Rẽ poore, b tũnugda ne d pãn-komsmã sẽn na yɩl n sãam zood ning sẽn be tõnd ne a Zeova sʋkã. La d sũy yaa noogo, bala Biiblã wilgda tõnd a Sʋɩtãan sɩlmã. (2 Korẽnt dãmba 2:11) Seb-kãngã pʋgẽ, d zoe n goma a sɩlmã kẽer yelle, wala makre, laogã nonglmã, tũud-n-ta-wẽnsã, la yoobã. Masã d na n goma a Sʋɩtãan sɩlem a to yelle: Yaa zĩn-dãmbã yɛl maanegã.

ZĨN-DÃMBÃ YƐL MAANEG YAA WẼNNAAM KƖƖSGO

10. a) Sõdg-y yɛl kẽer sẽn tũud ne zĩn-dãmb sõngre. b) A Zeova tagsg yaa wãn to ne yel-kãensã, la tõnd me tagsg segd n yɩɩ wãn ne yel-kãensã?

¹⁰ Ned sẽn bʋgd bagre, sẽn maand tɩt bɩ n dɩt tɩɩm, bɩ ned sẽn boond kɩɩms maanda bũmb sẽn tũud ne zĩn-dãmbã sẽn yaa malɛg-wẽnsã sõngre. Wala d sẽn mi wã, a Zeova kisa “neb nins fãa sẽn maand woto wã.” (Tõodo 18:10-12; Wilgri 21:8) Sẽn mik tɩ tõnd me segdame n “kisg sẽn yaa wẽngã,” d pa segd n bao zĩn-dãmb sõngr ye. (Rom dãmb 12:9) D sã n maan woto, d sɩd kɩɩsa d saasẽ Ba a Zeova!

11. Bõe yĩng t’a Sʋɩtãan sũur na n yɩ noog wʋsgo, a sã n tõog n kɩt tɩ d maan yɛl sẽn tũud ne zĩn-dãmbã sõngre? Rɩk-y makre.

¹¹ Sẽn mik tɩ neb nins sẽn maand yɛl sẽn tũud ne zĩn-dãmbã sõngrã sɩd kɩɩsda a Zeova vẽenegã yĩnga, a Sʋɩtãan maanda a sẽn tõe fãa n dat tɩ tõnd me maan yel-kãensã. A sã n tõog n kɩt tɩ kiris-ned maan bũmb sẽn tũud ne zĩn-dãmbã sõngre, a sɩd tõoga a soabã. D rɩk makre: B sã n tõog n belg sodaag t’a bas a soda-taasã n tɩ naag bɛɛbã, yaa vẽeneg tɩ bɛɛbã naab sũur na n yɩɩ noogo. Sẽn na yɩl n ning soda-kãng naabã yãnde, tõe t’a na n wilg-a-la nebã fãa, tɩ b bãng tɩ sodaagã zãmba a soda-taasã. Kiris-ned me sã n wa maand bũmb sẽn tũud ne zĩn-dãmbã sõngre, a wilga vẽeneg t’a basa a Zeova n tɩ tũud a Sʋɩtãana. La a Sʋɩtãan na n paama rẽ n wilg tɩ yẽ tõogame. Tags-y n ges-y a sũur sẽn na n yɩ noog to-to! Rẽ yĩnga tõnd ratame t’a Sʋɩtãan tõog sɩda? Yaa vẽeneg tɩ ayo! Bala d pa zãmb dãmb ye.

A KƖTDAME TƖ NEBÃ MAAND SÃMB-SÃMBE

12. Bõe la a Sʋɩtãan maand sẽn na yɩl tɩ tõnd tall tagsg sẽn pa zems zĩn-dãmbã yɛl wɛɛngẽ?

¹² A Sʋɩtãan miime tɩ tõnd sã n kell n kisg zĩn-dãmbã yɛlã, a pa na n tõog n tũnug ne rẽ n paam tõnd ye. Rẽ kɩtame t’a baood n na n toeem d tagsgã. Wãn to la a maanda? A maanda a sẽn tõe fãa n dat n kɩt tɩ kiris-neb kẽer “boond wẽng tɩ sõma la b boond sõma tɩ wẽnga.” (Ezai 5:20) Sẽn na yɩl n maan dẽ, a Sʋɩtãan nong n tũnugda ne bũmb sẽn tõogd neb wʋsgo: Yaa sãmb-sãmbã.

13. Sogs-bʋs la a Sʋɩtãan sok sẽn na yɩl n wa ne sãmb-sãmbe?

¹³ Ges-y a Sʋɩtãan sẽn wa ne sãmb-sãmb to-to Edɛn zẽedẽ wã. A soka a Hawa yaa: ‘Rẽ yĩnga Wẽnnaam sɩd yeela yãmb tɩ y ra rɩ tɩɩs nins fãa sẽn be zẽedã zĩigẽ wã biis bɩ?’ A Zoob wakatẽ wã me, malɛgsã fãa sẽn wa n tigim taab saasẽ, a Sʋɩtãan soka Wẽnnaam woto: ‘A Zoob zoeta yãmb zaalem la?’ A Zezi Kirist sẽn wa n sɩng koɛɛgã mooneg tẽngã zugã, a Sʋɩtãan mak-a lame n yeel-a woto: ‘Yãmb sã n yaa Wẽnnaam Biiga, bɩ y kɩt tɩ kug-kãensã lebg buri.’ A Sʋɩtãan sẽn yeel woto wã, a paooga a Zeova, bala a ra miime tɩ semen a yoob la woto a Zeova meng sẽn da gom a Zezi yelle, n yeel tɩ: “Ada yaa mam Bi-nongre, mam sẽn nong ne m sũur fãa.”—Sɩngre 3:1; Zoob 1:9; Matɩe 3:17; 4:3.

14. a) Zĩn-dãmbã yɛl wɛɛngẽ, bõe la a Sʋɩtãan modgd n dat tɩ nebã tagse? b) Bõe yell la d na n gom masã?

¹⁴ Rũndã-rũndã me, a Sʋɩtãan maanda woto sẽn na yɩl tɩ nebã maand sãmb-sãmb ne yɛl nins sẽn tũud ne zĩn-dãmbã sõngrã sã n yaa wẽng bɩ pa wẽnga. Zu-bʋko, a tõogame n kɩt tɩ kiris-neb kẽer meng sɩd maand sãmb-sãmbe. B sɩngame n tagsdẽ tɩ tõe tɩ zĩn-dãmbã yɛl kẽer maaneg pa tolg n yaa wẽng zãng ye. Yaa wala nin-kãensã sẽn na n sokdẽ tɩ: ‘Rẽ yĩnga sɩd yaa wẽng sɩda?’ (2 Korẽnt dãmba 11:3) Wãn to la d tõe n sõng nin-kãensã tɩ b rems b tags-kɛgã? D maanda wãn t’a Sʋɩtãan ra tõog n kɩt tɩ d tall tags-kɛga? Bɩ d ges yɛl kẽer a Sʋɩtãan sẽn kẽes zĩn-dãmbã yɛla. Yaa filim dãmbã ne sɛbã, la tɩbsgã.

A TŨNUGDA NE BŨMB NINS D SẼN NONGÃ, LA TƖBSGÃ

15. a) Erop la Amerik tẽns wʋsg pʋsẽ, nebã tagsda wãn ne yɛl nins sẽn tũud ne zĩn-dãmb sõngrã wɛɛngẽ? b) Bõe n wilgd tɩ kiris-neb kẽer tara dũniyã neb tagsg yel-kãensã wɛɛngẽ?

¹⁵ Erop la Amerik tẽns wʋsg pʋsẽ, b pa get bag-bʋgendã, sõodã, la zĩn-dãmb yɛl a taabã wa bũmb sẽn yaa wẽng wʋsg ye. Filim dãmbã, sɛbã, televiziõ wã la ẽntɛrnetã pʋgẽ, nebã nong n wilgda yɛl nins sẽn tũud ne zĩn-dãmbã sõngrã wa bũmb sẽn be yamleoogo, la sẽn ka yelle. Neb wʋsg nonga filim dãmb la sɛb sẽn wilgd yel-kãensã wã wʋsgo. Yaa vẽeneg tɩ zĩn-dãmbã tõogame tɩ nebã pa get tɩ rẽ tõe n maana ned wẽng ye. La rẽ yĩnga zĩn-dãmbã tõogame tɩ kiris-neb kẽer sɩd tagsd woto bɩ? N-ye. Wala makre, kiris-ned a ye sẽn ges filim sẽn gomd bag-bʋgendã yell poore, a yeela woto: “Mam gesa filmã yẽ, la m pa maan bũmb sẽn tũud ne zĩn-dãmb sõngr ye.” Bõe yĩng tɩ tags-kãngã buud yaa yelle?

16. Bõe yĩng tɩ d sã n nong filim dãmb bɩ sɛb sẽn wilgd zĩn-dãmbã yɛla, yaa yelle?

¹⁶ Yaa sɩd tɩ zĩn-dãmbã yɛl gesg ne a maaneg pa yembr ye. La woto pa rat n yeel tɩ f sã n getẽ bala pa yell ye. Wẽnnaam Gomdã wilgdame t’a Sʋɩtãan ne a zĩn-dãmbã pa tõe n bãng sẽn be tõnd sũurẽ wã ye.a Wala d sẽn zoe n gom tɩ loogã, zĩn-dãmbã gũusd n geta d manesmã, la bũmb nins d sẽn nongã, sẽn na yɩl n yã d pãn-komsmã, la b bãng tõnd sẽn tagsd bũmb ningã. Kiris-ned manesem sã n wilgdẽ t’a nonga filim dãmb bɩ sɛb sẽn gomd bag-bʋgend yelle, tɩt maaneg yelle, neb zĩn-dãmb sẽn tar yelle, la zĩn-dãmb yɛl a taab yelle, a wilgda zĩn-dãmbã a tagsg yel-kãensã zugu. Ne woto, a wilgd-b-la a pãn-komsem. La zĩn-dãmbã na n tũnuga ne rẽ n nang pãng n zab ne-a hal n wa tõog-a. Neb kẽer gesa filim dãmb sẽn wilgd zĩn-dãmb yɛl tɩ yɩ-b noogo, hal tɩ bãmb me wa baas n maand yel-kãensã.—Galat dãmba 6:7.

17. Sɩlem bʋg la a Sʋɩtãan tõe n tũnug ne n kɩt tɩ ned sẽn ka laafɩ kɩɩs Wẽnnaam?

¹⁷ Pa filim dãmbã la sɛbã bal la a Sʋɩtãan tũnugd sẽn na yɩl n paam tõnd ye. A tũnugda ne tɩbsgã me. Wãn to la a maand rẽ? Kiris-ned sã n tɩpd a bãag tɩ pa yãkd nenga, a tõe n komsa raoodo. (Mark 5:25, 26) La rẽ tõe n yɩɩ sabab t’a Sʋɩtãan ne zĩn-dãmbã paam-a. A Sʋɩtãan ne zĩn-dãmbã miime tɩ Wẽnnaam Gomdã wilgda vẽeneg tɩ d pa segd n bao sõngr “neb nins sẽn maand wẽngã” nengẽ ye. (Ezai 31:2, NW ) Sẽn na yɩl n kɩt tɩ kiris-ned sẽn koms raood a bãag yĩng kɩɩs gom-kãnga, zĩn-dãmbã tõe n kɩtame t’a tũnug ne “zĩn-dãmb tõog” n na n bao laafɩ. La woto yaa wẽng wʋsgo. (Ezai 1:13, NW ) Zĩn-dãmbã sã n tõog tɩ kiris-ned maan woto, b sãama zood ning sẽn be kiris-nedã ne Wẽnnaam sʋkã.

18. Tɩbsg bʋs buud la kiris-ned segd n zãgse, la bõe yĩnga?

¹⁸ A Zeova ra yeela Israɛll neb nins sẽn da kẽnd bagbã nengẽ wã woto: “Yãmb sẽn tees y nusã, mam wẽnemdame n ka ges yãmb ye. La baa yãmb sẽn paasd pʋʋsgã, mam ka kelgd ye.” (Ezai 1:15) Yaa vẽeneg tɩ d pa rat n maan bũmb sẽn na n kɩt t’a Zeova pa reeg d pʋʋsgo, la sẽn na n kɩt t’a pa le sõng tõndo, sẽn yɩɩd fãa d sã n wa ka laafɩ ye. (Yɩɩl Sõamyã 41:4) Rẽnd d sã n miẽ tɩ tɩbsg ning tũuda ne zĩn-dãmbã sõngr baa yaa bilfu, kiris-ned hakɩk segd n zãgsa tɩbs-kãng fasɩ.b (Matɩe 6:13) A sã n maan woto, a Zeova na n kell n sõng-a lame. Ges-y seb-neng 194 zĩ-gũbrã sẽn sok tɩ: “Naaga ne zĩn-dãmb yɛl bɩ?”

D GŨUS NE KIBAY SẼN GOMD ZĨN-DÃMB YELLÃ

19. a) A Sʋɩtãan tudga neb wʋsg tɩ b tagsd wãn to a pãngã wɛɛngẽ? b) Kiba-bʋs buud la kiris-nebã pa segd n togsdẽ bɩ n kelgdẽ?

¹⁹ Erop la Amerik tẽns wʋsg pʋsẽ, nebã pa get t’a Sʋɩtãan tara pãng wʋsg ye. La tẽns a taab pʋsẽ, nebã tẽedame t’a sɩd tara pãng wʋsgo. Tẽns nins pʋsẽ nebã sẽn tẽed woto wã, a Sʋɩtãan kɩtame tɩ wʋsg tagsdẽ t’a tara pãng n yɩɩd pãng ning a sẽn sɩd tarã. Neb n be tɩ zĩn-dãmbã rabeem tar-b wakat fãa. Kibay nebã sẽn yelgd zĩn-dãmbã yel-soalem wɛɛngẽ me yaa wʋsgo. Neb kẽer nonga kiba-kãensã togsgo, tɩ sãnda me nong kiba-kãens kelgre. Rẽ yĩnga tõnd me segd n togsda nebã kiba-kãensã buud sɩda? Ayo. D ges bʋʋm a yiib sẽn kɩt tɩ ned sẽn tũud a Zeova pa na n sak n togsd kibay zĩn-dãmb yɛl wɛɛngẽ wã.

20. Wãn to la ned tõe n yelg a Sʋɩtãan ziri wã n pa bãnge?

²⁰ Pipi, ned sã n togsd neb kibay sẽn gomd zĩn-dãmbã yel-soalem yelle, a soab sõngda a Sʋɩtãana. Bõe yĩng tɩ d yet woto? Bala yaa sɩd tɩ Wẽnnaam Gomdã sɩd wilgdame t’a Sʋɩtãan tõe n maana yel-soalma, la a wilgdame me tɩ d segd n gũusame, tɩ bala a tũnugda ne “ziri bõn-bãna,” la “belgr buud fãa.” (2 Tesalonik rãmba 2:9, 10) Sẽn mik t’a Sʋɩtãan yaa bɛlgdã yĩnga, a mii a sẽn na n maan to-to n kɩt tɩ neb nins sẽn nong zĩn-dãmb yɛlã tẽ bũmb sẽn yaa ziri. Nin-kãensã tõe n wa tẽeme tɩ b sɩd yãame la b wʋm yɛl kẽere, n dɩk n taas neb a taaba. T’a zagl rɩk n togs a zagla, la tarẽ-n-tarẽ, b wat n paasa yɛl a taab kiba-kãens pʋgẽ. Kiris-ned sã n sak n taasd neb a taabã kiba-kãensã buudu, a maanda a Sʋɩtãan sẽn yaa “ziri ba” wã raabo, bala a yelgda a Sʋɩtãan ziri wã.—Zã 8:44; 2 Tɩmote 2:16.

21. Bõe zug la d segd n nong n sõsda?

²¹ Yiib-n-soaba, baa ned sã n da maanda zĩn-dãmb yɛl n yaool n wa lebg kiris-neda, a pa segd n nong n sõsd rẽ zug ne a tẽed-n-taasã ye. Bõe yĩnga? Bala Biiblã yeta tõnd tɩ d “ges a Zezi sẽn yaa tõnd tẽeb sɩngd la a taasdã.” (Hebre dãmba 12:2) Yaa a Zezi yell la d segd n tagsd wakat fãa, lakae pa a Sʋɩtãan yell ye. D bãng t’a Zezi sẽn da wa n be tẽngã zugã, baa ne a sẽn da tõe n togs a karen-biisã bũmb nins a Sʋɩtãan ne a zĩn-dãmbã sẽn tõe n maan la b sẽn pa tõe n maanã, a ra pa nong n sõsd rẽ zug ne-b ye. Yaa Wẽnnaam Rĩungã zug la a ra sõsd wakat fãa. Woto yĩnga, tõnd me sã n wa sõsda, d segd n gomda “Wẽnnaam tʋʋm-kãsemsã” yelle, n wilg tɩ d rɩkda a Zezi ne tʋm-tʋmdbã togs-n-taare.—Tʋʋma 2:11; Luk 8:1; Rom dãmb 1:11, 12.

22. Bõe la tõnd tõe n maan n sõng n kɩt tɩ sũ-noog kell n zĩnd saasẽ?

²² A Sʋɩtãan sɩd tũnugda ne sɩlem buud toor-toore, wala yɛl sẽn tũud ne zĩn-dãmbã sõngrã, n dat n sãam zood ning sẽn be tõnd ne a Zeova sʋkã. La tõnd sã n kis sẽn yaa wẽng la d nong sẽn yaa sõma, a Sʋɩtãan pa na n tõog n kɩt tɩ d maan bũmb baa a ye sẽn tũud ne zĩn-dãmbã sõngr ye. (Efɛɛz rãmba 4:27) Tags-y n ges-y sũ-no-kãseng ning sẽn na n zĩnd saasẽ, d sã n kell n yals kãn-kãe n “tõog Sʋɩtãanã sɩlem fãa” hal n tãag sasa ning a sẽn na n menem fasɩ wã!—Efɛɛz rãmba 6:11.