Kiris-nebã vɩɩm la b tʋʋma tigissã na-kẽndr sebr not-rãmbã
© 2024 Watch Tower Bible and Tract Society of Pennsylvania
SƖPAOLG RASEM A 4-10
D SẼN BÃNG BIIBLÃ KARENG PƲGẼ YƖƖN-SÕAMYÃ 105
“A tẽegda a kaoolã yell wakat fãa”
Bõe la d tõe n maane, n maneg n kɩs sɩd tɩ dũni-paalgã na n waame?
11 D ges bũmb a wãn a Zeova sẽn da pʋlem a nin-buiidã pĩnd wẽndẽ wã, tɩ wõnd ra pa tõe n pids ye. Baa ne a Abrahaam ne a Saara yʋʋmã sẽn da vẽsgã, a yeel-b lame tɩ b na n paama biiga. (Sɩng. 17:15-17) Sẽn paase, a yeela a Abrahaam t’a yagensã na n wa sooga Kanaã tẽngã. Israyɛll nebã sẽn da yaa a Abrahaam yagensã sẽn zĩnd yembd Ezɩpt tẽngã n maan yʋʋm wʋsgã, ra wõnda a Zeova sẽn yeel bũmb ningã pa na n tol n pids ye. La pidsame. Pipi kiris-nebã wakatẽ wã me, a Zeova yeela pʋg-yãang a Elizabɛt t’a na n paama biiga. A leb n yeela a Maari me sẽn da pa mi raoã, t’a na n doga Wẽnnaam Bi-riblã, soab ning waoong a sẽn da pʋlem yʋʋm tusa sẽn looge, Edɛn zẽedã zĩigẽ wã. Pʋlen-kãng me pidsame. (Sɩng. 3:15) Wakat fãa a Zeova pidsda bũmb ning a sẽn pʋlem t’a na n maaname.
12 D sã n tagsd bũmb nins a Zeova sẽn pʋlem la a sẽn pidsã zugu, na n kɩtame tɩ d maneg n tẽ t’a tara pãn-kãseng n na n pids a sẽn pʋlem tɩ dũni-paalg n watã. (Karm-y Zozuwe 23:14; Ezayi 55:10, 11.) Sõngda tõnd tɩ d tõe n segl d meng sõma n sõng neb a taab tɩ b bãng tɩ dũni-paalgã a Zeova sẽn pʋlmã pa zãmsdo, bɩ belgr ye. A Zeova mengã goma sa-paalgã la tẽn-paalgã a sẽn pʋlmã yell n yeel yaa: “Gom-kãensã yaa sɩda, n yaa goam b sẽn tõe n tẽ.”—Vẽn. 21:1, 5.
it-2 493 s. a 3
Gomdã
Bũmb nins fãa Wẽnnaam sẽn naanã sakda a gomdã. A tõe n kɩtame tɩ b maan a raabã. (Yɩɩn. 103:20; 148:8) D tõe n kɩsa a gomdã sɩda. A sã n pʋlem bũmb me, a tẽegdame n pids-a. (Tõo. 9:5; Yɩɩn. 105:42-45) Wa yẽ mengã sẽn yeelã, a “gomdã paada wakat fãa.” A sã n togs gomd me, pa lebgd n wa a nengẽ zaalem ye.—Eza. 40:8; 55:10, 11; 1 Pɩy. 1:25.
D bʋgs Wẽnnaam Gomdã zug neere
w86 1/11 19 s. 15
Kom-bɩɩsã sẽn tõe n maan n sõng tɩ zems-n-taar la sũ-noog zĩnd zakã pʋgẽ
15 “B sẽba a [Zozɛf] naoã ne bãense. B balga a yublã kutu. Hal n tãag wakat ning a Zeova gomdã sẽn pidsã, yaa a gomdã n da yɩlgd-a.” (Yɩɩn-sõamyã 105:17-19) Na maan yʋʋm 13 pʋgẽ, a Zozɛf namsame. A yɩɩ yamba, a zĩnda bãens roogẽ me, hal n tãag a Zeova pʋlengã pidsgu. Namsg ning a sẽn paamã yɩlg-a lame. La pa a Zeova n kɩt tɩ zu-loe-kãensã paam-a ye. A basame tɩ paam a Zozɛfe, sẽn na yɩl n pids bõn-daabo. Rẽ yĩnga, a Zozɛf ra na n kell n kɩsa sɩd ne a “Zeova gomdã” baa ne a sẽn da be zu-loees nins pʋgẽ wã bɩ? A ra na n maneg n bɩɩsa zʋg-sõma, wala makre, sũ-mare, sik-m-menga, tẽeb sẽn tar pãnga, la a tʋll ne a sũur fãa n sak n tʋm tʋʋmd b sẽn na n wa kõ-a bɩ? Zu-loe-kãensã fãa yɩlga a Zozɛfe, t’a lebg wa sãnem halaale, la ned Wẽnnaam sẽn nand wʋsgo. A wa n tũnuga ne-a me n maan bũmb toor-toore.—Sɩngre 41:14, 38-41, 46; 42:6, 9.
SƖPAOLG RASEM 11-17
D SẼN BÃNG BIIBLÃ KARENG PƲGẼ YƖƖN-SÕAMYÃ 106
“B yĩma Wẽnnaam sẽn yaa b Fãagdã yelle”
“Yãmb bee a Zeova poorẽ bɩ?”
13 Israyɛll nebã sẽn yã yel-soalmã Sinayi tãngã zugã, rabeemã kẽ-b lame, tɩ b kong n kos a Moyiiz tɩ yẽ rʋ tãngã zug n gom ne a Zeova bãmb yʋʋr yĩnga. (Yik. 20:18-21) A Moyiiz rʋʋ tãngã zug n kaoose. Wõnda Israyɛll nebã sẽn da pa ne b taoor lʋɩtã, b ra getame tɩ b raag-b lame n base. B na n maana wãna? Wõnda yaa a Moyiiz sã n da be ne-b bal la b tar pɛl-kɛgeng la tẽebo. Wa n lebga yɩɩr wʋsg ne-ba, tɩ b tɩ yeel a Aarõ yaa: ‘Maan wẽnnaam n kõ tõnd t’a lʋɩ tõnd taoor n tɛ tõndo. Bala, Moyiiz-kãngã, rao ning sẽn yiis-a tõnd Ezipt tẽngã, tõnd ka mi bũmb ning sẽn paam-a ye.’—Yik. 32:1, 2.
D bʋgs Wẽnnaam Gomdã zug neere
Yɩɩl Sõamyã sebrã babg a tãab-n-soab la a naas-n-soabã tags-kãsemse
106:36, 37. Verse kãensã wilgdame tɩ bõn-naands pʋʋsg yaa wa maand b sẽn kʋʋd zĩn dãmba yĩnga. Tɩ rẽ rat n yeel tɩ ned sã n pʋʋsd bõn-naandse, tõe n wa kɩtame tɩ zĩn dãmb soog-a. Biiblã keoogda tõnd woto: “Gũus-y y mense n da pʋʋs bõn-naands ye.”—1 Zã 5:21.
SƖPAOLG RASEM 18-24
D SẼN BÃNG BIIBLÃ KARENG PƲGẼ YƖƖN-SÕAMYÃ 107–108
“Pʋʋs-y-yã a Zeova barka, bala a yaa sõma”
Bɩ tigingã pẽg a Zeova
2 Kiris-neb tigingã pa neb sẽn tigim taab woto bal ye. Leb n pa buud bɩ zĩig a yembr neb sẽn tigim taab wall neb sẽn nong ɛspoor bɩ reem a to sẽn tigim taab ye. Sẽn yɩɩd fãa, yaa Wẽnnaam a Zeova pẽgr yĩng la b sẽn lugl tigingã. Yɩɩl Sõamyã sebr wilgdame tɩ ra sɩng n yaa woto hal pĩnd wẽndẽ menga. Wala makre, Yɩɩl Sõamyã 35:18 wã pʋgẽ, b yeta woto: “Mam na n pẽga yãmb tiging kãseng pʋgẽ. Mam na n zẽka yãmb yʋʋr kʋʋng kãseng sʋka.” Yɩɩl Sõamyã 107:31, 32 wã pʋgẽ me, b yet-d-la woto: “Bɩ [nebã] pʋʋs Zusoaba bark b nonglmã ne b tʋʋm kãsemsã b sẽn maan n kõ ninsaalbã yĩnga. La bɩ b kõ bãmb waoogr nebã tiging pʋgẽ.”
Bɩ y pẽg a Zeova a sõmblmã yĩnga, n paam barka
4 Sẽn na yɩl n da wa lebg zɩ-beoog soab baooda modgre. Pipi, d gũus n ges bũmb nins a Zeova sẽn maand tõnd yĩngã. Rẽ poore, d tags n ges rẽ sẽn wilgd a Zeova sẽn nong tõndã to-to. Yɩɩl-gʋlsdã sẽn maan woto wã, yɩ-a-la noogo. Bala, a bãngame tɩ bõn-sõma nins a Zeova sẽn maan yẽ yĩngã yaa wʋsgo.—Karm-y Yɩɩl Sõamyã 40:6; 107:43.
D bʋgs Wẽnnaam Gomdã zug neere
it-2 303 s. a 5
Mowaab
Kaoosg zugẽ, a Davɩɩd sẽn wa n lebg rĩmã, zabr n yik Israyɛll ne Mowaab nebã sʋka. Israyɛll nebã tõoga Mowaab nebã, n kɩt tɩ b ra yaood a Davɩɩd fadgo. Wõnda zabrã sẽn wa n sa wã, b kʋʋ Mowaab nebã sẽn yɩɩd pʋɩ-sʋkã fãa. Wõnda a Davɩɩd kɩtame tɩ b gãand tẽng n yɛgl taaba, t’a mak-b ne wĩiri. Yẽ maka wĩir woglem a yiibu, n kʋ nin-kãense, la a mak wĩir woglem a ye n bas bãmb rãmbã tɩ b vɩɩmde. (2 Sãm. 8:2, 11, 12; 1 Kib. 18:2, 11) Tõe me tɩ yɩɩ zab-kãng sasa la a Zehoyada biig a Benaya “kʋ Mowaab rao a Ariyɛll kom-dibli a yiibã.” (2 Sãm. 23:20; 1 Kib. 11:22) A Davɩɩd sẽn tõog Mowaab nebã pidsa bãngr-gomd a Balaam sẽn da pĩnd n togs sẽn yɩɩd yʋʋm 400 woto: A ra yeelame yaa: “Ãdg n na n yi a Zakoob yagensã sʋka, naam dasaar n na n zẽk Israyɛll nebã sʋka. Sãmbg sẽn kae, a na n wãa Mowaab nebã rĩyã, la a wã tãb-biis nins sẽn yaa nen-kɛglem dãmbã zu-wamse.” (Sõd. 24:17) Sẽn paase, tõe tɩ yaa zab-kãng tõogr yell la yɩɩn-gʋlsdã ra gomda, a sẽn yeel tɩ Wẽnnaam nifẽ, Mowaab ra yaa ‘a la-pok a sẽn tar n sood koomã.’—Yɩɩn. 60:8; 108:9.
SƖPAOLG RASEM 25–YƲƲM-SAR RASEM A 1
D SẼN BÃNG BIIBLÃ KARENG PƲGẼ YƖƖN-SÕAMYÃ 109–112
Teel-y-yã a Zeezi sẽn yaa rĩmã!
Yɩɩl Sõamyã sebrã babg a nu soabã tags-kãsemse
110:1, 2—A Zezi Kirist a Davɩɩd sẽn boond t’a “Soaala” sẽn da wa n zĩ Wẽnnaam dɩtgã, a ra maanda bõe? A Zezi vʋʋgrã poore, a rʋʋ saasẽ n tɩ zĩnd Wẽnnaam nug rɩtg n tãag yʋʋmd 1914 sasa wã n na n yaool n deeg Rĩungã naam. La a sẽn da wa n zĩ Wẽnnaam nug rɩtgã t’a ra zoe n dɩta naam sẽn paam-b vʋʋsem sõngã zaeebã zutu, n wilgd-b sor b koe-noogã mooneg la karen-biisã maaneg tʋʋm pʋgẽ. Wakat kãng me a Zezi ra segend-b lame, sẽn na yɩl tɩ b wa lagem-a n dɩ naam a Rĩungã pʋgẽ.—Matɩe 24:14; 28:18-20; Luk 22:28-30.
Sẽn zabd-b ne Wẽnnaamã pa na n tõog ye
3 Yʋʋm kob-gĩnd 20 soabã sɩngr tɛka, b talla zabr ne a Zeova nin-buiidã. Tẽns wʋsg pʋsẽ neb sẽn tar yam-wẽns n bao n na n gɩdg Wẽnnaam Rĩungã koe-noog moonego, bɩ b yals-a menga. Yaa tõnd bɛ meng-mengã sẽn yaa Munaafɩɩkã, sẽn ‘gõod wa gɩgemd sẽn kelemd n baood a sẽn tõe n paam a soab n sãamã’ n tusd-ba. (1 Pɩɛɛr 5:8) “Tẽn-tẽnsã wakat b sẽn yãkã” saab poor yʋʋmd 1914, a Zeova zĩniga a Biriblã t’a yaa tẽngã rĩm paalga, n kõ-a noor t’a ‘rɩ naam a bɛɛba sʋka.’ (Luk 21:24, NW; Yɩɩl Sõamyã 110:2) Kirist wilga a pãnga n dig a Sʋɩtãan n yiis saasẽ, la a kɩt t’a pa tẽngã sẽnese. Munaafɩɩkã sẽn mi t’a wakatã yaa koɛɛgã yĩng kɩtame t’a tar sũ-yikr ne kiris-neb nins sẽn zaeyã la b tũud-n-taasã. (Wilgri 12:9, 17) Kɩɩsdb kãensã sẽn zab ne Wẽnnaamã n yɩlmã baasa ne bõe?
be 76 s. a 2
D paasd d minimã
B sẽn sagl tõnd tɩ d tall d kũunã n sõng d taabã rat n yeelame me tɩ d segd n yɩɩ pipi n bao n na n sõng d taabã. Yãmb yɩta pipi n baood n na n naag y taabã n moon koɛɛgã bɩ? Yãmb baooda segb buud fãa n na n sõng y tigingã nin-paalsã, kom-bɩɩsã la koms-rãmbã bɩ? Yãmb sakdame n naagd n pekd Rĩungã roogo, pa rẽ bɩ n sõngd n tʋmd tʋʋm a taab tigis-kãsemsã sasa bɩ? Yãmb tõe n mi n dɩka sõngr so-pakrã tʋʋmd bɩ? Yãmb tõe n lebga wakat fãa so-pakda, bɩ n tɩ sõng zĩig koe-moondb raab sẽn yaa kãseng bɩ? Yãmb sã n yaa saam-biiga, yãmb modgdame n na n bɩɩs zʋg-sõma nins saam-biig sẽn segd n bɩɩs n paam tɩ b yãk-a t’a lebg kãsem-soab bɩ kãsem-sõngdã bɩ? Y sã n sakd n sõngd y taabã ne yamleoogo, la y sakd tɩ b bobend-y tʋʋm a taaba, yaa kaset tɩ y minimã paasdame.—Yɩɩn. 110:3.
D bʋgs Wẽnnaam Gomdã zug neere
it-1 80 s. a 4
Kaoole
Wẽnnaam maana kaool ne a Zeezi, t’a na n yɩ maan-kʋʋd wa a Melkisedɛke. B gomda kaool-kãng yell Yɩɩn-sõamyã 110:4 pʋgẽ, tɩ sẽn gʋls-a Ebre-rãmb sebrã wilg Ebre-rãmb 7:1-3, 15-17 wã pʋgẽ tɩ yaa ne Kiristã la Wẽnnnaam maan kaoolã. Yaa kaool Wẽnnaam a Zeova sẽn maan ne a Zeezi Kirist bala. Wõnda yaa kaool-kãng yell la a Zeezi sẽn da gomdã, a sẽn wa n maand kaool ne a karen-biisã Rĩung yĩngã. (Luk 22:29) A Zeova pʋlmame t’a Zeezi Kirist sẽn yaa a Bi-ribl sẽn be saasẽ wã na n yɩɩ maan-kʋʋd wa a Melkisedɛke. A Melkisedɛk ra yaa rĩm la maan-kʋʋd Wẽnnaam sẽn yãk tẽngã zugu. La a Zeezi Kirist na n yɩɩ rĩm la maan-kʋʋdb kãsem saasẽ. A sẽn leb saasẽ wã tɛka, a Zeova yãk-a lame t’a lebg rĩm wakat fãa yĩnga. (Ebre. 6:20; 7:26, 28; 8:1) Kaool-kãng pa na n sãam a bada, bala a Zeova na n wilga a Zeezi sor t’a kell n yɩ rĩm la maan-kʋʋdb kãsem wakat fãa yĩnga.—Ebre. 7:3.
YƲƲM-SAR RASEM A 2-8
D SẼN BÃNG BIIBLÃ KARENG PƲGẼ YƖƖN-SÕAMYÃ 113–118
Bõe la d na n maan n lebs a Zeova?
Bɩ nonglmã keng-yã
13 Sã n yaa ne a Zezi goama, yaa vẽeneg tɩ sẽn yɩɩd fãa, pipi, d segd n nonga a Zeova. La d pa rog ne nonglem sẽn bɩ n pid zãng ne a Zeova ye. Yaa bũmb d sẽn segd n bɩɩse. Yaa tõnd sẽn wʋm a yell pipi wã n pẽneg-d ne-a. Bilf-bilfu, d zãms n bãnga a sẽn segl tẽngã to-to ãdem-biisã yĩnga. (Sɩngre 2:5-23) D bãnga a sẽn tall manesem ning ne ãdem-biisã, n pa bas-do, yel-wẽndã sẽn sɩng n kẽ ãdem-biisã, la a rɩka segls n na n fãag tõndo. (Sɩngre 3:1-5, 15) A talla sõmblem manesem ne neb nins sẽn da tar kɩs-sɩdã, la a baas n kõ a Biribl yendã a sẽn naana, tõnd yel-wẽnã sugr yĩnga. (Zã 3:16, 36) Bãngr kãngã sẽn tall paasgã kɩtame tɩ tõnd tall naneb ne a Zeova n paase. (Ezai 25:1) Rĩm a Davɩɩd yeelame t’a ra nonga a Zeova, A sẽn da get a yell ne nonglmã yĩnga. (Yɩɩl Sõamyã 116:1-9) Rũndã-rũndã, a Zeova geta tõnd yelle, n wilgd tõnd sore, n kõt-d pãng la a kengd d raoodo. D sã n zãmsd n paasd a zugu, d nonglmã ne-a paasdame.—Yɩɩl Sõamyã 31:24; Sofoni 3:17; Rom dãmba 8:28.
Reegd-y ne sũ-noogo, la y kõt ne y sũur fãa
Yɩɩl-gʋlsdã ra soka a meng woto: “Mam na n maana bõe n lebs [a Zeova] bõn-neeb nins fãa bãmb sẽn maan n kõ maamã yĩnga?” (Yɩɩl 116:12) Bõe la a Zeova maan n kõ-a? A Zeova sõng-a-la “toog ne sũ-sãoong” sasa. Sẽn paase, a ‘fãag-a-la ne kũum’ menga. Woto n kɩt t’a baood bũmb a sẽn tõe n maan n dole. Bõe la yɩɩl-gʋlsdã ra tõe n maane? A yeela woto: ‘Mam na n pidsa m kãabsã ne Zusoabã.’ (Yɩɩl 116:3, 4, 8, 10-14) A yãka yam n na n pids bũmb nins fãa a sẽn kãab a Zeova wã.
Yãmb me tõe n maana woto? Wãn-wãna? Yaa y sẽn na n kell n modgd ne y sũur fãa n tũud Wẽnnaam noyã y vɩɩmã pʋgẽ. Bɩ y mao tɩ wakat fãa bɩ yaa a Zeova raabã maaneg n pak-y n yɩɩd sẽn ketã fãa, la y sakdẽ t’a vʋʋsem sõngã wilgd-y sẽn segd bũmb fãa pʋgẽ. (Koɛ. 12:13; Gal. 5:16-18) Yaa sɩd tɩ y pa tõe n dol a Zeova bũmb nins fãa a sẽn maan n kõ-yã yĩng ye. La a sã n ne y sẽn kẽesd y pãngã la y yamã fãa a tʋʋmdã pʋgẽ, ‘kõt-a-la sũ-noogo.’ (Yel. 27:11) Ad tõnd sẽn paam n tõe n kɩt t’a Zeova sũur yɩ noogã sɩd yaa zu-zẽkr meng n kõ-do!
Bũmb kẽer Maan-kʋʋr sebrã sẽn sõngd tõnd tɩ d bãnge
9 D sẽn tõe n bãngã. Yiibu: D tũuda a Zeova, d sẽn nong-a la d rat n pʋʋs-a barkã yĩnga. Sẽn na yɩl n wʋm rẽ võor sõma, d gom zems-n-taar maandã Israyɛll nebã sẽn da maandã yelle. Maan-kʋʋr sebrã wilgdame tɩ Israyɛll ned ra tõe n maana zems-n-taar maoongo, Wẽnnaam “bark pʋʋsg” yĩnga. (Maan. 7:11-13, 16-18) Maoong a woto pa tɩlɛ ye. Yaa a soab n maand ne yamleoogo. A soabã n yãkd a yam n na n maan maoongã, a sẽn nong a Zeova sẽn yaa a Wẽnnaamã yĩnga. Maoongã sã n maane, sẽn wa-a ne rũngã, a zakã rãmba, n paas maan-kʋʋdbã n wãbd nemdã. La rũngã zĩis kẽer ra yaa a Zeova a ye tãa la b kõta. Yaa a zĩ-bʋse?
10 D sẽn tõe n bãngã. Tãabo: Tõnd sẽn nong a Zeova wã, d kõt-a-la d sẽn tar tɩ yaa sõma n yɩɩdã. Rũng maoong pʋgẽ, a Zeova ra getame tɩ sẽn yaa sõma n tɩ yɩɩd rũngã pʋgẽ yaa a kaamã. A ra yeelame me tɩ rũngã yiimã ne a sãoorã yaa sõma wʋsgo. (Karm-y Maan-kʋʋr 3:6, 12, 14-16) Rẽ n so tɩ Israyɛll ned sã n da maan maoong ne yamleoogo, n kõ a Zeova yiimã ne sãoorã la kaamã, tolg n nooma a Zeova wʋsgo. Israyɛll ned sã n da maan maoong a woto buudã, wilgdame t’a kõo a Zeova a sẽn tar tɩ yaa sõma n yɩɩdã. A Zeezi me sẽn tũ a Zeova ne a sũur fãa nonglem yĩngã, yaa wa a sẽn kõ-a a sẽn da tar tɩ yaa sõma n yɩɩdã ne yamleoogo. (Zã 14:31) Wẽnnaam raabã maaneg ra kõta a Zeezi sũ-noogo, bala a ra nonga Wẽnnaam tõodã ne a sũur fãa. (Yɩɩn. 40:9) Hakɩɩka, a Zeova sũur da nooma wʋsgo, a sẽn da ne t’a Zeezi tũud-a-la ne yamleoog woto wã.
11 Tõnd me sẽn maand a Zeova raabã ne yamleoogã, yaa wa d sẽn kõt-a zems-n-taar maando, bala wilgda a Zeova tõnd sẽn nong-a to-to wã. D kõt-a-la d sẽn tar tɩ yaa sõma n yɩɩdã. Rẽ me, yaa d sẽn nong-a ne d sũur fãa wã yĩnga. Hakɩɩka, a Zeova sũur tog n nooma wʋsgo, a sẽn ne tɩ neb milyõ-rãmb n yãk yam n tũud-a, b sẽn nong-a ne b sũur fãa, la b nong a noyã yĩngã. D sã n tẽegdẽ tɩ pa tõnd sẽn maandã bal la a Zeova geta, la t’a mii bũmb ning me sẽn kɩt tɩ d maand rẽ wã, tõe n bels-d lame la keng d raoodo. Wala makre, y sã n kʋʋlame, n pa le tõe n maan bũmb kẽer wa y sẽn datã, bas-y y yam t’a Zeova zʋʋg n geta y modgrã. Tõe tɩ y tagsdame tɩ y sẽn maandã paoodame, la a Zeova nee y sẽn nong-a ne y sũur fãa, tɩ rẽ kɩt tɩ y maand y sẽn tõe wã. Y sẽn kõt-a y sẽn tõe wã, a maanda sũ-noog ne rẽ.
D bʋgs Wẽnnaam Gomdã zug neere
w12 15/5 22 s. a 1-2
Karemdbã sogsgo
A Zeova vẽnega yɩɩn-gʋlsd t’a yeel yaa: “Neb nins sẽn maand sɩd ne a Zeova wã kũum yaa bõn wʋsg a nifẽ.” (Yɩɩn. 116:15) Neb nins sẽn tũud a Zeova ne b sũy fãa wã vɩɩm tara yõod wʋsg a nifẽ. La Yɩɩn-sõamyã 116 pa gomd nin-yend kũum yell ye.
Kiris-ned sã n maan kaalem, tɩ b na n wɛgs sõsg n gom a yelle, pa zems tɩ sõsdã tik vɛrse kãngã n yeel tɩ nin-kãng kũumã yaa bõn wʋsg a Zeova nifẽ, baa a soabã sã n maana sɩd ne a Zeova ye. Bõe yĩnga? Bala yɩɩn-gʋlsdã goamã võor pa woto ye. A rat n yeelame tɩ Wẽnnaaam nifẽ a nin-buiidã zãng sẽn maand sɩd ne-a wã vɩɩm tara yõod wʋsgo, hal tɩ b kũum yaa bõn wʋsgo.—Ges-y Yɩɩn-sõamyã 72:14; 116:8.
YƲƲM-SAR RASEM A 9-15
D SẼN BÃNG BIIBLÃ KARENG PƲGẼ YƖƖN-SÕAMYÃ 119:1-56
“Bi-bɩɩg na n maana wãn t’a sor kell n yɩ yɩlemde?”
w87 1/11 18 s. 10
Yãmb ket n yaa yɩlemd y yĩngã wɛɛngẽ, y tagsa wã, la y yel-manesmã wɛɛngẽ bɩ?
10 Efɛɛz rãmb 5:5 wã pʋgẽ, a Poll keooga kiris-nebã yaa: “Bala yãmb miime la y sak n deegame tɩ yoaad baa a ye wall ned sẽn tʋmd tʋʋm-dẽgd bɩ yão-be-neda, rat n yeel tɩ bõn-naands pʋʋsd baa a ye pa na n paam pʋɩɩr Kiristã ne Wẽnnaam Rĩungã pʋgẽ ye.” Baa ne rẽ, yʋʋmd fãa yaa d tẽed-n-taas bãmb tusa la b kibindi, pa rẽ bɩ n yiisd tigingã pʋgẽ yoob yĩnga, bala nin-kãens sẽn yo wã, ‘b beega b mens yĩngã.’ (1 Korẽnt rãmbã 6:18) Naoor wʋsgo, yaa b sẽn pa ‘gũus b menga, la b kẽn wa sẽn zems [Wẽnnaam] gomdã’ yĩnga. (Yɩɩn-sõamyã 119:9) Wala makre, d saam-biis wʋsg pa maan gũusgu, b sẽn wa n dɩk b vʋʋsmã sasa ye. B maana b toog kae ne tigissã la bũmb a taab d sẽn maand n kengd d tẽebã. B yõga zood ne neb sẽn pa tũud a Zeova, zĩig ning b sẽn dɩk vʋʋsmã n kẽngã. Kiris-neb kẽer sẽn da tagsd tɩ nin-kãens yaa ‘nin-sõamyã’ wã, b naag-b lame n maan bũmb toor-toor tɩ kɩt tɩ b sũur-kasetã ning-b taale. Kiris-neb a taab pʋd n yõga zood meng-meng ne b tʋmd-n-taase. Kiris-ned a ye sẽn da yaa kãsem-soab n yõg zood meng-meng ne a tʋmd-n-ta-poaka, hal n bas a zakã rãmb n tɩ vɩ ne pʋg-kãnga. B wa n yiis-a-la tigingã pʋgẽ. Hakɩɩka, Biiblã sẽn yeel bũmb ningã yaa sɩda. A yeelame yaa: “Tũud-n-ta-wẽns sãamda minim-sõamyã”!—1 Korẽnt rãmbã 15:33.
“Mam nonga yãmb sẽn tẽegd maam y noyã”
A ZEOVA tẽegda a nin-buiidã a noyã, sẽn na yɩl n sõng-b tɩ b tõog n mao ne tõnd wakatã sẽn yaa toog wakatã zu-loeesã. Yaa tõnd meng Biibl karengã sasa la kiris-neb tigissã sasa la b tẽegd tõnd no-kãens kẽere. Bũmb nins tõnd sẽn karemd bɩ d sẽn wʋmd sasa kãensã wã pa bõn-paals ye. Naoor wʋsgo, yaa yɛl d sẽn zoe n miẽ. La d sẽn yaa yĩmdbã yĩnga, rẽndame tɩ wakat fãa bɩ b tẽeg-d a Zeova raabã la a noyã. Dẽnd d segd n talla mi-beoog ne a Zeova, a sẽn tẽegd tõnd a noyã. B kengda tõnd raoodo, bala b sõngda tõnd tɩ d ket n tẽr bũmb nins sẽn kɩt tɩ d rat n yɩ wẽn-sakdbã. Yaa rẽ n so tɩ yɩɩl gʋlsdã yɩɩl n pẽg a Zeova n yeel woto wã: “Yãmb kaseta [tẽesgã, NW] me yaa noog ne maam, a sagenda maam.”—Yɩɩl Sõamyã 119:24.
Da ges-y bõn-zaals ye!
2 La bũmb nins tõnd sẽn getã me yaool n tõe n wã-d lame. Ninsaal sã n yã bũmbu, paada a yamẽ wã. Woto kɩtame tɩ d sẽn get bũmb ninsã tõe n kɩt tɩ d tall tʋls-wẽns la mag-bɛda, wall b paas tʋlsmã bɩ mag-bɛdã pãnga. Sẽn paase, d sẽn vɩ dũni sẽn põog pʋgẽ, t’a nebã nong yõ-noogrã, tɩ le yaa a Sʋɩtãan n so-a wã yĩnga, b wilgd-d-la yɛl toor-toor televiziõ wã, soayã noy la zʋrno rãmbã pʋsẽ, tɩ baa yaa wakat bilf meng la d ges-b bɩ tõe n kɩt tɩ d maan sẽn pa segde. (1 Zã 5:19) Rẽnd d wʋmda yɩɩl-gʋlsdã sẽn da kos Wẽnnaam bũmb ningã võore. A ra kosa Wẽnnaam woto: “Bɩ y kɩt tɩ m wẽneg n da ges bõn-zaals ye, bɩ y kõ maam vɩɩm y sorã pʋgẽ.”—Yɩɩl 119:37.
D bʋgs Wẽnnaam Gomdã zug neere
Teeg-y a Zeova goamã
2 Yaa Wẽnnaam koɛɛgã yõod yell la Yɩɩll Sõamyã 119 soabã gomd n yɩɩda. A gʋlsdã tũu Hebre goamã gʋls-biis sẽn pʋgd taab to-to wã n gʋls-a. Tõe tɩ yaa sẽn na yɩl t’a tẽegr yɩ nana. A verse rãmbã fãa yaa bãmb 176, n tũud Hebre goamã gʋls-biis tongre. Yɩɩllã sull 22 wã fãa sɩngda ne gʋls-bi-yende. Yɩɩn-kãngã gomda Wẽnnaam goamã, a tõodã, a soayã, a noyã, a raabã, a saglsã la a bʋ-kaoã yelle. Sõs-kãngã la sẽn na n pʋgl-a wã pʋgẽ, d na n vaeesa Yɩɩll Sõamyã 119 soabã b sẽn lebg tɩ zems kɛpɩ ne Hebre wã. D sã n bʋgs yɛl nins a Zeova pĩnd wẽndẽ la a rũndã-rũndã sõgen dãmbã sẽn vɩɩmdã, na n kɩtame tɩ d wʋm yɩɩn-kãngã a sẽn vẽneg tɩ b gʋlsã võor n paase, la kɩt me tɩ nonglem ning d sẽn tar ne Biiblã sẽn yaa Wẽnnaam Gomdã paase.
YƲƲM-SAR RASEM 16-22
D SẼN BÃNG BIIBLÃ KARENG PƲGẼ YƖƖN-SÕAMYÃ 119:57-120
D sẽn tõe n tõog toog to-to
“Mam nonga yãmb Tõogã wʋsgo!”
2 D tõe n sokame n gese, yaa wãn to la Wẽnnaam tõogã ra tõe n bels yɩɩl gʋlsdã, baa ne a namsgã fãa? Yaa yɩɩl gʋlsdã sẽn da kɩs sɩd t’a Zeova tagsda a yellã n sõng-a. A sẽn da mi Wẽnnaam tõogã sẽn nafd ninsaalbã ra kõt-a-la sũ-noogo, baa ne a bɛɛbã sẽn da namsd-a wã. A sak n deegame t’a Zeova ra maand-a-la neere. Sẽn paase, yɩɩl gʋlsdã sẽn tũ Wẽnnaam tõogã kɩtame t’a yamã ra yɩɩd a bɛɛbã, la kogla a vɩɩmã menga. A sẽn sak tõogã, a paama bãan la sũur kaset sẽn yaa sõma.—Yɩɩl Sõamyã 119:1, 9, 65, 93, 98, 165.
Yãmb nonga a Zeova tẽegrã hal wʋsg bɩ?
3 Wẽnnaam tẽegrã ra tara yõod wʋsg ne yɩɩl-gʋlsdã sẽn yɩɩl woto wã: “Mam yãgdame n ka kaoosdẽ tɩ sak yãmb noyã ye. Nin-wẽns tãoos gũbga maam, la mam ka yĩmd yãmb tõoga yell ye.” (Yɩɩl Sõamyã 119:60, 61) A Zeova tẽegrã sõngda tõnd tɩ d tõog toog namsg d tẽebã yĩng taoore, bala d kɩsa sɩd tɩ d yĩngr Ba wã tõe n kãsga gɩdgr wĩy nins d bɛɛbã sẽn dɩk n loe tõndã. Wakat sẽn zems pʋgẽ, a kõt-d-la paam-m-meng ne gɩdgr a woto, tɩ d tõog n kẽng taoor ne Rĩungã mooneg tʋʋmde.—Mark 13:10.
Yɩɩl Sõamyã sebrã babg a nu soabã tags-kãsemse
119:71—Wãn to la zu-loeesã tõe n naf-do? Zu-loeesã tõe n kɩtame tɩ d teeg a Zeova zãngã, n pʋʋsd-a ne d sũur fãa, n zãmsd Biiblã wakat fãa, la d tũud d sẽn zãms bũmb ninsã. Sẽn paase, zu-loeesã vẽnegda tõnd pãn-komsem nins d sẽn segd n demsã. D sã n basdẽ tɩ namsgã remsd-do, pa segd n kɩt tɩ d yɩ sũ-to-neb ye.
“Yãb-y ne neb nins sẽn yãbdã”
3 Yaa d saasẽ Ba a Zeova sẽn kʋmd d nimbãanegã nengẽ la d paamd belsg n tɩ yɩɩda. (Karm-y 2 Korẽnt-rãmb 1:3, 4.) A nimbãan-zoeerã ka to ye. A yeta tõnd ned kam fãa yaa: “Yaa maam bala, maam m yembr bal n belsd foom.”—Eza. 51:12; Yɩɩn. 119:50, 52, 76.
5 D ned sã n maan kaalem, d tõe n kɩsa sɩd zãng-zãng t’a Zeova na n maana bũmb n sõng-do. Rẽ n so tɩ d segd pʋʋs-a wakat fãa, n pelg d pʋg n togs-a sũ-sãangã sẽn namsd tõnd to-to wã. D sẽn mi t’a Zeova mii d sũ-sãangã sẽn ta zĩig ningã, la t’a na n maana bũmb n bels-dã, kengda d raoodo. La a maanda wãn n belsd tõndo?
D bʋgs Wẽnnaam Gomdã zug neere
Yɩɩl Sõamyã sebrã babg a nu soabã tags-kãsemse
119:96—B sẽn yet ‘tɩ bũmb fãa zemsg bee tɛkã’ võor yaa bõe? Yɩɩl-gʋlsdã ra gomda bũmb sẽn zems zãng ninsaalbã nifẽ yelle. Tõe t’a rat n wilga ne gom-kãensã tɩ ne ninsaalbã, bũmb fãa zemsg tara koaka. La Wẽnnaam tõoga yẽ pa tar koak ye. Vɩɩmã nens fãa pʋgẽ, a saglsã tara yõodo.
YƲƲM-SAR RASEM 23-29
D SẼN BÃNG BIIBLÃ KARENG PƲGẼ YƖƖN-SÕAMYÃ 119:121-176
Y sẽn tõe n maan to-to n gil sũ-sãamse
D bas tɩ Wẽnnaam noyã la a saglsã sõng-d tɩ d kibl d sũur-kasetã
5 D sã n karemd Biiblã, d bãngda Wẽnnaam noyã. La d sã n dat tɩ Wẽnnaam noyã naf-do, d segd n maanã sẽn yɩɩd rẽ. Yaa tɩlɛ tɩ d nong Wẽnnaam noyã la d sak-ba. Ad Biiblã sẽn yete: “Kisg-y wẽng la y nong sẽn yaa neere.” (Amoos 5:15) La bõe n na n sõng-do? D mao tɩ d tagsg sẽn yaa a soab bũmb fãa pʋgẽ wã zems ne a Zeova raabã. D rɩk makr wa yãmb sẽn na n pa gõe yʋng sõma. Y tɩ yãa logtore, t’a wilg-y rɩbd kẽer y sẽn pa segd n dɩ, la a yeel-y tɩ y segd n maanda ɛspoor la y toeem y minimd kẽere. Y sɩd tũu a saglsã, tɩ sõng-yã. Y sũur kõn yɩ noog ne logtorã, a sẽn sõng-y woto wã yĩng sɩda?
6 A Zeova sẽn yaa tõnd Naandã me kõo tõnd noy. D sã n tũ, manegda tõnd vɩɩmã, bala sõngda tõnd tɩ d gind yel-wẽnã la bi-wẽns nins rẽ sẽn wat ne wã. D sã n tags n gese, d sɩd neeme tɩ d sẽn tũud Biiblã sẽn yet tɩ d pa segd n yag ziri, n zãmb neda, n zu, n yo, n maan ned pãnga, wall d maan zĩn-dãmb yɛlã naf-d lame. (Karm-y Yel-bũn 6:16-19; Vẽn. 21:8) D sã n ne a Zeova noyã tũub sẽn nafd tõnd to-to wã, kɩtdame tɩ d maneg n nong-a la d nong a noyã.
w93 15/4 17 s. 12
Kom-bɩɩse, bõe la yãmb baooda?
12 Sẽn yɩɩd fãa, yãmb segd n kisga sẽn yaa wẽnga. (Yɩɩn-sõamyã 97:10) Bõe la y tõe n maan n tõog n kisg bũmb maaneg sẽn be yamleoogo, wall sẽn na n noog y sũuri? Yaa y sẽn na n tags rẽ sẽn na n wa ne zu-loees ninsã yelle! Biiblã yetame yaa: “Da belg-y y mens ye. Wẽnnaam pa sẽn na paoog ye. Bũmb ning fãa ned sẽn bʋte, yaa rẽ me la a na n kẽebe. Bala sẽn bʋt-a a yĩngã nafr yĩng na n kẽeba sãoong a yĩngẽ wã.” (Galat-rãmbã 6:7, 8) Y sã n wa rat n pids y tʋls-wẽnsã, tags-y rẽ sẽn na n sãam Wẽnnaam a Zeova sũur to-to wã yelle. (Ges-y Yɩɩn-sõamyã 78:41.) Tags-y y sẽn tõe n wa rɩk pʋga, pa rẽ bɩ n paam bãag yelle. Wala makre, SIDA wã. Tags-y n ges-y rẽ sẽn na n sãam y sũur to-to, n kɩt tɩ y pa le nand y menga, tɩ tar-y n namsdẽ wã yelle. Bõn-kãng maaneg me tõe n wa woma bi-wẽns kaoosg zugẽ. Pag a ye sẽn yaa kiris-ned yeelame: “Maam ne m sɩdã ra zoe n kẽe ne taaba, nand tɩ d wa bãng taaba. Rũndã-rũndã, tõnd d yiibã fãa lebga kiris-neba. La baa ne rẽ, d sẽn da zoe n kẽ ne taab n yaool n wa bãng taabã wata ne no-koɛɛm la sũ-kĩir d kãadmã pʋgẽ.” D tõeeme me n pa le paam tɩ b kõ-d tʋʋm tigingã pʋgẽ, pa rẽ bɩ n yiis-d tigingã pʋgẽ! (1 Korẽnt rãmbã 5:9-13) Rẽ yĩnga, sũ-noog ning d sẽn na n paam wakat bilf pʋgẽ wã seka d na sãam tõnd ne a Zeova zoodã sɩda?
D bʋgs Wẽnnaam Gomdã zug neere
“Kɩs-y sɩd tɩ Wẽnnaam ‘gomdã yaa sɩda’”
2 Tõnd sẽn yaa a Zeova Kaset rãmbã, d kɩsa sɩd t’a yaa ‘sɩdã Wẽnnaam’ la t’a rata d neer wakat fãa. (Yɩɩn. 31:6; Eza. 48:17) D miime tɩ d tõe n basa d yam ne bũmb nins d sẽn karemd Biiblã pʋgẽ wã. D kɩsa sɩd tɩ Wẽnnaam “gomdã halhaalã yaa sɩda.” (Yɩɩn. 119:160, MN) D saka Biibl-mit a ye sẽn yeel bũmb ningã. A yeelame: “Ziri baa bilf pa be bũmb Wẽnnaam sẽn yeel pʋgẽ ye. A sẽn yeel fãa pa tõe n pa pids ye. Wẽn-tũudbã tõe n kɩsa sɩd ne bũmb a sẽn yeele, bala b kɩsa Wẽnnaam ning sẽn togs bõn-kãngã sɩda.”
YƲƲM-SAR RASEM 30–YƲƲM-VẼKR RASEM A 5
D SẼN BÃNG BIIBLÃ KARENG PƲGẼ YƖƖN-SÕAMYÃ 120–126
B bʋda ne nintãm, la b tigsa ne sũ-noogo
Bark bee neb nins sẽn pẽgd Wẽnnaamã zutu
10 Tõnd sã n wa lebg a Zezi karen-biis n na n sɩng n tʋm ne-a, d zabda ne a Sʋɩtãana. Zak 4:7 yetame: “Kɩɩs-y Sʋɩtãanã, la yẽ na zoe n bas yãmba.” Woto pa rat n yeel tɩ Sʋɩtãanã kɩɩsg yaa nana ye. Wẽnnaam daabã maaneg baoodame tɩ d maan modgr wʋsgo. (Luk 13:24) La Biiblã pʋlemda woto Yɩɩl Sõamyã 126:5 pʋgẽ: “Neb nins sẽn bʋt ne nintãma na n tigsa ne sũ-noog yɩɩla.” N-ye, tõnd sẽn balemd Wẽnnaam ningã tara mi-beoogo. A yaa “neb nins sẽn baood bãmba roanda,” la a ningda neb nins sẽn pẽgd-a wã barka.—Hebre dãmba 11:6.
Y tẽebã na n kell n talla pãng bɩ?
17 Y bee sũ-sãams pʋgẽ, y ned sẽn maan kaalem yĩng bɩ? Sã n yaa rẽ, bɩ y maag y yĩng n karem Biiblã kibay nins sẽn gomd neb sẽn vʋʋg yellã, tɩ sõng-y tɩ y maneg n kɩs sɩd t’a Zeova sẽn pʋlem tɩ sẽn ki-bã na n wa vʋʋgame wã na n pidsame. Y sũur sãamame, b sẽn yiis y zakã ned tigingã pʋgẽ yĩng bɩ? Bɩ y zãms Biiblã, tɩ sõng-y tɩ y maneg n kɩs sɩd t’a Zeova kiblgã la sõma n yɩɩda. Sẽn yaa zu-loɛɛg ning fãa la y maood ne, bɩ y ges rẽ wa segb y sẽn paam n na n paas y tẽebã pãnga. Pelg-y y pʋg n togs a Zeova sẽn be y sũurẽ. Ra zãag-y y meng ne neb a taabã ye. Pʋd n baood-y y tẽed-n-taasã zĩiga. (Yel. 18:1) Maand-y bũmb kẽer sẽn na n sõng-y tɩ y tõog toogo, baa na n yɩɩ ne nintãm. (Yɩɩn. 126:5, 6) Kell-y n wɩng-y ne tigissã kẽnde, koɛɛgã moonego, la Biiblã karengo. Ket-y n tagsd-y bõn-sõma nins a Zeova sẽn pʋlem tɩ wat ka la bilfã yelle. Y sã n neẽ t’a Zeova sɩd sõngd-y lame, y tẽebã pãng na n paasdame.
Nang-y pãng tigisgã pʋgẽ!
13 Goam nins sẽn be Yɩɩl Sõamyã 126:5, 6 pʋgẽ wã kõta Wẽnnaam tigisdbã belsg kãsengã, sẽn yɩɩd fãa neb nins sẽn namsd b tẽebã yĩngã. Be b yetame: “Neb nins sẽn bʋt ne nintãma na n tigsa ne sũ-noog yɩɩla. Ned ninga sẽn zãad bʋd-gẽbga n yit n kẽnd ne yãbrã, a na n leb n waa ne sũ-noog yɩɩla n tʋk a ka-kila.” Yɩɩl gʋlsdã sẽn gom bʋdb la kẽebg yellã wilgdame t’a Zeova gesa kellã sẽn yi pĩnd Babilonã yembdã n wa wã yelle, la a ning-b barka. B sũy yɩɩ noog wʋsg b sẽn yiis-b yembdẽ wã, la tõe tɩ b yãba b sẽn da wa n bʋt tẽng sẽn kʋɩ zug b sẽn da pa ko b yʋʋm 70 yembdã sasa. Baasg zãnga, neb nins sẽn nang pãng ne bʋdbã rɩɩ b tʋʋm-toogã yõod la b paam sũ-noog a pʋgẽ.
14 D tõe n daaga nintãm, d sã n wa be makr pʋgẽ, bɩ tõnd bɩ d tẽed-n-taas sã n namsd a bʋʋm zugu. (1 Pɩɛɛr 3:14) Tõnd tigisgã pʋgẽ, sɩngrã tõe n yɩɩ toogo, bala d modga koe-moonegã pʋgẽ n yaool n pa tar bũmb sẽn wilgd tɩ woma biis ye. La d sã n ket n bʋtẽ la d zagsd koom, Wẽnnaam na n kɩtame tɩ bɩ, naoor wʋsgo a na n maana woto tɩ zʋʋg tõnd sẽn gẽegdã. (1 Korẽnt dãmba 3:6) Makr ne rẽ yaa Biibl dãmbã la sɛb nins sẽn tik Biiblã zug tõnd sẽn pʋtã sẽn womd biis ninsã.
D bʋgs Wẽnnaam Gomdã zug neere
cl 73 s. 15
A kogenda tõnd ne a pãngã: “Wẽnnaam yaa tõnd soondg zĩiga”
15 Pipi, d gom a Zeova sẽn kogend tõnd yõorã yelle. Tõnd sẽn yaa a Zeova nin-buiidu, n yaa wa sull a yembr nebã, d miime t’a kogenda tõndo. Sã n da pa rẽ, a Sʋɩtãan ra na n menesa d fãa zĩig pʋgẽ. Tags-y n ges-y: Bũmb sẽn na n yɩ a Sʋɩtãan sẽn yaa “dũni-kãngã naabã” noog n tɩ yɩɩda, yaa tũudum hakɩɩkã sẽn na n menem. (Zã 12:31; Vẽnegre 12:17) Goosneema kẽer sẽn tar pãng gɩdga tõnd koɛɛgã moonego, la b mak n na n menes-do. La a Zeova nin-buiidã kell n yalsa kãn-kae, la b ket n moond koɛɛgã n pa basdẽ ye! Bõe yĩng tɩ tẽns sẽn tar pãng pa tõog tɩ kiris-neb sõor sẽn pa waooge, la sẽn wõnd b ka tar pãng tʋʋmd yalse? Bala a Zeova kogla tõnd ne a pɩgsã sẽn tar pãngã!—Yɩɩn-sõamyã 17:7, 8.