SOGSG KOM-BƖƖSÃ SẼN SOKDE
Bõe la m segd n maan m lisgã poore—Pipi babgã: Kell n wɩng ne tũudmã tʋʋma
Fo sã n tar bũmb sẽn tar yõod wʋsgo, wala makre zak bɩ mobilli, yaa tɩlɛ tɩ f ges a yell sõma. Yaa woto me ne foo ne Wẽnnaam zoodã. Lisgã poore, bõe la f segd n maan tɩ y zoodã kell n tall pãnga?
D na n yãa bũmb a wãna
Ket n zãmsd Wẽnnaam Gomdã
Vɛrse wã: “Y sẽn womd biis tʋʋm-sõma buud fãa pʋgẽ la y paasd y bãngrã Wẽnnaam zugã yĩnga.”—Kolos rãmbã 1:10.
Rẽ sẽn dat n yɛɛlga: Fo lisgã poore, f segd n ket n karemda Biiblã la f bʋgsd bũmb ning f sẽn karemdã zugu.—Yɩɩn-sõamyã 25:4; 119:97.
Bũmb ning sẽn tõe n wa maane: Kareng yamleoog tõeeme n wa pa tar-f ye. F tõe n wa tagsame me tɩ f pa mi Biiblã zãmsg ye.
F sẽn tõe n maane: Bao n bãng Biiblã kibay nins sẽn noom foomã sõma. Maan na-kẽndr sẽn zems zãmsgã yĩnga, la pa sẽn na n kɩt tɩ f getẽ tɩ zãmsgã yaa toog ye. Fo raabã yaa f maneg n nong a Zeova ne a Gomdã. Zãmsg a woto na n nafa foo, la yɩ-f noogo.—Yɩɩn-sõamyã 16:11.
Saglgã: Fo sã n dat n zãms Biiblã tɩ naf foo, bɩ f zĩnd zĩig bũmb sẽn pa na n tiis-fu.
Fo rata sõngr n paas bɩ?
Karem:
“Wãn to la Biiblã tõe n sõng-ma?—Babg a 2: F sẽn tõe n maan tɩ f Biiblã kareng tall yamleoogo”
Ges:
Telesaarze:
Ket n pʋʋsd a Zeova
Vɛrse wã: “Da maan-y yɩɩr baa fʋɩ poorẽ ye. La bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã.”—Filip rãmbã 4:6.
Rẽ sẽn dat n yɛɛlga: Rat n yeelame tɩ Wẽnnaam gomda ne foo, tɩ fo-me gomd ne-a. Fo sã n karemd Wẽnnaam Gomdã, fo kelgd-a lame. La fo sã n pʋʋsd-a, fo gomda ne-a. Fo sã n wa pʋʋsd-a fo tõe n kos-a lame t’a sõng-fo, la f pʋʋs-a bark ne bũmb nins a sẽn zoe n maan n kõ foomã.
Bũmb ning sẽn tõe n wa maane: Wakat ninga f tõe n getame tɩ f sã n wa pʋʋsdẽ, f togsda goam n yɩlemdẽ bala. Fo tõeeme meng n wa pa kɩs sɩd t’a Zeova kelgda fo pʋʋsgã, bɩ t’a sɩd ratame tɩ f pʋʋs-a ye.—Yɩɩn-sõamyã 10:1.
F sẽn tõe n maane: Fo tõe n tagsa bũmb nins sẽn maan daarã pʋgẽ wã yelle, n pʋʋs a Zeova rẽ yĩnga. Fo sã n be zĩig f sẽn pa tõe n pʋʋs n wogle, bɩ f bao wakat a to n pʋʋse. Pʋʋs neb a taabã me yĩnga.—Filip rãmbã 2:4.
Saglga: F sã n tagsd tɩ yaa wa f togsda goam n yɩlemdẽ bal f pʋʋsgã sasa, bɩ f pʋʋs a Zeova rẽ yĩnga. A rat n bãnga bũmb nins fãa sẽn pak foomã, baa fo sẽn dat n maneg f sẽn pʋʋsd-a to-to wã.—1 Zã 5:14.
Fo rata sõngr n paas bɩ?
Karem:
Telesaarze:
Ket n gomd bũmb nins f sẽn tẽedã yell ne nebã
Vɛrse wã: “Gũus f meng wakat fãa, la f gũus ne f sẽn zãmsd nebã bũmb ningã, . . . bala fo sã n maand woto, f na n fãaga f meng la f fãag neb nins sẽn kelgd foomã.”—1 Tɩmote 4:16.
Rẽ sẽn dat n yɛɛlga: Fo sã n gomd ne nebã bũmb nins f sẽn tẽedã yelle, na n kenga f tẽebã me. Woto, f na n fãaga neb nins sẽn kelgd foomã, la f fãag f meng me.
Bũmb ning sẽn tõe n wa maane: Fo tõeeme n pa rat n gom bũmb nins f sẽn tẽedã yell ne ned ye. Tõe tɩ f yɛɛsd n na n maana woto, sẽn yɩɩd fãa lekollẽ wã.
F sẽn tõe n maane: Yãk yam n da bas tɩ tags-kɛga, wala makre rabeemã tõog-f ye. Tẽn-tʋmd a Poll yeelame yaa: “La mam sã n pa [moond koe-noogã] ne yamleoogo, ket n yaa tʋʋmd Zu-soabã sẽn kõ maam.”—1 Korẽnt rãmbã 9:16, 17.
Saglga: Fo roagdbã sã n kõ-f sore, bɩ f bao d tẽed-n-taag sẽn kõt mak-sõng la sẽn tõe n sõng foo koɛɛgã mooneg wɛɛngẽ, n dɩk a togs-n-taare.—Yel-bũnã 27:17.
Fo rata sõngr n paas bɩ?
Ket n kẽnd tigissã
Vɛrse wã: “La bɩ d tẽegd taab yelle, sẽn na yɩl n sõng taab tɩ d bɩɩs nonglem la d tʋm tʋʋm-sõma. Bɩ d ra bas taab tiging . . . ye.”—Ebre-rãmbã 10:24, 25.
Rẽ sẽn dat n yɛɛlga: D sẽn kẽnd tigissã yaa sẽn na yɩl n waoog a Zeova. La d sã n kẽnd tigissã, d paamda bũmb a yiib me. Pipi, f tẽed-n-taasã kengda f raoodo. Yiibu, fo sã n kẽesd f toog tigissã sasa, fo kengda bãmb me raoodo.—Rom dãmbã 1:11, 12.
Bũmb ning sẽn tõe n wa maane: F yamã tõe n wa yuusa tigsg sasa, tɩ kɩt tɩ f pa wʋm zãmsg sẽn tar yõod ye. Pa rẽ bɩ f tõeeme n wa vaand tigissã. F tõe n wa basame tɩ lekollã devoaar-dãmba, wall bũmb a taab rɩt f sẽkã.
F sẽn tõe n maane: Da bas f lekollã devoaar-dãmb maaneg ye. La modg n kẽnd tigissã n pa vaandẽ, la f kelgd zãmsg fãa sõma. Mi n zẽk f nug n leoke. Tigsg fãa poore, bɩ f pẽg baa yaa nin-yend bũmb a sẽn maan tigsgã sasa yĩnga.
Saglga: Reng n segl f meng sõma tigsg fãa. Telesaarz JW Library® n kẽ tigsgã zĩigẽ, n ges bũmb ning yell b sẽn na n gom tigisg fãa sasa.
Fo rata sõngr n paas bɩ?