D paas d koe-moonegã minim: D moon koɛɛgã koosmã zĩisẽ

Saglgã yõodo: Neb wʋsg tʋmdame n pa sigd pĩnd ye. Dẽnd yɩl n moon nin-kãensã Rĩungã koɛɛgã, yaa tɩlɛ tɩ d kẽng b tʋʋmã zĩigẽ. D sã n moond koɛɛgã koosmã zĩisẽ, tõe n woma biis la kõ-d sũ-noogo. Bala, sẽn yaa koosem zĩisẽ wã, tʋm-tʋmdbã wae n pʋʋsda ned ning fãa sẽn wa n na n ges-ba noog-noogo, b sẽn tẽed tɩ yaa bũmb la a ratã yĩnga. Koe-moondbã segd n ninga fut sẽn yaa sõma, la b ra gãnem b nensã me ye. Rẽ na n kɩtame tɩ b paam n taas koɛɛgã. (2 Kor. 6:3) Dẽnd tʋʋmdã yel-gɛt tog n bao n bãnga koe-moondbã sã n wae n moonda koosmã zĩisẽ, la neb nins sẽn moond be wã.

Ad y sẽn tõe n maan dẽ to-to:

Y sõsgã tog n yɩɩ koɛɛg-koɛɛga. Y sã n gom wʋsgo, tʋm-tʋmdbã tõeeme n pa le kelg tõnd nindaar ye.
Bao-y wakat tʋm-tʋmdbã sẽn tar sẽk n tɩ kaag-ba. Makre, tʋʋmã sɩngr wakate.
Reng-y n sõs-y ne tʋʋmdã taoor soaba. Modg-y tɩ y nengã be laado, la y tall yẽesem. Y tõe n yeela woto: “Y tʋʋmdã yĩnga, yaa toog tɩ d yã yãmb yiri. Yaa rẽ la d sẽn wa n na n sõs ne-y ka wã.” Gom-y ne-a koɛɛg-koɛɛga, la y kõ-a seb-vãoog bɩ periodik wall sebr a to. Sẽn na yɩl tɩ b ra tags tɩ y wa n na n koosa teedo, yɩta sõma tɩ y ra gom yamleoog kũunã yelle, sã n pa a soabã n gome.
Tʋʋmdã taoor soab sã n deeg-y noog-noog bɩ y kos-a sore, n sõs ne neb a taabã koɛɛg-koɛɛga. Zĩis kẽere, yɩta sõma tɩ y sok tʋʋmdã taoor soab n ges y sã n tõe n basa sɛb tɩ vʋʋsgã sasa bɩ b karme.
Yɩ-y wʋmdba, la y tall yam-sõngo. Wala makre, tʋm-tʋmd sã n gomd ne ned wall a tʋmdẽ, bɩ y bas t’a sa tɩ y yaool n sõs ne-a.

Mak-y woto ki-kãngã:

Y zak pʋgẽ Biibl zãmsgã sasa, bao-y n bãng-y y sẽn tõe n gom koɛɛg-koɛɛg to-to, y sã n wa moond koosem zĩisẽ, la y maan mak-n-wilgi.