A Zeova mi a nin-buiidã fãagre

“Zusoabã mii b sẽn na n maan to-to n fãag neb nins sẽn sakd bãmbã.”—2 PƖƐ. 2:9, KÃAB-PAALGÃ KOE-NOOGO.

BAO-Y SOGS-KÃENSÃ LEOORE:

․․․․․

Bõe yĩng tɩ d tõe n kɩs sɩd t’a Zeova mii yɛlã sẽn na n pʋgl taab to-to t’a raabã pidsã?

․․․․․

Bõe yĩng tɩ d tõe n kɩs sɩd t’a Zeova na n tʋma ne a pãn-kãsengã n sõng a nin-buiidã?

․․․․․

Bõe yĩng tɩ d tõe n kɩs sɩd t’a Zeova mii yɛlã sẽn na n yɩ to-to to-kãsengã sasa wã takɩ?

1. “To-kãsengã” sasa, bõe n na n zĩndi?

A SƲƖTÃAN dũniyã sãoong na n yɩɩ zĩig pʋgẽ, wakat nebã sẽn pa tẽede. (1 Tes. 5:2, 3) Bũmb nins sẽn na n zĩnd ‘a Zeova ra-kãsengã’ sasa wã sã n wa sɩnge, ninsaalbã pa na n mi b sẽn maandg ye. (Sof. 1:14-17) Wakat kãnga, toog la namsg wʋsg na n zĩndame, hal tɩ Biiblã bool rẽ tɩ ‘to-kãsenga,’ n yeel tɩ “toog sẽn yaa woto nan ka zĩnd dũniyã zug ye.”—Karm-y Matɩe 24:21, 22.

2, 3. a) “To-kãsengã” sasa, bõe la a Sʋɩtãan na n mak Wẽnnaam nin-buiidã maanego? b) Bõe n na n sõng-d tɩ d maneg n kɩs sɩd t’a Zeova tõe n fãaga a nin-buiidã?

² No-rɛɛs a Ezekɩɛll ra togsame tɩ “to-kãsengã” sã n wa kolgd saabo, a Goog sẽn yit Magoogã na n zaba ne Wẽnnaam nin-buiidã. Zab-kãng sasa, “tãb-biis kʋʋng-kʋʋng” n na n wa “pid tẽngã” n dat n zabe. (Eze. 38:2, 14-16) Ninsaalbã siglg baa a ye pa na n sõng a Zeova nin-buiidã ye. Yaa Wẽnnaam bal n na n kogl-ba. Wẽnnaam nin-buiidã bɛɛbã sã n wa rat n sãam-ba, b manesem na n yɩɩ wãna?

³ Yãmb sã n tũuda a Zeova, rẽ yĩnga y kɩsa sɩd t’a tõe n fãaga a nin-buiidã to-kãsengã sasa, la t’a na n fãag-b lame bɩ? Tʋm-tʋmd a Pɩɛɛr yeela woto: “Zusoabã mii b sẽn na n maan to-to n fãag neb nins sẽn sakd bãmbã makr wakate, la b sẽn na n maan to-to n bĩng tʋʋm-wẽns maandbã n sɩbg-b bʋʋdã kaoob daare.” (2 Pɩɛ. 2:9, Kãab-paalgã Koe-noogo) D sã n bʋgs kibay nins sẽn wilgd a Zeova sẽn fãag a nin-buiidã to-to pĩnd wẽndẽ wã zugu, tõe n kenga d raood tɩ d gũ bũmb nins sẽn watã. Bɩ d tẽeg kibay a tãab sẽn na n sõng-d tɩ d maneg n kɩs sɩd t’a Zeova tõe n fãaga a nin-buiidã.

B PAAMA FÃAGR SA-KÃSENGÃ SASA

4. Nand tɩ sa-kãsengã sɩnge, bõe la b ra segd n maane?

⁴ Bɩ d reng n gom a Nowe wakatẽ sa-kãsengã yelle. Tʋʋm toor-toor la b ra segd n tʋm tɩ sa-kãsengã nan pa sɩng ye. Wala makre, b ra segd n kaa koom-koglg sẽn yaa parwẽnde, la b kẽes rũms toor-toor a pʋgẽ. Kibarã sẽn be Sɩngr sebrã pʋgẽ wã wilgame t’a Zeova pa bas tɩ b ka koglgã n sa t’a yaool n yãk saagã sẽn na n sɩng niib wakat ningã ye. Bala a ra pa yɛɛsd saagã na n wa mik tɩ koglgã nan pa sa ye. Sɩd me, a sẽn wa n na n yeel a Nowe t’a ka koglgã t’a ra zoe n yãka sa-kãsengã sẽn na n sɩng wakat ningã hal daar zãra. Bõe yĩng tɩ d yet woto?

5. A Zeova sẽn yeel bũmb ning Sɩngr 6:3 wã võor yaa bõe, la wakat bʋg la a togs rẽ?

⁵ Biiblã yet-d lame t’a Zeova reng n yãka a sẽn na n maan bũmb ningã n togs malɛgsã. Sɩngr 6:3 wã wilgame t’a yeela woto: “Mam sɩɩgã sẽn kõt vɩɩmã ka na n pa ne ninsaal wakat fãa ye, bãmb sẽn yaa ninsaalbã yĩnga. Ninsaal yʋʋm na n zemsa koabg la pisi bala.” Pa yʋʋm sõor ninsaal sẽn segd n vɩɩmd n tek yell la a Zeova sẽn da gomã ye. Yaa wakat ning a sẽn da yãk n na n menes wẽngã sẽn be tẽngã zugã.a Sa-kãsengã sɩnga yʋʋmd 2370 sẽn deng a Zezi rogmã. Dẽnd yaa yʋʋmd 2490 sẽn deng a Zezi rogmã la a Zeova sẽn togs tɩ sa-kãseng n watã. Wakat kãng t’a Nowe ra tara yʋʋm 480. (Sɩng. 7:6) Yʋʋm 20 loogr poore, rat n yeel tɩ yʋʋmd 2470 sẽn deng a Zezi rogmã, a Nowe roga a bi-kãsengã. (Sɩng. 5:32) Rẽ poore, maana yʋʋm 100 tɩ sa-kãsengã yaool n sɩnge. La rẽ t’a Zeova ra ket n nan pa wilg a Nowe tʋʋmd ning a sẽn na n kɩt t’a tʋm tɩ ninsaalb wa paam n põsã ye. La Wẽnnaam ra na n basame tɩ kaoos wakat a wãn t’a yaool n wilg-a?

6. Yɩɩ wakat bʋg la a Zeova yeel a Nowe t’a ka koom-koglgã?

⁶ Wõnda a Nowe kambã rogem poore, a Zeova basame tɩ kaoos yʋʋm t’a yaool n togs-a bũmb ning a sẽn na n maanã. Bõe yĩng tɩ d yet woto? Kibarã sẽn be Biiblã pʋgẽ wã wilgame tɩ Wẽnnaam sẽn wa n na n yeel a Nowe t’a ka koom-koglgã, rẽ t’a kambã ra zoe n bɩɩme n kẽ kãadem. A Zeova yeel-a-la woto: “Mam na n yẽbga m kãabg ne foom, la bɩ foom ne f kom-dibli wã la f pagã ne f kambã pagb me wa kẽ koglgã pʋgẽ.” (Sɩng. 6:9-18) Rẽnd tõe t’a sẽn wa n yeel a Nowe t’a ka koom-koglgã tɩ keta yʋʋm 40 bɩ 50 tɩ sa-kãsengã sɩnge.

7. a) Wãn to la a Nowe ne a zakã rãmb wilg tɩ b tara tẽebo? b) Yaa wakat bʋg la Wẽnnaam togs a Nowe sa-kãsengã sɩngr daare?

⁷ A Nowe ne a zakã rãmb sẽn wa n kaad koglgã, tõe tɩ b ra sokda b meng Wẽnnaam sẽn na n pids a raabã to-to, la sa-kãsengã sẽn na n sɩng wakat ninga. La baa b sẽn da pa mi rẽ fãa wã, b pa bas koglgã kaab ye. Kibarã sẽn be Biiblã pʋgẽ wã yeelame t’a ‘Nowe maana bũmb nins fãa Wẽnnaam sẽn yeel yẽ t’a maana.’ (Sɩng. 6:22) Rẽ poore, a Zeova yeela a Nowe tɩ keta rasem a yopoe tɩ sa-kãsengã sɩnge. Sẽk-kãng zemsa a Nowe ne a zakã rãmb na paam n kẽes rũmsã koglgã pʋgẽ. Sa-kãsengã sẽn wa n na n sɩngã t’a ‘Nowe tara yʋʋm kobs-yoobe.’ Yɩɩ “kiuug a yiib soabã rasem piig la a yopoe raare.” Rẽ t’a maana bũmba fãa n sa.—Sɩng. 7:1-5, 11.

8. Bõe yĩng tɩ sa-kãsengã kibar tõe n sõng-d tɩ d kɩs sɩd t’a Zeova mii wakat ning a sẽn na n fãag a nin-buiidã?

⁸ Sa-kãsengã kibarã wilgdame t’a Zeova mii wakat ning a sẽn tog n fãag a nin-buiidã, la a sẽn na n fãag-b to-to wã me. Dũni-kãngã saabã sẽn tar pẽnegrã, d tõe n kɩsa sɩd t’a Zeova sẽn dat n maan bũmb ninsã fãa na n pidsa ‘daar ning la wakat ning’ a sẽn yãkã kɛpɩ.—Mat. 24:36; karm-y Habakuk 2:3.

B PAAMA FÃAGR MOG-MIUUGẼ WÃ

9, 10. Wãn to la a Zeova tall a nin-buiidã n bẽd Ezipt sodaasã?

⁹ Sa-kãsengã kibarã sõng-d lame tɩ d bãng t’a Zeova mii wakat ning a sẽn na n pids a raabã. Makr a yiib-n-soabã yell d sẽn na n gomã wilgda bʋʋm a to sẽn kɩt tɩ d tõe n bas d yam t’a Zeova na n fãaga a nin-buiidã. A na n tʋma ne a pãngã sẽn ka koakã n pids a raabã. Yaa sɩd tɩ wakat buud fãa, a Zeova tõe n fãaga a nin-buiidã. La sasa ninga, a mi n maana wa a pa na n fãag-ba, sẽn na yɩl n bẽd a bɛɛbã. A sẽn wa n na n yiis Israyɛll nebã Ezipt yembdẽ wã, a maana woto.

¹⁰ Tõe tɩ Israyɛll nebã sẽn yi Eziptã sõor taa milyõ a tã. A Zeova wilga a Moiiz a sẽn tog n tall nin-buiidã n tees zĩig ninga, sẽn na yɩl t’a Faraõ tags tɩ b pa mi b sẽn debdẽ ye. (Karm-y Yikr 14:1-4.) A Faraõ sɩd tẽeme t’a na n bẽd-b-la ne mog-miuugã n paame, n peeg a sodaasã tɩ b pʋgl-ba. Bala ra wõnda Israyɛll nebã pa na n tõog n põs ye. (Yik. 14:5-10) La bũmb yaool n da pa tõe tɩ b pa põs ye. Bõe yĩnga? Bala, a Zeova ra na n fãag-b lame.

11, 12. a) Wãn to la a Zeova sõng a nin-buiidã, la rẽ baasa wãna? b) Kiba-kãngã wilgda tõnd bõe a Zeova zugu?

¹¹ “Sawad-taokã” sẽn da be Israyɛll nebã taoor n wilgd-b sorã leba b poorẽ, tɩ Ezipt nebã sẽnesã lebg lika, n gɩdg a Faraõ ne a sodaasã tɩ b pa tõe n kolg Israyɛll nebã ye. La baa sẽn da yaa yʋngã, Israyɛll nebã ra tara vẽenem. (Karm-y Yikr 14:19, 20.) Dẽ poore, a Zeova kɩtame tɩ sob-kãseng yi yaang n pãrg koomã, “la mogrã pʋgẽ lebga koɛɛnga.” Yaa vẽeneg tɩ rẽ maaneg rɩka sẽka, bala kibarã pʋgẽ, b yeelame tɩ sobgã fuga “yʋngã tɛka,” la tɩ rẽ zugẽ, “Israyɛll nebã kẽna tẽn-koɛɛng zug mogrã pʋga.” A Faraõ ne a sodaasã sẽn da zao saar-dãmbã yĩnga, Israyɛll nebã kẽnd tʋʋlem da pa ta-b ye. La ne rẽ fãa, a Zeova sẽn da zabd n sõngd-bã yĩnga, Ezipt nebã ra pa tõe n paam-b ye. A “kɩtame tɩ rãmbg zĩnd Ezipt rãmbã sʋka. Bãmb kɩtame tɩ Ezipt rãmbã saar-dãmbã nao sud hal tɩ b kẽnd lebg toogo.”—Yik. 14:21-25.

¹² Israyɛll nebã fãa sẽn dʋʋg mogrã n sa wã, a Zeova yeela a Moiiz woto: “Bɩ f tẽeg f nug mogrã zug tɩ koomã leb n lim Ezipt rãmbã ne b saar-dãmbã la b wed-rʋʋdbã.” Sodaasã sẽn yã koomã sẽn wat n lebg tɩ b na n zoeyã, a Zeova ‘lub-b-la mogrã pʋgẽ.’ B ra pa tõe n põs ye. Sɩd me, “bãmb ned baa a yembr ka põs ye.” (Yik. 14:26-28) Woto, a Zeova wilgame t’a tõe n fãaga a nin-buiidã yell buud fãa pʋgẽ.

B PAAMA FÃAGR ZERIZALƐM SÃOONGÃ SASA

13. Sagl-bʋs la a Zezi kõ-yã, la tõe tɩ bõe la a karen-biisã ra sokd b mense?

¹³ A Zeova mii yɛlã sẽn na n pʋg taab to-to t’a raabã pidsã kɛpɩ. Makr a tãab-n-soabã yell d sẽn na n gomã sɩd wilgda rẽ. Yaa Rom sodaasã sẽn da wa n na n zab ne Zerizalɛm pipi kiris-nebã wakatã. Nand tɩ b wa sãam Zerizalɛm yʋʋmd 70 soab a Zezi rogmã poorã, a Zeova ra kɩtame t’a Bi-riblã kõ Zerizalɛm ne Zide kiris-nebã sagls toor-toor sẽn na yɩl tɩ b wa paam n põse. A Zezi yeel-b-la woto: “Yãmb sã n yã sãoong bõn-wẽngã sẽn yas zĩ-sõngã pʋgẽ Wẽnnaam no-rɛɛs a Daniɛll sẽn da gom a yellã, . . . wakat kãnga, neb nins sẽn be Zide wã, bɩ b zoe n kẽng tãens zutu.” (Mat. 24:15, 16) La wãn to la a Zezi karen-biisã ra na n maan n bãng wakat ning bãngr-gom-kãngã sẽn na n pidsã?

14. Yel-bʋs n zĩnd n kɩt t’a Zezi saglsã lebg vẽenese?

¹⁴ Yʋʋm wʋsg loogr poore, a Zezi sẽn da togs goam ninsã võor wa n lebga vẽenega. Yʋʋmd 66 soabã pʋgẽ, Rom sodaasã ne b taoor soab a Sɛstius Galus waa Zerizalɛm n na n zab ne zʋɩf-rãmb sull sẽn tõdg Rom sakre. Tõtbã b sẽn da boond tɩ Zelot-rãmbã zoe n tɩ solg wẽnd-doogã pʋgẽ, tɩ Rom sodaasã sɩng wẽnd-doogã lalg sãoongo. Rom sodaasã sẽn yaa wẽn-zɩtbã sẽn be Zerizalɛm wẽnd-doogã lalg sɛɛg ne b darpo-rãmbã sẽn tar bõn-naands imaaz-rãmb b zutã, kiris-neb nins sẽn da yaa gũusdbã bãngame tɩ rẽ la “bõn-wẽngã” sẽn yas “zĩ-sõng pʋgẽ” wã. Yaa wakat kãng la a Zezi karen-biisã ra tog n “zoe n kẽng tãens zutu.” La sodaasã sẽn da gũbg tẽngã, b ra na n maana wãn n zoe? Bũmb n da na n maan n ling nebã.

15, 16. a) Sagl-bʋg la a Zezi kõ vẽenega, la bõe yĩng tɩ ra yaa tɩlae ne a karen-biisã tɩ b sak-a tao-tao? b) Tõnd fãagrã na n tũu ne bõe?

¹⁵ A Sɛstius Galus ne a sodaasã wa n basa Zerizalɛm n lebg n loog tɩ nebã pa wʋm a võor ye. Zelot-rãmbã yi n pʋgl-b lame. Rom sodaasã sẽn loog tɩ tõtbã me yi n pʋgl-bã, a Zezi karen-biisã paama weer n na n zoe n yi tẽngã. A Zezi ra sagl-b-la vẽeneg tɩ b zoe n loog tao-tao n da bao n na n wʋk b teed ye. (Karm-y Matɩe 24:17, 18.) Rẽ yĩnga ra yaa tɩlae ne-b tɩ b sɩd loog tao-tao bɩ? Pa yã n kaoos la b bãng sok-kãngã leoor ye. Rasem a wãn poore, Zelot-rãmbã lebg n waame n sɩng Zerizalɛm ne Zide nin-buiidã modgre, n dat tɩ b naag-b n zab ne Rom. Zʋɩf-rãmbã sul toor-toor n kaoog zabr ne taaba, hal tɩ tẽngã pʋg zĩndg lebg toogo. Zerizalɛm yiib wa n lebgda toog n paasdẽ. Rom sodaasã sẽn lebg n wa yʋʋmd 70 soabã pʋgẽ wã, ned ra pa le tõe n zoe n yi tẽngã ye. (Luk 19:43) Neb nins sẽn pa tẽngã pʋgẽ wã pa põs ye! La kiris-neb nins sẽn sak a Zezi saglsã n zoe n kẽng tãensã zutã paam n põsame. B bãnga vẽeneg t’a Zeova sɩd mii a nin-buiidã fãagre. Yam-bʋg la d tõe n dɩk kiba-kãngã pʋgẽ?

¹⁶ To-kãsengã sasa, na n yɩɩ tɩlae ne kiris-nebã tɩ b sak Wẽnnaam Gomdã la a siglgã saglse. Wala makre, a Zezi ra sagla a karen-biisã tɩ b “zoe n kẽng tãens zutu.” To-kãsengã sasa, b na n sagla tõnd me tɩ d zoe n põse. Yaa sɩd tɩ d nan pa mi tõnd zoeesã sẽn na n yɩ to-to wã ye.b La d tõe n kɩsa sɩd tɩ sagls nins a Zeova sẽn na n kõ-dã tũub wakat sã n ta, a na n kɩtame tɩ d wʋm b võore. D fãagrã sẽn na n tũ ne d sakrã yĩnga, yɩta sõma tɩ d sok d meng woto: ‘Wãn to la mam tũud sagls nins a Zeova sẽn kõt a nin-buiidã? Rẽ yĩnga m sakd-b-la nana-nana bɩ, bɩ m maasa ne b sakre?’—Zak 3:17.

D PAAMA PƐLG KENGRE, N GŨUD SẼN WATÃ

17. Bõe la a Habakuk bãngr-gomdã wilgd tõnd a Goog sẽn na n wa zab ne Wẽnnaam nin-buiidã wɛɛngẽ?

¹⁷ Bɩ d tẽeg a Goog zabrã yell d sẽn gom sõsgã sɩngrẽ wã. Wa a Ezekɩɛlle, no-rɛɛs a Habakuk me goma wakat kãng yell n yeel woto: “Mam wʋma yãoã fãa, la m digdame. A koɛɛgã kɩtame tɩ m no-bɩmsã pãbd taaba. M kõabã pãng sɛɛme tɩ m dũmã rigda. Mam na n sĩndame n gũ daar ning toog sẽn na n paam neb nins sẽn zabd ne tõndã.” (Hab. 3:16) No-rɛɛs a Habakuk sẽn wʋm tɩ bɛɛb n wat n na n zab ne Wẽnnaam nin-buiidã, a no-bɩmsã pãba taaba, t’a kõabã pãng sɛ. A Habakuk manesem sẽn yɩ to-to wã wilgdame t’a Goog ne a poorẽ dãmbã sã n wa na n zab ne tõndo, na n wõnda pa na n yɩ nana ne-d ye. La no-rɛɛsã yeelame t’a na n sĩnd n gũ a Zeova ra-kãsengã, n bas a yam t’a Zeova na n fãaga a nin-buiidã. Tõnd me tõe n dɩka a togs-n-taare.—Hab. 3:18, 19.

18. a) Bõe yĩng tɩ d pa segd n zoe rabeem, d bɛɛbã sã n wa na n zabd ne-do? b) Bõe yell la sõsg ning sẽn pʋgdã na n gome?

¹⁸ Makr a tãab nins yell d sẽn gomã wilgdame t’a Zeova sɩd mi a nin-buiidã fãagre. A raabã pa tõe n pa pids ye. Yaa vẽeneg t’a na n tõoga a bɛɛbã. La d sã n dat n wa paam n naag n kɩdem sũ-noog wakat ning a Zeova sẽn na n tõog a bɛɛbã ne tõogr sẽn yaa kãsengã, d segd n kell n sak-a lame n tãag saabã. Wãn to la a Zeova sõngd tõnd rũndã-rũndã sẽn na yɩl tɩ d kell n sak-a? Sõsg ning sẽn pʋgdã na n goma rẽ yelle.

[Tẽngr not rãmbã]