Bao-y n pẽneg-y Wẽnnaam

‘Zusoaba, yãmb . . . mii maam’

RAO a yembr yeela woto: “Bũmb kae n namsd ned n yɩɩd a sẽn na n miẽ t’a yell pa pak neda, la tɩ b pa mi a zu-loeesã sẽn namsd-a to-to wã ye.”a Yãmb sak n deega gom-kãensã bɩ? Yãmb zoe n tagsame tɩ ned toog ka be ne-yã, wall tɩ ned pa mi y zu-loɛɛg sẽn namsd-y to-to tɩ kɩt tɩ y sũur sãam bɩ? Sã n yaa rẽ, Biiblã sẽn yet bũmb ningã tõe n bels-y lame. Biiblã wilgame t’a Zeova geta neb nins sẽn maand a raabã yelle, la t’a mii zu-loees nins b sẽn segdã sẽn namsd-b to-to wã. A Davɩɩd goam nins sẽn be Yɩɩl Sõamyã 139 soabẽ wã sɩd wilgda rẽ.

A Davɩɩd sẽn da kɩs sɩd tɩ Wẽnnaam geta a yellã yĩnga, a yeela woto: “Zusoaba, yãmb feesda maam n mi maam.” (Vɛrse a 1) A Davɩɩd sẽn gom goam nins ka wã bee yamleoogo. B tõe n tũnuga ne Hebre wã gom-bil ning b sẽn lebg ka tɩ ‘feesã’ n bilg b sẽn tuud n baood sãnem wall wanzuri to-to wã, (Zoob 28:3) ned sẽn soosd n dat n bãng tẽng yɛla, (Bʋkaoodba 18:2) wall ned sẽn baood n dat n bãng yell vɩʋʋg n tõog n kao bʋʋdo (Tõodo 13:15). Sɩd me, a Zeova mii tõnd hal sõma, tɩ yaa wa a feesa tõnd vɩɩmã nens fãa. A Davɩɩd sẽn yeel tɩ ‘maamã,’ sõngd-d lame tɩ d bãng tɩ Wẽnnaam nin-buiidã ned kam fãa yell pak-a lame. A feesda b ned kam fãa, hal n mi-a sõma.

A Davɩɩd wilgame tɩ Wẽnnaam sɩd feesda a nin-buiidã sõma, n yeel woto: “Yãmb mii wakat ning mam sẽn zĩndeda, la wakat ning mam sẽn yikda, yãmb bãnga mam tagsgã yɩɩga.” (Vɛrse a 2) D sɩd n tõe n yeelame t’a Zeova bee “yɩɩga,” bala, a bee saasẽ. La a mii tõnd zĩndg wakate, tõe tɩ yaa d sẽn wat n sig tʋʋmã, la d yikr wakate, rat n yeel tɩ yibeoogo, d sẽn wat n loogd tʋʋmã. A mii tõnd tagsa wã, d raab toor-toorã, la d sũurã tʋlsem me. Rẽ yĩnga a Davɩɩd sẽn da mi t’a Zeova feesd-a-la woto wã, kẽes-a-la rabeem bɩ? Ayo. A pʋd n da kota a Zeova t’a fees-a. (Vɛrse 23, 24) Bõe yĩnga?

Bala, a Davɩɩd ra miime t’a Zeova sẽn feesd a nin-buiidã, yaa b neer yĩnga. A goma rẽ yell n yeel woto: “Yãmb feesda mam kẽnd ne m sẽn gãe n vʋʋsdẽ, la yãmb mii mam manesem fãa.” (Vɛrse a 3) Daar fãa, a Zeova nee ‘tõnd manesmã fãa,’ rat n yeel tɩ d kongr toor-toorã la d tʋʋm-sõma wã fãa. Yaa d tʋʋm-sõma wã la a get n yɩɩd bɩ, bɩ yaa d tʋʋm-kɛgã. Hebre wã gom-bil ning b sẽn lebg ka tɩ feesã tõe n dat n yeelame tɩ “go,” wall “yelge,” wa ka-koaad sẽn yelgd a koodo, n welgd fɩɩbã ne ka-bɛɛlã. La gom-bil ning b sẽn lebg tɩ “mii mam manesem fãa” wã tõe n dat n yeelame me tɩ “nonga mam manesem fãa.” Rẽnd a Zeova sã n wa feesd a nin-buiidã sẽn maand bũmb nins la b sẽn gomd goam ninsã, a nonga sẽn yaa sõma wã. Bõe yĩnga? A nanda modgr ning b sẽn maand n dat n ta a yamã.

Yɩɩl Sõamyã 139 soabã sõngd-d lame tɩ d bãng t’a Zeova nin-buiidã yell pak-a-la wʋsgo. Daar fãa, a get-b lame la a feesd-ba. Woto kɩtame t’a mi b zu-loeesã, la a mi zu-loe-kãens sẽn nams-b to-to wã me. Rẽ yĩnga, y pa rat n tũ Wẽnnaam sẽn get y yell woto sɩda? Sã n yaa rẽ, y tõe n kɩsa sɩd t’a Zeova pa na n tol n ‘yĩm y tʋʋmdã ne y nonglmã y sẽn wilg a yʋʋrã yĩngã’ ye.—Hebre dãmba 6:10.

[Tẽngr note]