SAK A 05
Biiblã yaa Wẽnnaam Gomd a sẽn kõ-do
A Zeova kõo tõnd Biiblã. Yaa kũun sẽn yaa sõma wʋsgo. Sɛb 66 n be Biiblã pʋgẽ. La tõe tɩ y sokda y meng yaa: ‘Maana wãn tɩ Biiblã wa beẽ? Biiblã yaa ãnda n so?’ Sẽn na yɩl n leok sogs-kãensã, bɩ d ges sẽn yɩ to-to tɩ d wa paam Biiblã sẽn yaa Wẽnnaam Gomdã.
1. Sẽn mik tɩ yaa ninsaalb n gʋls Biiblã, bõe yĩng tɩ d yetẽ tɩ yaa Wẽnnaam n so-a?
Yaa sẽn zems rap 40 n gʋls Biiblã, na maan yʋʋm 1 600 pʋgẽ. B sɩnga yʋʋmd 1513 sẽn deng a Zeezi rogmã, n tãag yʋʋmd 98 a Zeezi rogmã poore. Sẽn gʋls-b Biiblã yɛlã ra yaa toor-toore. Kẽer da yaa pe-kɩɩmba, zĩm-yõgdba, tɩ sãnda ra yaa rĩm-dãmba. Baa ne rẽ, Biiblã zĩig baa ye pa kɩɩsd a to ye. Bõe n kɩt tɩ yaa woto? Yaa Biiblã sẽn yaa Wẽnnaam Gomdã yĩnga. (Karm-y 1 Tesalonik rãmb 2:13.) Sẽn gʋls-b Biiblã pa gʋls b mens tagsa ye. Ayo. B “togsa Wẽnnaam koees wa sẽn zems vʋʋsem sõngã sẽn vẽneg-bã.”a (2 Pɩyɛɛr 1:21) Wẽnnaam tũnuga ne a vʋʋsem sõngã, n vẽneg neb a tagsa wã tɩ b gʋlse.—2 Tɩmote 3:16.
2. Ãnda n tõe n paam Biiblã?
Biiblã goamã tõe n nafa “neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.” (Karm-y Vẽnegr 14:6.) Wẽnnaam kɩtame tɩ Biiblã be buud-goam wʋsg pʋsẽ n yɩɩd sɛb a taabã fãa. Nebã fãa la bal tõe n paama Biiblã n karme, baa b sẽn be zĩig ninga, la b sẽn gomd buud-gomd ninga.
3. Bõe n da tõe n kɩt tɩ Biiblã pa be rũndã-rũndã, la bõe la a Zeova maan t’a pa meneme?
Sɩngrẽ wã, b gʋlsa Biiblã bũmb toor-toor sẽn da pa tõe n kaoos wʋsg zutu. Wala makre, gãnd la papiris-rãmb zutu. La neb sẽn nong Biiblã n da maagd b yĩng n get-a n lebsd n gʋlsdẽ. Baa neb sẽn yaa pãens rãmb sẽn bao n na n menes Biiblã, neb a taab n sak n gẽneg b yõy sẽn na yɩl n kogl-a. A Zeova pa bas tɩ bũmb wall ned gɩdg-a t’a pa taas tõnd a koeesã ye. Biiblã pʋgẽ b yetame: “Tõnd Wẽnnaamã gomd paada wakat fãa.”—Ezayi 40:8.
D BAO N BÃNG N PAASE
D ges Wẽnnaam sẽn vẽneg neb to-to tɩ b gʋls Biiblã, a sẽn maan to-to t’a pa meneme, la a sẽn maan to-to tɩ nebã tõe n paam-a wã.
4. Biiblã pʋgẽ, b wilgda Soab ning sẽn so-a wã
Ges-y VIDEO wã. Rẽ poor bɩ y karem 2 Tɩmote 3:16, la y leok sogsgã.
Sẽn mik tɩ yaa neb n gʋls Biiblã, bõe yĩng tɩ b boond-a tɩ Wẽnnaam Gomde?
Yãmb tagsdame tɩ Wẽnnaam tõe n taasa a tagsa wã ninsaalb tɩ b gʋls bɩ?
Sekertɛɛr tõe n gʋlsa lɛtre, la lɛtrã yaa ned ning sẽn togs-a t’a gʋlsã n so. Woto me, yaa ninsaalb n gʋls Biiblã, la yaa Wẽnnaam n so-a
5. Neb n bao n na n menes Biiblã la b pa tõog ye
Biiblã sã n yaa Wẽnnaam Gomde, d tõe n kɩsa sɩd t’a kogend-a lame. Hal pĩnd wẽndẽ, neb sẽn yaa pãens rãmb n bao n na n menes Biiblã. Tũudum taoor dãmb n bao n na n gɩdg nebã tɩ b ra paam-a n karem ye. Neb wʋsg n gẽneg b yõy n na n kogl Biiblã t’a ra meneme, baa b sẽn nams sãnda la b kʋ kẽerã. Sẽn na yɩl n bãng n paase, bɩ y ges VIDEO wã. Rẽ poor bɩ y leok sogsgã.
Yãmb sẽn bãng tɩ neb n nams wʋsg sẽn na yɩl n kogl Biiblã t’a ra menemã kɩtame tɩ y tʋll n karm-a bɩ? Bõe yĩnga?
Karm-y Yɩɩn-sõamyã 119:97, tɩ rẽ poor bɩ y leok sokrã:
Bõe n kɩt tɩ neb wʋsg gẽneg b yõy n na n lebg Biiblã, la b sõng tɩ neb a taabã paam-a?
6. Sebr ned buud fãa sẽn tõe n paam n karme
Biiblã n yaa sebr ning b sẽn lebg ne buud-goam wʋsgo, la b sẽn yiis t’a sõorã yɩɩd sɛb a taabã fãa. Karm-y Tʋʋm 10:34, 35, tɩ rẽ poor bɩ y leok sogsgã:
Bõe yĩng tɩ Wẽnnaam dat tɩ b lebg a Gomdã ne buud-goam wʋsgo, la b sõng neb a taabã tɩ b paam-a?
Bõe n noom yãmb Biiblã wɛɛngẽ?
Dũniyã nebã
fãa
la bal
tõe n paama Biiblã n karem ne buud-gomd b sẽn wʋmde
A bee sẽn yɩɩd
buud-goam
3 000
A tõre, wall a pʋɩ-sʋka
B tagsdame tɩ b yiisa Biibl-dãmb
5 000 000 000
Yɩɩda sɛb a taabã hal zĩig sẽn zãre
NEB KẼER SẼN YETE: “Biiblã yaa seb-kʋdr ninsaalb sẽn gʋls bala.”
Yãmb tagsg yaa wãn ne rẽ?
Bõe n wilgd tɩ Biiblã yaa Wẽnnaam Gomde?
KƲMSGO
Biiblã yaa Wẽnnaam Gomde. A kɩtame tɩ ninsaalbã fãa tõe n paam-a n karme.
Lebg-n-gese
B sẽn yeel tɩ Wẽnnaam vẽnega neb tɩ b gʋls Biiblã rat n yeelame tɩ bõe?
B sẽn maan to-to tɩ Biiblã pa menemã wɛɛngẽ, b sẽn lebg-a ne buud-goam wʋsgã, la b sẽn yiis-a wʋsgã wɛɛngẽ, bõe n noom yãmba?
Y sẽn bãng tɩ Wẽnnaam maana bũmb wʋsg woto sẽn na yɩl n taas yãmb a koeesã, y tagsg yaa wãna?
BŨMB A TAABA
Karm-y kibay Biiblã wɛɛngẽ, b sẽn sɩng a gʋlsgã tɛka, n tall n tãag b sẽn lebg-a ne buud-goam wʋsg rũndã-rũndã wã.
“Sẽn yɩ to-to tɩ Biiblã wa be rũndã-rũndã” (Yʋʋmd 2007 sɩpaolg kiuug Réveillez-vous! wã)
Bũmb a tãab sẽn da tõe n kɩt tɩ Biiblã meneme. Bõe n kɩt t’a põse?
“Biiblã, sebr sẽn põs bɛɛb nugẽ” (Yʋʋmd 2016 Gũusg Gasgã No a 4)
Neb sẽn gẽneg b yõy n lebg Biiblã.
B gesa Biiblã n lebg n gʋlse, la b lebg-a naoor wʋsgo. Bõe n kɩt tɩ y tõe n kɩs sɩd tɩ b pa toeem a goamã?