Yãmb sogsgã leoore

◼ Wãn to la roagdbã segd n zãms b kambã tɩ paas b tẽebã pãnga?

Kiris-nebã maanda b sẽn tõe fãa n wubd b kambã “ne Zu-soabã saglg la a zãmsgo.” (Ef. 6:4) Wala makre, roagdb kẽer mikame tɩ tara yõod tɩ b vaeesd daarã vɛrse ne b kambã yibeoog fãa. Zak pʋgẽ Biibl zãmsgã sasa, wall sasa a taaba, zagsã rãmb tõe n gesa video la b sõs a zugu, pa rẽ bɩ n yãk Les jeunes s’interrogent sõssã a yembr n vaeese. B tõe n tika Biiblã kibar ning zug me n maan teyatr wall mak-n-wilg toor-toore. La roagdbã segd n zãmsa kambã Biiblã tɩ kẽ-b sõma tɩ bɩɩs b tẽebã.—Heb. 6:1.

D gom d sẽn sõngd d koe-moonegã zĩigẽ nebã to-to wã yelle. Wala makre, d sã n sɩng sõsg ne ned wall d lebg n na n tɩ kaag-a lame, d wae n talla Biiblã sɩd yetame tɩ bõe? sebrã n sɩng Biiblã zãmsg ne-a. D sã n sa seb-kãnga, d rɩkda Kell-y n pa-y “Wẽnnaam nonglmã pʋgẽ” sebrã. Bõe yĩng tɩ d maand woto? Bala, Biiblã sɩd yetame tɩ bõe? sebrã sõngda karen-biigã t’a bãng yɛl wʋsg Biiblã zugu, la Kell-y n pa-y “Wẽnnaam nonglmã pʋgẽ” sebrã wilgda a sẽn tõe n tũ Biiblã saglsã to-to. Seb-kãensã b yiibã vaeesg sõngda nin-paalsã tɩ b ‘kɩ yẽg’ Kiristã tũudum pʋgẽ, la b kell n “tall tẽeb kãn-kãe.” (Kol. 2:6, 7) Seb-kãensã na n sõnga d kambã me. Bãmb me segd n bãnga bũmb wʋsgo. Wala makre, rondã, Rĩungã, la bũmb ning sẽn be kũum poore. Sẽn paase, segdame tɩ kambã bãng Wẽnnaam sẽn bas tɩ ãdem-biisã namsdẽ wã võore, la b sẽn tõe n maan n bãng tɩ dũni-kãngã saab kolgame. Roagdbã segd n sõnga b kambã tɩ b sak ne b sũy fãa t’a Zeova Kaset rãmbã sẽn tẽed bũmb ninsã n yaa sɩda, la b bãng b sẽn tõe n tũ Biiblã sagls to-to. (Heb. 5:14) Yaa sɩd tɩ roagdbã segd n gesa b kambã yʋʋm sẽn zem to-to n bãng n sõng-ba. La baasgo, tẽeg-y tɩ kamb wʋsg tõe n wʋma Biiblã goam kẽer võor sẽn tagme.—Luk 2:42, 46, 47.

Sẽn na yɩl n sõng roagdbã, tõnd sitã (jw.org) pʋgẽ, b na n paasda sõss sẽn tik Biiblã yetame sebrã zugu. Y sã n dat-b bɩ y kẽ sitã pʋgẽ, n kilik LA BIBLE ET VOUS Y sã n kilik tɩ pak bɩ y ges y nug goabgã, n kilik ADOLESCENTS. D na n wa paasa sõss sẽn yit “Wẽnnaam nonglmã” sebr pʋgẽ. La y tõe n talla seb-kãensã d sẽn zoe n ẽnprim tɩ beẽ wã n zãms y kambã. Roagdbã tõe n gesa b sã n na n vaeesda seb-kãensã b zak pʋgẽ Biibl zãmsgã wakate, wall b sã n na n zãms-b-la ne biig fãa, pa rẽ bɩ b na n tall-b lame n sõng biig fãa t’a bãng a sẽn tõe n zãms Biiblã a toor to-to.