KAETO, ges-⁠y nebã sẽn maand bũmb ningã! B pʋʋsda nag-​bila. Bõe yĩng tɩ b maand woto?

A Moiiz sẽn dʋ tãngã zug n kaoosd n pa sigdã yĩnga, nebã yeelame yaa: ‘Wa-⁠y tɩ d maan wẽnnaam t’a lʋɩ d taoor n yiis-⁠d ka, bala tõnd ka mi bũmb ning sẽn maan a Moiiz ye.’

A Moiiz kẽem a Aarõ yeel-⁠b lame yaa: ‘Bɩ y yãgs y sãnem tʋb-​londã n kõ-ma.’ A Aarõ reega sãnem tʋb-​londã n maan nag-​bila. Rẽ poore, nebã yeelame yaa: ‘Yãoã yaa tõnd Wẽnnaam sẽn yiis tõnd Ezipt tẽngã.’ Israɛll nebã maana kibs kãseng n waoog sãnem nag-​bilã.

A Zeova sẽn yã rẽ wã, a sũurã yikame t’a yeel a Moiiz yaa: ‘Kẽng n sig tao-​tao tɩ nebã maanda sẽn yaa wẽnga. B basa mam noyã n wõgemd sãnem nag-​bil taoore.’

A Moiiz yɩɩ tao-​tao n sigi. A sẽn wa n kolgdẽ wã, a yãa nebã sẽn yɩɩnd la b saood n gilgd sãnem nag-​bilã. A Moiiz sũurã puuga wʋsg t’a rɩk kug-​wals nins Wẽnnaam sẽn da kõ-a wã n lob tẽng tɩ kell n wã zõg-​zõge. A rɩka sãnem nag-​bilã me n yẽneg n sãam-⁠a zãng-​zãnga.

Nebã sẽn da maand bũmb ningã yaa wẽng wʋsgo. Rẽ n so t’a Moiiz yeel rap kẽer tɩ b rɩk b sʋʋsã n kʋ neb nins sẽn da waoog sãnem nag-​bilã. Neb tus a tãab n ki baraarã. Kiba-​kãngã wilgdame tɩ d segd n waooga Wẽnnaam a Zeova a ye tãa. Bala sẽn ket-​bã fãa pa wẽnnaam dãmb sɩd-​sɩd ye.

YÃMB mii bũmb ning sẽn be fotã zugã bɩ? Yaa fu-​roog b sẽn ti a Zeova waoogr yĩnga. B boond-⁠a lame tɩ sɛk-​roogo. Yaa Israɛll nebã sẽn yi Eziptã yʋʋmd a ye poor la b maan-⁠a n sa. Yaa ãnd n yeel tɩ b maan sɛk-​roogã?

Yaa a Zeova. A Moiiz sẽn wa n dʋ Sinayi tãngã, a Zeova wilg-⁠a-⁠la a sẽn segd n maan sɛk-​roogã to-⁠to. A yeelame tɩ b maan-⁠a tɩ b tõe n siig-⁠a, n wʋk a teedã n le tɩ tilg-⁠a zĩig a to nana-​nana. Woto, Israɛll nebã sẽn wa n be rasempʋɩɩgẽ wã, b sã n wa yik n na n toeem zĩig fãa, b siigda sɛk-​roogã n tall n looge.

Y sã n ges ro-​bilã sẽn be goabgã pʋgẽ, y nee koglgo. Yaa rẽ la b sẽn boond tɩ kãabg koglgã. B rɩka sãnem n maan malɛgs a yiib b sẽn boond tɩ seribẽ rãmb n ning koglgã zugu. A Moiiz sẽn da wã kug-​walsã yĩnga, Wẽnnaam leb n gʋlsa noy piigã kug-​wals paal a yiib zutu. B ning-⁠b-⁠la kãabg koglgã pʋgẽ. B ra ninga mannã me rʋk pʋgẽ n sagl kãabg koglgã pʋgẽ. Yãmb ket n tẽra mannã sẽn yaa bũmb ning bɩ?

A Zeova yãka a Moiiz kẽem a Aarõ t’a na n yɩ maan-​kʋʋdbã kãsma. Yaa yẽ n wilgd nin-​buiidã b sẽn segd n pʋʋs a Zeova to-⁠to. A kom-​dibli wã me yaa maan-​kʋʋdba.

Ges-⁠y ro-​bedrã pʋgẽ masã. A bedrmã taa ro-​bilã naoor a yiibu. Yãmb nee kogl-​bilã sẽn dɩg tɩ bug-​zõos yit a pʋgẽ wã bɩ? Yaa tẽn-​kugrã. Beenẽ la maan-​kʋʋdbã yõogd wisdã. Fɩtl dogend sẽn tar fɩtl a yopoe me n dɩg roogã pʋgẽ. Sẽn paas me, tabl n dɩg tɩ bur 12 rog a zugu.

Rʋg-​bedr n pid ne koom n dɩg yɩnga, tɩ maan-​kʋʋdbã pekd b nusã la b waasd b naoã be. Tẽn-​kug-​bedr me n be yɩngã. B koota rũmsã n yõogd beenẽ n kõt a Zeova. Israɛll nebã tii b fu-​rotã n karg n gũbg sɛk-​roogã t’a be sʋka.