Rĩmã zomba bõn-bil n kẽ Zeruzalɛm

Nizã rasem a 9 wã sẽn yɩ hat daarã, a Zeezi ne a karen-biisã yii Betani n debd Zeruzalɛm. B sẽn wa n kolg Bɛtfaaze sẽn be Oliiv tɩɩs tãngã zugã, a Zeezi tʋma a karen-biis a yiibu. A tʋm-b-la bõe yĩnga?

A yeel-b-la woto: “Kẽng-y tẽng ning sẽn be yãmb taoorã. Yãmb sã n kẽ be bala, y na n yãnda bõn-yãang sẽn loe tɩ bõn-bil be ne-a. Lok-y-b n wa n kõ maam. Ned sã n yeel-y tɩ bũmb bɩ y leok tɩ yaa Zu-soabã n dat-ba, la wakat-kãnga, a na n bas-b lame tɩ b looge.”—Matye 21:2, 3.

Zĩig pʋgẽ wã, karen-biisã pa bãng t’a Zeezi sẽn dat n maanã yaa bũmb no-rɛɛsdbã sẽn da reng n togs ye. La b wa n bãngame tɩ no-rɛɛs a Zakari ra togsa rẽ. Sɩd me, a wilgame tɩ Wẽnnaam sẽn yãk Rĩm ningã na n zomba bõang n kẽ Zeruzalɛm. A ra yeelame: “Bãmb . . . yaa sik-m-meng soaba, n zao bõanga, bãmb zaoo bõan-bila, bõan-yãang biiga.”—Zakari 9:9.

Karen-biisã sẽn ta Bɛtfaaze n yõk bõn-bilã ne a ma wã, neb sẽn da yas beenẽ n sok woto: “Yãmb maanda bõe? Yaa bõe tɩ yãmb lokd bõn-bilã?” (Mark 11:5) Karen-biisã sẽn yeel-b tɩ yaa Zu-soabã n datã, b bas-b lame tɩ b loog ne bõensã. B sẽn ta, karen-biisã yãgsa b zugẽ futã n palg bõangã ne a biigã, la a Zeezi zomba bõn-bilã.

A Zeezi sẽn kolg Zeruzalɛmmã, kʋʋng n kaoog n segd-a, hal tɩ nebã sõor da tar paasgo. Neb wʋsg yɛɛda b fut sorã zugu, tɩ kẽer gãneg “tɩɩs vãad b sẽn kao pʋt pʋsẽ.” B ra kelemdame n yetẽ: “Hozaana! Bark bee ned ning sẽn wat ne Zu-soabã yʋʋrã zugu! Bark bee soolem ning sẽn wat-a wã, tõnd ba a Davɩɩd soolmã zugu.” (Mark 11:8-10) Fariizẽ-rãmb kẽer sẽn da be kʋʋngã sʋk sũy yikame, nebã sẽn kilsd a Zeezi wã yĩnga. B yeel-a lame t’a ‘leng a karen-biisã tɩ b sĩndi.’ La a Zeezi leokame: “Mam yeta yãmb tɩ b sã n sĩndi, kugã na n kelmame!”—Luk 19:39, 40.

A Zeezi sẽn wa n tool n ne Zeruzalɛmmã, a wẽe siri, n yeele: “Fo me sã n da bãngẽ bũmb ning sẽn wat ne fo laafɩ wã rũndã! La moasã b solga ne foom. Wakat n wat tɩ fo bɛɛba na n me bõn-yood n gilg foom.” Zeruzalɛm nebã na n paama toogo, b sẽn kɩɩs Wẽnnaamã. A Zeezi yeelame: “B na n gũbga foom n dɩdg-f zĩiga fãa. B na n sarma foom ne f kambã sẽn be fo pʋgẽ wã, la b kõn bas kugr baa yembr kugr a to zug fo pʋgẽ ye.” (Luk 19:42-44) Wa a Zeezi sẽn yeelã, b sɩd sãama Zeruzalɛm. Yɩɩ yʋʋmd 70 soabã pʋgẽ.

A Zeezi sẽn kẽ Zeruzalɛmmã, “tẽngã fãa rãmbame tɩ b sokdẽ tɩ yaa yɛ ned la woto?” Kʋʋngã leokame tɩ “yaa a Zeezi, Wẽnnaam no-rɛɛs sẽn yit Nazarɛt sẽn be Galɩle soolem.” (Matye 21:10, 11) Neb n be kʋʋngã sʋka, n da paam n yã a Lazaar vʋʋgrã. Bãmb dãmbã togsa neb a taabã kibarã. Fariizẽ-dãmbã sũy sãamame, bala sẽn maand kae ye. B yeela taab yaa: “Nebã fãa pʋgda bãmba.”—Zã 12:18, 19.

A Zeezi sã n da wa Zeruzalɛm fãa, a kẽeda wẽnd-doogẽ wã n zãms nebã. So-kãngã me, a maana woto. A puka zoens nini, la a kɩt tɩ wobs paam nao. Maan-kʋʋdbã kãsem-dãmb ne tõog karen-saam-dãmbã sẽn yã rẽ, la b wʋm kambã sẽn kaasd wẽnd-doogẽ wã n yetẽ tɩ “hozaana a Davɩɩd Bi-riblã,” b sũyã yika wʋsgo. B soka a Zeezi yaa: “Yãmb wʋmda kambã sẽn yetã bɩ?” A Zeezi leok-b lame yaa: “M sokda yãmb y sã n nan ka karem gom-kãensã sẽn be gʋls sõmyã pʋgẽ wã sẽn yet tɩ: ‘Yãmb paama pẽgr sẽn yit kom-bãooneg la kamb sẽn ket n yẽsemdẽ noyẽ?’ ”—Matye 21:15, 16.

A Zeezi zẽka a neng n ges bũmb nins sẽn be wẽnd-doogẽ wã. La sẽn mik tɩ wĩndgã lʋɩɩs kolgame wã, yẽ ne a tʋm-tʋmdbã yiime n looge. B leba Betani tɩ Nizã rasem 10 daar nan pa ta ye. Yaa be la a gãand hatã yʋngo.