Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • kr sak 9 s.n. 87-97
  • Koe-moonegã biisi: “Pʋtã . . . pelgame n ta tigsg masã”

Video pa be zĩ-kãngã ye.

Video wã pa tõog n yi ye.

  • Koe-moonegã biisi: “Pʋtã . . . pelgame n ta tigsg masã”
  • Wẽnnaam Rĩungã Rĩm rɩta naam!
  • Gom-zu-bõonesã
  • Bũmb sẽn wõnd woto
  • Yaa tʋʋm-yãgdem, tʋm-tʋmdbã me paamda sũ-noogo
  • D Rĩmã lʋɩta tigsg ning sẽn ka to wã taoore
  • B reng n wilga tigsgã sẽn na n wom biis ninsi
  • A Zeova nin-buiidã sẽn maand sũ-noogã võore
  • “Hal sẽn sɩng yaang tɩ ta nin-taoore”
  • Nang-y pãng tigisgã pʋgẽ!
    Gũusg Gasgã moonda a Zeova Rĩungã​—⁠2001
  • Pʋtã pelgame n ta tigsgu
    Yʋʋmd 2010 Rĩungã tʋʋmde
  • Yɩ-y tigisdb sẽn tar sũ-noogo!
    Gũusg Gasgã moonda a Zeova Rĩungã​—⁠2001
  • Tʋm-y tigisgã tʋʋmd ne y sũur fãa
    Gũusg Gasgã moonda a Zeova Rĩungã​—⁠2010
Bũmb a taaba
Wẽnnaam Rĩungã Rĩm rɩta naam!
kr sak 9 s.n. 87-97

SAK A 9

Koe-moonegã biisi: “Pʋtã . . . pelgame n ta tigsg masã”

D SẼN NA N GOM BŨMB NING YELL SAKÃ PƲGẼ:

A Zeova kɩtame tɩ Rĩungã koɛɛg d sẽn bʋd nebã sũyẽ wã wom biisi

1, 2. a) Bõe yĩng t’a Zezi karen-biisã ra pa wʋmd a goamã võore? b) Bõe la a Zezi sẽn mak ne tigsgã?

DAAR a ye, a Zezi yeela a karen-biisã bũmbu, tɩ b yas n pa wʋmd a võor ye. A yeel-b lame: “Zẽk y nens n ges pʋtã, tɩ bõe, bãmb pelgame n ta tigsg masã.” B sɩd zẽka b nens n ges a sẽn teesẽ wã, la b yãame tɩ pʋtã pa pelg ye. Koodã ra ket n yaa kẽeg haoo! Nan pa yao tigsg ye. Tõe tɩ b soka b mens yaa: ‘Yaa bõe tigsg yell la a Zezi sẽn gomdã?’ Bala ‘ra keta kiis wʋsg tɩ tigsgã wakat ta.’—Zã 4:35.

2 A Zezi ra pa gomd tigsg sɩd-sɩd yell ye. Yaa b sẽn na n tigim neb kiris-neb tigingã pʋgẽ ne koɛɛgã mooneg maasmã la a sẽn mak ne tigsgã. A ra rat n sõnga a karen-biisã tɩ b bãng bũmb a yiib sẽn tar yõod tʋʋm-kãng wɛɛngẽ. Yaa bõe la rẽ? Sẽn na yɩl n bãnge, bɩ d maneg n gom kibarã yelle.

Yaa tʋʋm-yãgdem, tʋm-tʋmdbã me paamda sũ-noogo

3. a) Tõe tɩ yaa bõe n kɩt t’a Zezi yeel tɩ “pʋtã . . . pelgame n ta tigsg masã” wã? (Ges-y vẽnegrã.) b) Bõe la a Zezi yeel sẽn na yɩl tɩ karen-biisã wʋm a gomdã võore?

3 A Zezi sẽn wa n gomd ne a karen-biisã tɩ b pẽe Samari tẽng a ye sẽn boond tɩ Sisaar. Yɩɩ yʋʋmd 30 wã saabẽ. Karen-biisã reng n kẽe tẽngã pʋg n bas a Zezi t’a zĩ bulg noore, tɩ pag a ye wa be t’a taas-a Wẽnnaam koɛɛgã. La tao-tao bala, pagã bãngame t’a goamã tara yõod wʋsgo. Karen-biisã sẽn lebg n wa wã, pagã zoe n kẽnga Sisaar n tɩ togs a yagsã bũmb nins a sẽn wʋmã. A goamã kɩtame tɩ b rat n wa kelg a Zezi. B kaoogame n wat bulgẽ wã. Tõe tɩ wakat kãnga, a Zezi zẽka a neng n kell n yã Samari nebã sẽn be pʋtã poorẽ n watẽ. Rẽ la a yeel a karen-biisã: “Zẽk y nens n ges pʋtã, tɩ bõe, bãmb pelgame n ta tigsg masã.”a La sẽn na yɩl t’a karen-biisã bãng tɩ pa tigsg sɩd-sɩd yell la a sẽn da gomdã, a paasa woto: “Ned ninga sẽn tigsda . . . wʋkda biis n bĩngd vɩɩm sẽn ka sɛtã yĩnga.”—Zã 4:5-30, 36.

4. a) Bũmb a yiibã a Zezi sẽn da rat n sõng a karen-biisã tɩ b bãngã la bʋse? b) Sogs-bʋs la d na n leoke?

4 Bũmb a yiibã a Zezi sẽn da rat n sõng a karen-biisã tɩ b bãng koɛɛgã mooneg wɛɛngẽ wã la bʋse? Pipi, koɛɛgã mooneg yaa tʋʋm-yãgdem. A sẽn yeel tɩ “pʋtã . . . pelgame n ta tigsg masã” wã, a ra ratame t’a karen-biisã bãng tɩ b segd n kẽesa b toog tʋʋmdẽ wã. Sẽn na yɩl tɩ b sɩng tao-tao, a paasame: “Ned ninga sẽn tigsda, a paamda yaoodo.” Dẽnd tʋʋmdã ra zoe n sɩngame, tɩ b ka segd n maan maas-maas ye. Yiib-n-soaba, tʋm-tʋmdbã paamda sũ-noogo. A Zezi yeelame tɩ sẽn bʋt-bã la sẽn kẽebd-bã “na n lagem n paama sũ-noogo.” (Zã 4:35b, 36) A Zezi meng sẽn yã tɩ ‘Samari rãmbã wʋsg . . . tẽe yẽ’ wã, a sũurã tog n yɩɩ noogo. Woto me, a karen-biisã sã n moon koɛɛgã ne b sũy fãa, b na n paama sũ-noogo. (Zã 4:39-42) Rũndã-rũndã, tigsg tʋʋmd sẽn ka to la b tʋmda. Dẽnd kiba-kãngã sẽn togsd bũmb sẽn maan pipi kiris-nebã wakatã sõngda tõnd tɩ d bãng bũmb sẽn tar yõod wʋsg tʋʋm-kãng wɛɛngẽ. La rũndã-rũndã tigsgã sɩnga wakat bʋgo? Ãnd dãmb la tʋm-tʋmdbã? B tʋʋmdã woma bi-bʋse?

D Rĩmã lʋɩta tigsg ning sẽn ka to wã taoore

5. Ãnd n yaa tigsgã taoor-soaba, la a Zã sẽn yã bũmb ningã pʋgẽ, bõe n wilgd tɩ yaa tʋʋm-yãgdem?

5 A Zeova vẽnega a Zã t’a yã bũmb sẽn wilgd tɩ yaa a Zezi la a yãk t’a na n lʋɩ taoor n tigs neb dũniyã gill zug tɩ b wa kiris-neb tigingã pʋgẽ. (Karm-y Wilgr 14:14-16.) A Zã yãa a Zezi sẽn fõgen sãnem maanfo, la a zãad goeego. “Sãnem maanfã” a sẽn fõgã wilgdame t’a ra zoe n lebga Rĩma. “Goeegã” sẽn be a nugẽ wã wilgdame tɩ yaa yẽ la tʋʋmdã taoor soaba. A Zeova sẽn kɩt tɩ malɛk yeel tɩ “dũniyã bõn-koaadlã bɩɩme” wã wilgdame tɩ yaa tʋʋm-yãgdem. Sɩd me, ‘wʋrbã wakat taame,’ sẽk kae n maand maas-maas ye! Wẽnnaam sẽn yeel tɩ “rɩk-y yãmb goeegã,” a Zezi sɩd rɩka a goeegã n wʋr dũniyã. Woto rat n yeelame t’a tigsa neb dũniyã gill zugu. A Zã sẽn yã bũmb ningã me tẽegda tõnd tɩ “pʋtã . . . pelgame n ta tigsg masã.” Leb n sõngda tõnd tɩ d bãng dũniyã gill zug tigsgã sẽn sɩng wakat ninga. Bõe yĩng tɩ d yet woto?

6. a) “Tigsgã wakat” sɩnga yʋʋm-bʋgo? b) Wakat bʋg la b sɩng n na n “tigs dũniyã bõn-koaadlã,” la bõe n wilgd rẽ?

6 Wilgr sak 14 pʋgẽ, a Zezi sẽn yaa tigsgã taoor soabã ra zoe n fõga maanfo (vɛrse 14). Dẽnd ra yaa a sẽn deeg a naamã yʋʋmd 1914 poore. (Dan. 7:13, 14) Rẽ poore, b kõo a Zezi noor t’a sɩng wʋrbo (vɛrse 15). Yɛlã sẽn pʋg taab to-to wã yɩɩ wa a Zezi yel-bũnd ning pʋgẽ a sẽn gom ki tigsg yelle, n yeel tɩ “tigsgã yaa dũniyã sɛɛbã.” Dẽnd tigsgã wakat ne dũniyã sɛɛb wakat sɩnga yʋʋm-yɛnga. Yɩɩ yʋʋmd 1914. La “tigsgã wakat” reng n sɩngame, tɩ tigsgã meng-meng yaool n na n sɩnge. (Mat. 13:30, 39) Rũndã-rũndã, d bãngame tɩ tigsgã meng-meng sɩnga yʋʋm a wãn a Zezi naamã reegr poore. Yʋʋmd 1914 n tãag 1919 wã sɩngrẽ, a Zezi wa n gesa sẽn paam-b zaeebã, n maneg-b bɩ n yɩlg-ba. (Mal. 3:1-3; 1 Pɩɛ. 4:17) Yʋʋmd 1919 wã la b sɩng n na n “tigs dũniyã bõn-koaadlã.” Tao-tao bala, a Zezi tũnuga ne tʋm-tʋmd sẽn tũud sɩdã a sẽn yãk paalmã, n sõng kiris-nebã tɩ b bãng tɩ koɛɛgã mooneg yaa tʋʋm-yãgdem. Bɩ d ges a sẽn sõng-b to-to.

7. a) Bõe la saam-biisã maan tɩ sõng-b tɩ b bãng tɩ koɛɛgã mooneg yaa tʋʋm-yãgdem? b) Bõe la b sagl saam-biisã tɩ b maane?

7 Yʋʋmd 1920 sẽoog kiuug Gũusg Gasgã pʋgẽ, b yeela woto: “D sẽn vaees Gʋlsg sõamyã, wõnda yaa vẽeneg tɩ kiris-nebã paama sor n na n taas Rĩungã koɛɛgã, tɩ yaa zu-zẽkre.” Wala makre, a Ezai sẽn deng n togs bũmb ningã sõnga saam-biisã tɩ b bãng tɩ Rĩungã koɛɛgã tog n moona dũniyã gill zugu. (Ezai 49:6; 52:7; 61:1-3) B ra pa mi sẽn na n yɩ to-to tɩ tʋʋm-kẽeng woto tõog ye. La b ra kɩsa sɩd t’a Zeova na n sõng-b lame. (Karm-y Ezai 59:1.) Sẽn lebg vẽeneg tɩ koɛɛgã mooneg yaa tʋʋm-yãgdmã, b sagla d saam-biisã tɩ b wɩng ne tʋʋmdã n paase. Saam-biisã manesem yɩɩ wãna?

8. Togs-y bũmb a yiib saam-biisã sẽn bãng koɛɛgã mooneg wɛɛngẽ yʋʋmd 1921 wã.

8 Yʋʋmd 1921 yʋʋm-sar kiuugã, b yeela Gũusg Gasgã pʋgẽ woto: “Yʋʋmd 1921 wã ka to ye. Neb nins sẽn wʋm sɩdã koɛɛg rõandã wã yɩɩda yʋʋm nins sẽn loogã.” B paasame: “Baasgo, tʋʋmdã sẽn ketã yaa wʋsgo. . . . Bɩ d tʋm ne sũ-noogo.” Dẽnd saam-biisã me bãnga bũmb a yiibã a Zezi sẽn da wilg a tʋm-tʋmdbã koɛɛgã mooneg wɛɛngẽ wã. B bãngame tɩ yaa tʋʋm-yãgdem, la tɩ tʋm-tʋmdbã paamda sũ-noogo.

9. a) Yʋʋmd 1954, bõe la Gũusg Gasgã yeel koɛɛgã mooneg wɛɛngẽ, la bõe yĩnga? b) Wilg-y koe-moondbã sõor sẽn paam pãng to-to yʋʋm 50 wã sẽn loogã. (Ges-y zĩig ning sẽn gʋls tɩ “B sõorã paasame.”)

9 Yʋʋmd 1930 wã poore, saam-biisã sẽn bãng tɩ piis a taab sẽn yaa kʋʋn-kãseng n da na n sak Rĩungã koɛɛgã, b maneg n wɩnga ne koɛɛgã mooneg n paase. (Ezai 55:5; Zã 10:16; Wil. 7:9) Rẽ woma bi-bʋse? Yʋʋmd 1934, koe-moondbã ra yaa neb 41000. La yʋʋmd 1953 wã tɩ zẽk n taa neb 500000. Kɩtame tɩ yʋʋmd 1954 yʋʋm-sar kiuugã Gũusg Gasgã pʋgẽ, b yeel woto vẽenega: “Yaa ne a Zeova vʋʋsem sõngã maasem, la ne a Gomdã pãng la d sẽn tõog n tʋm tigsgã tʋʋmd dũniyã gill zugã.”b—Zak. 4:6.

B SÕORÃ PAASAME

Tẽnsã

1962

1987

2013

Ostrali

15 927

46 170

66 023

Berzill

26 390

216 216

756 455

Fãrense

18 452

96 954

124 029

Itali

6 929

149 870

247 251

Zapõ

2 491

120 722

217 154

Megsik

27 054

222 168

772 628

Nizeriya

33 956

133 899

344 342

Filipin

36 829

101 735

181 236

Etazĩni

289 135

780 676

1 203 642

Zãmbi

30 129

67 144

162 370

SẼN ZÃMSD-B BIIBLÃ SÕOR FƖƖGRE

1950

234 952

1960

646 108

1970

1 146 378

1980

1 371 584

1990

3 624 091

2000

4 766 631

2010

8 058 359

B reng n wilga tigsgã sẽn na n wom biis ninsi

10, 11. Siil bɩ mutard bilã yel-bũndã pʋgẽ, tɩɩgã sẽn bɩ to-to wã wilgda tõnd bõe?

10 Yel-bũn nins pʋgẽ a Zezi sẽn gom Rĩungã yellã, a wilgame tɩ koɛɛgã b sẽn moond rũndã-rũndã tɩ b mak ne tigsgã na n woma biisi. Bɩ d gom siil bɩ mutard bilã yel-bũndã ne rabɩllã yel-bũndã yelle. A Zezi sẽn yeel bũmb nins yel-bũn-kãensã pʋgẽ wã pidsda rũndã-rũndã sẽn yaa yaoolem wakatã. D na n yãa sẽn pidsd to-to.

11 Siil bɩ mutard bilã yel-bũndã: Yel-bũndã pʋgẽ, a Zezi yeelame tɩ rao a ye n bʋd mutard bila, t’a yi n lebg tɩ-bedre, hal tɩ liuuli wã wat n zao be. (Karm-y Matɩe 13:31, 32.) Tɩɩgã sẽn bɩ to-to wã wilgda bõe? 1) A sẽn bɩ n ta zĩig ningã yaa yel-solemde. A Zezi yeelame tɩ mutard bilã sẽn yaa ‘bilf n yɩɩd bõn-buudã fãa’ wã yiime n bɩ t’a wilã “lebg wogdo.” (Mark 4:31, 32) 2) A pa tõe n pa lebg bedr ye. A Zezi yeelame tɩ “b sã n bʋd-a, a yikdame.” A pa yeel tɩ “tõe t’a yik ye.” Dẽnd a pa tõe n pa yik ye. 3) Tɩɩgã lebga bedre, tɩ bõn-vɩɩs wat n zombdẽ, la b soond a maasmẽ. A Zezi yeelame tɩ “liuuli” wã wata be, n “tõe n tʋɩ b tʋgd a zug n kẽ.” Wãn to la koɛɛgã d sẽn moond rũndã-rũndã wã sõngd tɩ woto fãa pidsdẽ?

12. Koɛɛgã d sẽn moond rũndã-rũndã wã pʋgẽ, wãn to la mutard bilã yel-bũndã pidsda? (Ges-y zĩig ning me sẽn gʋls tɩ “Sẽn zãmsd-b Biiblã sõor fɩɩgre.”)

12 1) A sẽn bɩ n ta zĩig ningã: Mutard bilã yel-bũndã wilgda koɛɛgã sẽn na n yelg to-to, la kiris-neb tigingã sẽn na n fɩɩg to-to wã me. Yʋʋmd 1919 wã tɛka, b tigsa koe-moondb sẽn tar yẽesem kiris-neb tigingã b sẽn da maneg n luglã pʋgẽ. Wakat kãngã, b sõorã ra pa waoog ye. La pa yã n kaoos la b lebg wʋsg ye. Sɩd me, b sõorã sẽn fɩɩg to-to yʋʋmd 1900 wã tɛk n tãag rũndã wã yaa yel-solemde. (Ezai 60:22) 2) A pa tõe n pa lebg bedr ye: Kiris-neb tigingã tara fɩɩgr tɩ bũmb pa tõe n gɩdg-a ye. Bũmb ning fãa Wẽnnaam bɛɛbã sẽn maan n na n gɩdg bõn-buudã t’a ra yi n lebg tɩ-bedrã pa tõog ye. (Ezai 54:17) 3) Soondg zĩiga: “Liuuli” wã sẽn wat n tʋɩt b tʋgd tɩɩgã zugã makda sũ-tɩrs rãmba. Yaa neb milyõ rãmb sẽn yit tẽns sẽn dat n ta 240 pʋgẽ. B sak n deega Rĩungã koɛɛgã, n lebg kiris-neb tigingã neba. (Eze. 17:23) Tigingã pʋgẽ, b paamda belsgo, koglgo, la bũmb nins sẽn yaa tɩlae Wẽnnaam tũubã yĩnga.—Ezai 32:1, 2; 54:13.

[Foto, seb-neng 91]

Mutard bilã yel-bũndã wilgdame tɩ neb nins sẽn be kiris-neb tigingã pʋgẽ wã paamda koglgo (Ges-y sull 11, 12)

13. Rabɩllã yel-bũndã pʋgẽ, zomã wukrã wilgda tõnd bõe?

13 Rabɩllã yel-bũndã: A Zezi yeela yel-bũndã pʋgẽ tɩ pag n ning rabɩll zom pʋgẽ, tɩ zomã fãa wuki. (Karm-y Matɩe 13:33.) Zomã wukrã wilgda tõnd bõe? D gom bũmb a yiib yelle. 1) Zomã sẽn wukã, a toeemame. A Zezi yeelame tɩ rabɩllã sẽn ningã kɩtame tɩ ‘zomã wuki.’ 2) Rabɩllã kẽe zomã zãnga. A Zezi yeelame tɩ rabɩllã kɩtame tɩ “zom wam a tã” wã fãa wuki. Wãn to la koɛɛgã d sẽn moond rũndã-rũndã wã sõngd tɩ woto fãa pidsdẽ?

14. Koɛɛgã mooneg wɛɛngẽ, bõe n maand rũndã-rũndã tɩ pidsd rabɩllã yel-bũndã?

14 1) Toeengã: Rabɩllã makda Rĩungã koɛɛgã, tɩ zomã fãa makd ninsaalbã. B sẽn dɩk rabɩllã n naag zomã n nag tɩ wukã, a toeemame. Woto me, ned sã n sak Rĩungã koɛɛgã, toeemda a sũurã. (Rom 12:2) 2) Zomã zãng n wuki: Rabɩllã sẽn kẽ zomã zãngã makda Rĩungã koɛɛgã sẽn na n yelg n ta zĩig fãa wã. Rabɩllã kẽe zomã bilf-bilfu, hal tɩ fãa wa wuki. Woto me, Rĩungã koɛɛgã yelgdame n tat “dũniyã tɛk fãa.” (Tʋʋ. 1:8) Yel-bũndã wilgdame me tɩ Rĩungã koɛɛgã na n taa zĩis nins meng b sẽn gɩdg tõnd tʋʋmdã, baa d na n moonda zĩ-kãens tɩ nebã pa miẽ.

15. Wãn to la goam nins sẽn be Ezai 60:5, 22 pids-yã? (Ges-y seb-neng 93 zĩ-gũbrã sẽn yet tɩ “A Zeova kɩtame tɩ tõoge,” ne seb-neng 96-97 soabã sẽn yet tɩ “Sẽn yɩ to-to tɩ ‘sẽn paood-a’ wa lebg ‘bu-kãsenga.’”)

15 Sẽn zems yʋʋm 800 sẽn deng t’a Zezi wẽ yel-bũn-kãensã, a Zeova vẽnega a Ezai t’a togs koɛɛgã moonegã sẽn da na n yelg n ta zĩig ningã, la rẽ sẽn da na n wa ne sũ-noog ningã.c A Zeova wilgame tɩ neb n na n yi “zĩ-zãrsẽ” n wa a siglgã pʋgẽ. A goma Zerizalɛm yelle, n mak-a ne paga. Rũndã-rũndã, pʋg-kãng makda neb nins sẽn paam vʋʋsem sõng zaeeb n ket tẽngã zugã. A Zeova yeela pagã woto: “Fo sã n yã yõ wã, fo nengã na n pɩlame. La fo na n yɛɛsame n paam sũ-no-kãsenga; tɩ bõe, ko-kãseng na n waa fo nengẽ ne arzɛgse, la buud a taabã arzɛgs na n waa fo nengẽ.” (Ezai 60:1, 4, 5, 9) Gom-kãensã sɩd pidsdame. Rũndã-rũndã, neb nins sẽn tũud a Zeova hal sẽn kaoosã nensã sɩd pɩnda ne sũ-noogo, bala b neeme tɩ b tẽnsã pʋsẽ, Rĩungã koe-moondbã sẽn da yaa kar-karã fɩɩgame n lebg tusa.

A Zeova nin-buiidã sẽn maand sũ-noogã võore

16, 17. Wilg-y bʋʋm sẽn kɩt tɩ sẽn bʋt-a wã ne sẽn tigsd-a wã fãa lagemd n paamd sũ-noogo. (Ges-y zĩ-gũbrã me sẽn yet tɩ “Seb-vãad a yiib sẽn kɩt tɩ Amazon neb a yiib toeeme.”)

16 Tẽeg-y t’a Zezi yeela a tʋm-tʋmdbã tɩ ‘ned ninga sẽn tigsda . . . wʋkda biis n bĩngd vɩɩm sẽn ka sɛtã yĩnga, tɩ sẽn bʋt-a wã ne sẽn tigsd-a wã fãa na n lagem n paam sũ-noogo.’ (Zã 4:36) Bõe n kɩt tɩ d fãa ‘lagem n paamd sũ-noogo’? Bʋʋmã waoogame. Bɩ d gom a tãab yelle.

17 Pipi, d sẽn ne a Zeova sẽn maand bũmb ning koɛɛgã mooneg pʋgẽ wã kõt-d-la sũ-noogo. D sã n moond Rĩungã koɛɛgã, yaa wa d sẽn bʋt bõn-buudu. (Mat. 13:18, 19) D sã n tõog n sõng ned t’a lebg Kiristã karen-biiga, yaa wa d sẽn kẽeb d sẽn bʋdã. La tõnd fãa sũy nooma wʋsgo, d sẽn ne a Zeova sẽn kɩtd tɩ Rĩungã ‘bõn-buudã bund n yikdẽ’ wã. (Mark 4:27, 28) Bõn-buud kẽer d sẽn bʋd wat n bulame n yi kaoosg zugẽ, tɩ koe-moondb a taab kẽebe. Wa a Joan, tõe tɩ yãmb mengã maana a buudu. Yaa saam-bi-poak sẽn vɩ Gãrãnd Bertayn. A sẽn deeg lisg yaa yʋʋm 60 masã. A yeelame: “Mam sega neb sẽn yeel maam tɩ mam bʋda bõn-buud bãmb sũyẽ wã, bala mam da moon-b-la koɛɛgã yʋʋm a wãn sẽn looge. La koe-moondb a taab n wa n zãms-b Biiblã, n sõng-b tɩ b lebg a Zeova kaset rãmba, tɩ mam meng ra pa miẽ ye. Mam sũurã noomame, bala bõn-buudã m sẽn bʋdã bulame n yi, tɩ koe-moondb a taab kẽebe.”—Karm-y 1 Korẽnt dãmb 3:6, 7.

A ZEOVA KƖTAME TƖ TÕOGE

A ZEZI ra yeelame: “Bũmb nins sẽn yaa toog ne nebã yaa naana ne Wẽnnaam.” (Luk 18:27) Tõnd sʋkã neb wʋsg yãame tɩ gom-kãngã yaa sɩda. Neb n maan b sẽn tõe fãa sẽn na yɩl tɩ d ra moon koɛɛgã ye. La baa ne rẽ, a Zeova sõngda tõnd tɩ d ket n moondẽ.

A Zacharie Elegbe tara yʋʋm 66. A reega lisg yʋʋmd 1963. A wilgame tɩ b sẽn gɩdg a Zeova Kaset rãmbã tũudmã Benẽ wã pʋd n sõnga saam-biisã. Ad a sẽn yeele: “Yʋʋmd 1976, b sẽn wa n gɩdg tõnd tũudmã tɩ koe-moondbã sõor da yaa 2300. Tẽngã taoor-dãmb yeelame tɩ radio rãmbã moon buud-goamã fãa pʋgẽ tɩ nebã bãng tɩ b gɩdga d tũudmã. A buud da zɩ n zĩnd ye. Buud-goam 60 la zak la b gomd Benẽ. La wakat kãng tɩ yaa buud-goam a nu bal la b ra gomd radio rãmbẽ wã. Dẽnd b sẽn sɩd moon buud-goamã fãa pʋgẽ wã, neb tusa sẽn da be tẽn-kɩremsẽ n pa mi tõndã wʋma d kibare. B ra sokda b mens woto: ‘Ãnd dãmb la a Zeova Kaset rãmbã, la bõe yĩng tɩ b gɩdg b tũudmã?’ Kaoosg zugẽ tõnd sẽn wa n moond be wã, neb wʋsg saka sɩdã tao-tao.” Masã, a Zeova Kaset rãmbã sõor yɩɩda 11500 Benẽ.

[Foto, seb-neng 93]

A Mariya Zinich tara yʋʋm 74. A reega lisg yʋʋmd 1957. A yeela woto: “Mam sẽn wa n zems yʋʋm 12, goosneemã kɩtame tɩ b tall tõnd zakã rãmb fãa n yi Ikrɛn n kẽng Siberi sẽn be Risi wã. B maana b sẽn tõe fãa n na n menes a Zeova Kaset rãmbã zãng fasɩ Iniyõ Sovietik soolmẽ wã, la d sõorã kell n talla fɩɩgre. D sõorã sẽn fɩɩg to-to baa ne b sẽn da namsd tõnd wʋsgã kɩtame tɩ m kɩs sɩd tɩ yaa a Zeova tʋʋmde. Ned kae n tõe n gɩdg a Zeova tʋʋmd ye!” Saam-bi-poak a to me yʋʋr sẽn yaa Mariya, sẽn tar yʋʋm 73, n deeg lisg yʋʋmd 1960 paasame: “Goosneemã sẽn tall tõnd saam-biisã n kẽng Siberi wã yɩɩ sabab tɩ neb wʋsg sẽn da be zĩ-zãrsẽ paam n wʋm koe-noogã.”

[Foto, seb-neng 93]

A Jesús Martín sẽn tar yʋʋm 77 wã reega lisg yʋʋmd 1955. A yeelame: “Mam sẽn wa n bãng a Zeova wã t’a Kaset rãmbã sõor da yaa bãmb 300 Ɛspayn. Yʋʋmd 1960, b sẽn da namsd tõnd to-to wã maneg n yãngame. Goosneemã kõo polɩɩs rãmbã noor tɩ b menes a Zeova Kaset rãmbã. Wakat kãng tɩ d ra pa tõe n mams n bãng d sẽn na n maan to-to n tõog tɩ koe-noogã ta tẽngã zĩig fãa ye. Ra wõnda b maanda bũmb fãa sẽn na yɩl tɩ d ra tõog ye. La rũndã-rũndã, a Zeova Kaset rãmbã sõor kolga 111000 Ɛspayn. Mam sẽn maan kaset ne fɩɩgrã sẽn yɩ to-to baa ne namsgã, kɩtame tɩ m maneg n kɩs sɩd t’a Zeova sẽn be ne-dã, bũmb kae d sẽn pa tõe ye!”

18. Bõe la 1 Korẽnt dãmb 3:8 yeta, tɩ sek d na maan sũ-noogo?

18 Yiib-n-soaba, d yaa tʋm-tʋmdb sẽn tar sũ-noogo, bala d tẽegda bũmb ning a Poll sẽn yeelã. A yeela woto: ‘Ned kam fãa na n deega a meng keoor tɩ zems a meng tʋʋmde.’ (1 Kor. 3:8) Yaa d tʋʋm-toogã la b get n keo, la pa tʋʋmdã sẽn wom biis ninsã ye. Ad woto sɩd kengda koe-moondb nins sẽn moond zĩis nebã wʋsg sẽn pa kelgdã raoodo. Wẽnnaam nifẽ, koe-moond sẽn moond ne a sũur fãa tʋʋmd ‘womda biis wʋsgo.’ Dẽnd yaa bʋʋm sẽn sek a na maan sũ-noogo.—Zã 15:8; Mat. 13:23.

19. a) Bõe yĩng t’a Zezi sẽn deng n togs bũmb ning Matɩe 24:14 kɩt tɩ d maand sũ-noogo? b) Baa d pa tõog tɩ ned lebg Kirist karen-biiga, bõe la d pa tog n yĩmi?

19 Tãab-n-soaba, tõnd maanda sũ-noogo, bala d tʋʋmdã pidsda gomd Biiblã sẽn da pĩnd n togse. D ges a Zezi sẽn leok a tʋm-tʋmdbã to-to, b sẽn wa n kos-a t’a togs bãmb ‘bãnd ninga sẽn na n wilg yẽ waoong la dũniyã sɛɛb wakatã.’ A leoorã pʋgẽ, a wilgame tɩ koɛɛgã sẽn na n moon dũniyã gill zugã me naaga bãndã. Rẽ yĩnga a ra gomda b sẽn segd n sõng nebã tɩ b lebg a karen-biisã yell bɩ? Ayo. A yeelame: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga.” (Mat. 24:3, 14) Dẽnd yaa Rĩungã koɛɛgã moonego, rat n yeel tɩ bõn-buudã bʋdbã n naag bãndã. D sã n moond Rĩungã koe-noogã, d pa tog n yĩm tɩ baa d pa tõog tɩ ned lebg Kiristã karen-biiga, d tõog n kõo ‘kasetã.’d Nebã kelg tɩ b pa kelg me, d naag n pidsda a Zezi sẽn da reng n togsã. Sẽn paase d yaa “tʋmd-n-taas ne Wẽnnaam,” tɩ yaa zu-zẽkr n kõ-do. (1 Kor. 3:9) Ad d sɩd tara bʋʋm n na n maan sũ-noogo!

“Hal sẽn sɩng yaang tɩ ta nin-taoore”

20, 21. a) Wãn to la goam nins sẽn be Malaki 1:11 wã pidsda? b) Koɛɛgã mooneg wɛɛngẽ, bõe la y yãk yam n na maane, la bõe yĩnga?

20 Pipi kiris-nebã wakate, a Zezi sõnga tʋm-tʋmdbã tɩ b bãng tɩ tigsgã yaa tʋʋm-yãgdem. Yʋʋmd 1919 wã tɛka, a sõnga Wẽnnaam nin-buiidã me tɩ b bãng rẽ. Woto kɩtame tɩ b maneg n wɩng ne koɛɛgã moonego. Hakɩka, bũmb ka tõog n gɩdg koɛɛgã mooneg ye. Wa no-rɛɛs a Malaki sẽn da togsã, rũndã-rũndã b moonda koɛɛgã, “hal sẽn sɩng yaang tɩ ta nin-taoore.” (Mal. 1:11) Sẽn sɩng wĩndg sẽn yitẽ n tãag wĩndg sẽn lʋɩtẽ, sẽn bʋt-bã la sẽn kẽebd-bã sẽn be tẽng ning fãa, b tʋmdame la b naagd taab n maand sũ-noogo. Hal yaang tɩ ta nin-taoore, daar fãa, yibeoog n tãag zaabre, d tʋmda ne yãgbo.

21 D sã n lebg n tags Wẽnnaam nin-buiidã sõor sẽn da paood to-to yʋʋm 100 sẽn loogã, d yãtame tɩ b lebga “bu-kãsenga.” Woto kɩtame tɩ d sũyã noome. Yaa “sũ-no-kãseng” menga. (Ezai 60:5, 22) Bɩ sũ-no-kãngã, n paas d sẽn nong a Zeova sẽn yaa “tigsgã soabã” kɩt tɩ d ned kam fãa ket n kẽesd a meng tigsg kãngã sẽn ka to wã pʋgẽ.—Luk 10:2.

a A Zezi sẽn yeel tɩ ‘pʋtã pelgame’ wã, tõe t’a tool n gesa Samari neb kʋʋngã sẽn wat a nengẽ wã, n mik tɩ b wʋsg yera fu-peelse.

b Y sã n dat n bãng bũmb nins sẽn maan yʋʋm-kãens la rẽ poorã, bɩ y ges Les Témoins de Jéhovah : Prédicateurs du Royaume de Dieu sebrã neng 425-520. Be b wilgda tigsgã sẽn wom biis nins yʋʋmd 1919 n tãag 1992 wã.

c Y sã n dat n paam kibay a taab bãngr-gomd kãngã zug n paas bɩ y ges La prophétie d’Isaïe, lumière pour tous les humains II wã seb-neng 303-320.

d Biiblã Zãmsdbã ra zoe n bãnga rẽ. Yʋʋmd 1895 sɩpaolg kiuugã Gũusg Gasgã pʋgẽ, b yeela woto: “Baa ble wã d sẽn na n kẽebã sã n na n yɩɩ bilfu, koɛɛgã yẽ d tõe n moona wʋsgo. . . . D fãa tõe n moona koe-noogã.”

Yãmb yamẽ, Rĩungã sɩd beeme bɩ?

  • Koɛɛgã mooneg b sẽn mak ne tigsgã wɛɛngẽ, bõe la Rĩungã maan-yã?

  • Wãn to la mutard bilã yel-bũndã ne rabɩllã yel-bũndã sõng yãmb tɩ y wɩng ne koɛɛgã moonego??

  • Bõe n kɩt tɩ y maand sũ-noog koɛɛgã mooneg pʋgẽ?

SEB-VÃAD A YIIB SẼN KƖT TƖ AMAZON NEB A YIIB TOEEME

[Foto, seb-neng 94]

A Antônio Simões

A ANTÔNIO SIMÕES yaa kãsem-soab sẽn tũud a Zeova sõma. A tara yʋʋm 91. A tẽrame t’a ba wã ne a pʋgdbã sɩd sẽn na n bãng a Zeova wã, yɩɩ ne seb-vãad a yiib a Zeova Kaset rãmbã sẽn yiis maasem. Pag ne a sɩd n kẽng a Antônio nengẽ, t’a sok-b woto: “Yãmb datame tɩ m togs-y kibarã bɩ?” B leokame tɩ ‘b nongẽ lame n wʋme.’ A yõgemda a noor n maneg n zĩnd n na n gome.

“M baaba yʋʋr la a Zeno. A ra yaa baptist tũudmã koe-moonda. Yʋʋmd 1931 wã, a kẽnga hal Amazon we-raoogẽ wã n na n tɩ ges b wẽnd-doogã pag a ye. A yãa seb-vãad a yiib pagã roogẽ. Pagã yã-b-la wẽnd-doogẽ wã, la a pa bãng sẽn yaa ned ning n dɩgl-b ye. A ye ra gomda bugum yirã yelle, t’a to wã gomd sẽn ki-bã vʋʋgrã yelle. M baaba sẽn karmã, yɩ-a-la noogo. Zĩig pʋgẽ, a tagsa a Guilherme sẽn yaa a rɛɛmbã yelle. Bala nin-kãngã ra nong n yet-a lame ‘t’a pa tẽed bugum yirã, la tɩ Wẽnnaam sẽn yaa nonglem pa tõe n maan zĩig a woto ye.’ M baaba sẽn da rat ne a sũur fãa n wilg a Guilherme seb-vãadã, a kẽe a koom-kogl-bila, n dug na maan lɛɛr a nii n ta a Guilherme nengẽ Manakiri. Yaa tẽn-bil sẽn pẽ Manaus.”

[Foto, seb-neng 94]

Berzill bab-kãng pipi tigingã

“M baaba ne a Guilherme maaga b yĩng n karem seb-vãadã. B yiibã fãa yeelame: ‘Sɩdã la woto!’ Zĩig pʋgẽ, b gʋlsa Berzill Betɛllã n kos sɛba. M baaba yãka yam t’a pa na n le yɩ pastɛɛr ye. B yiibã sɩngame n togsd beenẽ nebã Biiblã sẽn yetã. Nebã sak n kelga sõma hal tɩ yʋʋmd pʋgẽ bala, b lugla tiging Manakiri. Pa kaoos la neb 70 wat tigissã ye. Tiging ra pa be Berzill wakat kãng t’a nebã sõor ta woto ye.” A Antônio yalsa bilfu, n yaool n sok woto: “Y sã n kelgd sẽn yɩ to-to tɩ Rĩungã koɛɛg ta Amazonnã, pa be yamleoog sɩda?” Hakɩka, bee yamleoogo! Seb-vãad a yiib bal la sẽn kẽ tẽngã tɩ lebg tiging kãsengã. Yaa wa bõn-bu-kɩds a yiib b sẽn bʋd Amazon weoogã sʋk tɩ yi n lebg tɩ-kẽenga. Yʋʋm 83 masã la b sẽn lugl Manakiri tigingã sẽn yɩ Berzill bab-kãng pipi tigingã. Rũndã-rũndã, lebga tigims 143 n be be.

Sẽn yɩ to-to tɩ “sẽn paood-a” wa lebg “bu-kãsenga”

WẼNNAAM da yeela woto: “Ned ninga sẽn yaa bilf n yɩɩd a taabã na n lebga tusri. La ned ninga sẽn paood-a na n lebga bu-kãsenga. Mam yaa Zu-soaba. A wakatã sã n ta, mam na n maan-a-la tao-tao.” (Ezai 60:22) Wãn to la gom-kãensã pids-yã? Sẽn maan-b kaset ne a pidsgã manesem yɩɩ wãna?

A Börje Nilsson sẽn tar yʋʋm 84 reega lisg yʋʋmd 1943. A yeela woto: “M tẽra saam-biig a ye sẽn paam vʋʋsem sõngã zaeeb yelle. Yʋʋmd 1920 sẽnesã t’a ra yaa so-pakda. B sẽn wa n yeel-a t’a tog n moona Suɛd tẽngã pʋɩ-sʋk la balã, a sakame n sɩnge. Koe-moondb a taab me n moon be. A Zeova ninga b fãa tʋʋmdã barka. Rũndã-rũndã, koe-moondbã sõor yɩɩda 22000. Baa ne m yʋʋmã sẽn vẽsgã, m dat n ket n tũuda a Zeova ne m sũur fãa. Ãnd n mi a sẽn na n le maan n kõ-do?”

A Etienne Esterhuyse tara yʋʋm 83. A reega lisg yʋʋmd 1942. A yeelame: “Rũndã-rũndã, m sã n ges d sõorã sẽn fɩɩg to-to Afirikdisiidã, m sũur yaa noog wʋsgo. Yʋʋmd 1942 wã tɩ d ra yaa 1500. Masã d yɩɩda 94000. Hakɩka, m sẽn paam n be sigl-kãngã pʋgẽ wã yaa bũmb sẽn kengd m tẽebã!”

A Keith Gaydon sẽn tar yʋʋm 82, n deeg lisg yʋʋmd 1948 wã yeelame: “M sã n ges Gãrãnd Bertayn koe-moondbã sõor sẽn da zems 13700 yʋʋmd 1948, tɩ rũndã-rũndã bɩ d kolg 137000 wã, m sɩd nee vẽeneg tɩ yaa a Zeova nugu. Sã n da kellẽ-la ninsaal pãnga, woto pa tõe n yɩ ye. La a Zeova yaa a soab ning sẽn maand ‘tʋʋm-kãsems la bõn-bãna.’”—Yik. 15:11.

A Ulrike Krolop tara yʋʋm 77. A reega lisg yʋʋmd 1952. Ad a sẽn yeele: “Dũni gill zabr a yiib-n-soabã poore, saam-biis nins sẽn da paam namsg Nazi rãmbã nusẽ wã sẽn da tar yẽesem ningã kenga Alemayn saam-biisã raood wʋsgo. Nin-buiidã ra rata belsgo. Tõnd n da tõe n bels-ba, bala d pa naag zabrã sẽn kʋ neb wʋsgã ye. M maana kaset ne Wẽnnaam vʋʋsem sõngã sẽn teel a nin-buiidã to-to yʋʋm 60 la zakã. Masã, a Zeova Kaset rãmbã sõor yɩɩda 164000. Tʋʋmdã sɩd woma biisi!”

A Mariya Brinetskaya sẽn tar yʋʋm 77, n deeg lisg yʋʋmd 1955 wã yeelame: “Mam deega lisg ne yʋngo, sẽn na yɩl tɩ b ra yõk-d ye. Daar a ye, b wa n yõka mam sɩdã n kẽng hal zĩ-zãrgẽ, n tɩ kẽes-a bãens-roog t’a na n tʋmdẽ, a sẽn yaa a Zeova Kaset soabã yĩnga. M da ket n maanda yam-ne-yam n moond koɛɛgã Risi tẽn-bil ning m sẽn da beẽ wã, tɩ yagsã wʋsg sak sɩdã. Wakat kãng tɩ d ra yaa neb a wãn bala. La rũndã-rũndã, d sõorã yɩɩda 168000 Risi, tɩ m sũur yaa noogo!”

A Kimiko Yamano tara yʋʋm 79. A reega lisg yʋʋmd 1954. Ad a sẽn yeele: “Yʋʋmd 1970 wã, b sẽn wa n yeel tɩ Zapõ koe-moondbã sõor taa 10000, sũ-noogã yĩnga, m pa tõog m nintãmã ye. Kɩtame tɩ m le pʋlem a Zeova woto: ‘M datame n kell n tũ foo hal n tãag m yõor tɛka.’ Mams-y n ges-y m sũ-noogã sẽn yaa to-to rũndã-rũndã, koe-moondbã sõor sẽn yɩɩd 216000 wã!”

A Daniel Odogun tara yʋʋm 83. A yeelame: “Mam sẽn wa n na n deeg lisg yʋʋm 1950 wã tɩ Nizeriya koe-moondbã sõor da yaa 8000. Rũndã-rũndã, b taa 351000. Tigis-kãsemsã sasa, m sã n yã zãma wã, m pa mi m sẽn yet ye. M tagsda Aze 2:7 wã yelle. A Zeova sɩd rigimdeda dũniyã soolem fãa, tɩ bõn-neebã watẽ. M ket n modgdame n maand m sẽn tõe koɛɛgã mooneg pʋgẽ, bala m getame tɩ ne koe-moonegã maasem, m yeta a Zeova tɩ barka!”

A Carlos Silva tara yʋʋm 79. Ad a sẽn yeele: “M sẽn wa n na n deeg lisg yʋʋmd 1952 t’a Zeova Kaset rãmbã ra yaa bãmb 5000 Berzill. Yʋʋm-kãngã, tigis-kãseng la d maan São-Polo yĩn-wɩsgr doog a ye pʋgẽ. Mobilsã ra yaa a yiib bala. Saam-biig n tees Pakaembu ɛstaadã sẽn da pẽ be wã, n sok maam woto: ‘Fo tagsdame tɩ tõnd na n wa pida ɛstaadã bɩ?’ Ra wõnda pa tõe ye. La yʋʋmd 1973 wã, d maana tigis-kãseng be, t’a pid ne neb 94586. Masã, d sõorã yɩɩda 767000 Berzill. Fɩɩgrã sɩd yaa yel-solemde!”

A Carlos Cázares tara yʋʋm 73. A yeelame: “Mam deega lisg yʋʋmd 1954. Rẽ tɩ Megsik koe-moondbã yaa 10500. D sɩd ra rata tʋm-tʋmdba. Mam da tara yʋʋm 21 bala, la baa ne rẽ, b yãk-m lame tɩ m lebg tigims sull yel-gɛta. M sẽn paam n maan kaset ne Ezai 60:22 pidsgã yaa bark meng-menga. Masã, koe-moondbã sõor yɩɩda 806000, tɩ sẽn zãmsd-b Biiblã yɩɩd milyõ. Sɩd yaa fɩɩgr tɛkẽ!”

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole