Kiris-nebã vɩɩm la b tʋʋma tigissã na-kẽndr not-rãmbã
TƲƲL-NIF RASEM A 1-7
D SẼN BÃNG BIIBLÃ KARENG PƲGẼ | 1 KORẼNT RÃMBÃ 7-9
“Sẽn nan pa kẽ-b kãadmã tara bũmb sẽn yaa sõma”
1 Kor. 7:32, w11-MM 1/1 20 s. a 3
Rɩ-y y rakõtã yõodo
3 Naoor wʋsgo, ned sẽn pa kẽ kãadem tara sẽk la a so a meng n yɩɩd ned sẽn kẽ kãadem. (1 Kor. 7:32-35) A tõe n tũnuga ne rẽ n tʋm Wẽnnaam tʋʋmdã sõma n yɩɩda, n wilg saam-biis wʋsg a nonglem, la a bao n bãng a Zeova sõma n paase. Rẽ n so tɩ kiris-neb wʋsg sak n deeg tɩ f sã n nan pa kẽ kãadem, tara nafa toor-toore, tɩ kɩt tɩ b tolg n yãk yam n pa na n kẽ kãadem, wall b na n kaoos n yaool n bao neda. Neb kẽer pa yãk yam n na n zĩnd b yembr ye. Yaa ned la b nan pa paame. Sãnda nengẽ, yaa b kãadmã n kao wall b to wã n maan kaalem. Nin-kãensã sãnda tagsa b yellã zug la b pʋʋse, tɩ kɩt tɩ b bãng tɩ ne a Zeova sõngre, bãmb me na n tõog n kell n zĩnda b ye. Woto kɩtame tɩ sẽn zems ne b yɛlã sẽn yaa to-to wã, b sak n na n pa woto.—1 Kor. 7:37, 38, NW.
1 Kor. 7:33, 34, w08-MM 7/1 30 s. a 5
Pipi Korẽnt dãmb ne 2 Korẽnt dãmb sɛbã vaeesgo
7:33, 34—B sẽn yeel vɛrse kãngã pʋgẽ tɩ rao bɩ pag sẽn kẽ kãadem “geta dũniyã yellã” rat n yeelame tɩ bõe? A Poll ra gomda bũmb nins sẽn yaa tɩlɛ ne kiris-neb sẽn kẽ kãadmã yelle. D tõe n sõdga rɩɩbo, futu, ro-gãaga, lakae pa bõn-wẽns nins sẽn be dũniyã pʋgẽ tɩ kiris-nebã segd n lak b mens ne wã ye.—1 Zã 2:15-17.
1 Kor. 7:37, 38, MN, w96 15/10 12-13 s. 14
Y sã n nan pa kẽ kãadem, y tõe n tʋma Wẽnnaam tʋʋmã tɩ tiisg kaẽ ye
14 Kiris-ned sẽn pa kẽ kãadem sã n bẽd ne lohorem ning a sẽn tarã n baood a meng nafr bala, a pa maand neer n yɩɩd kiris-neb nins sẽn kẽ kãadmã ye. A sẽn pa kẽ kãadmã pa “Rĩungã yĩng” ye. Yaa a mengã yĩnga. (Matiye 19:12, MN ) Kiris-ned sẽn pa kẽ kãadem segd n “maanda yɩɩr Zu-soabã yɛl poorẽ,” n baood “a sẽn na n maan to-to n ta Zu-soabã yam,” la a ‘tũud Zu-soabã ne a sũur fãa la wakat fãa, tɩ tiisg kaẽ ye.’ Rat n yeelame t’a yamã fãa segd n bee a Zeova la Kirist Zeezi tʋʋmdã pʋgẽ. Yaa kiris-ned sẽn pa kẽ kãadem sẽn na n maand woto bal la a maand “neer n yɩɩd” kiris-neb nins sẽn kẽ kãadmã.
D bʋgs Wẽnnaam Gomdã zug neere
Vẽnegre
La kiris-neb sẽn kẽ kãadem mi n welga taaba, baa yoob pa zĩndi. (1 Korẽnt rãmbã 7:11) Ad bʋʋm a wãn sẽn tõe n wa kɩt tɩ kiris-ned welg ne a pag bɩ a sɩda:
• Zakã yell gesgo: Rao sã n zãgs t’a kõn ges a zakã yelle, hal tɩ ligd kae, tɩ yã n kõ noorã lebg toog wʋsgo.—1 Tɩmote 5:8.
• Nin-yend sã n tar a to wã pãbre: Raoã bɩ pagã sã n tar a to wã n pãbd hal tɩ tõe n tũ ne a yõore.—Galat rãmbã 5:19-21.
• A Zeova tũubã wɛɛngẽ: Raoã bɩ pagã sã n gɩdgd a to wã t’a pa tõe n tũ a Zeova baa bilfu.—Tʋʋma 5:29.
1 Kor. 7:36, MN, w00 15/7 31 s. a 2
Y tõe n kell n paa yɩlemd dũni sẽn pid ne yoob pʋgẽ
La kom-bɩɩsã pa segd n yɩ tao-tao n kẽ kãadem, pag ne rao lagengã tʋlsem sẽn wat n sɩng-b ye. Neb sã n na n kẽ kãadem, b pʋlemda taaba, tɩ yɩl n pids pʋlen-kãng baood tɩ b yɩ neb sẽn bɩ. (Sɩngre 2:24) Sẽn são yaa bi-bɩɩg sẽn na n bas t’a yãadmã wakat loog t’a yaool n kẽ kãadem. Yãadmã wakate, pag ne rao lageng tʋlsmã tara pãnga, n tõe n kɩt t’a pa bãng n yãk yam-sõng kãadmã wɛɛngẽ ye. (1 Korẽnt rãmbã 7:36, MN ) La baa ned sẽn lebg kãsem sẽn dat n kẽ kãadem sã n yo, a sẽn nan pa paam ned n na n kẽ kãadem yĩnga, yaa yalemdo, la yel-wẽnde.
TƲƲL-NIF RASEM A 8-14
D SẼN BÃNG BIIBLÃ KARENG PƲGẼ | 1 KORẼNT RÃMBÃ 10-13
“A Zeova yaa sɩd soaba”
1 Kor. 10:13, w17.02-MM 29-30
Karemdbã sogsgo
Tʋm-tʋmd a Poll yeelame t’a Zeova pa “na n sak tɩ yãmb paam makr sẽn yɩɩd y pãng ye.” (1 Kor. 10:13) Rẽ yĩnga, woto rat n yeelame t’a Zeova rengd n yãka tõnd sẽn tõe n mao ne zu-loɛɛg ninga, la a yãk zu-loees nins a sẽn na n bas tɩ paam tõnd bɩ?
▪ Sã n da yaa woto, mams-y yɛlã sẽn da na n yɩ to-to. Saam-biig bi-ribl n kʋ a menga, t’a sok a meng yaa: ‘A Zeova pĩnd n gesame n mik tɩ maam ne m pagã na n tõog n maoo ne toog ning d biigã kaalem sẽn na n wa ne wã bɩ?’ D miime tɩ dũni-kãngã pʋgẽ, d pa tõe n pa paam zu-loees ye. La rẽ yĩnga, d segd n tagsame tɩ bũmb nins fãa sẽn paamd tõndã yaa a Zeova yell bɩ?
D sã n maneg n vaees a Poll sẽn yeel bũmb ning 1 Korẽnt-rãmb 10:13 wã, na n sõng-d lame tɩ d bãng tɩ Biiblã pa wilgd t’a Zeova rengd n yãka tõnd sẽn tõe n mao ne zu-loɛɛg ninga, la a yãk zu-loees nins a sẽn na n bas tɩ paam tõnd ye. Ad bũmb a naas sẽn kɩt tɩ d tõe n yeel rẽ.
Pipi, a Zeova naana ninsaal t’a tõe n yãk a toorẽ yam. A ratame tɩ ned kam fãa yãkd a sẽn date. (Tõo. 30:19, 20; Zoz. 24:15) D yam-yãkr sã n yaa sõma, d tõe n paamame t’a Zeova sõng-d tɩ d tõog n maan d sẽn datã. (Yel. 16:9) La sã n pa sõma, d na n wʋka a biisi. (Gal. 6:7) Sã n yaa a Zeova n yãkd zu-loees nins sẽn na n paam tõndã, rẽ yĩnga d tõe n yeelame t’a basa ned fãa t’a yãkd a toorẽ yam sɩda?
Yiib-n-soaba, a Zeova pa kogend tõnd tɩ “yel-lingdem” pa tõe n paam-d ye. (Koɛ. 9:11, MN ) Ned tõe n wa bee zĩig ning tɩ sabab-wẽng tiig n paam-a. Daar a yembre, a Zeezi goma gasg sẽn lʋɩ n kʋ neb 18 yelle, n yeel tɩ pa Wẽnnaam n kɩt tɩ yel-beedã paam-b ye. (Luk 13:1-5) Dẽnd pa zems tɩ d tags tɩ nand tɩ yel-beed maane, Wẽnnaam zoe n yãka sẽn na n põs-bã ye.
Tãab-n-soaba, tõnd ned kam fãa segd n kell n wilgame tɩ yaa a Zeova la a sakda. D tẽeg t’a Sʋɩtãan yeelame t’a Zeova nin-buiidã sẽn maand a raabã yaa sẽn nafd-bã yĩnga, la tɩ toog sã n paam-ba, b na n basa a sakre. (Zoob 1:9-11; 2:4; Vẽn. 12:10) A Zeova sã n da kogendẽ tõnd tɩ toog buud fãa pa tõe n paam-do, kõn yɩ wa a Sʋɩtãan bee bʋʋm sɩda?
Naas-n-soaba, pa tɩlɛ t’a Zeova reng n bao n bãng bũmb ning fãa sẽn na n paam tõnd ye. Yaa sɩd t’a Zeova sã n data, a tõe n pĩnd n bãnga sẽn wat beoogo. (Eza. 46:10) La Biiblã wilgdame tɩ pa bũmba fãa la a yãkd yam n deng n bãng ye. (Sɩng. 18:20, 21; 22:12) A Zeova yaa nonglem la tɩrlem soaba. Rẽ n so t’a bas tɩ ned fãa tõe n yãk a sẽn date.—Tõo. 32:4; 2 Kor. 3:17.
La tʋm-tʋmd a Poll sẽn yeel tɩ ‘Wẽnnaam ka na n sak tɩ yãmb paam makr sẽn yɩɩd y pãngã’ võor yaa bõe? A ra gomda bũmb ning a Zeova sẽn maand makr sasa wã yelle, pa nand tɩ makr wa ye. A sẽn yeelã wilgdame tɩ toog buud fãa sasa, d sã n teeg a Zeova, a na n sõng-d lame. (Yɩɩn. 55:23) A Poll gom-kãensã sẽn kengd raoodã tika bũmb a yiib sẽn yaa sɩda.
Pipi, a yeelame tɩ yɛl nins sẽn paamd tõndã paamda nebã fãa. D sẽn nan ket a Sʋɩtãan dũniyã pʋgẽ wã, d fãa na n paamda zu-loeese, tɩ wakat ning menga, tõe n yɩ yel-beedo. La d sã n teeg a Zeova, d na n tõog n maoo ne yel-kãense, n kell n sak-a. (1 Pɩy. 5:8, 9) Pipi Korẽnt-rãmb sak 10 pʋgẽ wã, a Poll deng n goma makr nins sẽn paam Israyɛll nebã b sẽn wa n be rasempʋɩɩgẽ wã. (1 Kor. 10:6-11) La pa makr sẽn da zɩ n paam neda, pa rẽ bɩ sẽn da yɩɩd b pãng ye. A Poll yeela naoor a naas tɩ “bãmb neb kẽer” kɩɩsa Wẽnnaam. Rẽnd b sʋkã neb kẽer basame tɩ b tʋls-wẽnsã tõog-ba, b sẽn pa teeg Wẽnnaamã yĩnga.
Yiib-n-soaba, a yeelame tɩ “Wẽnnaam yaa sɩd maanda.” Woto rat n yeelame tɩ bõe? D sã n tẽeg a Zeova sẽn ges a nin-buiidã yell hal pĩnd wẽndẽ n tãag masã wã, d nee vẽeneg t’a sɩd sõngda “neb nins sẽn nong bãmb la b sakd bãmb tõogã.” (Tõo. 7:9) D yãtame me t’a Zeova pidsda a pʋlemsã fãa. (Zoz. 23:14) Woto fãa kɩtame tɩ neb nins sẽn nong-a la b sakd-a wã tõe n bas b yam tɩ b makr fãa sasa, a na n maana bũmb a yiibã a sẽn pʋlmã: 1) A pa na n bas tɩ makrã wa loog nugu, tɩ b pa le tõe n tõog toog ye. 2) A ‘na n kõ-b-la manesem b sẽn na maan n yi.’
Neb nins sẽn teeg a Zeova wã sã n be makr pʋgẽ, wãn to la a kõt-b ‘manesem b sẽn na maan n yi’? Yaa sɩd t’a sã n data, a tõe n kɩtame tɩ zu-loɛɛgã loog n bas-do. La tẽeg-y t’a Poll yeelame t’a Zeova na n ‘kõo yãmb manesem y sẽn na maan n yi, tɩ yãmb tõe n yals makrã pʋgẽ.’ Rẽnd b sẽn yeel t’a na n ‘kõ-b-la manesem b sẽn na maan n yi’ wã, yaa tɩ naoor wʋsgo, a getame tɩ b paam bũmb ning fãa sẽn na n sõng tɩ b tõog toog n kell n sak-a wã. Bɩ d ges a sẽn maand rẽ to-to.
▪ A ‘belsda tõnd d yel-pakr fãa pʋgẽ.’ (2 Kor. 1:3, 4) A Zeova tõe n tũnuga ne a Gomdã, a vʋʋsem sõngã la tʋm-tʋmd sẽn tũud sɩdã sɛbã n bels tõndo, la a keng d raoodo, tɩ d yam gãande.—Mat. 24:45; Zã 14:16; Rom. 15:4.
▪ A tõe n sõnga tõnd ne a vʋʋsem sõngã maasem. (Zã 14:26) D sã n wa maood ne zu-loɛɛga, vʋʋsem sõngã tõe n sõng-d lame tɩ d tẽeg Biiblã kibay la a saglse, tɩ sõng-d tɩ d bãng n maan sẽn segde.
▪ A tõe n sõng-d-la ne a malɛgsã maasem.—Ebre. 1:14.
▪ A tõe n tũnuga ne d tẽed-n-taasã tɩ b ‘paas d raood’ ne b no-goam la b tʋʋmã.—Kol. 4:11.
Woto wã, a Poll sẽn yeel bũmb ning 1 Korẽnt-rãmb 10:13 wã wilgda tõnd bõe? Wilgdame t’a Zeova pa rengd n yãk zu-loees nins sẽn na n paam tõndã ye. La d sã n wa maood ne zu-loɛɛga, d tõe n kɩsa sɩd tɩ d sã n teeg a Zeova, a pa na n tol n bas tɩ wa yɩɩg d pãng ye. A na n sõng-d lame tɩ d tõog n mao. Ad woto sɩd kengda raoodo!
D bʋgs Wẽnnaam Gomdã zug neere
1 Kor. 10:8, w04 1/4 29
Karemdbã sogsgo
Bõe yĩng tɩ 1 Korẽnt rãmb 10:8 yetẽ tɩ yaa Israyɛll neb 23 000 n ki daar-n-yɛng b sẽn yo wã yĩnga, tɩ Sõdb 25:9 yaool n yetẽ tɩ yaa bãmb 24 000?
Bũmb nins sẽn tõe n kɩt tɩ kibay a yiibã sẽn togs nebã sõorã pa ye wã waoogame. Pipi, tõe tɩ neb nins sẽn ki wã sõor yɩɩda 23 000, n yaool n pa ta 24 000, tɩ b tõe n kʋmb n yeel sõor a yiibã.
Ad bũmb a to: Tʋm-tʋmd a Poll goma bũmb ning sẽn paam Israyɛll nebã Sitim weoogẽ wã yell n na n keoog Korẽnt kiris-nebã. Korẽnt ra yaa tẽng sẽn pid ne tʋʋm-dẽgd tɩ nebã fãa mi rẽ. A yeelame: “D ra yo wa bãmb neb kẽer sẽn yo tɩ bãmb tus-pisi la a tãab ki daar-n-yɛngã ye.” A Poll welga neb nins a Zeova sẽn kʋ yoob yĩngã toore, n wilg tɩ yaa bãmb 23 000.—1 Korẽnt rãmbã 10:8.
La Sõdb sak 25 yetame tɩ “Israyɛll nebã tɩ naag n pʋʋsa Pewoor wẽn-naandg a Baalle, la Sẽn-Ka-Saab sũurã puuga ne Israyɛll nebã.” Rẽ poore, a Zeova yeela a Moyiiz t’a kʋ “Israyɛll buudã taoor dãmb” fãa, t’a Moyiiz yeel bʋ-kaoodbã tɩ b maan dẽ. La a Fineyaas sẽn wa n yɩ tao-tao n kʋ Israyɛll ned ning sẽn tall Madiyã pag n wa sikã zĩigẽ wã, “bãagã sẽn dag n kʋʋd Israyɛll nebã yalsame.” Kibarã baasgẽ, b yeelame: “Bãagã sẽn da zoe n kʋ neb ninsã sõor yaa neb tus-pisi la a naase.”—Sõdbo 25:1-9.
Sãmbg sẽn kae, Sõdb sebrã sẽn togs sõor ningã yaa “Israyɛll buudã taoor dãmb” nins bʋ-kaoodbã sẽn kʋ wã, n paas neb nins a Zeova sẽn kʋ a toorã. Tõe tɩ taoor dãmb nins bʋ-kaoodbã sẽn kʋ wã taa bãmb tusri, n kɩt tɩ sẽn ki-bã fãa sõor zẽk n ta 24 000. Taoor dãmb kãens sã n naag n yoome, n naag n maan tigã, wall b kõo nin-buiidã sore, b tara taal nin-buiidã sẽn pʋʋs “Pewoor wẽn-naandg a Baallã” pʋgẽ.
Gom-bil ning b sẽn lebg ka tɩ pʋʋsã rat n yeelame tɩ “loe.” Biibl-mit a yembr bilga a võorã a sebr pʋgẽ n yeel tɩ tõe n dat n yeelame tɩ “loe f meng ne ned a to.” Israyɛll ra yaa buud sẽn dɩk a meng n kõ a Zeova, la a nebã sẽn tɩ “loe b mens ne Pewoor Baallã,” b sãama bãmb ne Wẽnnaam zoodã. Na maan yʋʋm 700 rẽ poore, a Zeova kɩtame tɩ no-rɛɛs a Ooze yeel Israyɛll nebã yaa: “Bãmb kẽng n tɩ waooga Baall-Pewoore, n tɩ maan yãn-tʋʋmã, la b lebga yel-beed wa b sẽn nong-a soabã.” (Ooze 9:10) Neb nins fãa sẽn da maan woto wã segda ne Wẽnnaam sɩbgrã. Rẽ n so t’a Moyiiz yeel gomd n na n tẽeg Israyɛll nebã. A yeelame: “Yãmb nin yãnda bũmb ning Sẽn-Ka-Saab sẽn yaa yãmb Wẽnnaamã sẽn maan Baall-Pewoor yellã wakatã. Bãmb menesa neb nins fãa sẽn tũ Baall-Pewoorã.”—Tõodo 4:3.
1 Kor. 11:5, 6; 11:10, w15 15/2 30
Karemdbã sogsgo
Koe-moond sẽn yaa pag sã n zãmsd ned Biiblã tɩ koe-moond sẽn yaa rao be be, a segd n pila a zugã bɩ?
▪ “Karemdbã sogsgã” sõsg a ye sẽn yi yʋʋmd 2002 sẽoog kiuugã rasem 15 Gũusg Gasgã pʋgẽ, b ra yeelame tɩ koe-moond sẽn yaa pag sã n zãmsd ned Biiblã tɩ koe-moond sẽn yaa rao be be, raoã reega lisg t’a pa reeg me, saam-bi-poakã segd n pila a zugã. D sẽn maag d meng n bao n wʋm yel-kãng vɩʋʋgo, d yãame tɩ yɩta sõma tɩ d toeem no-kãnga.
Koe-moondã sẽn yaa raoã sẽn yãag saam-bi-poakã sã n deega lisgu, tɩ Biiblã zãmsgã yaa bũmb sẽn zoe n lugli, yaa vẽeneg tɩ saam-bi-poakã na n pila a zugã. Woto, a wilgdame t’a nanda a Zeova sẽn sigl yɛlã to-to tigingã pʋgẽ zu-sobendã wɛɛngẽ wã, bala a tʋmda tʋʋmd b sẽn kõ tigingã rapã. (1 Kor. 11:5, 6, 10) A tõeeme me n kos saam-biigã t’a maan Biibl zãmsgã, sã n mik t’a tõeeme.
La koe-moondã sẽn yãag saam-bi-poakã tɩ b na n tɩ maan Biibl zãmsg sẽn zoe n luglã sã n nan pa reeg lisgu, n leb n pa saam-bi-poakã sɩda, bũmb ka be Biiblã pʋgẽ n wilgdẽ tɩ yaa tɩlɛ t’a pil a zug ye. La baa ne rẽ, saam-bi-poak ning sũur-kaset tõe n kɩtame t’a pil a zugu.
TƲƲL-NIF RASEM 22-28
D SẼN BÃNG BIIBLÃ KARENG PƲGẼ | 1 KORẼNT RÃMBÃ 14-16
“Wẽnnaam na n yɩɩ ‘bũmb fãa nebã fãa yĩnga’ ”
1 Kor. 15:24, 25, w98 1/7 21 s. 10
“B na n kɩtame tɩ kũum lebg zaalem”
10 “Saabã” yaa Kiristã naamã sẽn na n kaoos yʋʋm tusrã saabẽ, wakat ning a Zeezi sẽn yaa sik-m-meng soab la sɩd soabã sẽn na n lebs Rĩungã b Wẽnnaamã sẽn yaa b Ba me wã. (Vẽnegre 20:4) Rẽ tɩ Wẽnnaam daabã sẽn yaa “tigim bũmb nins fãa sẽn be saasẽ, la bũmb nins fãa sẽn be tẽngã zugã tɩ b sak Kiristã” pidame. (Efɛɛz rãmbã 1:9, 10, MN ) La Kiristã na n deng n sãama “soolem-dãmbã fãa, naam la pãng fãa” sẽn kɩɩsd Wẽnnaamã. Rẽ pa sãoong ning sẽn na n zĩnd Armagedõ wã bal ye. (Vẽnegre 16:16; 19:11-21) A Poll yeelame: “[Kiristã] segd n dɩɩ naam hal n tãag wakat ning Wẽnnaam sẽn na n ning b bɛɛbã fãa bãmb naoã tẽngrã. Yaoolem bɛ ning b sẽn na n kɩt tɩ lebg zaalmã yaa kũum.” (1 Korẽnt rãmbã 15:25, 26, MN ) A Ãdem yel-wẽndã sẽn wa ne bũmb ninsã fãa, baa kũumã meng na n saame. Woto rat n yeelame tɩ Wẽnnaam na n vʋʋga sẽn be-b yaadẽ t’a tẽr b yellã fãa tɩ b le vɩɩmde.—Zã 5:28.
Rĩungã maasem yĩnga, Wẽnnaam daab na n maana tẽngã zugu
21 La kũumã yẽ? Bala d miime tɩ bãag tõe n wa baasa ne kũum. Ninsaal buudã fãa ‘bɛ’ yaa kũum. D fãa yaa kiidba, tɩ ned kae n tar a tɩɩm ye. (1 Kor. 15:26) La rẽ yĩnga, kũumã yaa bũmb sẽn yɩɩd a Zeova pãng bɩ? Ad a Ezayi sẽn yeele: “Bãmb na n sãama kũum wakat sẽn ka sɛta. Zu-soabã sẽn yaa Soaalã na n yẽesa nintãm nins fãa sẽn be nebã ninẽ wã.” (Ezayi 25:8) Mams-y y yamẽ n ges vɩɩmã sẽn na n yɩ to-to. Kʋʋr le kae, yaad kae! Ned kõn le raag nintãm bɩ a wiis sũ-sãang yĩng ye. Nebã na n pʋd n daaga nintãm sũ-noogã yĩnga, bala a Zeova na n vʋʋga sẽn ki-bã wa a sẽn pʋlmã. (Karm-y Ezayi 26:19.) D na n yaa n paama d mens ne toog ning fãa kũumã sẽn wat ne wã.
1 Kor. 15:27, 28, w12-MM 9/1 17 s. 17
Laafɩ sẽn na n zĩnd yʋʋm tusr la wakat fãa yĩnga
17 A Poll sẽn yeel tɩ ‘Wẽnnaam na n yɩɩ fãa ne fãa’ wã, a wilga vɩɩmã sẽn na n yɩ to-to Kiristã naam sẽn na n kaoos yʋʋm tusrã baasgẽ wã sõma. La woto rat n yeelame tɩ bõe? Tẽeg-y wakat ning a Ãdem ne a Hawa sẽn da wa n be Edɛn n yaa a Zeova zakã nebã. Rẽ tɩ yaa a Zeova n dɩt naam malɛgsã la ninsaalbã zugu. B ra tõe n sõsa ne a Zeova, n maand a raabã la b paamd a barka. Woto la a Zeova ra yaa fãa ned kam fãa yĩnga.
D bʋgs Wẽnnaam Gomdã zug neere
1 Kor. 14:34, 35, w12-MM 10/1 9, zĩ-gũbrã
Tʋm-tʋmd a Poll gɩdgame tɩ pag ra gom tigingã pʋgẽ bɩ?
Tʋm-tʋmd a Poll yeela woto: ‘Bɩ yãmb pagbã sĩnd karengã pʋgẽ.’ (1 Korẽnt dãmba 14:34) Gom-kãensã võor yaa bõe? Rat n yeelame t’a Poll ra tagsdame tɩ pag yam paoodame bɩ? Ayo. A Poll ra wae n pẽgda zãmsg ning pagbã sẽn kõtã. (2 Tɩmote 1:5; Tɩt 2:3-5) Pa pagbã bal la a Poll sagl a lɛtr ning a sẽn tool Korẽnt kiris-nebã pʋgẽ ye. A sagla sẽn da tar-b gom-zẽn kũun la bãngr-goam kũunã tɩ b nin-yɛng sã n wa gomda, bɩ b taabã “sĩndi.” (1 Korẽnt dãmba 14:26-30, 33) Wõnda pagb nins sẽn da lebg kiris-nebã kẽer sũy ra nooma wʋsg ne yɛl nins b sẽn bãngã, tɩ sõsd sã n mi n be zãma wã taoore, bɩ b wae n kʋʋgd a goamã n sokd sogsgo. Sɩd me, Gɛrɛs soolmã pagb ra minim n maanda woto. Rẽ n so tɩ sẽn na yɩl tɩ zũnd-zãnd ra zĩndi, a Poll sagl pagbã tɩ “b sok b sɩdbã yiri.”—1 Korẽnt dãmba 14:35.
1 Kor. 15:53, it-1 1181
Pa tõe n põoge
Neb nins sẽn na n naag a Zeezi n dɩ naamã paamda a vʋʋgrã buudu. La b pa vʋʋgd n lebg malɛgs n na n tɩ vɩɩmd wakat sẽn kõn sa saasẽ bal ye. B vʋʋgrã poore, b pa le tõe n ki, tɩ b yĩngã pa le tõe n põog me ye. B vɩɩmdame n tũ Wẽnnaam ne kɩs-sɩda, n ki tɩ b yĩnsã põoge. La masã, b paama yĩns sẽn pa tõe n põoge, wa tʋm-tʋmd a Poll sẽn yeel 1 Korẽnt rãmb 15:42-54 pʋgẽ wã. Rẽnd b sẽn yeel tɩ b pa tõe n ki wã, yaa vɩɩm ning b sẽn paamã yell la b gomda. Yaa vɩɩm sẽn pa tar tɛka, la sẽn pa tõe n sãame. La sã n yaa ne pa tõe n põogã, wõnda bilgda yĩng ning buud Wẽnnaam sẽn kõt-bã. Yaa yĩng sẽn pa põogde, sẽn pa sãamde, la b sẽn pa tõe n sãame. Rẽnd wõnda Wẽnnaam kõt-b-la tõog tɩ b tõe n sek b menga, n pa teeg bũmb a to wa sẽn yaa to-to ne tẽngã zug bõn-naandsã la malɛgsã ye. Woto sɩd yaa kaset tɩ Wẽnnaam kɩs-b-la sɩd zãng-zãnga. Baa b sẽn tõe n sek b mens tɩ baa fʋɩ pa tõe n sãam-bã, rẽ pa kɩt tɩ b pa le baood tɩ Wẽnnaam wilgd-b sor ye. Bãmb ne Kirist Zeezi sẽn yaa b Taoor soabã ket n tũuda Ba wã raabo, la b sakdẽ t’a wilgd-b sore.—1 Kor. 15:23-28.
TƲƲL-NIF RASEM 29–SIG-NOY RASEM A 5
D SẼN BÃNG BIIBLÃ KARENG PƲGẼ | 2 KORẼNT RÃMBÃ 1-3
“A Zeova yaa ‘belsg fãa Wẽnnaam’ ”
2 Kor. 1:3, MN, w17.07-MM 13 s. a 4
“Yãb-y ne neb nins sẽn yãbdã”
4 Tõnd Ba wã sẽn yaa nimbãan-zoɛtã mii ned kaalem sẽn sãamd sũur to-to wã, bala neb yẽ mengã sẽn nong maana kaalem. Wala makre, a Abrahaam, a Izaake, a Zakoobe, a Moyiiz la rĩm a Davɩɩd. (Sõd. 12:6-8; Mat. 22:31, 32; Tʋʋ. 13:22) Biiblã wilgda vẽeneg t’a Zeova ratame tɩ wakat ning a sẽn yãk n na n vʋʋg-bã ta tao-tao, t’a paam n vʋʋg-ba. (Zoob 14:13, 15) B vʋʋgrã poore, b na n tara sũ-noog la keelem. A Zeezi kũumã me sãama a Zeova sũur wʋsgo. Biiblã yeelame t’a sẽn wa n be saasẽ wã, a ra kõta a Ba wã “sũ-noog daar fãa.” (Yel. 8:22, 30) D pa tõe n bãng n bilg a Zeezi kũumã sẽn yɩ kũ-toaagã sẽn sãam a Zeova sũur to-to ye.—Zã 5:20; 10:17.
2 Kor. 1:4, w17.07-MM 15 s. 14
“Yãb-y ne neb nins sẽn yãbdã”
14 Sũ-sãangã wilgr sẽn pa yembrã kɩtame tɩ wakat ninga, d pa mi d sẽn na n yeel n bels sũ-sãang soab ye. La Biiblã yeelame tɩ “yam soab goam wata ne maagre.” (Yel. 12:18) Neb wʋsg karma Kũum sã n dɩk ned y sẽn nonge sebrã, n yã goam b sẽn tõe n yeel n keng sũ-sãang rãmbã raood la b bels-ba. La naoor wʋsgo, wa Biiblã sẽn sagendã, d sã n ‘yãb ne neb nins sẽn yãbdã,’ rẽ sõngd-b lame n yɩɩda. (Rom. 12:15) A Gabi sɩdã maana kaalem. A yeelame tɩ wakat ninga, yaa ne yãbrã bal la a tõe n wilg a sũ-sãangã. A paasame: “Rẽ n so tɩ m sã n wa yãbd tɩ m zo-rãmb naag-m n yãbe, belsd-m-la bilfu. Kɩtdame tɩ m neẽ tɩ toogã yaa bãmb me toogo.”
D bʋgs Wẽnnaam Gomdã zug neere
2 Kor. 1:22, MN, w16.04-MM 32
Karemdbã sogsgo
A Poll sẽn yeel tɩ Wẽnnaam ninga sẽn paam-b vʋʋsem sõng zaeebã ned kam fãa ‘bãnde,’ la t’a ninga sɩɩg-sõng “reng-n-lɛmbg” b sũyã pʋgẽ wã rat n yeelame tɩ bõe?—2 Kor. 1:21, 22.
▪ Reng-n-lɛmbgã: Sebr a yembr yeelame tɩ Gɛrkã gom-bil ning b sẽn lebg 2 Korẽnt-rãmb 1:22 tɩ ‘reng-n-lɛmbgã’ yaa gom-bil lɛɛbdbã sẽn da nong n pʋtẽ. A bilgda ned sẽn dat n da bũmbu, n deng n yao pʋɩ-sʋka, la a sar ne koaasã t’a na n yaoo bilf-bilf n baas n yaool n deege. Raadengã sẽn sɩng yaoobã, bũmbã lebga a rẽnda, tɩ koaasã me mi rẽ. Sẽn paam-b vʋʋsem sõng zaeebã nengẽ wã, yaa b sã n wa kẽng saasẽ n tɩ paam yĩng sẽn pa põogdã la d tõe n yeel tɩ b reega b yaoodã gilli, bɩ b keoorã. B bilga rẽ 2 Korẽnt-rãmb 5:1-5. Wakat kãng tɛka, b pa le tõe n ki ye. Rẽ me naaga keoorã.—1 Kor. 15:48-54.
Rũndã-rũndã Gɛrkã tara gom-bil a to sẽn wõnd rẽ, tɩ b pʋt-a b sã n gomd nugbĩng rao sẽn kõ pʋg-sad n pʋlm-a kãadem yelle. Rẽ zemsa ne bũmb Biiblã sẽn yeele. A bilgame tɩ sẽn paam-b vʋʋsem sõng zaeebã na n wa lebga Kirisã pʋg-paala.—2 Kor. 11:2; Vẽn. 21:2, 9.
▪ Bãndã: Pĩnd wẽndẽ, bãnd ra yaa nug-tikr buud sẽn wilgd tɩ bũmb yaa ned n so, tɩ gomd yaa sɩda, wall tɩ neb zemsa taab bũmb wɛɛngẽ. B sẽn yeel tɩ Wẽnnaam ninga sẽn paam-b vʋʋsem sõngã zaeeb ‘bãndã,’ yaa a sẽn yãk-b ne a vʋʋsem sõngã maasem tɩ b lebg a rẽndã. (Efɛ. 1:13, 14) La yɩl tɩ bãndã kell n pa wakat fãa, rẽnda b sak Wẽnnaam n tãag b kũum, pa rẽ bɩ sẽn wat n ket bilf tɩ to-kãsengã sɩnge.—Efɛ. 4:30; Vẽn. 7:2-4.
2 Kor. 2:14-16, MN, w10 1/8 23
Yãmb ra miime bɩ?
Tʋm-tʋmd a Poll sẽn wa n gomd “kẽnd wa sodaas sẽn tõog zabr n lebgdẽ wã” yellã, tõe tɩ yaa bõe yell la a ra tagsda?
▪ A Poll yeelame: “Wẽnnaam . . . n wilgd tõnd sor wakat fãa tɩ d naag Kiristã n kẽnd wa sodaas sẽn tõog zabr n lebgdẽ wã. Bãmb kɩtdame tɩ ne tõnd maasem, bãmb bãngrã yũug saagd zĩig fãa! Bala sã n yaa ne Wẽnnaam, tõnd yaa Kiristã yũ-noog neb nins sẽn paamd fãagrã sʋka, la neb nins sẽn na n sãamã me sʋka. Sã n yaa ne neb nins sẽn na n sãamã, tõnd yaa kũum yũug sẽn wat ne kũum, la ne neb nins sẽn na n paam fãagrã, d yaa vɩɩm yũug sẽn wat ne vɩɩm.”—2 Korẽnt rãmbã 2:14-16, MN.
Tʋm-tʋmd a Poll gomdã bilgda bũmb Rom nebã sẽn da wae n maandẽ. B soda-naab sã n da tɩ tõog b bɛɛb n lebgdẽ, b maanda tigr a waoogr yĩnga. Tigr a woto sasa, b gilgda ne teed nins b sẽn zaeyã, neb nins b sẽn yõg zabrẽ wã, la b tat niis me n na n tɩ kʋ maando, tɩ kʋʋngã kilsd soda-naabã ne a sodaasã. B sã n gilg n sa, b kʋʋda niisã n maan maando. La wõnda b ra yãkda neb nins b sẽn yõgã wʋsg me n kʋ.
Sebr a yembr yeelame t’a Poll sẽn gom “Kiristã yũ-noog” sẽn wat ne vɩɩm neb kẽer yĩnga, la wat ne kũum sãnda yĩng yellã, “yaa vẽeneg t’a tika Rom nebã sẽn da minim n yõogd wisd gilgrã sasa wã zugu,” la tɩ “wisdã yũug sẽn makd tõogrã tẽegda neb nins b sẽn yõgã tɩ tõe tɩ b na n kʋ-b lame.”
Kiris-nebã vɩɩm la b tʋʋma tigissã na-kẽndr not-rãmbã