SAK A 2

Gomd-y wa raasenkamã

2 Korẽnt rãmbã 2:17

Y SẼN NA N BÃNGE: Gom-y wa raasenkamã, la ne pʋ-peelem, tɩ wilg bũmb ning yell y sẽn gomdã sã n noom-y lame bɩ pa noom-y-yã, la wilg tɩ y kɛlgdbã yell pak-y lame.

Y SẼN TÕE N MAAN TO-TO:

Pʋʋs-y-yã a Zeova la y segl y meng sõma. Pʋʋs-y-yã a Zeova n kos-a t’a sõng-y tɩ y tõog y rabeemã, n sõs ne nebã. Bũmb ning yell y sẽn dat n gomã tog n yɩɩ vẽeneg y yamẽ wã. Ra ges-y sebr zug n karem ye. Gom-y ne yãmb mengã gom-biisi.

Y sã n magd n na n karma Biiblã vɛrse, wall sebr a to, karm-y goamã n yɩlme. Woto, y na n wa tõog n karm-a-la sõma. Sã n yaa ned goam me, karm-y tɩ yaa wa a soabã n gomde. La ra maan-y tɩ loog noor ye.
Gom-y ne y sũur fãa. Tags-y bũmb ning sẽn kɩt tɩ y kɛlgdbã segd n wʋm y sẽn dat n taas-bã yelle. Tags-y y kɛlgdbã yelle. Rẽ, y sẽn na n yals to-to wã, y nusã bilgrã la y nengã na n wilgame tɩ b yell pak-y lame, la tɩ y rat n sõng-b lame.

Gom wa raasenkamã pa rat n yeel tɩ gomd n pa gũusdẽ ye. Y sã n gomd buud-gomdã sõma, tɩ yaa vẽenega, y wilgdame tɩ koɛɛg ning y sẽn taasdã tara yõod wʋsgo.
Get-y kɛlgdbã. Sã n sakda ne yãmb babgẽ wã, bɩ y get y kɛlgdbã. Y sã n wa wɛgsd sõsga, ra get-y nebã yĩngr-yĩngr ye. Mi n zẽk-y y nengã n ges kɛlgdbã nin-yende.