Siglgã taoor lʋɩtb Sull paama nin-paalle

Yʋʋmd 2012 bõn-bɩʋʋng kiuugã rasem a 5 wã daar yibeoogo, b togsa Etazĩni la Kanada Betɛl-dãmbẽ wã tɩ Siglgã taoor lʋɩtb Sull paama nin-paalle. A yʋʋr la a Mark Sanderson. Yɩɩ yʋʋmd 2012 bõn-bɩʋʋng kiuugã pipi daarã la a sɩng a tʋʋmdã.

Saam-biig a Sanderson roagdbã sẽn yaa kiris-nebã wub-a-la Sãn Diego sẽn be Kaliforni, Etazĩni soolmẽ wã. A reega lisg yʋʋmd 1975 wao-fugd kiuugã rasem a 9 wã daare. Yʋʋmd 1983 bõn-bɩʋʋng kiuugã pipi daarã tɛka, a lebga so-pakd Saskatchewan sẽn be Kanada wã. Yʋʋmd 1990 yʋʋm-sar kiuugã, a kẽnga Wẽnnaam tʋʋmdã zãmsg lekoll Etazĩni. B boonda lekol-kãng masã tɩ Biiblã zãmsg lekoll rakõapã yĩnga. Yʋʋmd 1991 tʋʋl-nif kiuugã tɛka, b yãk-a lame t’a lebg zall so-pakd Kanada ko-sʋk tẽng a ye sẽn boond tɩ Terre-Neuve. A wa n yɩɩ tigims sull yel-gɛtã lɛdgda. La yʋʋmd 1997 wao-fugd kiuugã, a lebga Kanada Betɛllã tʋm-tʋmda. Yʋʋmd 2000 sɩpaolg kiuugã, b bool-a-la Etazĩni filiyallẽ wã. Beenẽ, a reng n tʋma ne Service d’information hospitalier, la kaoosg zugẽ, a tʋma biru ning sẽn get koe-moonegã yellã pʋgẽ.

Yʋʋmd 2008 bõn-bɩʋʋng kiuugã, saam-biig a Sanderson kẽnga Betɛl-rãmbã yel-gɛtbã lekolle. La rẽ poore, a lebga Filipin Betɛllã yel-gɛt a ye. Yʋʋmd 2010 bõn-bɩʋʋng kiuugã, b le bool-a-la Etazĩni, t’a tɩ sõngd Siglgã taoor lʋɩtb Sull ning sẽn get koe-moonegã yellã.