Zɩɩmã pʋgẽ bõn-kɩdsã, la woperasɩõ rãmbã

Zɩɩmã pʋgẽ bõn-kɩdsã: Bõn-kãsems a naas n naag taab n yaa zɩɩmã: Yaa globill ruuz, globill blã, plakɛt, la plasma. B tõe n le kẽe bõn-kãensã pʋgẽ n yãk bõn-kɩdse. Wala makre, globill ruuz rãmbã pʋgẽ, proteyin n be b sẽn boond tɩ emoglobin, tɩ b tõe n yãk-a ned bɩ rũng zɩɩmẽ n tɩp ned sẽn bẽed t’a zɩɩm booge, bɩ ned zɩɩm sẽn daag wʋsgo.

Plasma wã fãa la bal yaa koom, la ormon dãmba, yamsem, sɩkr la yɛl a taab me n be a pʋgẽ. Plasma wã leb n tara bũmb sẽn kɩtd tɩ zɩɩm yõke, la bũmb sẽn zabd ne bãasã. Wala makre, ned sã n zoe n paam bãag t’a yĩngã zab ne bãagã n tõoge, logtor tõe n yãka gaamaglobulin nin-kãng plasma wã pʋgẽ n vʋdg ned a to sẽn na yɩl n kogl-a ne bãagã. B tõe n yãka bũmb globill blã rãmbã me pʋgẽ n tɩp kãnsɛɛr la bãas a taaba.

Kiris-ned tõe n saka tɩbsg sẽn tũud ne zɩɩmã pʋgẽ bõn-kɩdsã bɩ? Biiblã pa gomd bõn-kãensã fãa yell bal-bal n wilgd d sẽn segd n maan ye. Dẽnd yaa ned kam fãa n get a sũur-kasetã sã n kõt-a-la sor bɩ a pa kõt-a sore. Kẽer na n zãgsa zɩɩmã pʋgẽ bõn-kɩdsã fãa, n yetẽ tɩ Wẽnnaam ra yeela Israɛll nebã tɩ b sã n yiis rũng zɩɩm, bɩ b “raag-a tẽng wa koom.” (Tõodo 12:22-24) La sãnda yẽ pa na n sak tɩ b ning-b zɩɩmã meng bɩ a bõn-kãsems a naasã ye. La b na n sakame tɩ b tɩp-b ne zɩɩmã pʋgẽ bõn-kɩdsã. B tõe n tagsame tɩ bõn-kɩdsã b sẽn yãk zɩɩmã pʋgẽ wã pa le makd nedã bɩ rũngã vɩɩm yɛs ye.

Y sã n wa rat n yãk y sẽn na maaneg zɩɩmã pʋgẽ bõn-kɩdsã wɛɛngẽ, bɩ y sok y meng woto: ‘Rẽ yĩnga mam miime tɩ m sã n yeel tɩ m zãgsa zɩɩmã pʋgẽ bõn-kɩdsã fãa, rat n yeelame tɩ m zãgsa tɩɩm kẽer sẽn zabd ne bãase, bɩ sẽn tõe n kɩt tɩ m zɩɩm sẽn daagd yõk bɩ? Mam na n tõog n wilga logtor bũmb ning sẽn kɩt tɩ m zãgsdẽ bɩ m sakd zɩɩmã pʋgẽ bõn-kɩdsã kẽerã bɩ?’

Woperasɩõ rãmbã: Woperasɩõ sasa, b tõe n maana b sẽn boond tɩ emodilisɩõ wã, walla rekiperasɩõ de sã epãnse wã. B sã n na n maan emodilisɩõ wã, b fõogda nedã zɩɩm tɩ zoe n kẽ masĩn buud pʋgẽ, n yaool n ledg-a ne bũmb sẽn yaa koom-koom, tɩ woperasɩõ wã poor bɩ b le kɩt tɩ zɩɩmã lebs n kẽ a soabã yĩngẽ wã. Sã n yaa rekiperasɩõ de sã epãnse wã, b kokda zɩɩm sẽn yit woperasɩõ wã sasa wã, n yɩlg-a, n lebs n ning a soabã yĩngẽ wã. Logtoɛɛmbã fãa sẽn maand bõn-kãensã to-to wã sẽn pa yembrã yĩnga, kiris-ned segd n soka a logtor n bãng a sẽn na n maan to-to wã takɩ.

Y sã n wa rat n yãk b sẽn na n maan-y bũmb ning woperasɩõ sasa wã wɛɛngẽ, bɩ y sok y meng woto: ‘B sã n na n fõoga mam zɩɩmã tɩ zoe n tɩ kẽ zĩig a to, n tõe n kaoos bilf meng n yaool n wa lebg n kẽ m yĩngẽ wã, mam sũur-kasetã na n sakame tɩ m get rẽ wa bũmb sẽn ket n be mam yĩngã pʋgẽ, tɩ pa tɩlae tɩ b “raag-a tẽng” bɩ? (Tõodo 12:23, 24) Mam sũur-kasetã sẽn paam Biiblã kiblgã na n zab-m lame, b sã n yãk mam zɩɩmã n kalem ne tɩɩm n lebs n ning mam yĩngẽ wã bɩ? Rẽ yĩnga mam miime tɩ m sã n yeel tɩ tɩbsgã wɛɛngẽ, m pa na n sak tɩ b maan baa fʋɩ ne m zɩɩmã, rat n yeelame tɩ m zãgsa m zɩɩmã yãk n vaees n gesã, emodialiizã, bɩ masĩn nins sẽn sõngd sũurã bɩ fulfuudã bɩ?’

Yaa kiris-ned fãa n segd n wilg a sẽn na n sak tɩ b maan bũmb ning ne a zɩɩm woperasɩõ sasa. Yaa woto me ne zɩɩmã yãk n vaees n gesã, la tɩbsg nins sẽn baood tɩ b yãk f zɩɩm bilf n kalem ne tɩɩm n lebs n vʋdg-fã.