Darpo wã, votã, la sɛrvɩs sivillã

Darpo wã: A Zeova Kaset rãmbã tẽedame tɩ darpo wã pʋʋsgã sẽn naag ne tãb-kaoorã yɩɩlã yaa wa tũudum yel-maandɩ, tɩ f sã n maand rẽ bɩ wilgd tɩ f tẽedame tɩ f fãagr pa yit Wẽnnaam nengẽ, la a yita tẽngã taoor dãmbã nengẽ. (Ezai 43:11; 1 Korẽnt dãmba 10:14; 1 Zã 5:21) Wala makre, pĩnd wẽndẽ wã, Babilon rĩm a Nebukadnezaar sẽn da rat n wilg a naamã ziir la a yẽesmã tũudmã pʋgẽ wã yĩnga, a kɩtame tɩ b maan bõn-naandg sẽn yaa kãsenga, n kõ noor tɩ nebã sã n wʋm yʋʋm teedã rãamd sẽn yaa wa tãb-kaoor yɩɩlã, bɩ b fãa wõgemd n waoog bõn-naandgã. La hebre rãmb a tãabã, rat n yeel t’a Sadrak, a Mesak ne a Abɛdnego zãgsame tɩ b kõn wõgemd n waoog bõn-naandgã baa b na kʋ-ba.—Daniɛll sak a 3.

Kʋdemd yɛl-mit a Carlton Hayes yeela woto: “Tẽng-n-bɩɩlmã pʋgẽ, darpo wã lebga bũmb b sẽn waoogd wʋsgo. B sã n wa loogd ne darpo, rapã fõgsda b pugli. Seb-gʋlsdb gʋlsda goam n pẽgd darpo wã, la kambã me yɩɩndame n pẽgd darpo wã.” A paasame tɩ tẽng-n-biilmã kɩtame tɩ nebã yãk ray n maand kibs b tẽngã yĩnga, wala Etazĩni sẽn yãk sẽoog kiuug rasem a naasã. B tara b gãn-daad me n kilsdẽ. Berzilli, sodaasã bʋ-kaoodb sul-kãsengã taoor soabã yeela woto: “B waoogda darpo wã wa wẽnde, . . . la b waoogd tẽngã me woto.” Sebr a ye (The Encyclopedia Americana) yeelame tɩ “darpo wã me yaa pʋʋsg bũmb wa pikã.”

Sẽn pa kaoose, seb-kãng goma tãb-kaoorã yɩɩlã yelle, n yeel tɩ “neb nins sẽn yɩɩnd-a wã wilgdame tɩ b nonga b tẽngã, la naoor wʋsg me b kota Wẽnnaam t’a kogl nebã bɩ tẽngã taoor dãmb la a wilg-b sore.” Dẽnd a Zeova Kaset rãmbã bee bʋʋm la b sẽn get tãb-kaoorã yɩɩl la darpo wã pʋʋsg wa tũudum yel-maandɩ wã. Sebr a ye (Le tempérament américain [ãngil.]) goma a Zeova Kaset rãmbã kamb sẽn karemd Etazĩni lekoll dãmbẽ wã sẽn pa sakd n pʋʋs darpo wã bɩ n wẽen tɩ b na n saka b tẽngã taoor dãmbã raabã yelle. A yeelame tɩ “Etazĩni bʋ-kaoorã sul-kãseng wa n sak n deegame tɩ yel-kãensã b sẽn maand daar fãa lekoll dãmbẽ wã yaa tũudum yel-maandɩ.”

Baa ne a Zeova Kaset rãmbã sẽn pa naagd n maand yel-maandɩ nins Biiblã sẽn gɩdgã, b pa yet neb a taabã tɩ b ra maan ye. B pa paoogd tẽngã darpo, b sakda “nanambsã” bɩ tẽngã taoor dãmb me wa ‘Wẽnnaam tʋm-tʋmdba.’ (Rom dãmba 13:1-4) Rẽ n so t’a Zeova Kaset rãmbã sakd saglg ning sẽn yet tɩ b pʋʋs “rĩm dãmbã yĩng la nanambsã fãa yĩnga.” D sẽn pʋʋsdã yaa sẽn na yɩl “tɩ tõnd tõe n zĩnd bãan n paam laafɩ n sak Wẽnnaam n maan tɩrg bala.”—1 Tɩmote 2:2.

Votã: Kiris-neb hakɩkã getame tɩ ned fãa tara sor n tõe n vot ned ning a sẽn date. B pa gɩdgd neb a taabã tɩ b ra vot ye. B sakda neb nins sẽn be naamã zugã. B pa kẽesd b mens politikã yɛlẽ ye. (Matɩe 22:21; 1 Pɩɛɛr 3:16) Tẽns nins pʋsẽ sẽn yaa tɩlae tɩ ned fãa votã, la zĩis nins b sẽn get neb nins sẽn pa kẽngd votã zĩigẽ wã wa kɩɩsdbã, kiris-neb hakɩkã segd n maana wãna? Kiris-ned sẽn be yel-kãngã buud taoor sã n tẽeg t’a Sadrak, a Mesak ne a Abɛdnego sakame n kẽng Dura, bõn-naandgã sẽn da beẽ wã, a tõe n kẽnga votã zĩigẽ a sũur-kasetã sã n ka ningd-a taale. La a sã n kẽnge, a na n maana gũusg n da kɩɩs Wẽnnaam noor ye. A segd n tagsa yɛl a yoob nins sẽn pʋgdã yelle:

1. A Zezi karen-biisã “ka dũniyã rẽnd ye.”—Zã 15:19.

2. Kiris-nebã gomda Kirist yʋʋr yĩnga, la a Rĩungã yʋʋr yĩnga.—Zã 18:36; 2 Korẽnt dãmba 5:20.

3. Kiris-nebã tara tẽeb a yembre, b nonga taaba.—1 Korẽnt dãmba 1:10; Kolos rãmb 3:14.

4. F sã n vot neda, f tara taal ne bũmb nins fãa a sẽn na n maanã.—Ges-y 1 Sãmwɛll 8:5, 10-18 ne 1 Tɩmote 5:22 sẽn yet rẽ wɛɛngẽ.

5. Israɛll nebã sẽn wa n dat tɩ ninsaal yɩ b rĩmã, a Zeova gesame tɩ yaa yẽ la b zãgs-yã.—1 Sãmwɛll 8:7.

6. Kiris-ned sã n wa gomd Wẽnnaam Rĩungã yell ne neda, baa a soab tagsg sẽn yaa to-to politikã zugu, a segd n tõog n goma ne raoodo.—Matɩe 24:14; 28:19, 20; Hebre dãmba 10:35.

Sɛrvɩs sivillã: Tẽns kẽer pʋsẽ, tẽngã taoor dãmb yiisa noy sẽn wilgd tɩ ned sã n zãgs sodaarã, a segd n tʋma tʋʋmd a to kiis a wãn bɩ yʋʋm a wãn pʋgẽ. Ned sã n wa be yel-kãngã buud taoore, a segd n pʋʋsa Wẽnnaam, a tõeeme me n sõs ne a tẽed-n-taag sẽn mi Biiblã noy sõma, n yaool n yãk a sẽn na n maan bũmb ninga.—Yelbũna 2:1-5.

Wẽnnaam Gomdã yeta tõnd tɩ d “sak soolem soaadba ne nanambsã, la [d] sak n maan tʋʋm sõma fãa” la d maan bũmba fãa ne yam. (Tɩt 3:1, 2) D ning rẽ d yamẽ wã, la d sok d meng woto: ‘M sã n sak tʋʋm-kãngã, na n kẽes-m-la politik la zabr pʋgẽ bɩ, bɩ na n kẽes-m-la ziri tũudum yɛl pʋgẽ?’ (Miise 4:3, 5; 2 Korẽnt dãmba 6:16, 17) ‘Tʋʋm-kãngã na n kɩtame tɩ lebg toog ne-m tɩ m tʋm tʋʋm nins Wẽnnaam sẽn bobl-ma bɩ, bɩ na n pʋd n gɩdg-m lame?’ (Matɩe 28:19, 20; Efɛɛz rãmba 6:4; Hebre dãmba 10:24, 25) ‘M sã n tʋm tʋʋm-kãngã, a na n sõnga maam tɩ m tõog n tʋm Wẽnnaam tʋʋmdã sõma n paase, bɩ n kɩt meng tɩ m tõog n yɩ so-pakd bɩ?’—Hebre dãmba 6:11, 12.

Kiris-ned sã n tags t’a sẽn tʋmd tʋʋm-kãngã n são a sẽn na n kẽng bãens-roogẽ, a tẽed-n-taasã pa segd n ning-a taal ye. (Rom dãmb 14:10) La a sã n tags me t’a pa tõe n tʋm tʋʋm-kãngã, a tẽed-n-taasã pa segd n ning-a taal me ye.—1 Korẽnt dãmba 10:29; 2 Korẽnt dãmba 1:24.