Sak 133

A Zezi maana bũmb nins fãa Wẽnnaam sẽn da baood t’a maanã

RĨM a Zezi Kirist sã n wa zab n sãam a Sʋɩtãan la a dũni wẽngã, ad sɩd na yɩ kɩdengo! A Zezi Yʋʋm Tusr Naamã sẽn yaa laafɩ naamã na yaa n sɩnge!

A Zezi ne a rĩm-taasã na n kõo sẽn na n põs-b Armagedõ wã sor-wilgr tɩ b yiis rẽgd nins fãa zab-tɩrgã sẽn basã. Yaa wala wakat bilf pʋgẽ, sẽn na n põs-b Armagedõ n pa tẽng zugã na n ket n dogda kamba. Kom-kãens na n naagame n maneg tẽngã n kɩt t’a lebg zĩig sẽn tar dasãnd wʋsgo.

Sã n wa beẽ-n-beẽ, a Zezi na n vʋʋga neb milyõ rãmb ka tɛk tɩ b yi b yaadẽ wã n zĩnd arzãn kãngã sẽn tar dasãndã pʋgẽ. A na n maana woto n pids bũmb ning yẽ meng sẽn da pʋlem, n yeel woto wã: “Wakat watame tɩ fãa sẽn be [tẽegr] yaad pʋsẽ na n . . . yi.”

Wẽng maand ning sẽn da ki a Zezi sɛɛgẽ ra-lukã zugã me na n zĩnda neb nins a Zezi sẽn na n vʋʋgã sʋka. Tẽeg-y t’a Zezi kãaba woto: “Sɩd-sɩda mam yet-f-la rũndã: Fo na n zĩnda ne maam Arzãnã pʋgẽ.” (NW ) A ka yet tɩ b na n talla rao wã n kẽng saasẽ t’a tɩ rɩ naam ne a Zezi ye, a Zezi ka na n leb n lebg ninsaal n wa vɩɩmd Arzãna pʋgẽ tẽng zug ne yẽ me ye. Ayo, b sẽn yet t’a Zezi na n zĩnda ne pĩnd wẽng maandã rat n yeelame t’a na n vʋʋg-a lame t’a vɩɩmd Arzãna pʋgẽ tẽng zugu, n ges t’a raab paam pidsg yĩngã la tẽebã wɛɛngẽ, wa seb-neng ning sẽn pʋgdã fot sẽn wilgdã.

Yãmb wee n tagse! Ne nonglem, a Zezi na n gesame tɩ ãdem-biisã fãa gill wa tõog n lebg ninsaalb sẽn zems zãnga. Nin-kãens yaa sẽn na n põs-b Armagedõ wã, b kambã, la neb milyõ tus ka tɛk nins b sẽn na n vʋʋge, la sẽn na n sak-a wã. Ne a Biribl a Zezi Kirist sẽn yaa rĩmã maasem, a Zeova na n zĩnda ne ninsaalbã makr wɛɛngẽ. La wala saasẽ koɛɛgã a Zã sẽn wʋmã sẽn yetã, “bãmb na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.” Tẽngã zugu, ned ba a yembr ka na n leb n bẽ, bɩ n nams ye.

A Zezi Yʋʋm Tusr Naamã ne a wa sa tɩ bũmba fãa lebga wa Wẽnnaam sẽn dag n tʋlg tɩ b yɩ to-to sɩngrẽ wã, a sẽn da wa n yeel tõnd pipi roagdb a Ãdem ne Hawa tɩ b rog kamb n pids tẽngã. N-ye, tẽngã na n pida ne ninsaalb sẽn yaa tɩrs la sẽn zems zãnga. Rẽ yaa b sẽn na n wa rɩk a Zezi maoongã sẽn yaa rondã n kɩt t’a naf ned kam fãa wã. A Ãdem yel-wẽndã sẽn wa ne kũum ningã ka na n le zĩnd ye!

Woto, na n mikame t’a Zezi maana bũmb nins fãa Wẽnnaam sẽn da baood t’a maanã. Rẽ n so, tɩ yʋʋm tusrã saabẽ, bɩ a na n dɩk Rĩungã la ninsaalbã sẽn zems zãngã n lebs a Ba wã. Rẽ poore, Wẽnnaam na n basa a Sʋɩtãan ne a zĩn dãmbã sẽn da be bog-zulung pʋgẽ n ka tõe n maan baa fɩ wã tɩ b yi. Tɩ bõe yĩnga?

Yʋʋm tusrã saabẽ, neb nins sẽn na n vɩ Arzãna pʋgẽ wã wʋsg na n yɩɩ neb b sẽn vʋʋge, tɩ b tẽeba zɩ n paam makr ye. Sẽn deng tɩ nin-kãensã ki, b ka tol n bãng Wẽnnaam kãabsã n paam n tẽ-b ye. Dẽ, b sẽn da wa n vʋʋg-b n zãms-b Biiblã sɩdã, ra yaa nana ne-b tɩ b balem Wẽnnaam Arzãna pʋgẽ, gɩdgr sẽn ka le be wã yĩnga. La b sã n da kõ a Sʋɩtãan sor t’a na n mak n gɩdg-b tɩ b ra ket n balemd Wẽnnaam, b na n wilgame tɩ b yaa Wẽn-sakdb makrã pʋgẽ bɩ? Yaa sẽn na yɩl n welg yel-kãngã la b sẽn na n bas a Sʋɩtãan t’a yi wã.

Yãab ning a Zã sẽn paamã wilgdame t’a Zezi Yʋʋm Tusr Naamã poore, a Sʋɩtãan na n tõogame n kɩt tɩ neb ka tɛk bas Wẽnnaam balengo. La yaoolem makrã sã n wa sa poore, b na n sãama a Sʋɩtãana, a zĩn dãmbã, la neb nins fãa a sẽn tõog n belgã wakat sẽn-kõn-sa yĩnga. La põsdbã sẽn yaa sakdbã b sẽn mak tɩ pid zãngã na n paama b saasẽ Ba wã bark wakat fãa yĩnga.

Vẽenega a Zezi talla tʋʋmd sẽn tar yõod wʋsg Wẽnnaam daabã sẽn tar ziirã pidsg pʋgẽ, la na n kell n yɩɩ woto. Sɩd-sɩda a Zezi sẽn yaa rĩm kãseng Wẽnnaam sẽn yãkã sẽn pids bũmb nins fãa wã, sɩd na n kõo tõnd sũ-noog beoog-daare. Baasg zãnga, d ka tõe n yĩm bũmb nins fãa a sẽn maan a sẽn da wa n yaa ninsaalã ye.

Yaa ne yamleoog la a Zezi wa tẽng zug n zãms tõnd a Ba wã sẽn ya a soaba. Sẽn paase, a rɩka togs-n-taar ne a Ba wã zʋg-sõma sẽn tar yõod wʋsgã. Raood ning a Zezi sẽn tallã, a yam sẽn ka tar mak-n-taagã, a sẽn yɩ karen-saam kãseng meng-meng la taoor soab sẽn ka yɛɛsdã, la a yɩ nimbãan-zoɛt sẽn ningd a meng a taab zĩigẽ wã, woto fãa sɩd bee yamleoog wʋsgo. Tõnd sã n tẽeg a sẽn nams namsg ning b sẽn ka tõe n bãng n bilg n na n tõog n kõ rondã, tɩ yaa ne rẽ maasem bal la d tõe n paam vɩɩmã, sɩda d sũyã pita ne mi-beoog wʋsg ne a Zezi!

Sɩd-sɩda, tõnd sẽn zãms n yã a Zezi vɩɩmã sẽn yɩ to-to wã kɩtame tɩ d bãng rao tɛkẽ! A Zezi yɩɩ nin-kãsengã yaa bũmb sẽn yaa vẽenega, tɩ kɩɩsg kaẽ ye. Woto kɩtdame tɩ d rat n yeel wala Rom guvɛrneer a Põns Pɩlat yaa: ‘Ad dao wã!’ N-ye, ‘dao’ sẽn yaa zãmaan fãa nin-kãseng sẽn ka to wã!

Tõnd sã n sak a Zezi maoongã sẽn yaa rond b sẽn kõ d yĩngã, d na n tõog n paama d mens ne yel-wẽnã la kũumã a Ãdem sẽn bẽeg-dã. Dẽ, a Zezi tõe n lebga tõnd “Ba sẽn ka kiida.” Neb nins fãa sẽn dat n paam vɩɩm sẽn-kõn-sa wã tog n bao n bãnga Wẽnnaam la a Biribl a Zezi Kirist me. Bɩ seb-kãngã y sẽn karem la y zãmsã sõng-y tɩ y paam bãng-kãng sẽn kõt vɩɩmã! 1 Zã 2:17; 1:7; Zã 5:28, 29; 3:16; 17:3; 19:5; Luk 23:43, NW; Sɩngre 1:28; 1 Korẽnt dãmba 15:24-28; Wilgri 20:1-3, 6-10; 21:3, 4; Ezai 9:5.

▪ Armagedõ põsdbã ne b kambã na n paama zu-noog n maan tʋʋm bʋgo?

▪ Armagedõ põsdbã ne b kambã sẽn yãk b toogo, ãnd rãmb me n na n zĩnd arzãna pʋgẽ, la wãn-wãn to la a Zezi na n zĩnd ne-ba?

▪ Yɛlã na n yɩɩ wãn-wãn yʋʋm tusrã baasgẽ, la bõe la a Zezi na n maan wakat kãnga?

▪ Bõe yĩng tɩ b na n yiis a Sʋɩtãan bog-zulungã pʋgẽ, la bõe n na n baas n paam yẽ ne neb nins fãa sẽn na n zĩnd a poorẽ wã?

▪ Wãn-wãn to la a Zezi tõe n lebg tõnd “Ba sẽn ka kiida”?