Bõe la y tõe n maan n wa paam vɩɩm sẽn kõn sa wã?

Biiblã sẽn yete

B yeela Biiblã pʋgẽ yaa: “Ned ning sẽn maand Wẽnnaam daab paada wakat sẽn kõn sa.” (1 Zã 2:17) Bõe la Wẽnnaam rat tɩ y maane?

• Bao-y n bãng-y Wẽnnaam la a Biig a Zeezi. A Zeezi pʋʋsa Wẽnnaam n yeel yaa: ‘Vɩɩm sẽn kõn sa wã yaa tɩ nebã na bãng yãmb sẽn yaa y yembre, n yaa sɩd Wẽnnaamã, la b bãng a Zeezi Kirist, yãmb sẽn tʋm a soabã.’ (Zã 17:3) ‘Bãng’ Wẽnnaam la a Zeezi wã baoodame tɩ y maan bõe? Yaa y sã n zãmsd Biiblã la y tũud a saglsã la y na n bãng-ba.a Biiblã sõngda tõnd tɩ d bãng Wẽnnaam a Zeova sẽn yaa tõnd Naandã tagsgo. Yaa yẽ la vɩɩmã Kõata. (Tʋʋma 17:24, 25) Sẽn paase, Biiblã sõngda tõnd tɩ d bãng a Biig a Zeezi. A tara “vɩɩm sẽn kõn sa wã goamã.”​—Zã 6:67-69.

• Wilg-y tɩ y tẽeda a Zeezi maoongã. A Zeezi waa tẽngã zugu, n na n sõng nebã, la a kõ a vɩɩmã n yao n fãag neb wʋsgo. (Matye 20:28) A sẽn kɩ tɩ yɩ maoongã paka sor tɩ d tõe n wa paam n vɩɩmd wakat sẽn kõn sa arzãnã pʋgẽ tẽngã zugu.b (Yɩɩn-sõamyã 37:29) A Zeezi yeelame yaa: “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) D segd n tẽe a Zeezi. Rat n yeel tɩ d segd n vɩɩmdame tɩ zems ne bũmb nins a sẽn zãms nebã, la a Ba wã raabo.​—Matye 7:21; Zak 2:17.

• Bao-y zood sẽn tar pãngã ne Wẽnnaam. Wẽnnaam ratame tɩ d bao n bãng-a sõma, n yɩ a zoa. (Zak 2:23; 4:8) Wẽnnaam bee wakat fãa. A pa na n ki abada. Rẽ n so t’a rat t’a zo-rãmbã vɩɩmd wakat sẽn kõn sa me. Ne a Gomdã maasem, Wẽnnaam wilga neb nins sẽn baood-a wã sẽn na n paame. A yeelame yaa: “Bɩ bãmb vɩɩmd wakat sẽn ka sɛta!”​—Yɩɩn-sõamyã 22:27.

Tagsg sẽn pa zems vɩɩm sẽn kõn sa wã wɛɛngẽ

Tagsg sẽn pa zemse: Nebã yam na n yɩɩ vɩɩm sẽn kõn sa wã.

Sẽn yaa sɩdã: Wẽnnaam sẽn nong tõnd la a rat tɩ d paam sũ-noogã, a pʋlmame t’a na n kõo tõnd vɩɩm sẽn kõn sa wã. (Zak 1:17; 1 Zã 4:8) A miime tɩ sẽn na yɩl tɩ d tall sũ-noogo, rẽndame tɩ d paam tʋʋmd sẽn tar barka. (Koɛɛg soaba 3:12) A pʋlmame tɩ sẽn na n vɩɩmd-b tẽngã zug wakat sẽn kõn sa wã na n paama tʋʋmd sẽn na n kõ-b sũ-noogo, sẽn tar yõodo, la sẽn na n naf bãmb ne b zak-rãmba.​—Ezayi 65:22, 23.

Sẽn yɩɩd fãa, neb nins sẽn na n vɩɩmd wakat sẽn kõn sa wã, na n ket n bãngda bõn-paal Naandã zugu, la bũmb nins a sẽn naana zug me. Wẽnnaam naana ninsaalbã tɩ b tʋll n vɩɩmd wakat sẽn kõn sa, la b bao n bãng-a, baa ne bãmb “sẽn ka tõe n tags n bãng tʋʋmd ning Wẽnnaam sẽn maan hal sɩngr tɩ ta sɛɛbã.” (Koɛɛg soaba 3:10, 11) Dẽnd sẽn na n vɩɩmd-b wakat sẽn kõn sa wã na n ket n bãngda bũmb toor-toore, la b maand bũmb toor-toor sẽn na n kõ-b sũ-noogo.