Kiris-nebã vɩɩm la b tʋʋma tigissã na-kẽndr not-rãmbã
SƖPAOLG RASEM A 4-10
D SẼN BÃNG BIIBLÃ KARENG PƲGẼ | 1 ZÃ 1-5
“Ra nong-y dũniyã wall bũmb nins sẽn be dũniyã pʋgẽ wã ye”
1 Zã 2:15, 16; w05 1/1 22 s. 13
Tũ-y mak-sõng ning a Zeezi sẽn kõ wã
13 Neb kẽer tõe n tagsame tɩ pa bũmb nins fãa sẽn be dũniyã pʋgẽ wã n yaa wẽng ye. Baa ne rẽ sẽn yaa sɩdã, dũniyã ne a yamle-yɛlã tõee nana-nana n kɩt tɩ d bas a Zeova raabã maanego. La dũniyã bũmb ba a yembr pa kɩtd tɩ tõnd pẽneg Wẽnnaam n paas ye. Woto yĩnga, tõnd sã n nong bũmb nins sẽn be dũniyã pʋgẽ wã, baa bũmb nins sẽn pa wẽnsã, yaa yell n yɛgd-do. (1 Tɩmote 6:9, 10) Rẽ toor sẽn ka be, bũmb wʋsg sẽn be dũniyã pʋgẽ sɩd yaa wẽnse, n tõe n kʋɩɩb tõndo. Tõnd sã n nong n get filim dãmb bɩ televiziõ emisiõ rãmb sẽn wilgd nen-kɛglem tʋʋma, laog nonglem, bɩ yoob ne raglem tʋʋm a taaba, tõnd tõe n wa sakda bõn-kãensã, tɩ lebg makr n kõ-do. Tõnd sã n nong n maand tũud-n-taar ne neb sẽn baood n na n paam naar vɩɩm bɩ n bao n maan afɛɛr dãmb n paas n paam ligdi, bõn-kãensã tõe n wa lebga bũmb sẽn tar yõod n yɩɩd tõnd nifẽ.—Matɩe 6:24; 1 Korẽnt dãmba 15:33.
Yãmb yaa nin-bʋg buudu?
18 Bũmb a to sẽn tõe n sõng-d tɩ “bũmb nins sẽn be dũniyã pʋgẽ wã” yamleoog ra kẽ-d yaa d sẽn na n tẽegd a Zã goamã. A yeela woto: “Dũniyã ne a ratem wẽngã me loogdame, la ned ning sẽn maand Wẽnnaam daab paada wakat sẽn ka sɛta.” (1 Zã 2:17) Wõnda a Sʋɩtãan dũniyã na n paa wakat sẽn ka sɛta. La daar n wat t’a na n sa. D sã n ning d yamẽ tɩ bũmb nins fãa sẽn be dũni-kãngã pʋgẽ wã na n looga ka la bilfu, a Sʋɩtãan pa na n tõog n belg-d ye.
D bʋgs Wẽnnaam Gomdã zug neere
A Zeova tõogã zemsa zãnga
14 Biiblã babg ning b sẽn gʋls ne gɛrkã pʋgẽ, b sagend-d lame n yɩlemdẽ tɩ d nong taaba. A Zeezi yeelame tɩ tõog a yiib-n-soabã yaa “nong f yak wa f menga.” (Mat. 22:39) A ma-biig a Zak boola tõ-kãng tɩ ‘naam tõogo.’ (Zak 2:8) Tʋm-tʋmd a Zã me yeela woto: “Mam kom-nongdse, mam ka gʋlsd yãmb tõ-paalg ye, yaa tõ-kʋdg ning yãmb sẽn da paam hal sɩngrã.” (1 Zã 2:7, 8) Bõe la a Zã sẽn bool tɩ ‘tõ-kʋdgã’? Yaa a Zeezi sẽn da zoe n sagl a karen-biisã ‘hal sɩngrẽ’ wã tɩ b nong taabã yĩng la a Zã sẽn yeel tɩ yaa ‘tõ-kʋdgã.’ La a ra yaa “tõ-paalg” me. Bala, kiris-nebã ra na n sega zu-loe-sãamse, tɩ yɩ tɩlae tɩ b wilg tɩ b nonga b tẽed-n-taasã, n sak n mong b mens bũmb wʋsg rẽ yĩnga. Rũndã-rũndã me, b sagend-d lame tɩ d ra yɩ rat-m-ye rãmb wa dũniyã neb wʋsg sẽn yaa to-to wã ye. D segd n modgd n wilgdame tɩ d sɩd nonga d taabã.
1 Zã 5:16, 17; it-2 491 s. a 1
Sugrã kũuni
Zemsame tɩ d pʋʋs Wẽnnaam n kos-a t’a kõ d taabã sugri, la baa tigingã tõr neb yĩnga. A Moyiiz maana woto Israyɛll nin-buiidã yĩnga. A vẽnega b yel-wẽnã n togse, la a kos a Zeova t’a kõ-b sugri. A Zeova kelga a kosgã. (Sõd. 14:19, 20) Sẽn paase, wẽnd-doogã pakr sasa, a Salomo pʋʋsa a Zeova n kos-a t’a kõ nin-buiidã sugri, b sã n wa beeg-a, n sak n tek yam n kos b yel-wẽnã yĩnga. (1 Rĩm. 8:30, 33-40, 46-52) A Ɛsdraas goma zʋɩf-rãmbã sẽn da yi yemd n lebg n wa wã yʋʋr yĩnga, n vẽneg b yel-wẽnã n togse. A sẽn pʋʋs ne a sũur fãa la a keng nin-buiidã raoodã kɩtame tɩ b yãk yam n na n maan bũmbu, sẽn na yɩl t’a Zeova kõ-b sugri. (Ɛsd. 9:13–10:4, 10-19, 44) A Zak sagla ned ning tẽeb sẽn komsã t’a bool tigingã kãsem-dãmbã, tɩ b pʋʋs a yĩnga, la “a sã n da maana yel-wẽna, a na n paama sugri.” (Zak 5:14-16) La “yel-wẽnd n be n wat ne kũum.” Yaa beeg Wẽnnaam vʋʋsem sõngã, rat n yeel tɩ yãk yam n na n ket n maand yel-wẽna. Yel-wẽn-kãng pa tar sugr ye. Kiris-ned pa tog n pʋʋs neb nins sẽn maand yel-wẽnd a woto yĩng ye.—1 Zã 5:16; Mat. 12:31; Ebre. 10:26, 27, ges-y PÉCHÉ; ESPRIT.
SƖPAOLG RASEM 11-17
D SẼN BÃNG BIIBLÃ KARENG PƲGẼ | 2 ZÃ 1–ZIID
“D segd n maoome, n kell n pa sɩdã pʋgẽ”
‘Bɩ y paam pãng Zusoaba tũudum pʋgẽ’
8 Tõnd mii a Sʋɩtãan sɩlmã, bala Gʋlsg Sõamyã wilgda a manesmã sẽn yaa to-to wã. (2 Korẽnt dãmba 2:11) A Sʋɩtãan zaba ne a Zoob n kɩt t’a yã bõne, n kɩt t’a kambã ki, t’a zakã neb kɩɩs-a, tɩ bã-toaag nams-a, la a kɩt t’a zo-rãmb sãbg-a zaalem yĩnga. A Zoob yamã wa n yii ne a vɩɩmã, la a tagsame tɩ Wẽnnaam bas-a lame. (Zoob 10:1, 2) Baa ne a Sʋɩtãan sẽn pa wat ne zu-loe-kãensã vẽeneg-vẽeneg rũndã-rũndã wã, to-kãensã sɩd namsda kiris-neb wʋsgo, la Sʋɩtãanã tõe n tũnuga ne rẽ n nams neba.
9 Sasa kãngã sẽn yaa saabã wakatã, yɛl nins sẽn tõe n sãam tẽebã paasa wʋsgo. Tõnd sẽn vɩ dũni ning pʋgẽ wã, laogã baoob rɩta tẽebã bõn-datɩ. Wakat fãa, kɩbayã wilgda pag ne rao lagengã wa bũmb sẽn kõt sũ-noogo, la sẽn pa wat ne sũ-sãams ye. La neb wʋsg ‘nonga dũniyã sũ-noog n yɩɩd Wẽnnaam.’ (2 Tɩmote 3:1-5) Sã n pa d ‘mao ne d pãng tɛk tẽebã yĩnga,’ tags-kãensã buud tõe n sãama tõnd tẽebã.—Ziid 3.
D bʋgs Wẽnnaam Gomdã zug neere
Nonglem tigã
Biiblã pa wilgd nonglem tigã sẽn yaa bũmb ninga, la b sẽn da wae n maand-b sasa nins ye. (Ziid 12). Pa Zu-soab a Zeezi Kirist wall a tʋm-tʋmdbã n kõ noor tɩ b maan tig-kãensã ye. Yaa vẽeneg tɩ pa bũmb sẽn da yaa tɩlɛ, wall b sẽn tog n maand wakat fãa ye. Neb kẽer yeelame tɩ yaa tig kiris-neb nins sẽn yaa ra-kã-rãmbã sẽn da maande, n segend rɩbd buud toor-toor n boond b tẽed-n-taas nins nus sẽn pa zãadã. Kɩɩbsã, pʋg-kõapã, ra-kã-rãmbã la naong rãmbã ra naagda taab wa zak a ye neba, n dɩ sõma.
it-2 804
Kug-bɛda
Spilas yaa gɛrk gom-bil a to me, t’a võorã yaa kug-bedr sẽn solg koom tẽngre. A Ziid rɩka makr ne rẽ, n wilg tɩ neb kẽer n soos n kẽ kiris-neb tigingã pʋgẽ ne yam-wẽnga. Wa kug-bɛd sẽn solg koom tẽngr sẽn tõe n sãam batayo wã, nin-kãensã ra yaa yell meng-meng n kõ tigingã nebã. Ad a Ziid sẽn yeele: “Yãmb nonglem tigã sasa, nin-kãens yaa wa kug-bɛd sẽn be koom tẽngre, n naagd yãmb n dɩt n tɩgda.”—Ziid 12.
‘A taa Wẽnnaam yam’
Bõe la a Enok yeel a bãngr-gomdã pʋgẽ? Ad a sẽn yeele: “Ges-y-yã! A Zeova waa ne b malɛg-sõamyã ka tɛkã, n na n kao nebã fãa bʋʋdo, la b ning wẽn-kɩɩsdbã fãa taale, tʋʋm-wẽns nins b sẽn kɩɩs Wẽnnaam n tʋmã yĩnga, la gom-yood nins yel-wẽn-maandbã sẽn gom n paoog Wẽnnaamã yĩnga.” (Ziid 14, 15) Tõe tɩ y gũus n gesame tɩ yaa wa Wẽnnaam zoe n maanda bũmb ning bãngr-gomdã sẽn togsã. No-rɛɛsdb a taab me togsa bãngr-goama, tɩ b sẽn gom to-to wã yaa wa zoe n pidsdame. B goma bũmb sẽn na n sɩd maan yelle, hal n gom wa zoe n maaname.—Ezayi 46:10.
‘A taa Wẽnnaam yam’
A Enok sẽn tall tẽeb ningã tõe n kɩtame tɩ d sok d meng n ges d sã n geta dũniyã wa Wẽnnaam sẽn get-a to-to wã. Bʋ-kaoor koɛɛg ning a Enok sẽn moonã na n pidsa tõnd wakatã wa sẽn pids yẽ wakatẽ wã. Wa sẽn zems ne a Enok sẽn moonã, a Zeova kɩtame tɩ sa-kãseng ni a Nowe wakatẽ wã n sãam wẽn-kɩɩsdbã. La rẽ makda sãoong a to sẽn wate, sẽn na n yɩ kãseng n yɩɩda. (Matiye 24:38, 39; 2 Pɩyɛɛr 2:4-6) Wa pĩndã, rũndã-rũndã me, Wẽnnaam ne a malɛgs tus ka tɛkã segl n saame, n na n wa sɩbg dũni-kãngã wẽn-kɩɩsdbã ne sɩbgr sẽn zemse. Tõnd ned kam fãa segd n bʋgsa a Enok koɛɛgã zug neere, la d sõng d taabã me tɩ b bãnge. D zakã rãmb la d zo-rãmbã tõe n lak n basa tõndo. Tõe tɩ d mi n tagsdame tɩ d yaa d yembre. La a Zeova zɩ n bas a Enok ye. A pa na n tol n bas a neb nins sẽn maand sɩd ne-a rũndã-rũndã me ye.
SƖPAOLG RASEM 18-24
D SẼN BÃNG BIIBLÃ KARENG PƲGẼ | VẼNEGRE 1-3
“Mam mii fo tʋʋm-tʋmdɩ wã”
Vẽnegre 1:20; w12 10/1 19 s. a 8
Yãmb tara yam-sõng bɩ?
8 D sã n tẽeg tɩ Biiblã wilgame t’a Zezi zãada ‘ãds a yopoe ne a rɩtgo,’ na n sõng-d lame tɩ d kell n tall yam-sõngo. Bala, “ãdsã” makda tigingã kãsem-dãmb nins sẽn paam vʋʋsem sõngã zaeebã, la b makda kãsem-dãmb a taabã me. A Zezi tõe n wilga “ãdsã” sẽn be a nugẽ wã sor tɩ b maan bũmb ning fãa a sẽn get tɩ segdame. (Wil. 1:16, 20) A sẽn yaa tigingã Zusoabã, a mii bũmb nins kãsem-dãmbã fãa sẽn maandã. A “ninã yaa wa bug-witim.” Rẽnd b nin-yend sã n segd ne saglgo, yẽ n na n ges tɩ b bãng wakat ning b sẽn segd n sagl-a, la a sẽn segd ne saglg ninga. (Wil. 1:14) La nand t’a welg yellã, d segd n ket n sakda neb nins vʋʋsem sõngã sẽn yãkã, bala a Poll yeela woto: “Bɩ y sak yãmb taoor dãmbã la y reeg bãmb goamã, tɩ bõe, bãmb gũuda yãmb sɩɩse, bãmb sẽn na n wilg yɛlã fãa Wẽnnaam taoorã yĩnga. Bɩ a yɩ woto tɩ b maan ne sũ-noogo, la ka ne sũ-sãoong sẽn ka na n yɩ yãmb nafr ye.”—Heb. 13:17.
Vẽnegre 2:1, 2; w12 4/1 30 s. 11
A Zeova gũuda tõnd tɩ d na n wa paam fãagre
11 Yãab ning sẽn be Wilgr sebrã sak a 2 ne a 3 wã wilgame tɩ rĩm a Zezi Kirist ra mii yɛl nins sẽn da be Aazi Mineer tigims a yopoe wã pʋsẽ. Pa tiging fãa yɛl sẽn da yaa to-to wã bal la a Zezi ra mi ye. A ra mii yɛl takɩ sẽn da maand b pʋsẽ, n pʋd neb kẽer yʋy menga. Sẽn paase, a pẽga tiging fãa wall a kõ-a sagls nins sẽn yaa tɩlae ne-a wã. Yãab kãng wilgda tõnd bõe? Yãabã pidsg pʋgẽ, tigims a yopoeyã makda kiris-neb nins sẽn paam vʋʋsem sõng zaeebã sẽn be tẽngã zug yʋʋmd 1914 poorã. Yaa sẽn paam-b zaeebã la a Zezi sẽn saglã. La a saglsã tõe n nafa Wẽnnaam nin-buiidã fãa sẽn be dũniyã gill zug rũndã-rũndã wã. Dẽnd d tõe n yeelame t’a Zeova wilgda a nin-buiidã sor ne a Bi-riblã maasem rũndã-rũndã. Wãn to la d wilgd tɩ d sakda a sor-wilgrã?
Ket-y n kẽnd na-yakemd a yembr ne a Zeova siglgã
20 Kẽn na-yakemd a yembr ne a Zeova siglgã sẽn kẽngd taoor bilf-bilfã baoodame tɩ d sak n deeg tʋʋmd ning Wẽnnaam sẽn kõ a Zezi Kirist, a sẽn kɩt t’a yɩ “tigingã zu-soabã.” (Efɛɛz rãmba 5:22, 23, Sebr Sõngo) Ezai 55:4 pʋgẽ goama me bee yamleoogo. B yeta tõnd be woto: “Gese, mam [a Zeova] kõo yẽ t’a yɩ kaset soaba la buuda fãa naaba la b soaala.” A Zezi sɩd mii taoor lʋɩɩse. A leb n mii a piisã ne b tʋʋmã. Sɩda, a sẽn da wa n ges tigims a yopoe sẽn da be Azi Mineerã, a togsa naoor a nu tɩ: “Mam bãnga yãmb tʋʋma.” (Wilgri 2:2, 19; 3:1, 8, 15) A Zezi leb n mii tõnd sẽn datã, wa a Ba a Zeova. Nand t’a wilg Pʋʋsg Modɛllã, a Zezi yeelame: “Yãmb Ba mii yãmb sẽn datã, tɩ yãmb nan ka kos bãmb ye.”—Matɩe 6:8-13.
D bʋgs Wẽnnaam Gomdã zug neere
Wẽnnaam Rĩungã na n sãama a bɛɛbã gilli
10 B na n kaoo bʋʋdo: Wakat kãnga, na n yɩɩ tɩlae ne Wẽnnaam Rĩungã bɛɛbã fãa tɩ b maan kaset ne yell sẽn na n maneg n paas b toogã. A Zezi yeelame: “B na n yãa ninsaal biigã sẽn wat sawat pʋsẽ ne pãn-kãsenga, la naam.” (Mark 13:26) Yel-solem-kãngã sẽn wilgd a pãn-kẽengã na n yɩɩ kaset t’a waame n na n kao bʋʋdo. Bãngr-gomd ning sẽn gomd yaoolem dayã yellã pʋgẽ me, a Zezi togsda bũmb a taab sẽn na n maan sasa kãng sẽn yaa bʋʋdã kaoob wakatã. A yel-bũnd ning sẽn gomd piis la bʋʋs yellã sõngdame tɩ d bãng bõn-kãense. (Karm-y Matɩe 25:31-33; 2 Tesalonik rãmb 1:9.) A Zezi na n boola sẽn teend-b Wẽnnaam Rĩungã tɩ “piisi,” tɩ b “roog n nak n ges yĩngri,” n bãng tɩ b “fãagrã kolgame.” (Luk 21:28) La a na n boola sẽn yaa-b Rĩungã bɛɛbã tɩ “bʋʋse,” tɩ b ‘wiisi,’ b sẽn mi tɩ b “sɩbgrã na n yɩɩ sãoong sẽn ka sɛtã” yĩnga.—Mat. 24:30; Wil. 1:7.
Vẽnegre 2:7;, w09 1/1 31 s. a 1
Wilgr sebrã sak a 1 n tãag sak 12 vaeesgo
2:7—“Wẽnnaam Paradis” bɩ arzãnã yaa bõe? Sẽn mik tɩ yaa kiris-neb nins sẽn paam vʋʋsem sõng zaeebã yell la b sẽn gomd ka wã, paradis kangã makda saasẽ wã Wẽnnaam meng sẽn beẽ zĩig ningã. Sẽn paam-b zaeeb n na n kell yɩ kɩs-sɩd rãmbã na n paama keoore, dat n yeel tɩ b na n dɩɩ “vɩɩm tɩɩgã” biisi. B pa na n ki abada.—1 Kor. 15:53
SƖPAOLG RASEM 25–YƲƲM-SAR PIPI DAARÃ
D SẼN BÃNG BIIBLÃ KARENG PƲGẼ | VẼNEGRE 4-6
“Wed-rʋʋdb a naasã yiibu”
Wed-rʋʋdb a naasã yaa ãnd dãmba?
Ãnd n zao wed-mo-pɛɛlgã? Biiblã sebr ning b sẽn boond tɩ Vẽnegrã sõngdame tɩ d bãng sẽn yaa ned ninga. Sebrã sak a to pʋgẽ, b boola wed-rʋʋd-kãngã sẽn yit saasẽ wã tɩ “Wẽnnaam Gomdã.” (Vẽnegre 19:11-13) Yaa a Zeezi Kirist la b sẽn boond tɩ Gomdã, bala a yaa Wẽnnaam no-rɛɛsã. (Zã 1:1, 14) Sẽn paase, b boond-a lame tɩ “Rĩm-dãmb Rĩma, la zu-soben-dãmb Zu-soaba,” la b yeel me t’a ‘maanda sɩd la a togsd sɩda.’ (Vẽnegre 19:16) Dẽnd yaa vẽeneg t’a Zeezi paama tõog n na n yɩ Rĩma, la zabr gãndaoogo. La a pa rɩt a naamã ne zãmb bɩ ne pãng me ye. Rẽ wata ne sogsg kẽere.
wp17.3 4 s. a 5
Wed-rʋʋdb a naasã yaa ãnd dãmba?
Wakat bʋg la wed-rʋʋdbã sɩng b zoeesã? Pipi wed-rʋʋdã sẽn yaa a Zeezi wã sɩnga a zoeesã b sẽn fõgen-a maanfã poore. (Vẽnegre 6:2) Wakat bʋg la b fõgen a Zeezi maanf t’a lebg Rĩm saasẽ? Pa a sẽn leb saasẽ a kũumã poorã ye. Biiblã wilgdame t’a sẽn leb saasẽ wã poore, a gũume. (Ebre-rãmb 10:12, 13) A Zeezi yeela a karen-biisã bũmb sẽn na n sõng-b tɩ b bãng a gũubã saab wakate, la wakat ning a sẽn na n sɩng a naamã rɩɩb saasẽ wã. A yeelame t’a naamã rɩɩb sɩngrẽ, dũniyã yɛl na n maneg n kengame. Zaba, kom la bã-longds na n zĩndame. (Matiye 24:3, 7; Luk 21:10, 11) Dũni gill pipi zabrã sẽn sɩng yʋʋmd 1914 poor bilfu, lebga vẽeneg tɩ ninsaalbã vɩɩ wakat kãng sẽn yaa toog wakatã, tɩ Biiblã boondẽ tɩ ‘yaoolem wakate.’—2 Tɩmote 3:1-5.
Vẽnegre 6:4-6; wp17.3 5 s. a 2
Wed-rʋʋdb a naasã yaa ãnd dãmba?
Sẽn zao-a wed-mo-kãngã makda zabre. Pa tẽns a wãn pʋsẽ bal la a yiis laafɩ wã ye. Yaa dũniyã gill zugu. Yʋʋmd 1914 zabrã n yɩ pipi zabr sẽn ta dũniyã gill zugu. Rẽ poore, dũni gill zabr a yiib-n-soab n pʋgle, hal t’a wẽnem yɩɩg pipi soabã. Neb kẽer wilgame tɩ sẽn sɩng ne yʋʋmd 1914, zabã kʋʋ sẽn yɩɩd neb miliyõ 100, la koms neb wʋsgo.
wp17.3 5 s. a 4-5
Wed-rʋʋdb a naasã yaa ãnd dãmba?
“Mam yãa wed-mo-sablga, la sẽn da zao-a a zugã ra zãada makdg a nugẽ. Mam wʋma bũmb sẽn wõnd koɛɛg sẽn gom bõn-vɩɩs a naasã sʋk n yeele: ‘Bɩle kilo yaa deniye a ye, la orz kilo a tãab yaa deniye a ye. La ra maan oliiv kaamã ne divẽ wã bũmb ye.’”—Vẽnegre 6:5, 6.
Sẽn zao-a wed-mo-kãngã makda komã. Wilgdame tɩ rɩɩbã paoong yaa toog hal tɩ bɩle kilo yaa deniye a ye. Pipi kiris-nebã wakatẽ, deniye a ye ra yaa daar a ye tʋʋmd yaoodo. (Matiye 20:2) Deniye a ye me ra tõe n daa orz kilo a tãab la bũmbu. Orzã sõmblem pa ta bɩle wã ye. La ned zak neb sã n waoogẽ, a maanda a wãn tɩ b paam dɩɩbo? Pĩnd wẽndẽ wã, bɩle wã, orzã, oliivã kaam la divẽ wã ra naaga nebã daar fãa rɩɩbã pʋgẽ. B sẽn sõdg bõn-kãensã vɛrse-rãmbã pʋgẽ wã yaa sẽn na yɩl n keoog nebã tɩ b bãng kẽgsgo, baa b daar fãa rɩɩbã pʋgẽ.
Vẽnegre; wp17.3 5 s. a 8-10
Wed-rʋʋdb a naasã yaa ãnd dãmba?
Wed-rʋʋd a naas-n-soabã makda kũumã sẽn tũud ne bãasã la yɛl a taabã. Yʋʋmd 1914 poor bilfu, girip ɛspayõllã kʋʋ neb miliyõ piiga. Bãagã sẽn yõk b rãmbã tõe n taa neb milyõ 500, rat n yeel tɩ neb a tãab sʋka, nin-yɛng la bãagã yõk-yã.
La rẽ tɛka, bãas a taab n puki. Bãngdbã wilgame tɩ yʋʋmd 1901 wã n tãag yʋʋmd 2000, gɛndbã kʋʋ neb milyõ kobse. Hal ne rũndã, SIDA wã, kõs-kʋdgã la pali wã kʋʋ neb milyõ-rãmba, baa ne logtoɛɛmbã sẽn modgd wʋsg ne bãasã tɩt baoobã.
Yaa zabã tɩ yaa komã bɩ bãasã, fãa wata ne kũum. Kũumã tara vargr bala, tɩ sẽn maand kae ye.
D bʋgs Wẽnnaam Gomdã zug neere
Vẽnegre 4:4, 6; re 76-77 s. a 8
A Zeova geerã neerem
8 A Zã ra miime tɩ pĩnd wẽndẽ wã, maan-kʋʋdb la b yãk tɩ b tʋmd sɛk roogã zĩigẽ. Rẽ n so t’a sẽn yã bũmb ningã ling-a. Ad a sẽn yã wã: “Gɛy pisi la a naas n da gũbg geerã. La mam yãa kãsem-dãmb pisi la a naas sẽn zao ge-kãens zut n yer fu-peelse, la b fõg sãnem maanf-rãmba.” (Vẽnegre 4:4) A Zã pa yã maan-kʋʋdb ye. A yãa kãsem-dãmb pisi la a naas sẽn zao gɛy zutu, la sẽn fõgen sãnem maanf-rãmb wa rĩm-dãmba. Kãsem-dãmbã yaa ãnd dãmba? Yaa kiris-neb nins sẽn paam vʋʋsem sõng zaeebã, n vʋʋg n tar ziir saasẽ, wa a Zeova sẽn da pʋlem-bã. Bõe n kɩt tɩ d mi rẽ?
re 80 s. 19
A Zeova geerã neerem
19 Bõn-vɩɩsã makda ãnd dãmba? No-rɛɛs a to yʋʋr sẽn boond t’a Ezekɩyɛll paama vẽnegre, tɩ sõngd tõnd tɩ d paam sokrã leoore. A Ezekɩyɛll yãa saar sẽn be saasẽ, t’a Zeova zao a naam geerã n be saarã zugu, tɩ bõn-vɩɩs sẽn wõnd b rãmb nins a Zã sẽn yã wã pʋgda. (Ezekɩyɛll 1:5-11, 22-28) Kaoosg poorẽ, a Ezekɩyɛll le yãa saar-kãng tɩ geer be a zugã, tɩ bõn-vɩɩsã pʋgda. La so-kãngã, a yeelame tɩ bõn-vɩɩsã yaa seribẽ-rãmba. (Ezekɩyɛll 10:9-15) Bõn-vɩɩs a naasã a Zã sẽn yã wã tog n makda Wẽnnaam seribẽ-rãmb ka tɛkã. Yaa malɛgs sẽn tar yasr wʋsg malɛgsã sʋka. A Zã sẽn yã tɩ seribẽ-rãmb yasa a Zeova sɛɛgẽ wã pa ling-a ye. Bala pĩnd wẽndẽ wã, sɛk-roogã pʋgẽ, seribẽ-rãmb a yiib b sẽn maan ne sanem n da be kãabg-koglgã lingã zugu, tɩ makd a Zeova naamã geere. Yaa seribẽ-kãensã sʋk la a Zeova koɛɛgã ra yita, n wilgd nin-buiidã noy nins b sẽn segd n tũ wã.—Yikri 25:22; Yɩɩn-sõamyã 80:2.
Vẽnegre 5:5; cf 36 s. a 5-6
“Gese! Zida buudã Gɩgemdã sẽn yaa a Davɩɩd yẽgrã”
5 Naoor wʋsgo, gɩgemd makda raoodo. Yãmb zoe n yãa gɩgemd vẽeneg-vẽeneg bɩ? Y sã n zoe n yã-a lame, dẽnd a ra bee zĩig sẽn gũbg pʋgẽ, tɩ y miẽ tɩ bũmb pa tõe n maan-y ye. Tõe tɩ yaa zĩig sẽn gũbg ne giryaase, tɩ b gʋʋnd we-rũms be. Sẽn yaa a soab fãa, tõe tɩ rabeem yõk-y lame. Y sã n get rũn-kãngã sẽn yaa bedr la a tar pãngã, n yas n get yãmbã, y kõn tags tɩ bũmb tõe n kẽes-a-la rabeem t’a zoe ye. Biiblã goma gɩgemd yelle, n yeel tɩ “rũmsã fãa sʋka, yaa yẽnda n yaa gãndaoogo. A ka targd bũmb baa fɩ taoor ye.” (Yel-bũnã 30:30) Yaa raood a woto buud la Kirist sẽn tarã.
6 Bɩ d ges a Zeezi sẽn wilg to-to t’a tara raood wa gɩgemde, bũmb a tãab pʋgẽ: A gomame n teel sɩdã, a wilgame t’a nonga tɩrlem, la a yals kãn-kãe namsgã pʋgẽ. D na n yãame me tɩ d yaa rabɛɛm tɩ d pa rabɛɛm, tõnd ned kam fãa tõe dɩka a Zeezi togs-n-taare, n tall raoodo.