So-yɛng Ning Bal Sẽn Tar N Debd Vɩɩm Sẽn-kõn-saẽ Wã
“Mam yaa sore la sɩda la vɩɩm.”—ZÃ 14:6.
1, 2. Ne bõe la a Zezi mak vɩɩm sẽn-kõn-sa wã sore, la a bilgrã võor yaa bõe?
A TÃNG zug Zãmsgã yʋʋr sẽn yi wã pʋgẽ, a Zezi maka sor ning sẽn tar n debd vɩɩm sẽn-kõn-saẽ wã ne sor ned sẽn tũud noor n dɩke. Ges-y t’a Zezi gom n tadgame n wilg tɩ so-kãng sẽn tar n debd vɩɩmẽ wã pa so-nana ye. A yeelame: “Bɩ y kẽ zak noor sẽn yaa sẽka. Tɩ bõe, zak noor sẽn yaa yalenga la sor sẽn yaa yalenga rabda sãoong zĩiga, la neb wʋsg kẽeda beenẽ. La zak noor sẽn yaa sẽka la sor sẽn yaa bãanega rabda vɩɩm [sẽn-kõn-sa] zĩigẽ, la a yãtb yaa bilfu.”—Matɩe 7:13, 14.
2 Yãmb wʋmda bilg-kãngã võor bɩ? Rẽ pa wilgd tɩ sor a ye bal n be sẽn tar n debd vɩɩmẽ, la tɩ rẽ na n baoome tɩ d maan modgr neer n da lak n yi so-kãng sẽn tar n debd vɩɩmẽ wã sɩda? La bõe masã la so-yɛng ning bal sẽn tar debd n vɩɩm sẽn-kõn-saẽ wã?
A Zezi Kirist tʋʋmdã
3, 4. a) Wãn-wãn la Biiblã wilgd tʋʋm-kãseng ning a Zezi sẽn tar tõnd fãagrã pʋgẽ wã? b) Wakat bʋg la Wẽnnaam wilg pipi tɩ ãdem-biisã ra tõe n paama vɩɩm sẽn-kõn-sa?
3 Vẽenega, so-kãng wɛɛngẽ a Zezi tara tʋʋm-kãsenga, wala tʋm-tʋmd a Pɛɛr sẽn moon n wilgã: “Fãagr ka be ne ned a to ye; tɩ bõe, yʋʋr a to [a Zezi yʋʋrã sẽn yãk a toogo] ka be dũniyã zugu sẽn kõ neba tɩ tõnd tõe n paam fãagr ne-a ye.” (Tʋʋma 4:12) Woto me, tʋm-tʋmd a Poll togsame: “Wẽnnaam kũunã yaa vɩɩm sẽn ka sɛta tõnd Zusoaba Kirist Zezi maasem yĩnga.” (Rom dãmba 6:23) A Zezi mengã wilgame tɩ so-yɛng ning bal sẽn tar n debd vɩɩm sẽn-kõn-saẽ yaa ne yẽ maasem, bala a togsame: “Mam yaa sore la sɩda la vɩɩm.”—Zã 14:6.
4 Woto, tara yõod wʋsg tɩ d sak n deeg tʋʋmd ning a Zezi sẽn tarã, sã n yaa ne kɩt tɩ vɩɩm sẽn-kõn-sa wã tõogã. Woto yĩnga, bɩ d vaees tʋʋmd ning a sẽn tarã neer n paase. A Ãdem kɩɩsgã poore, yãmb mii wakat ning a Zeova Wẽnnaam sẽn kɩt tɩ b bãng tɩ ãdem-biisã ra tõe n paama vɩɩm sẽn-kõn-sa wã bɩ? Yɩɩ a Ãdem yel-wẽndã poor bala. Masã, bɩ d vaees n ges b sẽn deng n togs pipi t’a Zezi Kirist ra na n yɩɩ ãdem-biisã Fãagdã to-to.
Yagengã b sẽn kãabã
5. Wãn-wãn la d tõe n bãng waaf ning sẽn belg a Hawa wã sẽn ya a soaba?
5 Ne gom-makdem tũnugri, a Zeova Wẽnnaam wilga Fãagdã b sẽn kãabã sẽn ya a soaba. A maana woto, a sẽn wa n togsd bʋ-kaoorã ‘waafã’ sẽn da gom ne a Hawa la a kʋɩɩb-a t’a kɩɩs Wẽnnaam n dɩ tɩɩg ning biig b sẽn gɩdgã yĩnga. (Sɩngre 3:1-5) Yaa sɩd tɩ wag-kãng ra pa waaf sɩdgem-sɩdgem ye. A ra yaa bõn-naandg sẽn yaa vʋʋsem sẽn tar pãng tɩ b wilgd Biiblã pʋgẽ t’a yaa “wag-kʋdre sẽn boond tɩ diaabl la Sʋɩtãana.” (Wilgri 12:9) A Sʋɩtãan tũnuga ne rũn-kãngã bal n belg a Hawa. Woto, Wẽnnaam sẽn kao a Sʋɩtãan bʋʋdã, a yeel-a lame: “Mam na n ninga beem foo ne paga sʋka, la fo yagenga ne yẽ yageng sʋka. Yẽ yageng [pagã yageng] na n pogla fo zugu, la fo na n pogla yẽ nao-kãsengkãare.”—Sɩngre 3:15.
6, 7. a) Ãnd la pag ning sẽn dog “yagenga”? b) Ãnd la Yageng ning b sẽn kãabã, la bõe la a pidsda?
6 Ãnda la “paga” a Sʋɩtãan sẽn tar beem, bɩ kisgr ne wã? Wala ‘wag-kʋdrã’ b sẽn wilg a sẽn ya a soab Wilgri sak 12 wã pʋgẽ wã, yaa woto me ne pʋg-kãngã a Sʋɩtãan sẽn kisã. Ges-y tɩ verse a 1 wã pʋgẽ b wilgame tɩ pagã “pil[a] wĩndga wa fuug[u], la kiuugã bee a nao wã tẽngre, la maanf sẽn tar ãds piig la a yiib bee a zugu.” Pʋg-kãngã makda Wẽnnaam yĩngr siglgã sẽn yaa kɩs-sɩd malɛk rãmbã, la ‘biriblã’ makda Wẽnnaam Rĩungã t’a Zezi Kirist rɩt naam wala Rĩmã.—Wilgri 12:1-5.
7 Ãnda masã la pagã “yageng” bɩ bi-kãngã, b sẽn gom a yell Sɩngre 3:15 pʋgẽ wã, sẽn na n beds a Sʋɩtãan ‘zugã,’ tɩ rẽ na n kell n yɩ a kũum wẽebã? Yaa ned ning Wẽnnaam sẽn tʋm t’a yi saasẽ n wa rog ne yel-solemd ne pa-kul tũnugrã, n-yẽe, rao a Zezi. (Matɩe 1:18-23; Zã 6:38, NW ) Wilgri sak 12 wã vẽneg n togsame tɩ wala saasẽ naab sẽn vʋʋge, Yageng kãngã, sẽn yaa a Zezi Kiristã, n da na n lʋɩ taoor n tõog a Sʋɩtãan la a kɩt tɩ “tõnd Wẽnnaam soolem ne bãmb Kirist pãnga” wa wala Wilgri 12:10 sẽn yetã.
8. a) Bõn-paalg bʋg la Wẽnnaam kõ sẽn tɩ loe ne a pipi raabã? b) Ãnd n be Wẽnnaam goosneema paalgã pʋgẽ?
8 Woto, Rĩung kãngã sẽn be a Zezi Kirist nugẽ wã yaa bõn-paalg Wẽnnaam sẽn kõ sẽn tɩ loe ne a pipi raabã ne ninsaalbã, sẽn yaa tɩ b vɩɩmd wakat sẽn-kõn-sa tẽng zugã. A Sʋɩtãan wɛgengã poore, tao-tao bala a Zeova rɩka segls n na n sãam wẽnema bi-wẽns fãa ne Rĩung goosneem paalg kãngã tũnugri. A Zezi sẽn da wa n be tẽng zugu, a wilgame t’a ra pa na n yɩ a yembr goosneem kãngã pʋgẽ ye. (Luk 22:28-30) B ra na n tũusa neb a taab ãdem-biisã sʋka, la bãmb da na n lagma ne-a saasẽ n dɩ naamã, tɩ ne woto bɩ b lebg pagã yageng bab-pʋgdga. (Galat dãmba 3:16, 29) Biiblã pʋgẽ, a Zezi na-rɩt-n-taas kãensã sõor fãa b sẽn yãk ãdem-biisã sẽn yaa yel-wẽn-maandb sʋk tẽng zugã, kõome tɩ yaa 144 000.—Wilgri 14:1-3.
9. a) Bõe yĩng t’a Zezi ra segd n puk tẽng zug wala ninsaala? b) Wãn-wãn la a Zezi sãam Munaafɩɩkã tʋʋma?
9 Baasg zãngã, sẽn deng tɩ Rĩung kãng tõog n sɩng naam dɩɩbo, ra yaa tɩlae tɩ Yagengã pipi babg sẽn yaa a Zezi Kiristã puk tẽng zugu. Bõe yĩnga? Bala a Zeova Wẽnnaam ra yãk-a-la wala a soab ning sẽn “na n sãam Sʋɩtãana tʋʋma [bɩ n kɩt tɩ yɩ zaalma].” (1 Zã 3:8) Bũmb sẽn be a Sʋɩtãan tʋʋmã sʋk ya a sẽn tus a Ãdem t’a maan yel-wẽndã, tɩ rẽ wa ne bʋ-kaoor ning sẽn yaa yel-wẽnd la kũum a Ãdem yagensã fãa zutã. (Rom dãmba 5:12) A Zezi maaname tɩ Munaafɩɩkã tʋʋm-kãngã yɩ zaalem a sẽn kõ A vɩɩmã wala yao-n-dɛɛkã. Woto a Zezi kõo yẽbgr tɩ b tõe n fãag ãdem-biisã ne yel-wẽnd la kũum bʋ-kaoore, la a pak sor vɩɩm sẽn-kõn-sa wã yĩnga.—Matɩe 20:28; Rom dãmba 3:24; Efɛɛz rãmba 1:7.
Yao-n-dɛɛkã sẽn pidsd bũmb ningã
10. Wãn-wãn la a Zezi ne a Ãdem ra wõnd taaba?
10 B sẽn yiis a Zezi vɩɩmã saasẽ n wa ning pag pʋgẽ wã yĩnga, a rogame n yaa ninsaal sẽn zems zãng t’a Ãdem yel-wẽndã pa rẽgm-a wã. A ra tara tõog n na n vɩɩmd wakat sẽn-kõn-sa tẽng zugu. Woto me, b ra naana a Ãdem wala ninsaal sẽn zems zãng ne saagr ning sẽn yaa paam n vɩɩmd wakat sẽn-kõn-sa tẽng zugã. Tʋm-tʋmd a Poll ra tagsda wõneg kãng sẽn be roap a yiib kãensã sʋkã yell a sẽn wa n gʋls woto wã: “ ‘Pipi ninsaal a Ãdem lebga sɩ-vɩɩga.’ Yaoolem Ãdem [a Zezi Kirist] lebga vʋʋsem sẽn kõt vɩɩm. Pipi ninsaalã yita tẽngã la a maana ne tom, ninsaal a yiib soabã yẽ yita yĩngri.”—1 Korẽnt dãmba 15:45, 47, NW.
11. a) Bõe pãn-tusdg la a Ãdem la a Zezi tall ãdem-biisã zutu? b) Wãn-wãn la d segd n ges a Zezi yao-n-dɛɛkã?
11 Biiblã togsg wilgda vẽeneg tɩ nin-kãensã a yiibã wõnda taaba, bãmb sẽn yaa roap sẽn zems zãng a yiib balã sẽn zĩnd tẽng zugã. A yetame t’a Zezi “kõo a meng wala yao-n-dɛɛk sẽn zems neba fãa yĩnga.” (1 Tɩmotɩ 2:6, NW ) Ãnda la a Zezi zemsd ne? N-yẽe, a ra zemsda ne a Ãdem a sẽn da ket n yaa rao sẽn zems zãngã! Pipi Ãdmã yel-wẽnd kɩtame tɩ b kao ãdem-biisã fãa bʋʋd tɩ zems ne kũum. “Yaoolem Ãdmã” maoong kõta yẽbgr fãagr ne yel-wẽnd la kũum yĩnga, sẽn na yɩl tɩ d tõog n vɩɩmd wakat sẽn-kõn-sa. Ad a Zezi maoongã sɩd tara yõod wʋsgo! Tʋm-tʋmd a Pɛɛr wilgame: “Ka ne bõn-sãamdse sẽn wẽnd wanzũri wala sãnem la yãmb paam fãagre” ye. A Pɛɛr wilgame tɩ sẽn yaa lebend ne rẽ, “yaa ne Kirist zɩɩm sẽn yaa sõama, bãmb yɩɩ wa pe-bi sõngo sẽn ka tar yell ye.”—1 Pɛɛr 1:18, 19.
12. Wãn-wãn la Biiblã bilgd b sẽn na n maan to-to tɩ bʋʋd b sẽn kao tɩ zems ne kũumã tõnd zutã yɩ zaalem?
12 Ges-y Biiblã sẽn bilgd ne manesem sẽn be rasãnd b sẽn na n maan to-to tɩ ninsaalbã bʋʋd b sẽn kao tɩ zems ne kũumã yɩ zaalmã: “A wa beegr a yembr [a Ãdem dẽndã] sẽn wa ne bʋʋd sẽn yaa toog neba fãa yĩngã, woto me, tɩrlem tʋʋmd [a Zezi burkĩndlem vɩɩmã tõre, sẽn tall n baas ne a kũumã] a yembr waa ne zemsgo sẽn wat ne vɩɩm neba fãa yĩngã. Tɩ bõe, a wa rao a yembr [a Ãdem] kɩɩsg yĩng sẽn kɩt tɩ wʋsg lebg yel-wẽna rãmbã, dao a yembr [a Zezi] sakr yĩng me, wʋsg na n lebga nin-tɩrse.”—Rom dãmba 5:18, 19.
Saagr sẽn be ziiri
13. Bõe yĩng tɩ neb wʋsg tagsd woto vɩɩm sẽn-kõn-sa wã wɛɛngẽ?
13 Wẽnnaam segls kãensã segd n kɩtame tɩ d tall sũ-noog wʋsgo! Yãmb yĩng pa sidgd b sẽn kõ Fãagda yĩng sɩda? “Vɩɩm sẽn-kõn-sa wã yamleoog tara yãmb bɩ?” B maana yaoolem sʋk-kãngã ãnkɛt pʋgẽ, n yiis a rezilta wã Etazĩni galʋ-tẽn-kãseng a ye zʋrnall pʋgẽ. Yɩɩ lingri, sẽn leok-bã 67,4 koabg zug sẽn leok tɩ “Ayo” wã. Bõe yĩng tɩ b yeel tɩ b ra pa rat n vɩɩmd wakat sẽn-kõn-sa? Vẽenega yaa masã tẽng zug vɩɩmã sẽn lagem ne zu-loees wʋsgã yĩnga. Ned a ye yeelame: “Tags tɩ m wõnda yʋʋm 200 nin-kẽem yamleoog pa tar maam ye.”
14. Bõe yĩng tɩ vɩɩmd wakat sẽn-kõn-sa na n kõ yamleoog tɩ pidi?
14 Baasg zãnga, pa vɩɩmdg wakat sẽn-kõn-sa dũni pʋgẽ, tɩ be bɩ neb namsd ne bãase, kʋʋlem, la yel-beed a taab yell la Biiblã gomd ye. Ayo, bala a sẽn yaa Wẽnnaam Rĩungã naabã, a Zezi na n yiisa zu-loees a woto a Sʋɩtãan sẽn wa ne wã. Sã n yaa ne Biiblã, Wẽnnaam Rĩungã “na n wãa [dũni kãngã goosneem weoogds] kãens fãa tɩ b menem.” (Daniɛll 2:44) Wakat kãnga, sẽn na yɩl n leok pʋʋsg ning a Zezi sẽn zãms a karen-biisã, Wẽnnaam “daabã” na n “maana tẽng zug wala a sẽn maand saasẽ wã.” (Matɩe 6:9, 10, Today’s English Version) Wẽnnaam dũni paalgã pʋgẽ, b sã n yɩlg tẽngã ne wẽng fãa poore, b na n dɩka a Zezi yao-n-dɛɛkã nafa n tʋm tɩ pidi. N-yẽe, b rãmb nins fãa sẽn tar zʋgd ning sẽn zemsã na n lebs n paama laafɩ sẽn zems zãnga!
15, 16. Yel-bʋs n na n zĩnd Wẽnnaam dũni paalgã pʋgẽ?
15 Biiblã gom-kãensã na n paama pidsg neb nins sẽn na n vɩɩmd Wẽnnaam dũni paalgã pʋgẽ wã zutu: “A yĩnga na n le yɩɩ sõama n yɩɩd a yãadem wakate. Yẽ na n le lebga wa a sẽn da yaa bũmb ninga a bi-bɩɩlem wakatã.” (Zoob 33:25) Biiblã kãabg a to kãngã me n na n paam pidsgu: “Zõens nin na n pukame la wʋms tʋb na n yoosame. Dẽ, wobs na n yikame n tĩims wa yãgse la mugs zɛlma na n laka ne sũ-noog yɩɩla.”—Ezai 35:5, 6.
16 Yãmb wee n tags n gese: D yʋʋmã sẽn ta to-to fãa, d tara yʋʋm 80, yʋʋm 800, bɩ yɩɩd woto menga, tõnd yĩnsã na n kell n talla laafɩ sẽn yaa sõma wʋsgo. Na n yɩɩ wala Biiblã sẽn kãabdã: “Ned ba a ye ka na n le yeel t’a ka laafɩ ye.” Wakat kãnga, kãab-kãngã me na n paama pidsgu: “[Wẽnnaam] na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre wala toog kõn le zĩnd yɛs ye, tɩ bõe, dẽenem bũmb fãa loogame.”—Ezai 33:24; Wilgri 21:3, 4.
17. Tʋʋm bʋs la d tõe n gẽeg tɩ nebã pids Wẽnnaam dũni paalgã pʋgẽ?
17 Dũni paalg kãng pʋgẽ, d na n tõog n tʋma ne d kalkõtã sẽn yaa bõn-yɛɛsdgã ne manesem ning d Naandã sẽn da tʋll tɩ b rɩk-a n tʋm a sẽn wa n yag-a ne zãmsg tõog sẽn ka koakã. Yãmb wee n tags n ges yɛl sẽn be yamleoog nins d sẽn na n tõog n pidsã! Baa ninsaalb sẽn pa zems zãng tũnuga ne tẽngã teed n maan bũmb nins fãa d sẽn ne tɩ gũbg tõndã, telefõn b sẽn zɩt n kẽnda, mikoro rãmba, monta, gɩfẽ telefõn teedo (récepteur d’appel), ordinatɛɛr dãmba, sɩlse, n-ye, y tõe n sõdga y sẽn mi fãa. B pa tũnug ne teoog b sẽn zɩ ãndũniyã wɛɛng a to zĩ-zãrgẽ n wa ne n maan bãmb ba a yembr ye. Ne vɩɩm sẽn ka koakã sẽn gũud-d tẽng zug Arzãna sẽn watã pʋgẽ, tõog sẽn na yɩl n pids naaneg tʋʋmã ka na n tall koak ye!—Ezai 65:21-25.
18. Bõe yĩng tɩ vɩɩmã pa na n tol n tall yam-yiisg Wẽnnaam dũni paalgã pʋgẽ?
18 Vɩɩmã pa na n lebg yam-yiisg bũmb me ye. Masã menga, d gũuda d rɩɩb ning sẽn watã ne yãgbo, baa sã n tõeeme tɩ d zoe n dɩɩ rɩbd tus pi-gĩna. Ninsaal zems-zãngã pʋgẽ, d na n talla sũ-noog sẽn yaa kãseng n yɩɩd meng ne tẽng-zug Arzãna bõn-noodo. (Ezai 25:6) Sẽn paase, d na n paama wakat sẽn-kõn-sa sũ-noog ne tẽngã rũms wʋsgã yell gesgo, la d sã n wa get a wĩnd-lʋɩɩsã sẽn be rasãndã ne yamleoogo, tãensã, kʋɩlsã, la zĩ-londã. Sɩd-sɩda, vɩɩmã kõn tol n yɩ yam-yiisg bũmb Wẽnnaam dũni paalgã pʋgẽ ye!—Yɩɩl Sõamyã 145:16.
D pids Wẽnnaam sẽn baood tɩ d maanã
19. Bõe yĩng tɩ zems tɩ d tẽ tɩ yɛl la b baood tɩ d pids sẽn na yɩl n paam Wẽnnaam kũunã sẽn yaa vɩɩmã?
19 Y na n saagame n paam Wẽnnaam kũun kãseng kãngã sẽn yaa vɩɩm sẽn-kõn-sa Arzãna pʋgẽ n pa maan baa fɩ a yĩng bɩ? Pa bũmb sẽn zems tɩ Wẽnnaam bao tɩ tõnd maan bũmb sɩda? Sik kae tɩ yaa woto. Togs sɩda, Wẽnnaam pa rɩkd kũuna n lob-d bal tɩ d sok ye. A rɩkd-a lame n tees-do, la tõnd tog n tẽega d nug n deeg-a. N-yẽe, rẽ baooda modgre. Dẽ, tõe tɩ y maan sʋkr ning meng naab sẽn yaa ra-kãagr sẽn yaa bi-bɩɩgã sẽn maan a Zezi wã: “Bõe la m tog n maane sẽn yaa sõama tɩ m tõe n paam vɩɩm sẽn ka sɛta?” Bɩ tõe tɩ y maneg sʋkrã n maan-a wala bãens roog gũud sẽn yaa Filip nedã sẽn sʋk tʋm-tʋmd a Poll to-to wã: “Mam na n maana wãn n paam fãagre?”—Matɩe 19:16; Tʋʋma 16:30.
20. Bõn-kãseng bʋg la b baood tɩ d maan sẽn na yɩl n paam vɩɩm sẽn-kõn-sa wã?
20 Yʋng ning sẽn deng a kũumã, pʋʋsg a sẽn maan a yĩngr Ba wã pʋgẽ, a Zezi togsa bõn-kãseng a ye woto b sẽn baood tɩ d maane: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.” (Zã 17:3) Pa bũmb sẽn zems tɩ d bao n paam n bãng a Zeova, sẽn kɩt tɩ vɩɩm sẽn-kõn-sa wã tõe n zĩndã, la a soab ning sẽn ki tõnd yĩngã, sẽn yaa a Zezi Kiristã sɩda? Baasg zãnga, b baooda sẽn yɩɩd bãngr a woto paoongo.
21. Wãn-wãn la d wilgd tɩ d tara tẽebo, sẽn yaa bũmb ning b sẽn baood tɩ d maana?
21 Biiblã yetame me: “Ned ninga sẽn wilgd tẽeb ne Biriblã tara vɩɩm sẽn-kõn-sa.” Rẽ poore a paasame: “Ned ninga sẽn kɩɩsd Biriblã ka na n yã vɩɩm ye, la Wẽnnaam sũ-puugrã paada yẽ zugu.” (Zã 3:36, NW ) Y tõe n wilgame tɩ y tara tẽeb ne Biriblã y sã n maan toeeng y vɩɩmã pʋgẽ t’a zems ne Wẽnnaam daabã. Y segdame n bas manesem sẽn yaa wẽng buud fãa y sẽn da tõe n tar pĩnda, tɩ rẽ poor bɩ y maan bũmb sẽn noom Wẽnnaam. Y segd n maana tʋm-tʋmd a Pɛɛr sẽn kõ noor ning woto wã: “Woto yĩnga, bɩ y tek yam n kos sugri, la y toeem sẽn na yɩl tɩ y yel-wẽna paam yiisgu, tɩ pɛlg-kengr wakat tõog n yi a Zeova meng nengẽ n wa.”—Tʋʋma 3:19, NW.
22. Bõe tʋʋm me n be a Zezi nao wã tũub sʋka?
22 Bɩ d ra tol n yĩm tɩ yaa d sẽn na n wilgd tẽeb ne a Zezi bal la d tõe n paam vɩɩm sẽn-kõn-sa wã ye. (Zã 6:40; 14:6) D wilgdame tɩ d tara tẽeb ne a Zezi d sẽn na n ‘tũud a nao wã neere.’ (1 Pɛɛr 2:21, NW ) Woto maaneg baoodame tɩ d maan bõe me? Be neere, pʋʋsg a sẽn maan Wẽnnaam pʋgẽ, a Zezi zẽka a koɛɛg n yeele: “Gese, Wẽnnaam, mam waame n na n maan yãmb daabo.” (Hebre 10:7) Tara yõod wʋsg tɩ d rɩk a Zezi togs-n-taar n sak n maan Wẽnnaam daabã la d rɩk d vɩɩmã n kõ a Zeova. Rẽ poore, y segdame n mak rɩk-f-meng-n-kõ kãng ne koom lisgu. A Zezi me wilga a meng lisgã yĩngã. (Luk 3:21, 22) Zĩ-longds kãensã gãngr zemsa kɛpɩ. Tʋm-tʋmd a Poll wilgame tɩ “Kirist nonglem n so [n tusd] tõndo.” (2 Korẽnt dãmba 5:14, 15) Wãn-wãna? Nonglem tusa a Zezi t’a kõ a vɩɩmã tõnd yĩnga. Rẽ pa segd n tus tõnd tɩ d sak n wilg tẽeb ne-a sɩda? N-yẽe, a segd n tusa tõnd tɩ d tũ a nonglem mak-sõngã n kõ d mens n sõng neb a taabã. Kirist vɩɩmdame n maan Wẽnnaam daabã. Tõnd me segd n maana woto, n da ye vɩɩmd tõnd mens yĩng ye.
23. a) Ne bõe la neb nins sẽn paamd vɩɩmã segd n tɩ paase? b) Bõe la b baood tɩ neb nins sẽn be kiris-neb tigengẽ wã maane?
23 La pa tɛk la woto ye. Biiblã yetame tɩ neb 3 000 wã sẽn wa n deeg lisg yʋʋmd 33 T.W. Pãntekotã yaa neb sẽn wa n ‘paase.’ B wa n paasa bõe? “Bãmb kell n kẽesda b mens tʋm-tʋmdbã zãmsg pʋgẽ la b lagemd taab[a],” woto la a Luk wilgda. (Tʋʋma 2:41, 42, NW ) N-yẽe, b tigma taab Biiblã zãmsg yĩnga, la b maan lagem-n-taare, tɩ ne woto bɩ b rɩk-b n paas neb a taaba, bɩ b yɩɩ kiris-nebã tigengã neba. Pipi kiris-nebã ra tigemda taab wakat fãa tẽeb zãmsg yĩnga. (Hebre dãmba 10:25) Rũndã-rũndã a Zeova Kaset rãmbã me maanda woto, la b nongame n daool yãmb tɩ y wa tigis-kãens ne bãmba.
24. “Vɩɩm sẽn yaa sɩda” yaa bõe, la wãn-wãn la wakat bʋg la a na n zĩndi?
24 Masã neb milyõ rãmb n tũud so-sẽk ning sẽn tar n debd vɩɩmẽ wã. So-kãng zug paab baooda modgr menga! (Matɩe 7:13, 14) A Poll wilga rẽnda a booll ning sẽn kengd sũurã pʋgẽ woto: “Zab tẽeb zabr sõama, la gãd vɩɩm sẽn-ka-sɛtã, vɩɩm ninga Wẽnnaam sẽn bool foo tɩ f paamã.” Zab-kãng zabr yaa tɩlae sẽn na yɩl n “paam vɩɩm sẽn yaa sɩda.” (1 Tɩmotɩ 6:12, 19) Vɩ-kãng pa masã vɩɩmã sẽn tar tood la namsg a Ãdem yel-wẽndã sẽn wa ne wã ye. Walla tɩ yɩ woto, yaa Wẽnnaam dũni paalgã pʋgẽ vɩɩmdgo, sẽn na n zĩnd ka la bilfu, b sã n wa rɩk Kirist yao-n-dɛɛkã n tʋm tɩ naf neb nins fãa sẽn nong a Zeova Wẽnnaam la a Biriblã, b sã n wa yiis yɛl siglg kãngã wã. Bɩ tõnd fãa yãk vɩɩmã: “vɩɩm sẽn yaa sɩda,” vɩɩm sẽn-kõn-sa wã Wẽnnaam dũni paalgã sẽn tar ziirã pʋgẽ.
Wãn to la y na n leokẽ?
◻ Ãnd la waafã, pagã, la yagengã Sɩngre 3:15 pʋgẽ wã?
◻ Wãn-wãn la a Zezi ra zems ne a Ãdem, la bõe la yao-n-dɛɛkã kɩt tɩ tõe n yɩ?
◻ Bõe la y tõe n gẽeg sẽn na n kɩt tɩ Wẽnnaam dũni paalgã tall yamleoog wʋsg ne-yã?
◻ Yel-bʋs b sẽn baood tɩ d maan la d segd n tũ sẽn na yɩl n zems ne vɩɩmã Wẽnnaam dũni paalgã pʋgẽ?
[Picture on page 9]
Ne kom-bɩɩs la nin-kẽemba, a Zezi yaa sor ning bal sẽn tar n debd vɩɩm sẽn pa satẽ wã
[Picture on page 10]
Wakat ning Wẽnnaam sẽn yãkã pʋgẽ, sẽn kʋʋl-bã na n lebs n paama bi-bɩɩlem pãnga