D ket n paasd d koe-moonegã minim
1. Kiba-bʋs n wilgd tɩ d segd n ket n paasda d koe-moonegã minim?
1 Kiris-ned fãa segd n paasda a koe-moonegã minim. Yaa rẽ yĩng la a Zezi sẽn sõng a karen-biisã bilf-bilfu, tɩ b bãng koɛɛgã mooneg sõma wã. (Luk 9:1-5; 10:1-11) Rẽ n so me t’a Akila ne a Pirsill peeg a Apolos n tɩ ‘zãms-a Wẽnnaam sorã tɩrg n paase.’ (Tʋʋ. 18:24-26) Leb n yaa rẽ n kɩt t’a Poll sagl a Tɩmote sẽn da zoe n moond koɛɛgã sõma wã t’a paasd a minimã, tɩ “nebã fãa yã” t’a bɩtame. (1 Tɩm. 4:13-15) Baa d sã n sɩng n moonda koɛɛgã hal sẽn kaoos wall nan pa kaoose, d segd n ket n paasda d minimã.
2. Wãn to la d tõe n dɩk yam d taabã nengẽ?
2 D rɩk yam d taabã nengẽ: Bũmb a ye sẽn tõe n paas d minimã, yaa d sẽn na n dɩkd yam d taabã nengẽ. (Yel. 27:17) Woto yĩnga, d get d tẽed-n-taasã sẽn moond to-to wã. Sẽn paase, d kot koe-moondb nins sẽn tar minimã saglse, la d kelgd-b neere. (Yel. 1:5) Rẽ yĩnga y tʋll n bãnga y sẽn tõe n lebg n tɩ kaag ned to-to, y sẽn tõe n sɩng Biibl zãmsg ne ned to-to, pa rẽ bɩ n maan bũmb a taab koe-moonegã wɛɛngẽ bɩ? Sã n yaa rẽ bɩ y kos y koe-moonegã sull yel-gɛt wall koe-moond a to sẽn tar minim t’a sõng-yã. Tẽeg-y me tɩ vʋʋsem sõngã tõe n sõng-y lame tɩ y paam minim n paase. Woto yĩnga, kot-y-yã a Zeova sõngre.—Luk 11:13.
3. D tẽed-n-taag sã n sagl-do, baa d pa kos-a, d manesem segd n yɩɩ wãna?
3 B sã n kõ-y saglg n na n sõng-y bɩ y ra sãam y sũuri, baa sã n pa yãmb n kose. (Koɛ. 7:9) Sik-y y meng n sak saglgã wa a Apolose, la y pʋʋs barka. Woto, y wilgdame tɩ y yaa yam soaba.—Yel. 12:15.
4. Bõe la a Zezi yeel n wilg tɩ d segd n paasda d koe-moonegã minim?
4 D sã n paasd d minimã, waoogda a Zeova: A Zezi rɩka makr n wilg a karen-biisã tɩ b segd n ket n paasda b koe-moonegã minim. A yeelame tɩ yẽ yaa viyn tɩɩga, la t’a karen-biis nins sẽn paam vʋʋsem sõng zaeebã yaa tɩɩgã wila. A yeelame t’a Ba manegda tɩɩg will ning fãa sẽn womd biisi, t’a ‘wom biis n paase.’ (Zã 15:2) Wa viyn pʋʋg soab sẽn dat t’a viyn will fãa wom biis sõma wã, a Zeova me ratame tɩ d ket n kõt kaset ‘ne d noor goam’ a yʋʋrã yĩng tɩ womd biisi. (Heb. 13:15) D sã n paasd d koe-moonegã minim, nafa bʋs la d paamda? A Zezi leoka sok-kãngã n yeel woto: “Yãmb sã n wom biis wʋsgo, m Ba na n paama waoogre.”—Zã 15:8.