SAK A 4

Nand tɩ y karem vɛrse

Matye 22:41-45

Y SẼN NA N BÃNGE: Nand tɩ y karem vɛrse, togs-y kɛlgdbã bũmbu, tɩ vɛrse wã kareng poor bɩ b bãng y sẽn karem vɛrse wã võore.

Tags-y y sẽn dat n karem vɛrse wã võore. Nand tɩ y karem vɛrse, togs-y kɛlgdbã bũmb sẽn na n kɩt tɩ y sã n wa karem n sa, bɩ b bãng bũmb ning y sẽn dat tɩ b tẽege.

Vɛrse ning y sẽn tog n karmã sẽn yãk a toogo, bao-y n bãng-y vɛrse nins sẽn deng yẽ wã, la vɛrse nins sẽn pʋgdã võore. Y sã n na n wilg sẽn yaa ned ning n gomdã yʋʋre, la sẽn gʋls-a sebrã me yʋʋre, tog n zemsa kɛpɩ.
Yãmb sẽn yetã tog n tika Biiblã zugu. Y sã n wa sõsd ne neb sẽn tẽed Wẽnnaam, tik-y Biiblã sẽn yaa Wẽnnaam Gomdã. Rẽ na n kɩtame tɩ b bãng tɩ yaa be la b tõe n paam sagls sõmblem sẽn ka to.
Maan-y tɩ kɛlgdbã rat n bãng vɛrse wã sẽn yetã. Y tõeeme n sok sokr vɛrse wã sẽn na n leoke, bɩ n gom zu-loɛɛg yelle, tɩ vɛrse wã wilgd zu-loɛɛgã tɩɩm, wall y gom saglg yelle, tɩ y sẽn na n karem Biiblã kibar ningã wilgd saglgã yõodo.

Tags-y bũmb ning kɛlgdbã sẽn zoe n mi yãmb sẽn yetã wɛɛngẽ, la vɛrse ning y sẽn dat n karmã me wɛɛngẽ. Baa sã n yaa vɛrse kɛlgdbã sẽn mi sõma, nand tɩ y karm-a, togs-y bũmb sẽn na n kɩt tɩ b rat n le kelg vɛrse wã karengo, la sõng-b tɩ b wʋm vɛrse wã võor n paase.