Sak 131

A sẽn vẽneg a meng yaoolem, la yʋʋmd 33 Pãntekotã

WAKAT n zĩnd t’a Zezi maan segls t’a tʋm-tʋmdb 11 wã fãa seg-a Galile tãng a yembr zugu. Ra yaa wala karen-biis a taab me bãnga tigisgã tiiri, tɩ neba fãa sẽn wa n tigmã sõor yɩɩg 500. Ad tigis-kãseng kãngã sɩd waa ne sũ-noogo, a Zezi sẽn wa n puk n sɩng n zãmsd nebã!

A Zezi togsa kʋʋngã yɛl wʋsgo. Wala makre, a wilgame tɩ Wẽnnaam kõo yẽ zu-sobend fãa saasẽ la tẽng zugu. A sagl-b-la woto: “Bɩ y kẽng n maan neba buud fãa tɩ b yɩ mam karem-biisi n lis bãmb ne Ba la Biiga la [vʋʋsem sõng] yʋʋre. La zãms bãmb tɩ b sak bũmb nins fãa mam sẽn da togs yãmbã.”

Yãmb wee n tagse! Rapa, pagba, la kamb fãa paama tʋʋm yɛng ning sẽn yaa kẽng n tɩ maan karen-biisã. Bɛɛbã na n makame n kɩt tɩ b bas b moonegã la b zãmsgã tʋʋmde, la a Zezi kenga b pels woto: “Gese, mam bee ne yãmb wakat fãa hal tɩ ta [zãmaana sɛɛb wakate].” Ne vʋʋsem sõngã maasem a Zezi na n zĩnda ne a karen-biisã n sõng-b tɩ b tõog n moon koe-noogã.

Yɩɩ rasem 40 pʋgẽ la a Zezi ra vẽnegd a meng ne a karen-biisã a vʋʋgrã poore. A puk-kãens wakate, a kõ-b-la sagls Wẽnnaam Rĩungã wɛɛngẽ, la a wilg-b b tʋʋmd sẽn ya a soab vẽenega, b sẽn ya a karen-biisã yĩnga. Vugr menga a vẽnega a meng ne a ma-biig a Zak sẽn dag n ka tẽed pĩndã, n kɩt t’a sak n deeg tɩ sɩd yaa yẽ la Kiristã.

Tʋm-tʋmdbã sẽn da ket n be Galile wã, a Zezi kõ-b-la noor tɩ b leb Zerizalɛm. A seg-b-la Zerizalɛm be n yeel-ba: “Bɩ y ra yi Zerizalɛm ye, bɩ y yaas n gũ bũmb ninga m Ba sẽn dag n kãabã. Yaa bũmb ninga mam sẽn da togs yãmbã. Tɩ bõe, a Zã ra lisa neba koom pʋgẽ, la dasem bilf bala yãmb na n paama lisg [vʋʋsem sõng] pʋgẽ.”

Rẽ poore, a Zezi leb n sega a tʋm-tʋmdbã n tall-b n yi tẽngã pʋgẽ n kẽng Betani. Betani ra bee oliiv tɩɩs tãngã yaang sigdgẽ. Ad sɩd yaa lingr menga, tɩ ba a Zezi sẽn yeel karen-biisã tɩ rẽ poor bilfu a na n looga saasẽ wã, b ra ket n tẽed t’a na n lugla a Rĩungã tẽng zugu. Rẽ n so tɩ b soke: “Zusoaba, yãmb na n deega Israɛll soolma n kõ-b masã bɩ?”

A Zezi ka leb n bao n na n dems-ba, b sẽn wʋm yɛlã võor kɛgrã ye. A leok-b-la woto bala: “A ka be ne yãmb tɩ y bãng wakate la zãmaan nins Wẽnnaam sẽn yãk ne b meng pãnga ye.” Rẽ poore, a leb n wilga b sẽn segd n maan tʋʋmd ningã yɛs n yeele: “La [vʋʋsem sõng] sã n wa yãmb zutu, yãmb na reeg pãnga. La yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.”

B sẽn da wa n get a Zezi wã, a sɩngame n zẽkd n dʋʋd saasẽ, la rẽ poore sawadg n lill-a tɩ b ra ka le ne-a ye. A toeema a ninsaal yĩngã, n lebg wa malɛk n dʋ saasẽ. Tʋm-tʋmdb 11 wã sẽn da ket n get yĩngr kuii wã wakate, neb a yiib ne fu-peels n puk bãmb taoore. Nin-kãensã sẽn yaa malɛgs sẽn dɩk ninsaal yĩngã sokame: “Yãmb Galile neba, yaa bõe tɩ yãmb yɛs n get yĩngri? Zezi kãng sẽn yi yãmb sʋk n zẽke n kẽng [saasẽ wã] na n le waa woto wa yãmb sẽn yã tɩ bãmb dabd [saasẽ].”

A Zezi sẽn nan loog saasẽ wã yɩɩ wãn to? A ka maan tɩ zãma wã fãa nin maan kaset ne a loogrã ye. Ra ya a karen-biis sẽn yaa sakdbã bal n da be be n getẽ. Woto me, a sã n na n wa lebg n wa, a ka na n maan tɩ zãmã wã fãa nin maan kaset ne a waoongã ye. Na n yɩɩ a karen-biis sẽn yaa sakdbã bal n na n bãng t’a lebgame, la t’a sɩngame masã n bee a Rĩungã naamẽ.

Masã tʋm-tʋmdbã siga oliiv tɩɩs tãngã zugu, n pasg Sedrõ Longã, n leb n kẽ Zerizalɛm. B saka a Zezi noorã n kell n pa be. Rasem piig loogr poore, ra yaa yʋʋmd 33 Pãntekote. Baraare, karen-biis 120 n da tigim zugẽ doogẽ Zerizalɛm. Zĩig pʋgẽ bala bʋrg sẽn wõnd seb-kãseng n pid roogã fãa. B yãa zɩlmã sẽn wõnd wa bug-witim sẽn zaoond ned kam fãa zugu, tɩ karen-biisã fãa sɩng n gomd buud-gom zẽna. Woto ra yaa vʋʋsem sõngã a Zezi sẽn dag n kãab t’a na n pʋdga b zutã. Matɩe 28:16-20; Luk 24:49-52; 1 Korẽnt dãmba 15:5-7; Tʋʋma 1:3-15; 2:1-4.

▪ A Zezi sẽn da wa n loogdẽ wã, ãnd rãmb la a kõ noy Galile tãng a yembrẽ, la no-kãens la bʋse?

▪ Wãn-wãn la a Zezi keng a karen-biisã pelse, la wãn to la a na n pa ne-ba?

▪ A Zezi vʋʋgrã poore rasem a wãn la a vẽneg a meng ne a karen-biisã, la bõe la a zãms-ba?

▪ Sẽn deng a Zezi kũumã, ãnd soab n dag n pa a Zezi karen-biiga, t’a Zezi vẽneg a meng ne-a?

▪ Yaoolem tigiss a yiib bʋs la a Zezi maan ne a tʋm-tʋmdbã, la bõe n maan wakat kãense?

▪ Wãn to la a Zezi na n lebg n wa wala a sẽn loog to-to wã?

▪ Bõe n maan yʋʋmd 33 wã Pãntekotẽ?