Bõe la Biiblã yet malɛgsã zugu?

Malɛgsã pa tar “nemd wall kõab” wa ninsaalbã ye. Wa d sẽn pa tõe n yã Wẽnnaamã, d pa tõe n yã malɛgsã me ye. Malɛgs nins sẽn sakd Wẽnnaamã bee saasẽ ne-a, n tõe n paam n pẽneg-a.—Luk 24:39; Matye 18:10; Zã 4:24.

Pĩnd wẽndẽ, malɛgs n da mi n tedg b mens n lebg wa ninsaalba, n wa tẽngã zug n wa maan bũmb Wẽnnaam sẽn tʋm-b tɩ b wa maane. B sã n na n leb saasẽ, b le tedgdame n lebg malɛgse.—Bʋ-kaoodbã 6:11-23; 13:15-20.

Yaa sɩd tɩ Biiblã pʋgẽ, b mi n bilgda malɛgsã tɩ yaa wa b yaa rapa. B sã n na n tedg me n lebg wa ninsaala, b tedgdame n yaa rapa. La malɛk pa be raoog bɩ poak ye. B pa kẽed kãadem, b pa rogd me ye. Malɛgsã pa kom-peels bɩ kom-bõoneg wall kãsemb sẽn da zĩnd tẽngã zug n ki n kẽng saasẽ ye. A Zeova naan-b lame tɩ b yaa malɛgse. Rẽ n so tɩ Biiblã boond-b tɩ “Wẽnnaam kom-dibli.”—Zoob 1:6; Yɩɩn-sõamyã 148:2, 5.

Biiblã wilgdame tɩ wa ninsaalbã sẽn tar buud-goamã, malɛgsã me tara b goama. Baa ne Wẽnnaam sẽn mi n tũnug ne malɛgs n taas ninsaalbã a koeesã, a pa rat tɩ d pʋʋs malɛgsã bɩ n waoog-b wa d sẽn waoogd yẽ to-to wã ye.—1 Korẽnt-rãmbã 13:1; Vẽnegre 22:8, 9.

Malɛgs tus piig naoor tus piiga, la tus naoor tusa n be. Rẽnd tõe tɩ b sõorã taa milyaar-dãmba.—Dãniyɛll 7:10; Vẽnegre 5:11.

Malɛgsã tõog la b pãng yɩɩda ninsaalbã. B yamã me yɩɩda ninsaalbã hal zĩig sẽn zãre. B tõe n kẽnga b sẽn datẽ ne tʋʋlem buud ninsaal sẽn pa tõe n tags n bãnge.—Yɩɩn-sõamyã 103:20; Dãniyɛll 9:20-23.

Baa ne b yamã la b pãngã sẽn yɩɩd tõndã, bãmb me tara b sẽn pa tõe. Leb n pa bũmb fãa la b mi ye.—Matye 24:36; 1 Pɩyɛɛre 1:12.

Wẽnnaam naana malɛgsã tɩ b yaa toor-toor wa ninsaalbã. A naan-b lame tɩ b tõe n dɩk a togs-n-taare, la b tõe n yãk b toorẽ yam. Bãmb me tõe n yãka yam n maan sẽn yaa sõma, wall sẽn yaa wẽnga. Bʋko, malɛgs n yãk yam n kɩɩs Wẽnnaam, n lebg tõatba.—Zʋʋd 6.