Kiris-nebã vɩɩm la b tʋʋma tigissã na-kẽndr sebr not-rãmbã
© 2024 Watch Tower Bible and Tract Society of Pennsylvania
TƲƲLG RASEM A 3-9
D SẼN BÃNG BIIBLÃ KARENG PƲGẼ YEL-BŨNÃ 3
Wilg-y tɩ y teega a Zeova
Yel-bũn 3:5, 6: “Ra teeg f meng bãngr ye”
“Teeg a Zeova ne f sũur fãa.” D wilgdame tɩ d teega a Zeova, d sã n maand bũmb nins a sẽn datã. D segd n teega a Zeova zãng-zãng ne d sũurã fãa. Biiblã pʋgẽ, b sã n gomd sũur yelle, makda ned sẽn sɩd yaa a soabã, rat n yeel t’a tagsa wã, a yel-manesmã, a tʋlsmã, la a zʋgã. Woto wã, teeg Wẽnnaam ne d sũur fãa pa rat n yeel bal tɩ d tagsd a yell ye. Yaa d sẽn na n yãk yam n teeg-a, n kɩs sɩd t’a sẽn yaa d Naandã, a mii sẽn yaa sõma ne-do.—Rom dãmbã 12:1.
“Ra teeg f meng bãngr ye.” D segd n teega Wẽnnaam, bala d sẽn pa zems zãngã yĩnga, d tagsa wã mi n pa zems ye. D sã n teeg d menga, bɩ n tikd d mengã tagsa wã zug n yãkd yam, d tõe n wa yãka yam n maan bũmb n tagsd tɩ yaa sõma, tɩ yaool n na n wa ne yelle. (Yel-bũnã 14:12; Zeremi 17:9) Wẽnnaam yamã yɩɩda tõnd rẽndã hal zĩig sẽn zãre. (Ezayi 55:8, 9) D sã n tũud Wẽnnaam noyã la a saglsã, d vɩɩmã na n talla barka.—Yɩɩn-sõamyã 1:1-3; Yel-bũnã 2:6-9; 16:20.
Yel-bũn 3:5, 6: “Ra teeg f meng bãngr ye”
“Fo sẽn maand fãa pʋgẽ bɩ f tags a yelle.” Sẽn yaa bũmb ning fãa la d rat n maan d vɩɩmã pʋgẽ, la d yam-yãkr fãa pʋgẽ, d segd n bao n bãnga Wẽnnaam tagsgo. Sẽn na yɩl n maan woto, d segd n pʋʋsame n kos-a t’a wilg-d sore, la d tũud a sẽn yet bũmb nins a Gomdã sẽn yaa Biiblã pʋgẽ wã.—Yɩɩn-sõamyã 25:4; 2 Tɩmote 3:16, 17.
“A na kɩt tɩ f soayã yɩ tɩrse.” Wẽnnaam kɩtdame tɩ d soayã yaa tɩrse, a sẽn sõngd tõnd tɩ d tũud a noyã sẽn yaa tɩrsã yĩnga. (Yel-bũnã 11:5) Woto sõngda tõnd tɩ d gĩnd zu-loeese, la d tar sũ-noog wʋsgo.—Yɩɩn-sõamyã 19:7, 8; Ezayi 48:17, 18.
be 76 s. a 4
Paasd-y y minimã: Wilgd-y tɩ y bɩtame
Ned sẽn seg zu-loees buud toor-toor a vɩɩmã pʋgẽ sã n wa be yell ning taoore, a tõe n tagsame yaa: ‘Mam zoe n sega zu-loe-kãngã buudu. M mii m sẽn na n maane.’ Rẽ yĩnga, woto yaa yam tʋʋmd sɩda? Yel-bũn 3:7 wã pʋgẽ, b keoogda tõnd tɩ d ‘ra wa tagsdẽ tɩ d tara yam wʋsg ye.’ D sẽn zoe n seg zu-loees nins pĩndã segd n sõng-d lame tɩ d sã n wa be yell ning taoor bɩ d tõe n tags neer n bãng yellã vɩʋʋg sõma. La d sã n modgdame n paasd d tẽebã pãnga, d sẽn zoe n seg zu-loees ninsã na n kɩtame tɩ d ning d yamẽ la d sũurẽ tɩ yaa tɩlɛ tɩ d paam a Zeova barkã, n tõog tɩ d sẽn maandã fãa yãkd nenga. Yaa d sã n kot a Zeova wakat fãa t’a wilg-d sor la wilgd tɩ d tẽebã bɩtame, la pa d sẽn na n tõogd n welgd zu-loeesã ne d meng bãngr ye. D wilgdame me tɩ d teega a Zeova, d sã n kɩs sɩd tɩ bũmb pa tõe n maan tɩ pa yẽ n bas tɩ maane, la d kell n tall zood sõma ne d saasẽ Ba wã.
D bʋgs Wẽnnaam Gomdã zug neere
Yelbũn sebrã tags-kãsemse
3:3. D segd n nanda nonglem la sɩd wʋsgo, la d wilgd rẽnda d manesmã pʋgẽ wa kĩndf sẽn tar yõod wʋsg ned sẽn pid a kokorẽ. D segd n kɩtame tɩ zʋg-sõma kãensã kẽ d sũurã sõma n yɩ vẽeneg d manesmã pʋgẽ.
TƲƲLG RASEM 10-16
D SẼN BÃNG BIIBLÃ KARENG PƲGẼ YEL-BŨNÃ 4
Kogl-y y sũurã
D gũusd ne d sũurã tagsgo
4 Yel-bũn 4:23 pʋgẽ, b sẽn gomd “sũur” yellã, makda ned sẽn sɩd yaa a soabã. (Karm-y Yɩɩn-sõamyã 51:6) Rat n yeelame tɩ yaa a tagsa wã, a tʋlsmã, a bõn-datɩ wã, la a zʋgã. Yaa ned sẽn yaa a soab tɩ neb a taabã pa neẽ wã, pa nebã sẽn tagsd t’a yaa a soabã ye.
D gũusd ne d sũurã tagsgo
10 D sã n dat n gũusd ne d sũurã tagsgo, yaa tɩlɛ tɩ d yɩ ned sẽn tõe n deng n yã yelle, n yɩ tao-tao n maan bũmb n kolg a menga. Gom-bil ning b sẽn lebg Yel-bũn 4:23 tɩ “maan gũusgã” tẽegd-d-la pĩnd wẽndẽ gũudbã sẽn da gũud b tẽngã to-to wã. Gũusdbã ra wae n dʋʋda b tẽngã lalg zug n get yɩɩga, tɩ b sã n yã yell sẽn wat bɩ b peeb baorg n keoog nebã. D sã n tẽegd woto, sõngd-d lame tɩ d bãng d sẽn segd n maanega, t’a Sʋɩtãan ra wa tõog tɩ d sũurã tagsg lebg wẽng ye.
11 Pĩnd wẽndẽ wã, tẽngã gũudbã ne rigno-gũudbã ra tʋmda ne taaba. (2 Sãm. 18:24-26) B ra naagda taab n gũusdẽ, tɩ bɛɛb sã n kolgdẽ bɩ b pag kʋɩlensã sõma sẽn na yɩl n kogl tẽngã. (Nee. 7:1-3) D sã n kibl d sũur-kasetã sõma ne Biiblã maasem, a tõe n yɩɩ wa gũuda. Woto, a Sʋɩtãan sã n wa baood n na n soog d sũurã, rat n yeel tɩ n baood n na n kɩt tɩ d tagsa wã bɩ d tʋlsmã, la d bõn-datɩ wã wall d zʋgã lebg wẽnse, d sũur-kasetã na n keoog-d lame. D sũur-kasetã sã n keoog-do, d segd n kelg-a lame, la d mao wa d sẽn tõe tɛka, n kogl d menga.
D gũusd ne d sũurã tagsgo
14 Sẽn na yɩl n gũus ne d sũurã, pa segd bal tɩ d modg tɩ tags-wẽns wall tʋls-wẽns ra kẽ d sũurẽ wã ye. Segdame me tɩ d bas tɩ bũmb nins sẽn na n sõng-d tɩ d tagsa wã la d tʋlsmã yɩ sõma wã kẽ d sũurẽ wã. D lebg n tẽeg gũudbã yelle. B ra pagda tẽngã kʋɩlens sẽn na yɩl tɩ bɛɛbã ra kẽ ye. La b mi n pakame sẽn na yɩl tɩ rɩɩb la bũmb a taab kẽ tẽngã. Kʋɩlensã sã n pag wakat fãa, n pa tol n pakdẽ, tẽngã nebã na n kii kom. Woto me, d segd n sakda wakat fãa n kelgd Wẽnnaam goamã, tɩ kẽ d sũurã, tɩ d tagsa wã paam n zems ne a raabã.
w12 1/5 32 s. a 2
Kogl-y y sũurã
Bõe yĩng tɩ d segd n kogl d sũurã, rat n yeel tɩ d tʋlsmã la d tagsa wã? Wẽnnaam kɩtame tɩ rĩm a Salomo yeel yaa: “Bũmb nins fãa fo sẽn segd n koglã sʋka, f sũurã la f segd n kogl n yɩɩda, bala yaa be la vɩɩmã yita.” (Yel-bũnã 4:23) D sã n dat tɩ d vɩɩmã tall barka, la d wa paam vɩɩm sẽn kõn sa beoog sẽn wate, bee ne d sũurã sẽn yaa to-to wã. Bõe yĩng tɩ d yet woto? Bala Wẽnnaam geta sẽn be d sũurẽ wã. (1 Sãmwɛll 16:7) Yaa d sẽn sɩd yaa a soabã, rat n yeel tɩ “bũmb ning sẽn be sũurẽ wã” n wilgd Wẽnnaam tagsg sẽn yaa a soab d zugu.—1 Pɩyɛɛr 3:4.
D bʋgs Wẽnnaam Gomdã zug neere
Yãmb na n kell n gũu a Zeova bɩ?
4 Yel-bũn 4:18 wã yetame tɩ “nin-tɩrsã sor wẽnda wa sõor sẽn pukdi, t’a vẽenemã paasdẽ, hal n wa ta wĩnto-sʋka.” Gom-kãensã wilgda a Zeova sẽn vẽnegd a nin-buiidã a raabã to-to wã. Yaa bilf-bilf la a vẽnegd-ba. Vɛrse-kãngã leb n sõngda tõnd tɩ d bãng kiris-ned sẽn toeemd bũmb kẽer a vɩɩmã pʋgẽ to-to, la a paasd yẽ ne a Zeova zoodã. Yɩlẽ tɩ ned wa paam zood sõma ne a Zeova, tõe n kaoosame. D sã n maagd d yĩng n bʋgsd sagls nins Wẽnnaam sẽn tũnugd ne a Gomdã la a siglgã n kõt-dã zug la d tũudẽ, bilf-bilfã, d na n wa tõog n bɩɩsa Kirist zʋg-sõma wã buudu. Sẽn paase, d na n maneg n bãnga Wẽnnaam sõma. D ges makr a Zeezi sẽn dɩk n wilg rẽ.
TƲƲLG RASEM 17-23
D SẼN BÃNG BIIBLÃ KARENG PƲGẼ YEL-BŨNÃ 5
D zãag d meng fasɩ ne yoobo
w00 15/7 29 s. a 1
Y tõe n kell n yɩɩ yɩlemde, baa ne dũniyã sẽn pid ne yoobã
Yel-bũn-kãngã pʋgẽ, b boola pʋg-wɛgengã tɩ “pʋg-sãanga,” rat n yeel tɩ pʋg-yoodre. A sẽn gom goam nins n na n belg bi-bɩɩgã yaa noog wa sɩ-vaka, la bʋgsg n yɩɩd oliiv kaam. Roob pa wae n sɩngd ne goam a woto buud sɩda? Yɩɩ woto ne pʋg-sad-neer a ye yʋʋr sẽn boond t’a Ami. A ra tara yʋʋm 27, n yaa sekertɛɛre. A yeelame: “Mam tʋʋmã zĩigẽ, rao a ye n da wilgd wakat fãa tɩ m yell pak-a lame, la a ra nong n pẽgd maam. F sã n paam tɩ ned wilgd-f tɩ f yell pak-a lame yaa sõma. M da nee vẽeneg t’a raabã yaa yoob yĩnga. La m pa bas t’a paam-m ye.” No-noom goam ned sẽn gomd n dood a to nong n bee yamleoogo, la yaa f sã n bãng a soabã raabã takɩ la na n sõng-fo. Rẽ wɛɛngẽ d segd n tagsa sõma.
w00 15/7 29 s. a 2
Y tõe n kell n yɩɩ yɩlemde, baa ne dũniyã sẽn pid ne yoobã
Yoobã sẽn wat ne yɛl ninsã yaa toog liga wa absẽnte, la rɩt n yɩɩd sʋʋg sẽn tar noy a yiibu, rat n yeel tɩ zabda wʋsgo, la tõe n tũ ne yõor me. Naoor wʋsg yoobã wata ne sũur-kasetã sẽn ningd-f taale, pʋg rɩkre, la taoor bãase. Sẽn paase, ned sã n yo, tags-y n ges-y rẽ sẽn tõe n sãam a pagã bɩ a sɩdã sũur to-to. Yoob tõe n kɩtame tɩ ned paam toog wʋsg sẽn tõe n kaoos hal a yõor tɛka. Sɩd-sɩda, yoobã sãamda sũur wʋsgo.
w00 15/7 29 s. a 5
Y tõe n kell n yɩɩ yɩlemde, baa ne dũniyã sẽn pid ne yoobã
D segd n zãaga d meng fasɩ ne neb sẽn nong yoobo. D pa segd n kelgd mizik sẽn naag ne gom-dẽgdo, n get reem bɩ filim sẽn pa sõma, wall yoob yɛl ye. (Yel-bũnã 6:27; 1 Korẽnt rãmbã 15:33; Efɛɛz rãmbã 5:3-5) D pa segd n tall rolsem manesem sẽn pa zems ye. D sẽn ningd fut ninsã la d sẽn manegd d mengã to-to wã me pa segd n nekd pag ne rao lageng tʋlsem ye.—1 Tɩmote 4:8; 1 Pɩyɛɛr 3:3, 4.
D bʋgs Wẽnnaam Gomdã zug neere
w00 7/15 29 s. a 7
Y tõe n kell n yɩɩ yɩlemde, baa ne dũniyã sẽn pid ne yoobã
Dẽnd a Salomo gomda yɛl nins yoobã sẽn wat ne wã yelle. Ned sẽn nong yoob wat n pa le nand a meng ye. D raabã sã n yaa d pidsd d mengã yoob tʋlsem bɩ ned a to rẽndã, pa yãnd meng-meng sɩda? D sã n kẽe kãadem n yaool n yooda, pa wilgd tɩ d pa nand d mengã sɩda?
TƲƲLG RASEM 24-30
D SẼN BÃNG BIIBLÃ KARENG PƲGẼ YEL-BŨNÃ 6
Yam-bʋg la d tõe n dɩk gũur nengẽ?
it-1 927 s. a 3-928 s. a 1
Gũuri
Wẽnnaam kõ-b-la yam. ‘Yam’ ning gũyã sẽn tarã pa bãngr buud sẽn sõngd-b tɩ b tõe n tags ye. Yaa yam Naandã sẽn kõ-ba. Biiblã gomda gũur yelle, n yetẽ t’a “segenda a rɩɩb sɩpaolgo, la a baood rɩɩb tigsg wakat n bĩngdẽ.” (Yel. 6:8) Gũur buud n be Palɛstin soolmẽ wã (Messor semirufus), tɩ b boond-a tɩ kẽebda, bɩ koaada. A tigsda rɩɩb wʋsg n bĩngdẽ, tɩ tʋʋlgã bɩ waoodã sã n wa tar pãng wʋsg tɩ rɩɩb paoong lebg toog bɩ a zoe n tar rɩɩbo. Gũ-kãensã nong n bee zɛɛsẽ wã, sẽn yaa zĩis kood wʋsg sẽn be wã. Saagã sã n ni tɩ koodã wʋʋge, b wʋkdame n yiis wĩntoogẽ wã tɩ kʋɩ. B wilgame me tɩ b mi n yãka koodã bullã, tɩ b sã n wa bĩng-b bɩ pa le tõe n bul n yi ye. Gũ-kãensã b sẽn boond tɩ koaadbã sã n wa gũm taab n kẽnda, b naoã sẽn yaa to-to wã, la b sẽn mi n bas kood biis b gũurã noorã kɩtame tɩ b tõe n bãng-b n bake.
Yam ning d sẽn tõe dɩk b nengẽ. D sã n bʋgs gũyã manesem sẽn yaa to-to wã zugu, kɩtdame tɩ d tags Biiblã sẽn yeel bũmb ningã zug neere. Biiblã yetame yaa: “Foom a kʋɩɩma, tɩ ges gũuri. Maag f yĩng n ges a manesmã n dɩk yam.” (Yel. 6:6) Sɩd me, d bãngdame tɩ b baooda rɩɩb n bĩngd beoog yĩnga, la pa rẽ bal ye. D bãngdame me tɩ b tʋmda wʋsgo, la b tõogd toogo. B mi n vuuda rɩɩb zɩslem sẽn ta b mensã zɩslem naoor a yiib bɩ sẽn yɩɩd rẽ, n maand b sẽn tõe fãa n tõogd n tʋmd b tʋʋmã fãa, n pa tol n komsd raood n base, baa b sẽn mi n salgdẽ bɩ n leebdẽ n lʋɩtẽ wã. B naagda taab n tʋmdẽ tɩ be yamleoogo, n getẽ tɩ b gũurã pʋg yaa yɩlemd wakat fãa, la b sõngd sẽn pogl-bã bɩ sẽn ya-bã tɩ b lebd gũurẽ wã, tɩ wilgdẽ tɩ b taabã yell pak-b lame.
w00 15/9 26 s. a 3-4
Kell-y n tall-y yʋ-noogo
Wa gũyã, tõnd me segd n tʋmda wʋsgo. Baa nebã get tõnd tɩ b pa get-d me, d sã n tʋmd wʋsg la d modgdẽ n paamd minim n paasdẽ, na n naf-d lame. Yaa d lekollẽ wã, d tʋʋmã zĩigẽ wall yaa siglgã tʋʋm la d tʋmda, d segd n maana rẽ ne d sũur fãa. Wa gũyã sẽn dɩt b tʋʋm-toogã yõodã, Wẽnnaam me ratame tɩ d ‘paam sũ-noog d tʋʋm-toogã fãa yĩnga.’ (Koɛɛg soaba 3:13, 22; 5:18) D sã n tʋmd wʋsgo, d paamda sũur-kaset sẽn pa ningd-d taale, la sũ-noog hakɩɩka.—Koɛɛg soaba 5:12.
Rĩm a Salomo tũnuga ne sogsg a yiib n gom kʋɩɩngã yelle. A yeelame: “Foom a kʋɩɩma, fo na n gãandame hal tɩ ta dabʋre? Wakat bʋg la fo na n yik n bas gõeem?” Rĩmã yeelame tɩ kʋɩɩmã yetame yaa: “Mam na n gũsa bilfu. M na n suusa bilfu. Mam na n kalemda m nus n vʋʋs bilfu.” Rĩmã paasame yaa: “La fo naongã na n waa wa wagdre, tɩ fo talemdã wa wala rao sẽn zãad zab-teedo.” (Yel-bũnã 6:9-11) Kʋɩɩmã sẽn kalemd a nus n zĩẽ wã, naong n tiig n wa a zug wa wagdre, tɩ talemd me yõk-a wala rao sẽn zãad zab-teedo. Kʋɩɩm pʋʋg wat n pida ne mood la gõose. (Yel-bũnã 24:30, 31) Tʋʋmd ning sẽn da kẽesd-a ligdã wat n lebga zaalem. Tʋʋmd taoor soab pa tõe n tʋm ne ned sẽn yaa kʋɩɩm n kaoos ye. Lekoll karen-biig me sẽn yaa kʋɩɩm n pa nong kareng pa tõe n karem sõma ye.
D bʋgs Wẽnnaam Gomdã zug neere
w00 15/9 27 s. a 3
Kell-y n tall-y yʋ-noogo
Bũmb a yopoe nins yell b sẽn gomd yel-bũnã pʋgẽ wã yaa bũmb toor-toor sẽn pa sõma yell la b sẽn gomdã. “Nin sẽn get ne tɩtaam” ne “sũur sẽn magd mag-wẽns” yaa yel-wẽn sẽn yit d tagsa wã pʋgẽ. “Zɩlemd sẽn yagd ziri” ne “zirẽ-be-kaset soab sẽn yagd ziri wakat fãa” yaa no-goamã wɛɛngẽ yel-wẽna. “Nus sẽn daagd bʋʋm dãmb zɩɩm” ne “nao sẽn zoet tao-tao n na n tɩ maan wẽng” makda tʋʋm-wẽnse. La a Zeova sẽn kis n tɩ yɩɩd yaa ned sẽn nong n wat ne zab la no-koɛɛm neb sʋka, tɩ b yaool n da zĩ ne laafɩ. B sẽn sɩng sõadgã ne yoob n tɩ baas ne yopoe wã wilgdame tɩ bũmb nins a Zeova sẽn kisã pa tek bõn-kãens bal ye. Bala ninsaalbã ket n maanda bũmb a taab sẽn pa sõma.
TƲƲLG RASEM 31–TƲƲL-NIF RASEM A 6
D SẼN BÃNG BIIBLÃ KARENG PƲGẼ YEL-BŨNÃ 7
D gũus ne bũmb nins fãa sẽn tõe n wa ne yelle
‘Ra teeg-y y meng bãngr ye’
Yaa sɩd tɩ sẽn na yɩl tɩ kʋɩɩbg ra tõog-do, yaa tɩlae tɩ d pʋʋse, la d tog n bãnga wakat ning d sẽn segd n pʋʋsã. Tẽeg-y bi-bɩɩg ning yell b sẽn gomd Yelbũn 7:6-23 pʋgẽ wã. Daar a yembre, a tũu sor zĩ-sobd wakate, n yaool n da miẽ tɩ pʋg-yoodr n be be. Pʋg-yoodrã boola bi-bɩɩgã t’a wa tɩ b kuli, t’a pa tõog n mao ne makrã ye. Woto kɩtame t’a pʋg-a wa naaf b sẽn tar n debd kodgre. Sɩnga wãn tɩ bi-bɩɩgã wa tɩ tũud so-kãngã? Biiblã sẽn yeel t’a “ka tar yamã,” rat n yeel t’a pa tar minimã, tõe t’a ra maooda ne tʋls-wẽnse. (Yel. 7:7) Yaa wakat bʋg la bi-bɩɩgã ra segd n pʋʋs tɩ naf-a n yɩɩda? Yaa sɩd tɩ pagã sẽn da wa n gomd ne-a wã, a ra tõe n pʋʋsa sasa buud fãa tɩ sõng-a. La sasa ning a sẽn da segd n pʋʋs tɩ naf-a n yɩɩd yaa a sẽn wa n dat n dɩk so-kãngã.
D tõe n zãaga d mens ne yoobo
Yelbũn 5:8 yeta woto: “Ra tũ sor ning sẽn dabd [pʋg-yoodr] yirã ye. Zãag ne-a.” Kibar n be Yelbũn sak a 7 wã pʋgẽ, n wilgdẽ tɩ d sã n pa tũ sagl-kãngã, tõe n waa ne yelle. Kibarã gomda bi-bɩɩg sẽn yi zĩ-sobd n dɩk sor sẽn teesd pʋg-yoodr yir yelle. A sẽn ta so-tiisẽ wã, pagã seg-a-la ne ‘pʋg-yoodr fuugu,’ n mobg-a n mok-a. A goma no-noom goama, tɩ tʋls-wẽns kẽ bi-bɩɩgã yamẽ. Bi-bɩɩgã pa yiis tʋls-wẽnsã ye. Rẽ kɩtame t’a yo ne pagã. Wõnda bi-bɩɩgã ra pa yi yoob yĩng ye. Yaa a sẽn pa tar yamã, n paas a sẽn pa reng n tagsã n wa ne yellã. Baasgo, a sẽn maan bũmb ningã na n nams-a-la a vɩɩmã tõre. Ad a sã n da zãag a meng ne pʋg-yoodrã n são!—Yel. 7:6-27.
Wẽnnaam zoeesã nafda tõndo
Ned sã n yo, a tõe n ninga a meng yãnde, tõe n kɩtame t’a tagsdẽ t’a ka võore, a tõe n dɩka pʋg tɩ pa tũ ne a raabo, wall a wã a zakã. Vẽenega, d sã n zãag d meng ne pʋg-yalmã ‘roog’ la a rɩɩbã, yaa yam bũmbu. Neb nins sẽn yoodã sẽn sãamd bãmb ne a Zeova zoodã sẽn yãk a toogo, b wʋsg lʋɩta bãas n kiid pẽba. (Yel. 7:23, 26) Sak a 9 vɛrse 18 wã baasgẽ, b yeelame yaa: “Neb nins sẽn sig pagã yirã bee Yaoogã zĩ-zulumsẽ.” La bõe yĩng tɩ neb wʋsg sakd pagã boollã sẽn wat ne yɛl wʋsgã?—Yel. 9:13-18.
D bʋgs Wẽnnaam Gomdã zug neere
w00 15/11 29 s. a 1
“Sak mam noyã n kell n vɩɩmde”
“Rɩk-b [Wẽnnaam noyã] n sẽb f nug-biisã.” A Salomo paasame yaa: “Gʋls bãmb f sũurẽ wã wa b sẽn gʋlsd kug-walg zugu.” (Yel-bũnã 7:3) Wa d nusã d sẽn ne daar ne a to fãa wã sẽn sõngd-d tɩ d tʋmd d tʋʋmã, d sẽn paam bãngr la zãmsg ning ne Biiblã maasmã segd n bee d yamẽ wã wakat fãa, tɩ d tũud rẽ d sẽn maandã fãa pʋgẽ. D segd n gʋlsa rẽ d sũurẽ wã wa b sẽn gʋlsd kug-walg zugu, rat n yeel tɩ d bao n wʋm a võor sõma, tɩ lebg wa bũmb d sẽn minimi.
TƲƲL-NIF RASEM A 7-13
D SẼN BÃNG BIIBLÃ KARENG PƲGẼ YEL-BŨNÃ 8
D kelg a Zeezi b sẽn bool tɩ yamã
cf 130 s. a 7
“Mam nonga Ba wã”
7 Vɛrse 22 pʋgẽ, yamã yeelame yaa: “A Zeova naana maam tɩ m yaa a naanegã sɩngre. Mam yaa kʋdr n yɩɩd bũmb nins a sẽn naan hal daar zãrã.” Pa yam ning ninsaalbã sẽn tarã yell la b sẽn gomdã ye. Bala yam-kãng pa bũmb a Zeova sẽn naan wa a sẽn naan bũmb a taabã ye. Dẽnd pa bũmb sẽn tall sɩngr ye. A Zeova yẽ sɩng n bee wakat fãa n yaa yam-soab wakat fãa me. (Yɩɩn-sõamyã 90:2) La b sẽn “deng n naan a soab bõn-naandsã fãa sʋkã” yaa Wẽnnaam Bi-riblã. Yẽ la a Zeova reng n naane, n yaool n na n naan bũmb a taabã fãa. (Kolos rãmbã 1:15) Wa b sẽn wilg Yel-bũn sebrã pʋgẽ wã, sẽn deng saasã la tẽngã naanego, Wẽnnaam Bi-riblã ra beeme. A sẽn yaa Gomdã, rat n yeelame t’a ra yaa Wẽnnaam mengã koe-taasda, n da rɩkd a Zeova yamã togs-n-taar kɛpɩ.—Zã 1:1.
cf 131-132 s. a 8-9
“Mam nonga Ba wã”
8 Bõe la a Zeezi ra maand yʋʋm kõn bãng n sõdã sẽn deng a waoong tẽngã zugã? Vɛrse 30 wã pʋgẽ, b yeelame t’a ra bee Wẽnnaam sɛɛgẽ n yaa “tʋʋm-mita.” Woto rat n yeelame tɩ bõe? Kolos rãmb 1:16 pʋgẽ, b yeelame yaa: “Tũu ne yẽ maasem tɩ b naan bũmb a taabã fãa sẽn be saasẽ la sẽn be tẽngã zugu, . . . Yaa yẽ maasem yĩng la b naan bũmb a taabã fãa, la yaa a yĩng la b naan-ba.” Dẽnd a Zeova sẽn yaa Naandã tũnuga ne a Bi-riblã sẽn yaa tʋʋm-mitã n naan bũmb a taabã fãa. Ne yẽ maasem, a naana malɛgsã sẽn be saasẽ wã, la ãndũniyã bũmb nins fãa d sẽn ne wã, wala makre, tɩɩsã la rũms buud toor-toorã, la sẽn yɩɩd fãa ninsaalbã. D tõe n dɩka zems-n-taar ning sẽn da be Ba wã ne Biigã sʋkã n mak ne arsɩtɛk ne ãntrepreneer sẽn tʋmd ne taab to-to tɩ roog palã arsɩtɛkã sẽn maan lebg roog sɩd-sɩdã. D sã n wa get bũmb Wẽnnaam sẽn naan tɩ noom-d wʋsgo, yaa a Zeova sẽn yaa Arsɩtɛk-kãsengã n paamd pẽgre. (Yɩɩn-sõamyã 19:1) Leb n tẽegda tõnd tɩ Naandã ne a “tʋʋm-mitã” naaga taab n tʋm ne sũ-noog yʋʋm wʋsg pʋgẽ.
9 Neb a yiib sẽn pa zems zãng sã n naag taab n tʋmdẽ, b tõeeme n wa pa le wʋmd taab ye. Pa yɩ woto ne a Zeova ne a Biigã ye. Biigã tʋma ne Ba wã yʋʋm kõn bãng n sõde. B yeela Biiblã pʋgẽ tɩ Biigã yeelame yaa: “Mam da maanda sũ-noog a taoor wakat fãa.” (Yel-bũnã 8:30) Sɩd me, a sũur da nooma ne a sẽn paam n tʋmd ne a Ba wã, t’a Ba wã me sũur da noomẽ. Woto kɩtame t’a maneg n dɩk a Ba wã zʋg-sõma wã togs-n-taare, n da wõnd-a kɛpɩ. Rẽ n kɩt tɩ zems-n-taar ning sẽn da be-b sʋkã ra tar pãng wʋsgã. D tõe n yeelame tɩ yaa zems-n-taar sẽn kaoos wʋsg la sẽn tar pãng wʋsgo, hal t’a buud zɩ n zĩnd ãndũniyã gill zug ye.
D waoog a Zeezi sẽn yaa Davɩɩd-kãseng la Salomo-kãsengã
14 Ned a ye bal yam n yɩɩg a Salomo rẽndã. Yaa a Zeezi Kirist. A ra goma a meng yell n yeel woto: “Sẽn yɩɩd a Salomo bee ka.” (Mat. 12:42) A Zeezi ra gomda “vɩɩm sẽn ka sɛt goama.” (Zã 6:68) Wala makre, a sẽn sõs ne nebã tãngã zugã, a wɛgsa a Salomo yel-bũn kẽer tɩ b wʋm b võorã sõma n paase. A Salomo wilga bũmb toɛy-toɛy sẽn kɩtd tɩ ned sẽn maand a Zeova raabã tar sũ-noogo. (Yel. 3:13; 8:32, 33; 14:21; 16:20) A Zeezi me wilgame tɩ ned sã n dat sũ-noog hakɩɩka, a segd n tũ a Zeova la a tẽ a kãab-noodã pidsgu. A yeela woto: “Sũ-noog rãmb la neb nins sẽn mi tɩ b segd n baoa Wẽnnaamã. Tɩ bõe, saasẽ rĩungã yaa bãmb dẽnda.” (Mat. 5:3) Neb nins sẽn tũud sagls nins a Zeezi sẽn kõ a sõssã pʋsẽ wã paamda a Zeova sẽn yaa vɩɩmã kõtã zoodo.” (Yɩɩn. 36:9; Yel. 22:11; Mat. 5:8) Kiristã yamã kɩtame tɩ nebã bãng “Wẽnnaam yamã.” (1 Kor. 1:24, 30) A Zeezi sẽn yaa Mesi ning sẽn na n dɩ naamã yĩnga, Wẽnnaam kõ-a-la yam.”—Eza. 11:2.
D bʋgs Wẽnnaam Gomdã zug neere
Yam hakɩɩkã kelemdame
TẼNS wʋsg pʋsẽ, d nong n yãta Rĩungã koe-moondb sẽn moond koɛɛgã zãma zĩisẽ, n kõt nebã sɛb ne sũ-noogo. Tõe tɩ yãmb zoe n maana a buudu. Sã n yaa woto, tõe tɩ y tẽega Yel-bũn sebrã sẽn gomd yamã yellã. B yeelame tɩ yamã bee kʋʋng sʋk n zẽkd a koɛɛg n kelemdẽ, n dat tɩ nebã wʋme. (Karm-y Yel-bũn 1:20, 21.) “Yam hakɩɩkã” sẽn yaa yam ning a Zeova sẽn kõtã bee Biiblã la d siglgã sɛbã pʋsẽ. Yaa yam-kãng la nebã segd n paam n wa tõog n vɩɩmd wakat sẽn ka sɛtã. Ned sã n sak n deeg d sebre, d sũur nooma wʋsgo. La pa nebã fãa n sakd n deegd d sɛbã ye. Kẽer pa rat n bãng Biiblã sẽn yet bũmb ningã ye. Sãnda laad-d lame. B tagsdame tɩ Biiblã pa le tar yõod rũndã-rũndã ye. Neb kẽer paoogda Biiblã sẽn yet bũmb ning sẽn yaa sõma la sẽn yaa wẽngã wɛɛngẽ wã, n yetẽ tɩ sẽn tũud-b rẽ wã yaa dem-dem wʋsgo. La a Zeova sẽn nong nebã, a ket n sõngd-b lame tɩ b tõe n paam yam hakɩɩkã. Wãn to la a maand rẽ?
2 Bũmb a ye a Zeova sẽn tũnugd ne n sõngd nebã tɩ b paamd yam hakɩɩkã yaa ne Biiblã sẽn yaa a Gomdã. Nebã fãa la bal tõe n paama Biiblã. La yaa wãn to yẽ ne sɛbã d sẽn yiisdã? Ne a Zeova sõngre, d yiisda sɛbã sẽn yɩɩd buud-goam tusr pʋgẽ. Neb nins sẽn sakd a Zeova sõngrã, rat n yeel tɩ sẽn karemd-b Biiblã la b tũud a sẽn yetã na n paama nafa. La neb wʋsg yãka yam n pa kelgd a Zeova ye. B sã n wa rat n yãk yam n maan bũmbu, b nong n teegda b mengã yam wall b kelgd b taabã saglse. B tõeeme meng n yaal-do, d sẽn yãk yam n tũud Biiblã saglsã yĩnga. Sõs-kangã pʋgẽ, d na n yãa bũmb ning sẽn kɩt tɩ nebã tar manesem a woto wã. Bɩ d reng n ges d sẽn tõe n maan n paam yam ning sẽn yit a Zeova nengẽ wã.
TƲƲL-NIF RASEM 14-20
D SẼN BÃNG BIIBLÃ KARENG PƲGẼ YEL-BŨNÃ 9
D yɩ yam soaba, la d ra yɩ nin-yaand ye
“Kelg yam dãmb goamã”
4 Togs sɩdã, ned sã n wa sagl-d vẽeneg-vẽenega, tõe n yɩɩ toog tɩ d sak n tũ. Tõe n yika d sũur menga. Bõe yĩnga? Bala d sẽn mi vẽeneg tɩ d pa zems zãngã, tõe n yɩɩ toog tɩ d sak tɩ ned sagl-do, bũmb d sẽn maan tɩ pa zems yĩnga. (Karm-y Koɛɛg soab 7:9.) D tõe n dat n baoo pademse. D tõe n tagsame t’a sẽn sagl tõndã pa ne yam-sõngo, wall d getẽ t’a sẽn sagl-d to-to wã pa zems ye. D tõeeme meng n tik bũmb a sẽn maan tɩ pa sõma zugu, n yetẽ yaa: ‘A pa tar sor n na n wa sagl maam ye. Yẽ me tudgdame wɛ!’ Baasg zãnga, saglgã sã n pa noom-do, tõe tɩ d na n zãgsame, wall d tɩ bao sagls ned a to nengẽ, d sẽn saagd yẽ soab na n togs-d-la bũmb ning d sẽn dat n wʋmã yĩnga.
“Kelg yam dãmb goamã”
12 Bõe n tõe n sõng-d tɩ d sak saglga? D segd n yɩɩ sik-m-mens rãmba, n tẽeg tɩ d pa zems zãnga, la tɩ d mi n maanda sẽn pa zemse. Wa d sẽn zoe n yã wã, a Zoob ra tara tagsa sẽn pa zemse. La a wa n toeema a tagsa wã, t’a Zeova ning-a barka. Bõe yĩnga? Bala a ra yaa sik-m-meng soaba. A Zoob sẽn sak n deeg a Eliyu saglgã, baa ne a Eliyu yʋʋmã sẽn da pa ta-a wã, wilgdame t’a ra yaa sik-m-meng soaba. (Zoob 32:6, 7) Sik-m-mengã tõe n sõng-d lame me tɩ d sak n deeg saglga, baa d sã n wa getẽ tɩ pa zems ne tõnd yɛlã sẽn yaa to-to wã, wall tɩ sẽn sagl-a tõndã yʋʋm pa ta-do. Kãsem-soab a ye sẽn be Kanada yeelame: “Sẽn mik tɩ d pa get d meng wa neb a taabã sẽn get-d to-to wã, na n yɩɩ toog tɩ d tẽebã paam pãnga, d sã n pa paamdẽ tɩ neb sagend tõndo.” D fãa ratame n bɩɩsd vʋʋsem sõngã biis n paasdẽ, la d paasd d minimã koɛɛgã mooneg la nebã zãmsg pʋgẽ.—Karm-y Yɩɩn-sõamyã 141:5.
13 D get saglsã wa bũmb sẽn wilgd tɩ Wẽnnaam nong-d lame. A Zeova rata tõnd neere. (Yel. 4:20-22) A sã n wa tũnug ne a Gomdã wall siglgã sɛba, pa rẽ bɩ d saam-biig tẽeb sẽn bɩ n sagl-do, wilgdame t’a nong-d lame. Ebre-rãmb 12:9, 10 yetame tɩ Wẽnnaam maanda woto tõnd nafr yĩnga.
14 D ges saglgã n tɩ yɩɩda, la d da ges b sẽn sagl-d to-to wã ye. Wakat kẽere, d tõe n getame tɩ b sẽn sagl-d to-to wã pa yɩ sõma ye. Yaa vẽeneg tɩ d sã n na n wa sagl neda, d segd n maana d sẽn tõe tɩ saglgã reegr yɩ nana. (Gal. 6:1) La sã n wa yaa tõnd la b sagle, d segd n kelga saglgã neere, baa b sẽn sagl-d to-to wã pa noom-do. D tõe n soka d meng yaa: “Baa m sũur sã n pa noom ne b sẽn sagl-m to-to wã, b sẽn yeel-m bũmb ningã pa gõaag zug sɩda? Rẽ yĩnga, m pa tõe n zʋʋg a soabã pãn-komsmã la m dɩk yam a saglgã pʋgẽ sɩda?” D sã n modg n get saglg fãa sẽn tõe n naf-d to-to wã, yaa yam tʋʋmde.—Yel. 15:31.
w01 15/5 30 s. a 1-2
D sã n yaa yam soaba, d paamda yõ-woko
Yam soab manesem sẽn yaa to-to ne saglg yaa toor ne nin-yaanda. A Salomo yeelame: “Rems yam soaba, t’a na n nong-f lame. Zãms yam soab t’a na n paama yam n paase.” (Yel-bũnã 9:8b, 9a) Yam soab miime tɩ “kiblg ka be sẽn wõnd a kõta sũ-noog a wakat ye. A sãamda sũuri. La kaoosg zugẽ, a womda biis sẽn yaa laafɩ la tɩrlem.” (Ebre-rãmbã 12:11) Saglgã tõe n sãama y sũuri, la bõe yĩng tɩ y na n zãgs bɩ n yik y sũuri, sã n mik tɩ y sã n sake y na n paama yam n paase?
Rĩm a Salomo sẽn yɩ yam soabã paasame yaa: “Zãms nin-tɩrg t’a na n paama bãngr n paase.” (Yel-bũnã 9:9b) Ned kae n tar yam tɩ seke, bɩ n kʋʋl wʋsg n pa le tõe n zãms bũmb ye. D sẽn ne neb sẽn kʋʋl wʋsg sẽn sakd sɩdã la b rɩkd b mens n kõt a Zeova wã sɩd noom-d lame. Bɩ tõnd me kell n tʋll n zãms bũmb a taab n paase, la d modg n paasd d bãngrã.
w01 15/5 30 s. a 5
D sã n yaa yam soaba, d paamda yõ-woko
Yaa ned kam fãa n segd n modg n paam yam. A Salomo goma rẽ yelle, n yeel yaa: “Fo sã n lebg yam soaba, yaa fo mengã la yamã na n nafe. La fo sã n yaa nin-yaanda, foom f ye bal n na n kẽeb a biisã.” (Yel-bũnã 9:12) Ned sã n yaa yam soaba, a mengã la nafda, la ned sã n yaa nin-yaanda, yɛl nins sẽn na n paam-a wã yaa yẽ mengã n bao. Sɩd-sɩdã, d kẽebda d sẽn bʋde. Woto yĩnga, bɩ d ‘yok d tʋb n kelg yam.’—Yel-bũnã 2:2.
D bʋgs Wẽnnaam Gomdã zug neere
Yelbũn sebrã tags-kãsemse
9:17: “Wagdem koomã” yaa bõe, la bõe yĩng tɩ b yet t’a yaa “noogo?” Biiblã makda sũ-noog ning pag ne a sɩd sẽn lagemd taab sẽn paamdã ne bulg ko-maasg b sẽn yũuda. Dẽnd wagdem koomã makda yoob sẽn solge. (Yel-bũnã 5:15-17) B sẽn tõog n solg n yoodã yĩng kɩtame tɩ b tagsdẽ tɩ yaa noogo.
TƲƲL-NIF RASEM 21-27
D SẼN BÃNG BIIBLÃ KARENG PƲGẼ YEL-BŨNÃ 10
Bõe n kɩtd tɩ ned vɩɩm sɩd tall barka?
w01 15/7 25 s. a 1-3
Nin-tɩrsã paamda barka
Ad bark a to nin-tɩrg sẽn paamde. Biiblã yetame yaa: “Kʋɩɩm na n lebga naong soaba, la ned sẽn tʋmd sõma na n lebga arzɛk soaba. Biig sẽn tʋmd ne yam tigsda kood sɩpaolgo, la biig sẽn tʋmd yãn-tʋʋm gõee tamm kẽebg wakate.”—Yel-bũnã 10:4, 5.
Sẽn yɩɩd fãa, rĩmã ra gomda tʋm-tʋmdb nins sẽn tʋmd kẽebg sasa wã yelle. Kẽebgã wakat sã n da ta, pa gõeem wakat ye. Yaa wakat ned fãa sẽn segd n wɩk a meng n tʋm n kaoose. Sɩd-sɩda, ra baoodame tɩ b tʋm ne yãgbo.
Daar a ye, a Zeezi yeelame yaa: “Tigsgã yaa wʋsgo, la tʋm-tʋmdbã sõor paoodame. Woto wã, bɩ y kos tigsgã [Wẽnnaam a Zeova] Soab t’a tʋm tʋm-tʋmdb tɩ b wa a tigsgẽ wã.” (Matiye 9:35-38) A ra gomda ninsaalb yelle, la pa kẽebg yell ye. Yʋʋmd 2000 wã sasa, sẽn yɩɩd neb milyõ 14 n wa a Zeezi kũumã teegre. Sõorã taa a Zeova Kaset rãmbã fãa sõor naoor a yiibu. Ãnd n da tõe n kɩɩs tɩ pʋtã pa ‘pelg n ta tigsgu? (Zã 4:35) A Zeova nin-buiidã kota tigsgã soab t’a kõ-b tʋm-tʋmdb wʋsgo, la b modgd ne b sũy fãa n tʋmd wʋsg n sõngd nebã tɩ b lebgd a Zeezi karen-biisi, tɩ zemsd ne b sẽn pʋʋsd n kot bũmb ninsã. (Matiye 28:19, 20) A Zeova sɩd ninga b modgrã bark wʋsgo! Yʋʋmd 2000 wã sasa, sẽn yɩɩd neb tus kobs-yi la pis-nii n deeg lisgu. Nin-kãensã me modgdame n na n lebg Wẽnnaam Gomdã karen-saam-dãmba. Bɩ d modg n kẽes d toog sõma koɛɛgã mooneg sẽn yaa wa kẽebgã pʋgẽ, n sõng neb wʋsg tɩ b lebg a Zeezi karen-biisi, n paam sũ-noogo.
w01 15/9 24 s. a 3-4
Kẽn-y “tɩrlem sorã” zugu
A Salomo goma tɩrlmã yõod yelle. A yeelame yaa: “Arzɛk soab paoong yaa a tẽng sẽn gũbg lalse, la naong rãmbã lʋɩɩs yaa b naongã. Nin-tɩrg tʋʋm wata ne vɩɩm, la nin-wẽng tʋʋm wata ne yel-wẽnde.”—Yel-bũnã 10:15, 16.
Wala tẽng sẽn gũbg ne lalg sẽn kogend neb nins sẽn be tẽng-kãng pʋgẽ wã, woto me, ned sã n tar arzɛka tõe n kogl-a-lame, n sõng-a t’a gil zu-loees kẽer vɩɩmã pʋgẽ. La naong tõe n waa ne ned lʋɩɩse, yel-lingdem sã n paam-a. (Koɛɛg soaba 7:12) La tõeeme me tɩ rĩm a Salomo sẽn yɩ yam soabã ra gomda arzɛkã ne naongã fãa sẽn tõe n wa ne yɛl ninsã yelle. Arzɛk soab tõe n wa teega a paoongã ne a sũur fãa, n get rẽ wa “lalg sẽn kogende.” (Yel-bũnã 18:11) Naong soab me tõe n wa tagsdame t’a sẽn yaa naong soabã yĩnga, a beoogã pa na n yɩ neer ye. Dẽnd b yiibã fãa tõeeme n pa paam yʋ-noog Wẽnnaam nifẽ ye.
it-1 294
Barka
A Zeova ningda ninsaalbã barka. “Yaa a Zeova barkã n kɩtd tɩ ned yɩ arzɛk soaba, la a pa kõt rẽ n paas toog ye.” (Yel. 10:22) A Zeova ningda neb nins sẽn tat a yamã barka, n kogend-ba, n sõngd-b tɩ b sẽn maandã yãkd nenga, n wilgd-b sore, n get-b yelle, tɩ woto fãa nafd-ba.
D bʋgs Wẽnnaam Gomdã zug neere
Nin-tɩrg yɩɩb sẽn wat ne bark ninsã
18 Yaa a Zeova barkã n kɩt t’a nin-buiidã tar bark wʋsg tẽebã wɛɛngẽ wã, la d tara bas-m-yam t’a pa paasd toog ne rẽ ye. (Yel-bũnã 10:22) La bõe yĩng masã tɩ neb wʋsg sẽn sakd Wẽnnaam yaool n namsdẽ la b paamd makr toor-toore? Yaa bʋʋm a tãab yĩnga. Pipi, yaa wẽngã tʋlsem sẽn be ne-dã yĩnga. (Sɩngre 6:5; 8:21; Zak 1:14, 15) Sẽn paas yiibu, yaa a Sʋɩtãan ne a zĩn dãmbã sababo. (Efɛɛz rãmbã 6:11, 12) Sẽn na n baas tãabo, yaa dũni kãngã sẽn yaa wẽngã yĩnga. (Zã 15:19) Baa a Zeova sẽn basd yel-be-kãensã tɩ b paamd tõndã, pa yẽ n wat ne-b ye. Sɩd me d miime tɩ bark sõma fãa la kũun sõma fãa yita yẽ sẽn yaa yĩngr vẽenem Ba wã nengẽ n sigda. (Zak 1:17) Bark nins a Zeova sẽn ningd tõndã pa lagem ne toog ye.
TƲƲL-NIF RASEM 28–SIG-NOY RASEM A 4
D SẼN BÃNG BIIBLÃ KARENG PƲGẼ YEL-BŨNÃ 11
Goam y sẽn pa segd n gome
w02 15/5 26 s. a 4
Nin-tɩrsã burkĩndã kogend-b lame
Nin-tɩrsã burkĩndã tõe n nafa neb a taaba, tɩ nin-wẽnsã tʋʋm-wẽnsã me tõe n wã neb a taaba. Israyɛll rĩmã yeelame yaa: “Sɩdã kɩɩsd goam wata ne neb a taab sãoongo, la nin-tɩrsã paamda fãagr bãngr maasem yĩnga.” (Yel-bũnã 11:9) Ãnd n tõe n kɩɩs tɩ kãnegre, wɩdga, gom-dẽgdo, la goam sẽn pa tar yõod tõe n wãa neda? La nin-tɩrg goam yaa yɩlmã, a tagsdame n yaool n gome, t’a goamã wilgdẽ me t’a nanda a taabã. A paamda fãagr a bãngrã maasem yĩnga, bala a sẽn ket n wilgd t’a yaa burkĩnã yĩnga, a tõogd n wilgame t’a rõatbã goamã yaa ziri.
w02 15/5 27 s. a 2-3
Nin-tɩrsã burkĩndã kogend-b lame
Tẽng neb sã n tar yel-manesem sẽn yaa sõma, wata ne laafɩ la zems-n-taar nebã sʋka. Woto, tẽngã paamda yʋ-noogo, t’a nebã vɩɩm me noome. Kãnegre, goam sẽn zabde, bɩ sẽn naag ne ziri wata ne sũ-sãamse, zaba, sũ-yikri, welsgo, la zũnd-zãnde. Sɩd yaa woto, sã n mikame tɩ yaa neb sẽn tar naam n maan rẽ. Neb sẽn tar manesem a woto sã n be tẽng pʋgẽ, tẽngã nebã namsdame, bala lebgda yaare, la wẽgbo. Nebã yel-manesmã sãamdame, la wat ne ligd zu-loees me.
Goam nins sẽn be Yel-bũn 11:11 wã gomda a Zeova nin-buiidã sẽn tigimd taab b tigimsã sẽn yaa wa tẽnsã pʋsẽ wã me yelle. Neb nins sẽn be tigimsã pʋsẽ wã yaa burkĩmba, rat n yeel tɩ neb sẽn tũud a Zeova ne b sũy fãa, n tar sũ-noogo, n tʋmd wʋsgo, la b sõngd b taabã me, tɩ woto kɩtdẽ tɩ Wẽnnaam yʋʋr paamd pẽgre. A Zeova ningda tigingã neb barka, tɩ b tẽebã pãng paasdẽ. Wakat ninga, neb kẽer tõeeme n wa yik b sũuri, n tagsdẽ tɩ yɛl kẽer sẽn maan to-to wã pa zems ye. Nin-kãensã yaa wa “yẽgr sẽn tar zẽnem,” tɩ b zẽnemã tõe n yelg n kẽ neb nins sẽn da pa tagsd wa bãmbã. (Ebre-rãmbã 12:15) Naoor wʋsgo, nin-kãensã baooda naam la ziir n paasdẽ. B yelgda goam n wilgdẽ tɩ wẽgbo, bu-welsgo, bɩ bũmb sẽn wõnd woto n be tigingã pʋgẽ, wall yaa kãsem-dãmbã meng n wat ne rẽ. Sɩd-sɩda, b no-goamã tõe n waa ne welsg tigingã pʋgẽ. Rẽ yĩnga, d pa segd n maand wa d pa wʋmd b goamã, la d modg n yɩ neb tẽeb sẽn tar pãnga, la sẽn modgdẽ sẽn na yɩl tɩ laafɩ la zems-n-taar zĩnd tigingã pʋgẽ sɩda?
D maanda wãn n bãng goam wakat n bake?
12 La d tẽed-n-taag sã n mi bũmb ned a to sẽn pa segd n bãnge, d manesem yaa wãna? Wala makre, y sã n seg d tẽed-n-taag sẽn be zĩig b sẽn gɩdg d tũudmã, y yam la y sok-a n ges b sẽn maand to-to n ket n tũud a Zeova beenẽ bɩ? Woto pa wẽng ye. Bala d nonga d tẽed-n-taasã, tɩ yɛl nins sẽn paamd-bã pak-do. D ratame me tɩ d sã n na n pʋʋs n kõ-b bɩ d bãng b zu-loeesã takɩ n togs a Zeova. Baasgo, yell a woto sasa, d segd n “tõoga d noorã tɩ gomd ra fãage,” rat n yeel tɩ n sĩnd la d ra gom ye. D sã n pirs d tẽed-n-taag t’a togs bũmb a sẽn pa segd n togse, pa nonglem ye. Pa wilgd tɩ d nonga sẽn togs-a gomdã, leb n pa wilgd tɩ d nonga d tẽed-n-taas a tãabã me sẽn teeg nin-kãnga, n kɩs sɩd t’a pa na n dɩk yellã n gomã ye. Yaa vẽeneg tɩ b sẽn zoe n be zĩig b sẽn gɩdg d tũudmã, d ned baa ye pa rat n maan bũmb sẽn na n maneg n paas b zu-loeesã ye. La yaa vẽeneg me tɩ d tẽed-n-taas nins sẽn be zĩ-kãensã kõn dat n togs ned a Zeova Kaset rãmb nins sẽn be be wã sẽn maand to-to n moond koɛɛgã, n maand tigissã, la b tʋmd tũudmã tʋʋm a taabã ye.
13 Sẽn yɩɩd fãa, kãsem-dãmbã n segd n tũ Yel-bũn 11:13 saglgã, n da wa rɩk yell n togs ned b sẽn pa segd n togs ye. (Karm-y-yã.) Woto tõeeme n pa nana, sẽn yɩɩd fãa kãsem-soabã sã n kẽe kãadem. Pag ne a sɩd nong n togsda taab b tagsg yɛl wʋsg zugu, b sũur yɛla, la b zu-loeese, tɩ rẽ sõngdẽ tɩ b zems-n-taarã paamd pãnga. La kãsem-soab miime tɩ tigingã ned sã n togs-a ‘yɛl’ a sẽn pa segd n dɩk n gome, pa segd t’a rɩk n togs a pag ye. A sã n dɩk n togse, nebã pa na n le kɩs-a sɩda, sãamda a yʋʋr me. Neb nins fãa b sẽn kõ tigingã tʋʋmã, b kɩs-b-la sɩda. Dẽnd b segd n yɩɩ “sɩd dãmba,” n pa maand kuus-kuus ye. (1 Tɩm. 3:8, Wẽnnaam Sebre, 2014) Woto rat n yeelame tɩ b pa segd n yɩ neb sẽn pa yas b sɩd zugu, wall neb sẽn nong n dɩkd b taab yɛl n gomd ye. Kãsem-soab sẽn nong a pag pa na n zɩlg-a, rat n yeel tɩ n togsd-a yɛl sẽn pa tɩlɛ t’a wʋm ye.
D bʋgs Wẽnnaam Gomdã zug neere
MAAN-NEERE: Zʋg-sõng sẽn pukd d no-goam la d tʋʋm-tʋmdɩ pʋgẽ
“MAAN-NEERÃ NAFA”
Biiblã yetame: “Nin-sõng maanda a meng neere.” (Yel. 11:17) Ned sã n yaa nin-sõngo, n maand a taabã neere, b na n nonga a zĩigẽ, n maand yẽ me neere. Ad a Zeezi sẽn yeele: “Yaa ne makdg ning yãmb sẽn tar n makdẽ wã la b na n mak n lebs yãmba.” (Luk 6:38, MN) Rẽ n so tɩ yaa nana ne ned sẽn nong n maand a taabã neer t’a paam zo-rãmba, la a tõog tɩ b zoodã kaoose.
Tʋm-tʋmd a Poll ra yeela Efɛɛz kiris-nebã yaa: “Maan-y taab neere, n kʋmd taaba, la y kõ taab sugri.” (Efɛɛ. 4:32) Tiging neb sã n kʋmd taaba, n baood n maan taab neere, kengda b fãa raoodo, la paasd b zems-n-taarã. B pa na n yaa gãs-gãs ne b tẽed-n-taasã, bɩ n gomd b yell wẽnga, wall b gomd n paoogd-b n na n maan laad ye. B pʋd n na n maanda b sẽn tõe fãa n gomd goam sẽn kengd b tẽed-n-taasã raoodo, n pa gomd n sãamd b yʋʋr ye. (Yel. 12:18) Woto, tigingã neb fãa na n tũuda a Zeova ne sũ-noogo.
Hakɩɩka, d sẽn maand fãa la d sẽn yet fãa segd n wilgdame tɩ d yaa maan-neer soaba. D sã n maand d taabã neere, yaa d Ba a Zeova sẽn nong nebã, la a yaa kõatã togs-n-taar la d rɩkda. (Efɛɛ. 5:1) Rẽ na n kengda d tigingã neb fãa raoodo, la kɩt me tɩ neb a taab rat n wa naag-d n tũ a Zeova. Bɩ d maan d sẽn tõe fãa tɩ nebã ne vẽeneg t’a Zeova nin-buiidã yaa maan-neer dãmba.