Sak 116

A Zezi segla a tʋm-tʋmdbã a loogrã yĩnga

A ZEZI kũumã tẽegr dɩɩb ra saame, la a Zezi ne a tʋm-tʋmdbã ra ket n bee zugẽ doogẽ wã. Ra keta bilf bal t’a Zezi looge, ne rẽ fãa a ra ket n dat n togs-b-la yɛl wʋsgo. A goma woto n bels-ba: “Da sak-y tɩ yãmb sũyã sãam ye. Bɩ y tẽ Wẽnnaam.” La a paase: “Bɩ y tẽ maam me.”

“Rot wʋsg bee m Ba yiri,” woto la a Zezi yeel-yã. La a paase: “M dabdame n na n tɩ maneg zĩig yãmb yĩnga . . . tɩ mam sẽn be zĩig ninga, bɩ yãmb me zĩnd be. Yãmb mii mam sẽn dabd zĩig ninga, la yãmb mi a sore.” Tʋm-tʋmdbã ra ka mi t’a Zezi ra gomda saasẽ loogr yell ye, rẽ n so t’a Toma soke: “Zusoaba, tõnd ka mi yãmb sẽn dabdẽ wã ye. Tõnd na n yɩɩ wãn n bãng a sore?”

A Zezi leokame: “Mam yaa sore la sɩda la vɩɩm.” N-ye, yaa ned sẽn na n sak a Zezi la a vɩɩmd wa yẽ bal la a tõe n kẽ a Ba wã saasẽ yir pʋgẽ, wa a Zezi sẽn yeelã: “Ned ka tõe n ta m Ba nengẽ a sã n ka mam maasem yĩng ye.”

Dẽ a Filip kosa woto: “Zusoaba, bɩ y wilg tõnd y Ba, la a na sek tõndo.” Yaa wala a Filip ra ratame t’a Zezi maan tɩ b paam Wẽnnaam pukri, sẽn yaa wala b rãmb nins buud a Moiizi, a Eli, ne a Ezai sẽn paam n yã tẽn-kʋdem wẽndẽ wã. La sɩd-sɩda, tʋm-tʋmdbã tara bũmb sẽn são yãab kãens buudu, wa a Zezi sẽn yeelã: “Filip, mam bee ne yãmb hal daar zãr tɩ fo ket n ka mi maam? Ned ninga sẽn yã maam, a yãa m Ba.”

A Zezi ra tara a Ba wã yel-manesem tɩ zems zãng hal tɩ f sã n vɩ ne-a la f get-a, yaa wala f sẽn sɩd ne Ba wã. Baasg zãnga, Ba wã yɩɩda Biriblã, wa a Zezi sẽn sak n deeg woto wã: “Goam nins mam sẽn gomd ne yãmbã, m ka gomd ne m meng pãng ye.” Wa sẽn segde, a Zezi yeelame t’a zãmsgã yita a saasẽ Ba wã nengẽ.

Ad a Zezi gom-kãensã ra segd n kenga a tʋm-tʋmdbã pels masã: “Ned ninga sẽn tẽed maam, tʋʋm nins mam sẽn maandã yẽ me na n maaname. La yẽ na n maana tʋʋm kãsems sẽn yɩɩd bãmba”! A Zezi ra ka rat n yeel t’a karen-biisã ra na n tõog n maana yel-soalem n yɩɩg yẽ ye. Ayo, a ra rat n yeelame tɩ b na n tõog n moona koe-noogã n kaoos wʋsg n yɩɩge, n zãag zĩig wʋsg n yɩɩge, la b taas-a neb wʋsg n yɩɩda.

A Zezi loogrã poore, a ra na n ket n sõngda a karen-biisã. A kãab-b lame: “Bũmb ninga fãa yãmb sẽn na n kos ne mam yʋʋre, mam na maan bõn-kãng[a].” Rẽ poore, a yeelame: “Mam na kos m Ba, la bãmb na kõ yãmb sõangd a to, tɩ bãmb pa ne yãmb wakat sẽn ka sɛta. Bãmb yaa sɩd [vʋʋsem].” Kaoosg zugẽ, a Zezi sẽn dʋ saasẽ wã poore, a pʋdga vʋʋsem sõngã sẽn yaa sõangd a to kãngã karen-biisã zutu.

A Zezi loogrã ra kolgame, dẽ, a yeel-b lame: “A keta bilfu tɩ dũniyã kõn leb n yã maam ye.” A Zezi na n yɩɩ wala malɛka, tɩ ninsaalb nin ka tõe n yã-a ye. La a leb n kãaba a tʋm-tʋmdbã sẽn yaa sakdbã woto: “Yãmb na yã maam, tɩ bõe, mam vɩɩme, la yãmb me na vɩɩmde.” N-ye, a Zezi vʋʋgrã poore, a pa na n dɩk ninsaal yĩng n vẽneg a meng ne-b bal ye, la wakat sã n ta, a na n le vʋʋg-b-la saasẽ tɩ b yɩ wala malɛgse.

Masã a Zezi kõo no-kãngã sẽn yaa vẽenegã: “Ned ninga sẽn tar mam tõodã n sakd bãmba, yẽ soab nonga maam. Ned ninga sẽn nong maam, m Ba na nong yẽnda. La mam na n nonga yẽnda n vẽneg m meng ne-a.”

A sẽn yeel dẽ, tʋm-tʋmd a Zida b sẽn boond me t’a Taade wã kʋʋga a goama n soke: “Zusoaba, yaa wãn tɩ yãmb na n vẽneg y meng ne tõndo la ka ne dũniyã neba?”

T’a Zezi leoke: “Ned sã n nong maam, a na n saka mam goama, la m Ba na n nonga yẽnda. . . . Ned ninga sẽn ka nong maam, a ka sakd mam goam ye.” Dũniyã neb pa kelgd a Zezi zãmsgã wa a karen-biis sẽn yaa sakdbã ye. Rẽ n so t’a ka vẽnegd a meng ne-bã.

A Zezi sẽn da wa n moond tẽng zugã, a zãmsa a tʋm-tʋmdbã yɛl wʋsgo. La b na n maana wãn n tẽeg yel-kãensã fãa, sẽn mik tɩ hal tɩ ta wakat kãngã b ka tõog n wʋm yɛl kẽer võorã? Zu-noogo, a Zezi kãab-b-la woto: “Sõangda sẽn yaa [vʋʋsem sõngã], m Ba sẽn na n tʋm ne mam yʋʋra na n zãmsa yãmb bũmb fãa, la b na n tẽega yãmb bũmb nins fãa mam sẽn da togs yãmbã.”

A Zezi leb n yeela woto n bels-ba: “Mam basa laafɩ ne yãmba. Mam kõta yãmb mam laafɩ. . . . Da sak-y tɩ yãmb sũyã sãam . . . ye.” Yaa sɩd t’a Zezi loogdame, la a wilga woto: “Yãmb sã n nong maam, yãmb na maan sũ-noog ne mam sẽn dabd m Ba nengẽ wã, tɩ bõe, mam Ba yɩɩda maam.”

Wakat ning sẽn ket t’a Zezi zĩnd ne-ba ra lebga koɛɛga. A yeelame: “Mam ka na n le gom ne yãmb wʋsg yɛs ye, bala dũniyã naab watame, la a ka tar mam tʋʋmd ye.” (NW ) A Sʋɩtãan sẽn kẽ a Zida pʋgẽ n tõog-a wã n yaa dũniyã naaba. La pãn-komslem sẽn yaa yel-wẽnd ka be a Zezi pʋgẽ t’a Sʋɩtãan tõe n tũnug ne n kɩt t’a bas Wẽnnaam baleng ye.

Zems-n-taar sẽn tar pãngã

A Zezi rag n sõsda ne a tʋm-tʋmdbã Soaala kũum tẽegr dɩɩb poor n kengd b raoodo. Tõeeme tɩ yʋʋn-sʋk ra loogame masã. Dẽ a Zezi yeel-b lame: “Yik-y tɩ d kẽnge.” La sẽn deng tɩ b looge, a Zezi nonglmã ne-bã kɩtame t’a kell n tall sõasg ne-ba, n togs-b makr sẽn kengd raoodo.

A sɩnga woto: “Mam yaa viyn tɩɩg menga, la m Ba yaa viyn wã gũuda.” Yɩɩ Gũud Kãsengã sẽn yaa Wẽnnaam a Zeova wã n sel makr wɛɛngẽ viyn tɩ-kãngã, a sẽn da wa n zae a Zezi ne vʋʋsem sõng a lisgẽ wã yʋʋmd 29 wã sẽn wa n kolg saabã. La a Zezi leb n yeelame tɩ viyn tɩɩgã ka makd yẽ bal ye. A yeelame: “Mam will ninga fãa sẽn ka womd biisi, b na n kɛ-a lame n lobe. La will ninga fãa sẽn womd biisi, b na n yos-a lame n maneg-a t’a wom biis n paase. . . . A wa will sẽn ka tõe n wom biis a toore t’a ka be ne viyn tɩɩga, woto me yãmb ka tõe n wom biis tɩ y ka be ne maam ye. Mam yaa viyn tɩɩga. Yãmb yaa wila.”

Rasem 51 zugẽ Pãntekotã raare, tʋm-tʋmdbã ne karen-biis a taab lebga viyn tɩɩgã wila, b sẽn wa n paam vʋʋsem sõngã zaeebã. Yɩɩ neb 144 000 n wa n baas n lebg makr wɛɛngẽ viyn tɩɩgã wila. Nin-kãensã naaga a Zezi Kirist sẽn yaa viyn tɩɩgã sɛɛgã, n yaa makr wɛɛngẽ viyn tɩɩgã n womd Wẽnnaam Rĩungã biisi.

A Zezi wilga bũmb ning sẽn na n kɩt tɩ b wom biisã, n yeele: “Ned ninga sẽn be ne maam tɩ mam be ne yẽnda, a womda biis wʋsgo, tɩ bõe, yãmb ka tõe n maan bũmb baa fɩ tɩ ka ne maam ye.” La ned sã n ka wom biisi, a Zezi yeta woto nin-kãng wɛɛngẽ: “B lobd-a-la yɩng wala kɛɛdo la a na n kʋɩɩme, la b wʋkd-a lame n lob bugmẽ tɩ bugum dɩ.” (Sebr Sõngo) La a Zezi kãaba woto: “Yãmb sã n pa ne maam n deeg mam goama, yãmb tõe n kosa yãmb sẽn dat bũmb ninga, la yãmb na paam.”

A Zezi leb n yeela a tʋm-tʋmdbã: “Yãmb sã n wom biis wʋsgo, m Ba na n paama waoogre, la woto yãmb na n yɩɩ mam karen-biisi.” Biis nins Wẽnnaam sẽn tʋll tɩ wilã womã yaa b tall zʋg-sõma wala Kirist sẽn tallã, sẽn yɩɩd fãa nonglmã. Sẽn paase, Kirist sẽn da moond Wẽnnaam Rĩungã yĩngã, maan karen-biis wala a Zezi sẽn da maanã bee bi-sõma kãens sʋka.

Masã a Zezi sagl-b lame: “Bɩ y pa mam nonglem pʋgẽ.” La karen-biisã ra tõe n maana wãn n pa a nonglmã pʋgẽ? A Zezi yeelame: “Yãmb sã n sak mam tõodã yãmb na n paa mam nonglem pʋgẽ.” A Zezi leb n wilgame: “Ad mam tõogo: Bɩ y nong taab wa mam sẽn nong yãmbã. Nonglem ka be sẽn yɩɩd woto ye, tɩ ned sak kũum a zo-rãmb yĩnga.”

Ka la lɛɛr a wãn bala a Zezi ra na n wilga nonglem kãseng kãng buudã, n kõ a vɩɩmã a tʋm-tʋmdbã ne neb nins fãa sẽn na n tẽ-a wã yĩnga. A mak-sõngã segd n kɩtame t’a karen-biisã me tall nonglem sẽn tõe n kɩt tɩ b gẽneg b yõyã b taaba yĩnga. Nonglem a woto na n kɩtame tɩ b bãng bãmb sẽn yaa neb ninsi, wa a Zezi sẽn da yeel woto wã: “Yãmb sã n nong taaba, neba fãa na n bãngame tɩ yãmb yaa mam karen-biisi.”

A Zezi wilga neb nins sẽn ya a zo-rãmba, n yeele: “Yãmb sã n maan bũmb nins fãa mam sẽn yeel yãmbã, yãmb yaa mam zo-rãmba. Mam kõn le bool yãmb tɩ tʋm-tʋmdb ye, tɩ bõe, tʋm-tʋmd ka mi a zu-soab sẽn maan bũmb ninga ye. La mam boola yãmb tɩ m zo-rãmba, tɩ bõe, bũmb nins fãa mam sẽn wʋm m Ba nengẽ wã, mam togsa yãmba.”

Ad paam n yɩ a Zezi zo-nongds yaa zu-noog menga! La a karen-biisã sã n dat n kell n tall zood kãnga, b togame n “wom biisi.” A Zezi yeelame tɩ b sã n wom biisi, “bũmb ninga fãa yãmb sẽn na n kos m Ba ne mam yʋʋre bãmb na kõ yãmba.” Hakɩka, ad wã sɩd yaa keoor sẽn yaa kãseng Rĩungã biis womb sẽn wat ne! A Zezi leb n sagla a karen-biisã tɩ ‘b nong taaba,’ la a wilg tɩ dũniyã neb na n kisg-b lame. Baasg zãnga, a kenga b pelse, n yeele: “Dũniyã sã n kisg yãmba, bɩ y bãng t’a reng n kisga maam.” Rẽ poore, a togsa bũmb ning sẽn kɩt tɩ dũniyã kis a karen-biisã n yeele: “Yãmb ka dũniyã rẽnd ye, la mam tũusa yãmb dũniyã neba sʋka, yaa woto n kɩt tɩ dũniyã kis yãmba.”

A Zezi leb n wilga dũniyã kisgr võor n paase, n yeele: “Bãmb na n maana yãmb bõn-kãens fãa mam yʋʋra yĩnga, tɩ bõe, bãmb ka bãng sẽn tʋm-a maama [Wẽnnaam a Zeova] ye.” A Zezi yel-soalmã sɩd ra ningda neb nins sẽn kis-a wã taale, wala a sẽn yeelã: “Mam sã n da ka maan tʋʋm nins ned a to sẽn ka maan bãmb sʋka, bãmb da ka tar yel-wẽn ye. La masã bãmb yãame la b kisga maam ne m Ba.” Dẽ, wa a Zezi sẽn yeelã, Gʋlsg Sõngã gom-kãngã sɩd pidsame: “Bãmb kisga maam zaalem bala.”

Wa a sẽn da yeel pĩndã, a Zezi leb n kãabame t’a na n tʋma sõangdã, sẽn yaa vʋʋsem sõngã, sẽn yaa Wẽnnaam pãn-tʋmdgã. A yeelame: “[Yẽ soabã] na kɩs mam kaseto. La yãmb me na kɩs kaseto.”

Yaoolem sagls a taaba

A Zezi ne a karen-biisã ra segendame n na n yi zugẽ doogẽ wã. A paasame: “Mam togs-y-la rẽ fãa, tɩ y tẽeb da wa sãam ye.” (Sebr Sõngo) Rẽ poore a keoog-b lame n yeele: “Bãmb na n yiisa yãmb karenga pʋgẽ. La wakat watame tɩ neb na n kʋ yãmba n tẽed tɩ b maanda Wẽnnaam tʋʋmde.”

Vẽenega gom-kãngã sãama tʋm-tʋmdbã sũy wʋsgo. Yaa sɩd t’a Zezi ra zoe n yeelame tɩ dũniyã na n kisg-b lame, la a ra nan ka togs-b vẽeneg woto tɩ b na n kʋ-b lame ye. A Zezi wilgame: “Mam ka togs yãmb bõn-kãens hal sɩngr ye, mam sẽn da be ne yãmba yĩnga.” La ad sɩd yaa sõma, a sẽn deng n togs-b yel-kãensã n daool-b la a yaool n loogã!

A Zezi paasame: “Masã mam dabda sẽn tʋm-a maamã nengẽ. La yãmb ned ba a ye ka sokd maam tɩ m dabda yɛ ye.” Zaab kãng pʋgẽ b ra zoe n sok-a lame n dat n bãng a sẽn debdẽ, la masã bũmb nins a sẽn togs-bã sãama b sũy wʋsg tɩ b ka sok-a n paas yel-kãngã zug ye. Wa a Zezi sẽn yeelã: “Mam sẽn yeel yãmb bõn-kãensa wã yĩnga, sũ-sãoong tara yãmba.” Tʋm-tʋmdbã sũy ra sãamame, bala b wʋmame tɩ b ra na n nams-b-la hal wʋsg b tẽebã yĩng la b kʋ-ba, la sẽn paase b Zusoabã ra na n loog n bas-b lame.

Dẽ a Zezi wilgame: “Yaa yãmb sõngr yĩng la mam dabda, tɩ bõe, mam sã n ka kẽnge, Sõangd ka na n wa yãmb nengẽ ye. La m sã n kẽnge, mam na n tʋma [yẽ] yãmb nengẽ.” A sẽn yaa ninsaalã a Zezi pa tõe n lagem n be zĩis yak ye, la a sã n wa kẽng saasẽ, a na n tõog n tʋma sõangdã, sẽn yaa Wẽnnaam vʋʋsem sõngã, t’a tɩ sõng a karen-biisã zĩig ning fãa b sẽn beẽ tẽngã zugu. Dẽnd a Zezi loogrã ra na n talla yõodo.

A Zezi yeelame tɩ vʋʋsem sõngã ra na n “wilga dũniyã rãmb [kaset sẽn yaa vẽeneg sẽn tɩ loe ne] yel-wẽna yelle la tɩrlem yelle la bʋʋd yelle.” B na n kõo kaset vẽeneg ne dũniyã yel-wẽnde, sẽn ya a sẽn ka tẽ Wẽnnaam Biriblã. Sẽn paase, a Zezi saasẽ dʋʋbã na n wilga vẽeneg t’a yaa tɩrga. A Sʋɩtãan ne a dũni wẽngã sẽn ka tõog n sãam a Zezi burkĩndã leb n yaa kaset sẽn wilgd vẽeneg tɩ b kaoo dũniyã naab bʋʋd t’a tar taale.

A Zezi leb n yeelame: “Mam ket n tara bũmb wʋsg n dat n togs yãmba, la yãmb ka tõe n deeg bãmb masã ye.” Woto yĩnga, a Zezi kãabame t’a sã n wa pʋdg vʋʋsem sõngã, sẽn yaa Wẽnnaam pãng sẽn tʋmdã, rẽ na n sõng-b lame tɩ b wʋm bõn-kãens võore, tɩ zems ne b sẽn tõe n wʋm.

Tʋm-tʋmdbã sẽn ka wʋm bũmb ning võor n tɩ yɩɩdã, yaa t’a Zezi na n kiime n lebg n vʋʋg n vẽneg a meng ne-ba. Rẽ n so tɩ b sok taaba: “Bãmb sẽn gom ne tõnda võor yaa bõe? Bãmb yeela tõnd tɩ: A keta bilf tɩ yãmb kõn yã maam ye, la a keta bilf me tɩ yãmb le yã maam, la mam dabda m Ba nengẽ.”

A Zezi bãngame tɩ b ra rat n sok-a-la bũmbu, t’a wilg-ba: “Mam yeta yãmb sɩd-sɩda tɩ yãmb na yãb n wiisi, la dũniyã rãmb na paam sũ-noogo. Yãmb na n paama sũ-sãoongo, la yãmb sũ-sãoonga na n lebga sũ-noogo.” Baraar wĩnd-kaoore, b sẽn wa n kʋ a Zezi wã, dũniyã tũudum taoor dãmb maana sũ-noogo, la a karen-biisã maana sũ-sãanga. La a Zezi sẽn wa n vʋʋgã, b sũ-sãangã basa weer n kõ sũ-noogo! A Zezi sẽn da wa n pʋdg vʋʋsem sõngã b zut Pãntekotã raar n kõ-b tõog tɩ b yɩ a kaset rãmbã, b kell n talla sũ-noogo!

A sẽn mak tʋm-tʋmdbã yell sẽn da yaa to-to wã ne pag rogem toogã, a Zezi yeelame: “Pag sã n dat n doge, a tara toogo yẽ wakat sẽn ta wã yĩnga.” La a yeel tɩ pag sã n dog n sa, a ka le tẽegd a toogã ye. Dẽ, a kenga a tʋm-tʋmdbã pels n yeele: “Woto me, yãmb tara sũ-sãoong masã. La mam na n leb n yãa yãmb yɛsa [m sã n wa vʋʋge]. La yãmb sũyã na yɩ noogo, la ned ka na n tõog n yiis yãmb sũ-nooga ye.”

Hal tɩ ta wakat kãngã, tʋm-tʋmdbã ra nan pa kos bũmb ne a Zezi yʋʋr ye. La a Zezi ra yeta masã: “Mam yeta yãmb sɩd-sɩda, tɩ bũmb ninga fãa yãmb sẽn na n kos m Ba ne mam yʋʋre, bãmb na kõ yãmba. . . . Tɩ bõe, m Ba meng nonga yãmba, yãmb sẽn nong maam n tẽ tɩ mam yii Wẽnnaam nengẽ wã yĩnga. Mam yii m Ba nengẽ n wa dũniyã pʋga. La masã mam na n basa dũniyã n leb n kẽng m Ba nengẽ.”

A Zezi gom-kãngã sɩd kenga a tʋm-tʋmdbã raood wʋsgo. B yeelame: “Bõn-kãng yĩnga tõnd tẽedame tɩ yãmb yii Wẽnnaam nengẽ.” T’a Zezi sok-ba: “Yãmb tẽeda masã”? La a paase: “Gese, wakat watame la a taame masã tɩ yãmb na n sãeeg n kuil y yiy n bas maam m yembre.” Bɩ y bãng tɩ yʋʋn-kãng pʋgẽ bala a Zezi gom-kãensã paama pidsgu!

“Mam togsa yãmb bõn-kãense tɩ y paam laafɩ mam tũudma pʋgẽ,” woto la a Zezi yeel-yã. La a baas a goama woto: “Yãmb na n paama namsg dũni pʋgẽ. La bɩ y keng y sũyã, tɩ mam tõoga dũni wã.” (Kãab-paalgã Koe-noogo) A Zezi tõoga dũniyã ne a sẽn maan Wẽnnaam daabã ne kɩs-sɩdã, baa ne bũmb nins fãa a Sʋɩtãan ne a dũniyã sẽn mak n na n maan n sãam a burkĩndã.

Baasg pʋʋsg zugẽ doogẽ wã

A Zezi sẽn nong a tʋm-tʋmdbã ra kɩtame t’a ra segend-b a loogrã sẽn da ta n sa wã yĩnga. A Zezi sagl-b lame la a sõs ne-b n kaoos n keng b pelse. Masã a nakame n ges yĩngri, n kos a Ba wã woto: “Bɩ y waoog y Biiga tɩ yãmb Biiga me waoog yãmba. La a wa yãmb sẽn [kõ Biigã tõog ãdem-biig fãa zugã, Sebr Sõngo], yẽ na n kõo neb nins fãa yãmb sẽn kõ yẽ wã vɩɩm sẽn ka sɛta.”

Vɩɩm sẽn ka sɛta: Ad wã yaa gomd sẽn be yamleoogo! B sẽn kõ a Zezi ‘tõog ãdem-biig fãa zugã’ yĩngã, a tõe n kɩtame tɩ ãdem-biisã sẽn pa zems zãngã dɩ a maoongã sẽn yaa rondã nafa. La a kõta “vɩɩm sẽn ka sɛta” b rãmb nins sẽn tar a Ba wã lohormã bala. A Zezi kell n goma vɩɩm sẽn ka sɛta yell a pʋʋsgã pʋgẽ n yeele:

“Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” N-ye, yaa d sẽn na n bao n bãng Wẽnnaam la a Biriblã la d tõe n paam fãagre. La paam bãngr tɩ pid zug bal ka sek ye.

D tog n wa tõog n bãng-b-la sõma-sõma, n tall zood sẽn kengd wakat fãa la zems-n-taar sõma ne-ba. D tagsgã tog n yɩɩ wa bãmb sẽn tagsd to-to wã, la d get yɛlã wa bãmb sẽn get-b to-to wã. La sẽn yɩɩd fãa, d manesmã ne neb a taabã pʋgẽ, d tog n dɩka togs-n-taar ne b zʋg-sõma wã sẽn ka tar mak-n-taarã.

Rẽ poore a Zezi pʋʋsame n yeele: “Mam waooga yãmb dũniyã zugu. Tʋʋmd ninga yãmb sẽn kõ maam tɩ m maanã, mam maaname n sɛ.” Hal tɩ ta wakat kãnga a Zezi maana tʋʋmd ning b sẽn kõ-a wã n sɛ, la a leb n kɩsa sɩd me tɩ sẽn da wat me a ra na n tõog n maaname. Rẽ n so t’a kos Wẽnnaam: “M Ba, bɩ y waoog maam yãmb menga nengẽ ne waoogr ninga mam sẽn da tar yãmb nengẽ dũniyã sẽn nan ka naanã.” N-ye, a ra ratame t’a vʋʋg-a, n lebs n kõ-a ziir ning a sẽn da tar saasẽ wã.

A Zezi kʋmsa tʋʋm-kãseng ning a sẽn da tar tẽngã zugã woto: “Yãmb sẽn welg neb nins dũniyã pʋgẽ n kõ maamã, mam wilga bãmb yãmb yʋʋre. Bãmb yaa yãmb dẽnda, la yãmb n kõ maam bãmba. La bãmb saka yãmb goama.” A Zezi ra pʋta Wẽnnaam yʋʋrã sẽn ya a Zeova wã a koe-moonegã pʋgẽ, n wilg b sẽn segd n bool-a to-to. La a sẽn wilg Wẽnnaam yʋʋrã a tʋm-tʋmdbã, a ka tek woto bal ye. A leb n kɩtame tɩ b bãng a Zeova n paase, a zʋg-sõma wã, ne a raabã, tɩ b mi-beoogã ne-a me paase.

A Zezi sakame t’a Zeova yɩɩda yẽ, t’a tʋmda a sor-wilgr pʋgẽ. Rẽ n so t’a sak ne sik-m-meng woto: “Mam kõo bãmb goam nins yãmb sẽn kõ maamã, la bãmb deegame n bãng sɩd tɩ mam yii yãmb nengẽ. La bãmb tẽeme tɩ yãmb n tʋm maam.”

A Zezi wilgame t’a karen-biisã ne ãdem-biis a taabã pa yembr ye, n leb n yeel-a pʋʋsg pʋgẽ: “Mam ka pʋʋsd dũniyã yĩng ye, la yaa neb nins yãmb sẽn kõ maama yĩnga. . . . Mam sẽn be ne bãmb dũniyã pʋga, mam talla bãmba . . . , la bãmb sʋka ned ba a ye ka menem ye, sã n ka sẽn tog n sãam-a wã,” sẽn dat n yeel t’a Zida Iskariot. Wakat kãng bal t’a Zida ra bee a Zezi zãmbg zugu. Woto, a pidsa Gʋlsg Sõamyã n ka bãng ye.

A Zezi kẽnga taoor ne a pʋʋsgã n yeele: “Dũniyã kisga bãmba. Mam ka kot tɩ yãmb yiis bãmb dũniyã pʋgẽ ye, m kotame tɩ y gũ-b tɩ wẽng soaba ra tõog-b ye. Bãmb ka dũniyã rẽnd wa mam sẽn ka dũniyã rẽndã.” A Zezi karen-biisã bee dũniyã pʋgẽ, sẽn yaa ninsaalbã zãmaan ning sẽn sigl t’a Sʋɩtãan dɩt naam a zugã. La karen-biisã toga wakat fãa n welg b mens ne a Sʋɩtãan zãmaana la ne a wẽnemã.

A Zezi leb n pʋʋsame n yeele: “Bɩ y gomda tus-ba n kẽes y sõmblma pʋga tɩ yãmb gomda yaa sɩda.” (Sebr Sõngo) Ka wã, a Zezi boola Hebre Gʋlsgã goama a sẽn da tũnugd ne wakat fãa wã tɩ “sɩda.” La bũmb ning a sẽn zãms a karen-biisã, n paas vʋʋsem sõngã sẽn vẽneg-b tɩ b gʋls bũmb ning kaoosg zugẽ tɩ yaa Kiris-neb Gɛrk Gʋlsgã me yaa “sɩda.” Sɩd kãng tõe n kɩtame tɩ ned lebg sõngo, n toeem a vɩɩmã zãng fasɩ, la a kɩt t’a yaa ned sẽn welg toor ne dũniyã.

Rẽ poore a Zezi ka pʋʋs “bãmb yĩng bal ye. La yaa neb nins sẽn na n tẽ [yẽ] bãmb kaseta yĩngã me yĩnga.” Dẽ, a Zezi pʋʋsa neb nins sẽn na n yɩ a karen-biis b sẽn zae ne vʋʋsem sõngo, la a karen-biis a taab sẽn na n wa bãmb poorã yĩnga. B na n baas n tigma karen-bi-kãens fãa “yãgr a yembr” pʋgẽ. Bõe la a ra kot nin-kãensã fãa yĩnga?

“Yaa sẽn na yɩl tɩ bãmb fãa yɩ yembr wa foom, m Ba, sẽn be zems-n-taar pʋgẽ ne maam tɩ mam me be zems-n-taar pʋgẽ ne foomã, . . . tɩ bãmb me yɩ yembr wala tõnd me sẽn yaa yembrã.” (NW ) A Zezi ne a Ba wã ka lagem taab n yaa nin-yɛng ye, la b zemsa taab bũmb fãa zugu. A Zezi pʋʋsame t’a karen-biisã me yɩ yembr woto, sẽn na yɩl tɩ “dũniyã bãng tɩ yãmb n tʋm maam la y nonga bãmb wa y sẽn nong maamã.”

A Zezi leb n pʋʋsa a saasẽ Ba wã n kos bũmb b rãmb nins sẽn na n wa yɩ a karen-biis b sẽn zae ne vʋʋsem sõngã yĩnga. A kosa bõe? “Tɩ bãmb me . . . pa ne maam m sẽn be zĩig ningã n yã mam waoogra yãmb sẽn kõ maama, tɩ bõe, yãmb nonga maam sẽn deng dũniyã naanego,” sẽn dat n yeele, tɩ sẽn deng t’a Ãdem ne a Hawa rog kamba. Hal sẽn kaoos sẽn deng rẽ, Wẽnnaam ra nonga a Biribl yend a sẽn naanã, sẽn lebg a Zezi Kiristã.

A Zezi baasa a pʋʋsgã, n leb n wilg woto vẽenega: “Mam wilga bãmb yãmb yʋʋre, la mam na n le wilg bãmba, tɩ yãmb sẽn nong maam ne nonglem ninga zĩnd bãmb pʋse, tɩ mam me pa ne bãmba.” Ne tʋm-tʋmdbã, zãms n bãng Wẽnnaam yʋʋrã wa n kɩtame tɩ bãmb mensã bãng Wẽnnaam nonglem. Zã 14:1–17:26; 13:27, 35, 36; 10:16; Luk 22:3, 4; Yikri 24:10; 1 Rĩm dãmba 19:9-13; Ezai 6:1-5; Galat dãmba 6:16; Yɩɩl Sõamyã 35:19; 69:5; Yelbũna 8:22, 30.

▪ Yɛ la a Zezi da rebda, la bõe la a leok a Toma sã n yaa ne sor ning b sẽn tũud n kẽng zĩ-kãngã?

▪ Wõnda yaa bõe la a Filip ra kot t’a Zezi maane?

▪ Bõe yĩng tɩ ned ning sẽn yã a Zezi, yaa Ba wã me la a yã-yã?

▪ Wãn-wãn la a Zezi karen-biisã na n maan tʋʋm sẽn yaa kãsems n yɩɩd yẽ sẽn maanã?

▪ Wãn-wãn to la a Sʋɩtãan ka tar a Zezi tʋʋmde?

▪ Wakat bʋg la a Zeova sel makr wɛɛngẽ viyn tɩɩgã, la wakat bʋgo, la wãn-wãn la neb a taabã lebgd viyn tɩɩgã wila?

▪ Makr wɛɛngẽ viyn tɩɩgã wa n baas n talla wil a wãna?

▪ Wẽnnaam datame tɩ wila wom bi-bʋse?

▪ Wãn to la d tõe n yɩ a Zezi zo-rãmba?

▪ Bõe yĩng tɩ dũniyã kis a Zezi karen-biisã?

▪ A Zezi keoog-bʋs n sãam a tʋm-tʋmdbã sũyã?

▪ Bõe yĩng tɩ tʋm-tʋmdbã ka sok a Zezi n na n bãng a sẽn debdẽ?

▪ Sẽn yɩɩd fãa bõe võor la tʋm-tʋmdbã ka tõog n wʋme?

▪ Bõe makr la a Zezi rɩk n wilg tɩ tʋm-tʋmdbã sũ-sãang na n toeemame n lebg sũ-noogo?

▪ A Zezi yeelame tɩ tʋm-tʋmdbã na n maana bõe rẽ poor bilfu?

▪ Wãn to la a Zezi tõog dũniyã?

▪ Wãn to la b kõ a Zezi “tõog Adem-biig fãa zugu”?

▪ Bao n paam Wẽnnaam la a Biriblã bãngr rat n yeelame tɩ bõe?

▪ Wãn to-to la a Zezi wilg Wẽnnaam yʋʋrã?

▪ ‘Sɩdã’ yaa bõe, la wãn to la a kɩtd tɩ kiris-ned yɩ sõngo?

▪ Wãn-wãn to la Wẽnnaam, a Biriblã, la balemdb hakɩkã fãa yaa yembre?

▪ ‘Dũniyã naaneg’ yɩɩ wakat bʋgo?