D yaab-rãmbã bee bug-tẽng bɩ?

SẼN nan pa kaoose, Koore zʋrnall a ye pʋgẽ la sõsg zĩnd tɩ neb wʋsg gom a yelle. A gom-zugã la woto: “A Shim Cheong sẽn yɩ pʋg-sõngã bee bug-tẽnga, a sẽn pa bãng a Zezi wã yĩng bɩ?”

Bõe yĩng tɩ b sok woto? Yaa tɩ b gomda a Shim Cheong yell solemd pʋgẽ. Solemdã wilgame t’a yaa pʋg-sad sẽn sak n na n ki t’a ba wã sẽn yaa zoangã nin puki. Hal pĩnd n tãag masã, neb wʋsg pẽgda pʋg-kãngã. Sɩd me, Koore nebã getame t’a yaa mak-sõng pʋg-sadbã sẽn segd n tũ.

B sã n yeel tɩ ned a woto sẽn pa reeg lisg n lebg kiris-nedã yĩnga, a bee bug-tẽnga, wʋsg na n getame tɩ pa zemse, wall pʋd n yik b sũuri. Sɩd me, a Shim Cheong ra pa tõe n lebg kiris-ned ye. Bala, solemdã sɩng n bee yʋʋm wʋsg nand tɩ b moon Kirist koɛɛgã tẽn-kãng pʋgẽ.

Sõsgã pʋgẽ, zʋrnallã rãmb soka egiliiz taoor soab a ye woto: ‘Neb nins sẽn pa bãng a Zezi n yaool n ki wã fãa bee bug-tẽng bɩ?’ T’a leoke: “D pa mi ye. D tagsdame bal tɩ Wẽnnaam tara a sẽn na n maan nin-kãensã bũmb ninga.”

BŨMB SẼN YAA TƖLAE

Katolik-rãmbã sebr a ye yeela woto: “Ned sã n dat n paam fãagre, yaa tɩlae t’a reeg soobo. Wa Kiristã meng sẽn yeelã, ned sã n ka rog ne koom la ne Vʋʋsem, a ka tõe n kẽ Wẽnd Rĩung pʋgẽ ye (Zã 3:5).” Woto kɩtame tɩ kẽer tẽed tɩ ned sẽn pa reeg soob bɩ lisgã sã n ki, b lobd-a-la bug-tẽnga, wall a tɩ namsd zĩig a to.

La neb wʋsg pa tẽed woto baa bilf ye. Neb milyõ-rãmb n ki n pa bãng Biiblã sẽn yetã ye. Nin-kãensã fãa segd n kẽnga bug-tẽng bɩ? Bõe la Biiblã yet zĩ-kãng wɛɛngẽ?

BIIBLÃ SẼN YETE

Biiblã wilga vẽeneg tɩ Wẽnnaam pa maand a toor kae ne neb nins sẽn pa bãng a noyã n yaool n ki wã ye. Tʋʋm 17:30 (Sebr Sõngo) yeta woto: “Wẽnd basa . . . bãngr kaoolga taale.” La bõe la Biiblã yet sẽn pa paam-b n bãng Wẽnnaam raabã n yaool n ki wã zugu?

Bũmb ning a Zezi sẽn yeel bi-bɛɛg ning b sẽn ka n yɛgl-a wã tõe n sõng-d lame tɩ d paam sok-kãngã leoore. Bi-bɛɛgã yeela a Zezi woto: “Yãmb sã n wa reeg y naamã, bɩ y tẽeg mam yelle.” T’a Zezi pʋlm-a t’a na n zĩnda arzãnã pʋgẽ ne yẽnda.—Luk 23:39-43.

A Zezi pʋlma raoã t’a na n kẽnga saasẽ bɩ? Ayo. A ka paam ‘dogem-paalg’ ye. A Zezi yaool n yeelame tɩ ned sã n ka rog ne koom la Sɩɩg Sõngo, a ka tõe n kẽ Wẽnnaam soolmẽ ye. (Zã 3:3-6) Rẽnd a Zezi gomdã rat n yeelame tɩ bi-bɛɛgã na n wa vʋʋgame n vɩɩmd arzãnã pʋgẽ. A sẽn da yaa zʋɩfã, a ra miime tɩ Sɩngr sebrã wilgame tɩ Wẽnnaam ra manega tẽngã babg a ye tɩ lebg arzãna, n bool zĩ-kãng tɩ Edɛn. (Sɩngre 2:8) A Zezi sẽn pʋlem raoã bũmb ningã kɩtame t’a bãng t’a na n wa vʋʋgame n vɩɩmd tẽngã sẽn na n lebg arzãnã zugu.

Biiblã wilgame tɩ “nin-sõma la nin-wẽns na n vʋʋgame.” (Tʋʋma 24:15, Sebr Sõngo) Vɛrse kãngã pʋgẽ, ‘nin-wẽnsã’ yaa neb nins sẽn pa tũ Wẽnnaam, b sẽn pa paam n bãng a raabã yĩnga. A Zezi na n vʋʋga bi-bɛɛgã, n paas neb milyõ-rãmb sẽn pa paam n bãng Wẽnnaam daabã, tɩ b vɩɩmd tẽngã sẽn na n lebg arzãnã zugu. Tõe tɩ b sõorã na n yɩɩ milyaar-dãmb menga. B na n zãms-b-la Wẽnnaam noyã, la b kõ-b weer tɩ b sak no-kãens n wilg tɩ b nonga Wẽnnaam.

NIN-WẼNSÃ VƲƲGR POORE

Wẽnnaam sã n vʋʋg nin-wẽnsã, a na n tika bũmb nins b sẽn maan nand tɩ b ki wã n kao b bʋʋd bɩ? Ayo. Rom dãmb 6:7 yeelame: “Ned sã n ki, yel-wẽnã ka le tar pãng ne-a ye.” Rẽnd ned sã n ki, a yao a yel-wẽnã. Wẽnnaam pa na n tik nin-wẽnsã sẽn maan nand tɩ b ki wã n kao b bʋʋd ye. Yaa bũmb nins b sẽn na n maan b vʋʋgrã poorã. Wãn to?

Biiblã wilgame tɩ nin-wẽnsã vʋʋgr poore, b na n laka sɛba. Seb-kãens na n wilga noy Wẽnnaam sẽn dat tɩ d tũ. B na n zãmsa sẽn vʋʋg-bã no-kãense, tɩ rẽ poor bɩ b kao b bʋʋd tɩ “zems bãmb tʋʋma.” (Wilgri 20:12, 13) Ne nin-kãensã wʋsgo, na n yɩɩ pipi b sẽn paam n na n zãms Wẽnnaam daabã la b tũ, n paam n vɩɩmd wakat sẽn kõn sa tẽngã zugu.

Neb wʋsg ra pa le tẽed Wẽnnaam, la b sẽn bãng Biiblã sẽn yetã, b lebs n paama tẽebo. Wala makre, a Yeong Sug. A ra yaa katolik. B zakã neb kẽer yaa labe-rãmbã, tɩ yẽ mengã ra karemd n dat n lebg masɛɛre. La bũmb nins a sẽn yã karengã zĩigẽ wã sãama a sũuri, t’a bas karengã. Wẽnd-doogã taoor dãmb sẽn yet tɩ neb n be bug-tẽng n namsdẽ wã me ra sãamda a sũuri. A ra tagsdame tɩ Wẽnnaam sẽn yaa nonglem la tɩrlem soabã pa na n sak n maan woto ye.

Daar a ye, a Zeova Kaset soab n karem Koɛɛg Soab 9:5 n wilg-a. Be, b yetame: “Nin-vɩɩs miime tɩ b na n kiime. La kũum ka mi bũmb ye, la bãmb ka le paamd tʋʋmd yaood ye.” A Zeova Kaset soabã sõng-a lame t’a bãng t’a yaab-rãmbã pa be bug-tẽng n namsdẽ ye. B sẽn ki wã, b pa mi baa fʋɩ ye. Na n kell n yɩɩ woto n tãag Wẽnnaam sẽn na n wa vʋʋg-bã.

A Yeong Sug miime tɩ neb wʋsg n zɩ n wʋm Biiblã sẽn yetã ye. Rẽ n so tɩ goam nins sẽn be Matɩe 24:14 pʋgẽ wã tar yõod wʋsg ne-a. Be, a Zezi yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” Rũndã-rũndã, a moonda koe-noogã, n wilgd a taabã Biiblã sẽn yetã.

“WẼNNAAM KA TŨUSD NEB YE”

Biiblã yeela woto: “Wẽnnaam ka tũusd neb ye. La buud fãa sʋka, ned ning sẽn zoet bãmba la sẽn maand tɩrga, yẽ soab tata bãmb yam.” (Tʋʋma 10:34, 35) Rẽ pa ling tõnd ye. Bala, Wẽnnaam “nonga tɩrlem la bʋʋd sẽn yaa tɩrga.”—Yɩɩl Sõamyã 33:5.