Wãoor a ye n wa n pʋʋs a Zeezi barka

Bʋ-kaoodbã sullã neb sẽn dat a Zeezi n kʋ wã, a loogame n kẽng Efrayiim. A paa be ne a karen-biisã, n zãag ne a bɛɛbã. (Zã 11:54) Yʋʋmd 33 Pakã yaool n da kolgame. Dẽnd pa na n kaoos la a Zeezi le yi be ye. Sɩd me, a wa n dɩka sore, n pasg Samaari n kẽng Galɩle. Rẽ poore, a pa le tol n kẽng Galɩle hal n tãag a kũum.

A Zeezi so-toakã sasa, a pasga tẽn-bõonese. A sẽn wa n kẽed tẽn-bil a ye, a sega wãoob piiga. Wãood yaa bãag sẽn dɩt ned yĩ-nemse, wala makre, a nusi, a nao-bi bɩ a tʋba. (Sõdbo 12:10-12) Wẽnnaam tõogã wilgame tɩ wãoor tog n vɩɩ kɛɛnga, la tɩ ned sã n pẽnegd-a, a segd n zẽka a koɛɛg n yeel yaa: “Rẽgdo! Rẽgdo!”—Maan-kʋʋre 13:45, 46.

Rẽ n so tɩ wãoobã yals yɩɩga, n kelem n kos a Zeezi woto: “Zeezi, Zu-soaba, zoe-y tõnd nimbãanega.” A Zeezi sẽn tool n yãnd-bã, a yeel-b lame tɩ b “kẽng n tɩ wilg b mens maan-kʋʋdbã.” (Luk 17:13, 14) A sẽn yeel woto wã, a tũu Wẽnnaam tõogã. Tõogã pʋgẽ, b yeelame tɩ yaa maan-kʋʋdbã bal n tõe n wilg tɩ ned wãood saame. Yaa rẽ poor la a soab tõe   le kẽ neb sʋka.—Maan-kʋʋre 13:9-17.

Wãoob piigã ra kɩsa sɩd t’a Zeezi tara tõog n maand yel-soalma. Rẽnd nand meng tɩ b wãoodã sa, b rɩka sor n na n sɩd kẽng maan-kʋʋdbã nengẽ. B sẽn tẽ a Zeezi wã, naf-b lame. Bala b bãagã saame tɩ b nan ka ta maan-kʋʋdbã nengẽ meng ye.

Bãmb piigã sʋka, neb a wɛ wã kell n sãagame. La a ye n lebg n wa bao a Zeezi. Yaa Samaari neda. Bõe yĩng t’a lebg n wa? A wa n na n pʋʋsa a Zeezi barka, a sẽn sãoog-a wã. Raoã sẽn mi tɩ yaa ne Wẽnnaam pãng la a sẽn sãoogã, kɩtame t’a “zẽk a koɛɛg n pẽgd Wẽnnaam.” (Luk 17:15) A sẽn wa n yã a Zeezi, a wõgemda a taoor n pʋʋs-a barka.

A Zeezi yeela sẽn da be-b be wã yaa: “Bãmb piigã fãa ka lebg yɩlma sɩda? La neb a wɛ wã bee yɛ? Yaa sãan-kãngã bal n lebg n wa n na n kõ Wẽnnaam waoogre?” Dẽ a Zeezi yeela Samaari raoã yaa: “Yik n looge. Fo tẽeb n fãag foom.”—Luk 17:17-19.

A Zeezi sẽn sãoog wãoob piigã, wilga vẽeneg tɩ Wẽnnaam a Zeova bee ne-a. Yel-solemdã pa kɩt bal tɩ raoã bãagã sa ye. Kɩtame me t’a tõe n wa paam vɩɩm sẽn kõn sa wã. Rũndã-rũndã, Wẽnnaam pa kɩt t’a Zeezi maand yel-soalem n sãoogd tõnd bãasã ye. La d sã n tẽ a Zeezi, tõnd me tõeeme n wa paam vɩɩm sẽn kõn sa wã. Rẽ yĩnga, d rɩkda Samaari raoã togs-n-taare, n pʋʋsd Wẽnnaam bark a sẽn maand bũmb nins n kõt tõndã yĩng bɩ?