D tõe n vɩɩmda wakat sẽn kõn sa

1. D sã n bʋgsd a Zeova sẽn pʋlem-d vɩɩm sẽn ka sɛtã zugu, wãn to la nafd tõndo?

A ZEOVA pʋlma neb nins sẽn sakd yẽ wã “vɩɩm sẽn ka sɛtã.” (Rom. 6:23) D sã n bʋgsd rẽ zugu, d sẽn nong a Zeova to-to wã pãng paasdame. Woto wilgda vẽeneg tɩ d saasẽ Ba wã nong-d-la wʋsgo, hal n pa rat tɩ bũmb welg tõnd ne yẽ ye.

2. Wãn to la Wẽnnaam sẽn pʋlem-d vɩɩm sẽn ka sɛtã sõngd tõndo?

² Wẽnnaam sẽn pʋlem tõnd vɩɩm sẽn ka sɛtã sõngd-d lame tɩ d tõogd toog d zu-loeesã pʋgẽ. Baa d bɛɛbã sã n wa yeel tɩ b na n kʋ-d lame, d pa komsd raood n bas a Zeova tũub ye. Bõe yĩnga? Bala d miime tɩ d sã n kell n maan sɩd ne a Zeova n tãag d yõor tɛka, a na n wa vʋʋg-d lame, tɩ d wa paam n vɩɩmd wakat sẽn kõn sa. (Zã 5:28, 29; 1 Kor. 15:55-58; Ebre. 2:15) Bõe n kɩt tɩ d mi vẽeneg tɩ d tõe n vɩɩmda wakat sẽn kõn sa? D ges bũmb a wãn sẽn wilgd rẽ.

A ZEOVA VƖƖ WAKAT FÃA

3. Bõe n kɩt tɩ d miẽ t’a Zeova tõe n kɩtame tɩ d vɩɩmd wakat sẽn kõn sa? (Yɩɩn-sõamyã 102:13, 25, 28)

³ D miime t’a Zeova tõe n kɩtame tɩ d vɩɩmd wakat sẽn ka sɛta, bala yaa yẽ nengẽ la vɩɩmã yita, la a vɩɩ wakat fãa. (Yɩɩn. 36:10) Biiblã vɛrse kẽer wilgdame t’a Zeova sɩng n beeme, la t’a na n kell n paa wakat fãa. Wala makre, Yɩɩn-sõamyã 90:2 yetame t’a Zeova sɩng n yaa Wẽnnaam, “zamaan woo zamaane.” Yɩɩn-sõamyã 102 me yeta bũmb sẽn wõnd woto. (Karm-y Yɩɩn-sõamyã 102:13, 25, 28.) No-rɛɛs a Habakuk me goma d saasẽ Ba wã yelle, n yeele: “Zeova, yãmb pa be wakat sẽn kõn sa yĩng sɩda? Mam Wẽnnaam, yãmb yaa Sõngo. Yãmb pa kiid ye.”—Hab. 1:12, MN.

4. D sã n pa wʋmd b sẽn yet t’a Zeova sɩng n bee wakat fãa wã võore d segd n maanda yɩɩr bɩ? Wilg-y y leoorã võore.

⁴ Yaa toog ne-y tɩ y sak n deeg t’a Zeova sɩng n beeme, la t’a “paada wakat fãa” bɩ? (Eza. 40:28) Yaa toog ne neb wʋsg tɩ b sak n deeg rẽ. A Elihu goma Wẽnnaam yelle, n yeel yaa: “Ned ka tõe n bãng bãmb yʋʋmã sõor ye.” (Zoob 36:26) La pa sã n yaa toog ne-d tɩ d sak n deeg bũmb la wilgd tɩ pa sɩd ye. Wala makre, tõe tɩ yaa toog ne-d tɩ d wʋm kʋʋrã wã sẽn tʋmd to-to wã võor sõma. La rẽ yĩnga, woto rat n yeelame tɩ kʋʋrã pa be bɩ? Ayo! Woto me, tõnd a ninsaalbã tõeeme n pa wʋmd a Zeova sẽn sɩng n beẽ, la a na n pa wakat fãa wã võor ye. La woto pa rat n yeel tɩ Wẽnnaam pa vɩ wakat fãa ye. Sɩdã d Naandã zugã pa be ne d sã n tõe n wʋma a võor ye. (Rom. 11:33-36) Nand tɩ Wẽnnaam naan ãndũniyã la wĩndgã sẽn kõt vẽenemã, a ra sɩng n beeme. D kɩsa sɩd t’a Zeova “naana tẽngã ne b meng pãnga.” A Zeova ra sɩng n beeme, nand meng t’a ‘yɛdg sa-gãongã.’ (Zer. 51:15; Tʋʋ. 17:24) Bõe me n kɩt tɩ d tõe n kɩs sɩd tɩ d tõe n vɩɩmda wakat sẽn kõn sa?

A ZEOVA NAANA TÕND N DAT TƖ D VƖƖMD WAKAT SẼN KÕN SA

5. Bõe la a Ãdem ne a Awa ra tõe n paame?

⁵ A Zeova naana bũmb nins fãa sẽn be tẽngã zugã tɩ b tõe n ki, la a pa naan ninsaal n dat t’a ki ye. A kɩtame tɩ d saagdẽ n na n wa vɩɩmd wakat sẽn kõn sa. Rẽ n so t’a Zeova keoog a Ãdem yaa: “Yaa tɩɩg ning sẽn kɩtd tɩ ned bãng wẽnga, ne sõmb n bakã biis bal la fo ka tog n dɩ. Bala, daar ning fo sẽn na n dɩ tɩ-kãngã bilã, fo na n kiime.” (Sɩng. 2:17) A Ãdem ne a Awa sã n da sak a Zeova noorã, b ra pa na n tol n ki ye. D tõe n yeelame t’a Zeova ra tõe n wa kõ-b-la sor tɩ b rɩ “tɩɩg ning biis sẽn kõt vɩɩmã.” Woto ra na n yɩɩ kaset sẽn wilgd t’a Zeova sakame tɩ b na n “kell n vɩ n ka kiidẽ ye.”b—Sɩng. 3:22.

6-7. a) Bõe me n wilgd t’a Zeova pa naan ninsaal n dat t’a ki? b) Bõe la y rat n wa maan dũni-paalgã pʋgẽ? (Ges-y fot-rãmbã.)

⁶ Bãngdbã maana vaeesg n mik tɩ ninsaal kalkõtã sẽn tõe n deeg kibay ninsã sõor pa tõe n bãng n bilg ye. Dẽnd bũmb nins fãa ninsaal sẽn zãms a vɩɩmã tõrã pa tõe n kɩt t’a kalkõtã pid ye. Yʋʋmd 2010, b wilga zʋrnall a ye (Scientific American Mind) pʋgẽ tɩ ninsaal kalkõtã tõe n deega kibay sẽn ta ziga-rãmb milyõ a yiib la pʋɩ-sʋka. Yaa wa f sẽn na n dat n ges filim woglem sẽn ta lɛɛr-dãmb milyõ a tãabo (yɩɩda yʋʋm kobs-tã). La d kalkõtã sẽn tõe n deeg kibay ninsã tog n yɩɩda rẽ fãa hal zĩig sẽn zãre. Woto wilgdame t’a Zeova naana d kalkõtã, tɩ kibay nins a sẽn tõe n deegã yɩɩd bũmb nins fãa d sẽn zãmsde, d vɩɩmã sẽn kaoosd yʋʋm 70 wall yʋʋm 80 wã sasa.—Yɩɩn. 90:10.

⁷ A Zeova naan-d lame tɩ d rat ne d sũur fãa n vɩɩmd wakat sẽn kõn sa. Biiblã yeelame tɩ Wẽnnaam “ninga wakat sẽn ka sɛt tagsg ninsaal sũur pʋgẽ.” (Koɛ. 3:11) Rẽ n so tɩ d get kũumã wa d bɛ wã. (1 Kor. 15:26) D sã n wa bẽed bã-kɛgenga, rẽ yĩnga d kanda d nus n zĩẽ n gũud kũumã bɩ? Ayo. Naoor wʋsgo, d kẽngda logto-yiri, wall d tɩ ra tɩɩm n tɩp d menga. Sɩd me, d maanda d sẽn tõe fãa sẽn na yɩl n da ki ye. Sẽn paase, d ned sã n maan kaalem, a yaa bi-bilf t’a yʋʋmã vẽsgame, d sũur sãamdame hal n kaoose. (Zã 11:32, 33) D sẽn tõe n zãms bũmb wakat sẽn kõn sa wã, la d sẽn tʋll n vɩɩmd wakat sẽn kõn sa wã yaa d Naandã sẽn nong-dã n naan tõnd woto. Woto wilgda vẽeneg t’a na n wa kɩtame tɩ d vɩɩmd wakat sẽn kõn sa. Bũmb a taab me n kɩt tɩ d kɩs sɩd tɩ d na n wa vɩɩmda wakat sẽn kõn sa. D ges bũmb kẽer a Zeova sẽn maan pĩndã, la a sẽn maand masã menga, tɩ wilgdẽ t’a sẽn da rat tɩ ninsaalbã vɩɩm yɩ to-to sɩngrẽ wã pa toeem ye.

A ZEOVA RAABÃ PA TOEEM YE

8. Ezayi 55:11 sõngda tõnd tɩ d bãng bõe a Zeova raabã ne ninsaalbã wɛɛngẽ?

⁸ Baa ne a Ãdem ne a Awa sẽn maan yel-wẽnd tɩ kɩt tɩ b kambã la b yagensã lebg kiidbã, a Zeova sẽn da rat tɩ vɩɩmã yɩ to-to sɩngrẽ wã pa toeem ye. (Karm-y Ezayi 55:11.) A ket n datame tɩ wẽn-sakdbã wa vɩɩmd wakat sẽn kõn sa. A Zeova sẽn yeel la a maan bũmb ning n na n pids a raabã kɩtame tɩ d tõe n yeel woto.

9. Bõe la Wẽnnaam pʋlem-yã? (Dãniyɛll 12:2, 13)

⁹ A Zeova pʋlmame t’a na n wa vʋʋga sẽn ki-bã, tɩ b paam n tõe n vɩɩmd wakat sẽn kõn sa. (Tʋʋ. 24:15; Tɩt 1:1, 2) A Zoob sẽn yɩ wẽn-sakdã ra kɩsa sɩd t’a Zeova sɩd ratame n vʋʋg sẽn ki-bã. (Zoob 14:14, 15) No-rɛɛs a Dãniyɛll ra miime tɩ ninsaalbã na n wa vʋʋgame n tõe n vɩɩmd wakat sẽn kõn sa. (Yɩɩn. 37:29; karm-y Dãniyɛll 12:2, 13.) A Zeezi wakatẽ wã, Zʋɩf-rãmbã me ra miime tɩ neb nins sẽn tũud a Zeova ne b sũy fãa wã na n wa paama “vɩɩm sẽn ka sɛtã.” (Luk 10:25; 18:18) A Zeezi goma pʋlen-kãng yell naoor wʋsgo. Sẽn paase, a sẽn wa n ki wã, a Ba a Zeova vʋʋg-a lame.—Mat. 19:29; 22:31, 32; Luk 18:30; Zã 11:25.

10. B sẽn vʋʋg neb pĩndã wilgda bõe? (Ges-y fotã.)

¹⁰ A Zeova n yaa vɩɩmã kõta. A tõe n vʋʋga sẽn ki-bã. A kõo no-rɛɛs a Eli tõog t’a vʋʋg Sarepta pʋg-kõorã biiga. (1 Rĩm. 17:21-23) Kaoosg zugẽ, Wẽnnaam sõnga no-rɛɛs a Eliize t’a vʋʋg Sunem pag a ye bi-ribla. (2 Rĩm. 4:18-20, 34-37) Nin-kãensã vʋʋgrã la vʋʋgr a taab wilgdame t’a Zeova tõe n vʋʋga sẽn ki-bã. A Zeezi sẽn wa n be tẽngã zugã, a wilgame t’a Ba wã kõo-a-la tõog t’a tõe n vʋʋg sẽn ki-bã. (Zã 11:23-25, 43, 44) Rũndã-rũndã, a Zeezi bee saasẽ, la Wẽnnaam kõo-a-la ‘noor t’a ges bũmb fãa yell saasẽ la tẽngã zugu.’ Dẽnd a tõe n pidsa pʋleng ning sẽn yet tɩ “sẽn be-b yaad pʋsẽ wã fãa” na n vʋʋgame, n tõe n wa paam n vɩɩmd wakat sẽn kõn sa wã.—Mat. 28:18; Zã 5:25-29.

11. Wãn to la a Zeezi kũumã sẽn yɩ maoongã kɩt tɩ d tõe n wa paam n vɩɩmd wakat sẽn kõn sa?

¹¹ Bõe yĩng t’a Zeova sak t’a bi-nongrã ki kũ-toaaga? A Zeezi leoka sok-kãng n yeele: “Wẽnnaam nonga dũniyã hal wʋsgo, n kõ b Bi-ribl sẽn-ka-to wã sẽn na yɩl tɩ ned ning fãa sẽn tẽed bãmb ra sãame, la a paam vɩɩm sẽn ka sɛta.” (Zã 3:16) Sɩd me, Wẽnnaam sẽn kɩt t’a bi-riblã wa ki tɩ yɩ maoong d yel-wẽnã yĩngã kɩtame tɩ d tõe n wa paam n vɩɩmd wakat sẽn kõn sa. (Mat. 20:28) Tẽn-tʋmd a Poll wilga Wẽnnaam sẽn maan rẽ wã võor n yeel yaa: “Sẽn tũ ne rao a ye tɩ kũum wa wã, kũum vʋʋgr me wata rao a ye maasem yĩnga. Yaa wa sẽn tũ ne a Ãdem tɩ nebã fãa kiidẽ wã. Woto me, na n tũu ne Kiristã tɩ nebã fãa paam vɩɩm.”—1 Kor. 15:21, 22.

12. Wãn to la Rĩungã na n sõng t’a Zeova raabã pidsi?

¹² A Zeezi yeela a karen-biisã tɩ b pʋʋs tɩ Wẽnnaam Rĩungã wa, la t’a raabã maan tẽngã zugu. (Mat. 6:9, 10) Wẽnnaam da ratame tɩ ninsaalbã vɩɩmd wakat sẽn kõn sa tẽngã zugu. Sẽn na yɩl n pids raab-kãnga, a yãka a Bi-riblã t’a yaa Mesi Rĩungã rĩma. Wẽnnaam yãka neb 144 000 tẽngã zugu, tɩ b na n tɩ naag a Zeezi n tʋm Wẽnnaam raabã pidsg yĩnga.—Vẽn. 5:9, 10.

13. Bõe la a Zeova maand rũndã-rũndã, la bõe la y segd n maane?

¹³ Rũndã-rũndã, Wẽnnaam tigimda kʋʋn-kãsengã neba, la a wilgd b sẽn segd n maan n wa tõog n yɩ a Rĩungã nin-buiidu. (Vẽn. 7:9, 10; Zak 2:8) Baa ne zabã la kis-taabã sẽn kɩt tɩ nebã welgd taab rũndã-rũndã wã, kʋʋn-kãsengã neb maanda b sẽn tõe fãa n zãagd b mens ne bu-welsgo, la kisgr buud fãa. B sẽn maand woto wã yaa wa b sẽn zoe n kut b sʋʋsã tɩ lebgd wãgse. (Mis. 4:3) B pa kẽesd b toog zabã sẽn yaa sabaab tɩ neb wʋsg kiidẽ wã pʋsẽ ye. B pʋd n zãmsda nebã bũmb wʋsg Wẽnnaam sɩd-sɩdã la a raabã wɛɛngẽ, sẽn na yɩl n sõng-b tɩ b wa paam “vɩɩm hakɩɩkã.” (1 Tɩm. 6:19) Neb kẽer zãmsda Biiblã tɩ b zagsã rãmb namsd-b rẽ yĩnga, wall b segda ligd zu-loees b sẽn teend Rĩungã yĩnga. La a Zeova getame tɩ b paamd bũmb nins sẽn yaa tɩlɛ ne-bã. (Mat. 6:25, 30-33; Luk 18:29, 30) Woto fãa yaa kaset sẽn wilgd tɩ Wẽnnaam Rĩungã sɩd beeme, la t’a na n kell n pidsa a Zeova raabã.

BEOOG-DAARÃ NA N YIƖ NEERE

14-15. Wãn to la a Zeova sẽn pʋlem t’a na n menesa kũum wakat fãa yĩngã na n pidsi?

¹⁴ A Zeezi lebga rĩm saasẽ, la a na n wa pidsa a Zeova pʋlemsã fãa. (2 Kor. 1:20) Yʋʋmd 1914 tɛka, a Zeezi tõogda a bɛɛbã. (Yɩɩn. 110:1, 2) Ka la bilfu, yẽ ne a na-rɩt-n-taasã na n tõoga b bɛɛbã, la b sãam nin-wẽnsã.—Vẽn. 6:2.

¹⁵ A Zeezi yʋʋm tusr naamã sasa, a na n vʋʋga sẽn ki-bã, la a sõng wẽn-sakdbã tɩ b wa lebg neb sẽn zems zãnga. Yaoolem makrã poore, a Zeova sẽn kao neb nins bʋʋd n yeel tɩ b yaa tɩrsã ‘na n sooga tẽngã, la b na n paa beenẽ wakat sẽn kõn sa.’ (Yɩɩn. 37:10, 11, 29) D sũur na n yɩɩ noogo, b sẽn na n kɩt tɩ kũumã sẽn yaa “yaoolem bɛ” wã “lebg zaalmã.”—1 Kor. 15:26.

16. Pipi bũmb sẽn kɩt tɩ d rat n tũ a Zeova ne d sũur fãa wã yaa bõe?

¹⁶ Wa d sẽn yã sõs-kãngã pʋgẽ wã, d sẽn saagd n na n wa vɩɩmd wakat sẽn kõn sa wã tika Wẽnnnaam Gomdã zugu. D sẽn saagd woto wã sõngd-d lame tɩ d ket n maand sɩd ne a Zeova yaoolem da-kãensã sẽn pa nana wã. La d sã n dat n ta a Zeova yam, d sẽn tʋll n vɩɩmd wakat sẽn kõn sa wã bal pa sek ye. Pipi bũmb sẽn kɩt tɩ d rat n kell n maan sɩd ne a Zeova la a Zeezi wã yaa d sẽn nong-b ne d sũur fãa wã. (2 Kor. 5:14, 15) Rẽ kɩtame tɩ d rat n dɩk b togs-n-taare, la d moond koɛɛgã sẽn na yɩl n sõng neb a taabã tɩ bãmb me wa saagd n na n vɩɩmd wakat sẽn kõn sa. (Rom. 10:13-15) D sã n maand d taabã neere, la d pa rat-m-yembr dãmba, d lebgda neb nins buud a Zeova sẽn dat tɩ b yɩ a zo-rãmb wakat fãa yĩngã.—Ebre. 13:16.

17. Bõe la d ned kam fãa tõe n maane? (Matiye 7:13, 14)

¹⁷ Tõnd na n naaga neb nins sẽn na n wa vɩɩmd wakat sẽn kõn sa wã bɩ? A Zeova kɩtame tɩ d tõe n naag nin-kãensã. La yaa tõnd n segd n yãk d sã n na n paa sor ning sẽn tar n dabd vɩɩm zĩigẽ wã zugu. (Karm-y Matiye 7:13, 14.) D sã n wa vɩ wakat sẽn kõn sa, vɩɩmã na n yɩɩ wãn to? D na n leoka sok-kãngã sõsg ning sẽn pʋgdã pʋgẽ.