Bõe yĩng tɩ d rat fãagda?

Bũmb ninsaalbã sẽn sɩng n dat yaa vɩ n pa kʋʋndẽ, n pa lʋɩt bãaga, la b pa kiidẽ me ye. La zu-bʋko, d fãa yaa kiidba. A Zoob sẽn togs goam nins sẽn be yĩngrã yʋʋm tus a tã la zak la woto, la b ket n yaa sɩda.

Dũniyã gill zugu, nebã rat n vɩɩmda wakat sẽn kõn sa ne b sũur fãa. Biiblã yeelame tɩ Wẽnnaam ninga wakat sẽn ka sɛt tagsg ninsaal sũur pʋgẽ, la a kɩt me t’a rat n wʋm rẽ võore. (Koɛɛg Soaba 3:11) La Wẽnnaam sẽn yaa nonglmã na sak n ning tõnd sũurẽ wã bũmb d sẽn pa tõe n paam sɩda? Yaa vẽeneg t’a kõn sak n maan woto ye. Wẽnnaam Gomdã boonda kũum tɩ bɛya. A yeela woto: “Yaoolem bɛyã sẽn na n sãam yaa kũum.”—1 Korẽnt dãmba 15:26.

Kũum sɩd yaa bɛya. Ned sẽn tar laafɩ ka rat n ki ye. D sã n yã bũmb sẽn tõe n pogl-do, wall d yãa yell sẽn wate, d maanda d sẽn tõe fãa sẽn na yɩl n põse. D sã n lʋɩ bãaga, d baooda tɩbsgo. D gũusda d meng ne bũmb nins fãa sẽn tõe n kʋ-do.

Kũum sẽn yaa bɛyã sɩng n namsda ninsaalbã. D tõe n sɩd tẽeme tɩ wakat n wat t’a pa na n le beẽ bɩ? N-ye. A Zeova sẽn yaa bũmb fãa Naandã pa naan ninsaal t’a vɩɩmd yʋʋm a wãn bal la a ki ye. Sɩngrẽ wã, a raabã yaa tɩ ninsaalbã vɩɩmd wakat sẽn kõn sa tẽngã zugu. A sẽn dat fãa yaool n pidsdame.—Ezai 55:11.

La na n sɩnga wãn tɩ kũum wa pa le beẽ? Pĩnd wẽndẽ, nebã baoo kũumã tɩɩm, la b pa paam ye. Rũndã-rũndã me, b ket n baoodame. Siãnsã bãngdb bao n na n bãnga bõn-vɩɩlɩ wã sẽn naan to-to wã sõma. B paama tɩt sẽn kɩt tɩ bãas kẽer meneme. Zĩis wʋsgo, nebã vɩɩme n kaoosd n yɩɩd pĩndã. Baasgo, ninsaalbã nan pa paam kũumã tɩɩm ye. Yaa wa Biiblã sẽn yeelã. B fãa wat n lebga “tẽng tom.”—Koɛɛg Soaba 3:20.

Yaa vẽeneg tɩ d sã n teeg ninsaalbã, d pa na n tol n paam kũumã tɩɩm ye. La koe-noog n be. Wẽnnaam a Zeova paka sor tɩ d tõe n wa paam d mens ne kũumã. Yaa a Zezi Kirist maasem yĩng la a maan dẽ.