B waooga a Zeezi t’a nan pa rog ye

Malɛk a Gabriyɛll sẽn yeel a Maari t’a na n dɩka pʋg n dog biiga, n pʋd a yʋʋr t’a Zeezi, la tɩ biigã na n yɩɩ Rĩm wakat fãa yĩngã, a Maari soka malɛkã tɩ “bõn-kãng na n yɩɩ wãn n yɩ tɩ yẽnda nan ka mi raoa?”—Luk 1:34.

A Gabriyɛll leoka woto: “Sɩɩg-sõng na n waa fo zugu, la Wẽn-kẽemdã pãngã na n luda foom ne b maasem. Yaa woto yĩng la b na n bool bi-sõng ning fo sẽn na n dogã tɩ Wẽnnaam Bi-ribla.”—Luk 1:35.

A Gabriyɛll togsa a Maari bũmb a to me. Tõe tɩ yaa sẽn na yɩl n keng a pɛlg t’a tẽ koɛɛgã. A yeelame: “Ad fo kẽem a Elizabɛt me rɩka pʋg a kʋʋlem wakate, n na n dog bi-ribla. B sẽn dag n boond yẽnda tɩ kiirã, a tara kiis a yoob pʋg moasã. Bala, bũmb ka be Wẽnnaam sẽn ka tõe ye.”—Luk 1:36, 37.

A Maari sẽn yeel a Gabriyɛll bũmb ningã wilgdame t’a tẽe a goamã. A yeela woto: “Mam yaa Zu-soabã tʋmtʋmd poaka. Bɩ yãmb sẽn yeel bũmb ningã yɩ.”—Luk 1:38.

A Gabriyɛll loogrã poore, a Maari segla a meng n na n kẽng a Elizabɛt nengẽ. A Elizabɛt ne a sɩd a Zakari ra bee Zʋʋde tãmsã sẽnẽ sẽn pẽ Zeruzalɛmmã. A Maari sã n na n yi a yirã Nazarɛt n kẽng be, tõe n taa rasem a tãab bɩ a naase.

A Maari sẽn ta a Zakari zakẽ wã n pʋʋs a Elizabɛt la a kẽedẽ wã, vʋʋsem sõngã siga a Elizabɛt zugu, t’a yeel woto: “Fo tara Wẽnnaam bark n yɩɩd pagbã fãa. La biigã sẽn be fo pʋgẽ wã me tara barka. Maana a wãn tɩ mam wa paam tɩ m Zu-soabã ma wat m nengẽ? Bala, ade, fo pʋʋsmã sẽn kẽ mam tʋbrẽ wã yee, la biigã sẽn be mam pʋgẽ wã sẽn virs ne sũ-noogo.”—Luk 1:42-44.

A Maari sẽn leok to-to wã wilgdame t’a pʋʋsda Wẽnnaam barka. A yeelame yaa: “Mam sɩɩgã pẽgda Zu-soabã, la mam sũur pida ne sũ-noogo, mam fãagd a Wẽnnaam yĩnga. Bala, bãmb gesa b tʋmtʋmd-poakã a sik-m-mengã pʋgẽ. Bala, sẽn sɩng ne moasã, ad zamaan fãa neb na n yeelame tɩ bark bee mam zugu. Bala, Pãng-Soabã maana bõn-kãsems n kõ maam.” Baa a Maari sẽn paam Wẽnnaam barkã, a goamã wilgame tɩ waoogrã fãa yaa Wẽnnaam n so. Ad a sẽn yeele: “Bãmb yʋʋr yaa sõmblem. Bãmb nimbãan-zoeerã paada neb nins sẽn zoet bãmbã zutu, zamaan woo zamaane.”—Luk 1:46-50.

A Maari kell n pẽga Wẽnnaam, n togs bãngr-gomde. A yeelame: “Bãmb wilga b nug pãnga. Bãmb sãeega neb nins sẽn dag n tar wuk-m-meng tagsd b sũyã pʋsẽ wã. Bãmb deega pãens rãmbã naam n bas-ba, la b zẽk sik-m-mens rãmbã. Bãmb tɩgsa kom sẽn tar b rãmbã ne arzegse, la b kɩt tɩ arzegsã rãmb loog zaalem. Bãmb sõnga b tʋmtʋmd a Israyɛlle, la b tẽeg b nimbãan-zoeerã, wa b sẽn dag n yeel tõnd yaab-rãmbã tɩ b na n maana a Abrahaam ne a yagensã neer wakat fãa wã.”—Luk 1:51-55.

A Maari zĩnda ne a Elizabɛt na maan kiis a tãabo. Wõnda wakat kãng fãa, a sõnga a Elizabɛt a rogmã sẽn da kolgã yĩnga. Pʋg-kãensã b yiibã sẽn yaa wẽn-sakdba, n paam n na n zĩnd ne taab bilfã yaa bõn-sõngo. Bala, b ned kam fãa sẽn tʋtã yaa ne Wẽnnaam pãnga.

Yãmb yãa b sẽn waoog a Zeezi to-to t’a nan pa rogã bɩ? A Elizabɛt bool-a lame t’a “Zu-soaba.” Sẽn paase, a Maari sẽn kẽ wã bala, biigã sẽn da be a Elizabɛt pʋgẽ wã ‘virsa ne sũ-noogo.’ Wa d sẽn na n yã taoorã, neb kẽer yẽ pa waoog a Maari ne biig ning a sẽn na n dogã ye.