B yãka yõor rogem daar tẽegr kibs sasa

A Zeezi tʋm-tʋmdbã gilgda Galɩle n moond Rĩungã koɛɛgã, la a Zãmbatiis yẽ bee bãens-roogo. Yaa yẽ n segl sor n kõ a Zeezi, la a sẽn be bãens-roogã rat n taa yʋʋm a yiibu.

Naab a Erood Ãntipaas rɩka a ba-biig a Filip pag a Eroodyaad n maan a paga, t’a Zãmbatiis yeel-a vẽeneg tɩ pa segd ye. A Erood basa a pipi pagã n dɩk a Eroodyaad. La sã n yaa ne a Moyiiz tõogã a Erood sẽn da yet t’a tũudame wã, kãadem a woto yaa yoobo. Kɩɩsda Wẽnnaam tõogã. A Zãmbatiis sẽn yeel tɩ pa segdã, a Erood kɩtame tɩ b yõk-a n sui bãens-roogo. La tõe tɩ yaa a Eroodyaad n pirs-a.

A Erood kẽesa a Zãmbatiis roogo, la a ra pa mi a sẽn na n maan-a bũmb ning ye. Bala nebã “rag n geta a Zã wa Wẽnnaam no-rɛɛsa.” (Matye 14:5) A Eroodyaad yẽ ra mii a sẽn dat tɩ b maan a Zã bũmb ninga. Biiblã yeelame t’a “sũur yika ne a Zã t’a rat n kɩt tɩ b kʋ-a.” (Mark 6:19) A wa n sɩd paama segbo.

Yʋʋmd 32 Pakã sẽn wa n kolgdẽ wã, a Erood kɩtame tɩ b maan kibs kẽeng n tẽeg yẽ rogmã daare. A tigma a nin-kãsemsã fãa, la a sodaas nanambsã, ne Galɩle soolmã nanambsã fãa tigrã yĩnga. B sẽn wa n zĩ n dɩtẽ, b kɩtame t’a Eroodyaad bi-pugl a Salome sẽn yaa a pĩnd sɩd a Filip bi-puglã wa nebã sʋka, n sao tɩ b gese. A sẽn sao to-to wã yɩɩ nebã noogo.

A Erood sũur yɩɩ noog ne a Salome, t’a yeel-a woto: “Fo sẽn kos maam bũmb ning fãa, mam na kõ foom.” A pʋd n wẽename meng tɩ baa sã n yaa yẽ soolmã pʋɩ-sʋka. La bi-puglã pa leok zĩig pʋgẽ ye. A yiime n tɩ sok a ma yaa: “M kos bõe?”—Mark 6:22-24.

Yaa woto la a Eroodyaad sẽn da gũudã! Zĩig pʋgẽ bala, a yeela a biigã yaa: “Kos a Zãmbatiis zugã.” Bi-puglã leba rĩmã nengẽ tao-tao n tɩ yeel woto: “Mam datame tɩ y kõ maam a Zãmbatiis zug ne lengr moasã bala.”—Mark 6:24, 25.

Sãama a Erood sũurã wʋsgo, la a sẽn paam n wẽen tɩ sãambã wʋmã, a pa tõe n lebs a noorã poorẽ ye. Baa sẽn na n tũ ne ned sẽn pa tar taal kʋʋbã, a sã n tõdge, na n yɩɩ yãnde. A baas n tʋma sodaag t’a kẽng bãensã roogẽ n tɩ fiuug a Zã zugã. Tao-tao bala, sodaagã sɩd waa ne a Zã zugã n kõ a Salome, la a reegame n tɩ kɩs a ma.

A Zãmbatiis karen-biisã sẽn wʋm yellã, b wa n dɩka a kũumã n tɩ mumi. Rẽ poore, b tɩ togsa a Zeezi.

Kaoosg zugẽ, a Erood sẽn wa n wʋm tɩ b gomd t’a Zeezi sãoogda nebã bãas la a rigd zĩn-dãmbã, a yɛɛsame. A tagsame tɩ tog n yaa a Zãmbatiis n ‘vʋʋg n yi kũum sʋka.’ (Luk 9:7) Woto kɩtame t’a ra baood ne a sũur fãa n na n yã a Zeezi. La yaa vẽeneg tɩ pa sẽn na n kelg koɛɛgã a sẽn moondã ye. Sẽn da pak-a yaa a paam n yã a Zeezi mengã, n bãng yẽ sẽn tagsdã sã n yaa sɩda.