Bõe n na n paam tũudum toor-toorã tɩ yaa koe-noogo?

1. Tũudmã fãa yaa sõma bɩ?

Neb sẽn baood Wẽnnaam ne pʋ-peelem bee tũudmã fãa pʋsẽ. D sẽn mi t’a nee nin-kãensa, la tɩ b yell pak-a lame wã noom-d lame. La bʋko, tʋʋm-beed la b tʋmd tũudmã yʋʋr yĩnga. (2 Korẽnt dãmba 4:3, 4; 11:13-15) Kiba-kɩtbã wilgame tɩ tũudum kẽer pʋd n kẽesa b meng teerorismã, bu-welsg zabã, tẽn-tẽnsã zabã la kambã namsgã la b yõgbã pʋgẽ. Hakɩka, woto sãamda sẽn nong-b Wẽnnaamã sũyã.​—Karm-y Matɩe 24:3-5, 11, 12.

Tũudum hakɩkã waoogda Wẽnnaam, la ziri tũudmã yẽ pa tat a yam ye. B zãmsda nebã yɛl sẽn pa be Biiblã pʋgẽ. Wala makre, b pa togsd sɩdã Wẽnnaam zugu, b pa togsd sɩd sẽn ki-bã me zug ye. A Zeova yaool n datame tɩ nebã bãng sɩdã yẽ zugu.​—Karm-y Matɩe 10:28; 1 Tɩmote 2:3-5.

2. Bõe n na n paam tũudum toor-toorã tɩ yaa koe-noogo?

Tũudum nins sẽn yet tɩ b nonga Wẽnnaam tɩ yaool n yaa a Sʋɩtãan dũniyã la b nongã pa tat Wẽnnaam yam ye. (Zak 4:4) Biiblã pʋgẽ, b boonda ziri tũudmã fãa sẽn naag taab tɩ “Babilon Kãsengã.” Babilon yɩɩ tẽng sẽn zĩnd a Nowe wakatẽ sa-kãsengã poore. Be la ziri tũudum sɩng-yã. Ka la bilfu, Wẽnnaam na n sãama tũudum nins sẽn belgd ãdem-biisã la b wẽgd-bã.​—Karm-y Wilgr 17:1, 2, 5, 16, 17; 18:8.

La koe-noog n kete. A Zeova pa yĩm pʋ-peelem dãmb nins sẽn be ziri tũudum pʋgẽ wã yell ye. A zãmsd-b-la sɩdã, tɩ b wat n naagd tũudum hakɩkã neb sẽn zemsd taabã.​—Karm-y Miise 4:2, 5.

3. Bõe la pʋ-peelem dãmbã segd n maane?

Neb sã n nong sẽn yaa sɩd la sẽn yaa tɩrga, b yell paka a Zeova. A yeta nin-kãensã tɩ b yi n bas ziri tũudmã. Sẽn nong-b Wẽnnaamã sakd n basa bũmb nins sẽn pa tat a yamã.​—Karm-y Wilgr 18:4.

Pipi kiris-nebã wakatẽ, pʋ-peelem dãmbã sẽn wʋm koe-noogã tʋm-tʋmdbã sẽn da taasdã, b saka ne sũ-noogo. B toeema b vɩɩmã tɩ zems ne a Zeova raabã, tɩ rẽ kɩt tɩ b vɩɩmã ra tar võore, la b ra miẽ tɩ beoog-daarã na n yɩɩ neere. B sẽn sak koe-noogã n lʋɩɩs a Zeova raabã taoorã yaa mak-sõng n kõ-do.​—Karm-y 1 Tesalonik rãmb 1:8, 9; 2:13.

A Zeova reegda neb nins sẽn basd ziri tũudmã n wat n naagd a nin-buiidã. Y sã n sak tũudum hakɩkã, y na n paama a Zeova zoodo, n paam n naag a nin-buiidã sẽn nong taabã, la y wa paam vɩɩm sẽn kõn sa.​—Karm-y Mark 10:29, 30; 2 Korẽnt dãmb 6:17, 18.

4. Wãn to la Wẽnnaam na n kɩt tɩ sũ-noog zĩnd zĩig fãa?

Wẽnnaam sẽn na n sãam ziri tũudmã yaa koe-noogo. Na n kɩtame tɩ nebã paam b mens fasɩ. Ziri tũudum kõn le belg nebã, n wẽg-ba, wall a welg-b ye. Wakat kãngã, nebã fãa na n naaga taab tũudum hakɩkã pʋgẽ n waoog Wẽnnaam sɩd-sɩdã.​—Karm-y Wilgr 18:20, 21; 21:3, 4.