Yãmb zoe n lemba bur ning sẽn kõt vɩɩmã bɩ?

SÃAMB n da kẽng n na n tɩ kaag Betlehɛm tɩ kom wa tar-ba. Woto wã, b tʋlga ne b sũy fãa n na n dɩ tẽngã rɩɩbo. B nin-yend yãa rɩɩb zĩig b sẽn koosd bur ne zẽedo. Zẽedã rʋga ne tomato, gɛba la zẽ-biis a taab hal tɩ yũugã noome. B sẽn dɩ wã, b paama keelem, n le yik n sɩng tẽngã kaagre.

Sãambã pa bãng tɩ burã b sẽn wãbã yaa rɩɩb tẽngã neb sẽn da sɩng n dɩt hal pĩnd wẽndẽ ye. Sɩd me, Betlehɛm dat n yeelame tɩ “bur” bɩ “rɩɩb roogo.” Yʋʋm tusa la woto b sẽn wẽed bur Betlehɛm soolmẽ wã. (Rut 1:22; 2:14) Rũndã-rũndã, Betlehɛm nebã wʋsg rɩɩb yaa bur-kãnga.

Na maan yʋʋm tus a naas sẽn deng rẽ, a Abrahaam pag a Saara wẽe “maas” bɩ bur Betlehɛm soolmẽ wã, n deeg sãamb a tãab sẽn sig-b ne lingri. (Sɩngre 18:6) Tõe tɩ “zom” ning a Saara sẽn tall n maan burã yaa orz wall ble zom. A ra segd n maana burã tao-tao, la tõe t’a maan-a-la kug-tʋʋls zugu.—1 Rĩm dãmba 19:6.

A Abrahaam zakã rãmb ra maanda b burã wa b sẽn bilg kibarã pʋgẽ wã. B sẽn da wae n toeemd tẽnsã, a Saara ne a yemb-pogsã ra pa tar wʋng n maand burã wa sẽn da yaa to-to Uur sẽn yaa a Saara ba-yirã ye. Yɩl n maan burã, a Saara ra werda kood kẽer biis tɩ lebg zom-bãanega. Wõnda tʋʋm-kãngã ra yaa toogo. Bala, b sã n da na n toeem tẽnga, rẽnda a zã toore, wall neere.

Yʋʋm kobs-naas poore, a Moiiz tõogã pʋgẽ, b yeelame tɩ ned sã n dɩk a neer bɩ a ne-biig n na n gãneg ne a to n deeg bũmb bɩ a ra sak ye. Bala, ra yaa wa a soabã sẽn dɩk “a vɩɩm” bɩ a yõorã n gũnugi. (Tõodo 24:6) Woto wilgdame tɩ Wẽnnaam nifẽ, neer da tara yõod wʋsg ne zak rãmba, bala, rẽ la b tar n maand b daar buud fãa rɩɩbo.—Ges-y zĩ-gũbr ning gom-zug sẽn yaa: “Pĩnd wẽndẽ dãmbã sẽn da werd zom la b wẽed burã to-to.”

BUR NING B SẼN WÃB RASEMPƲƖƖGẼ WÃ

Biiblã pʋgẽ, yaa hal naoor kobs la b gom bur yelle. Sẽn paase, Biiblã gʋlsdb sã n mi n gomd bur yelle, yaa rɩɩb yell la b gomda. Wala makre, a Zezi yeelame tɩ neb nins sẽn teeg Wẽnnaam zãng-zãngã tõe n pʋʋs-a lame n kos woto: “Bɩ y kõ tõnd dɩɩb rũndã wa yãmb sẽn mi n kõt tõnd daar fãa wã.” (Matɩe 6:11) A Zezi gomdã wilgdame tɩ daar fãa, d tõe n kosa Wẽnnaam t’a ges tɩ d paam d noorã rɩɩbo.—Yɩɩl Sõamyã 37:25.

La bũmb n be t’a yõodã yɩɩd bur bɩ rɩɩbo. A Zezi yeela woto: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Matɩe 4:4) A Zezi gomdã tẽega a kɛlgdbã wakat ning Israyɛll nebã sẽn da segd n teeg Wẽnnaam zãng-zãng n paam n vɩɩmdã. Yɩɩ b sẽn yi Eziptã poor bilfu. B sẽn ta Sinayi rasempʋɩɩgẽ wã tɩ kiuugu, b rɩɩbã sɩnga saabo. Nin-buiidã yɛɛsame tɩ b na n kii kom. Woto, b sũur sãamame tɩ b yẽgem n yeele: ‘[Ezipte,] tõnd da rɩta rɩɩb n tɩgda.’—Yikri 16:1-3.

Bur ning b sẽn da paamd Eziptã sɩd ra noomame. Bala, a Moiiz wakatẽ wã, bur-wẽedb sẽn da mi b tʋʋmd sõma n da wẽed bur ne gato buud toor-toor tɩ Ezipt nebã wãbdẽ. La a Zeova ra pa rat t’a nin-buiidã kong rɩɩb ye. A yeel-b-la woto: “Gese, mam na n kɩtame tɩ rɩɩb yi yĩngr n ni wa saag yãmb yĩnga.” Vẽkembeoog yibeoog pĩnda, b yãa bũmb sẽn gãneg tẽngã zug wa meenem, n yaa “faasg wa ka-pɛɛlga.” Israyɛll nebã sẽn yã rẽ, b sokame yaa: “Yaa bõe la woto?” T’a Moiiz yeel-b tɩ yaa rɩɩb bɩ bur a Zeova sẽn kõt-b tɩ b rɩ. B boola bur-kãng tɩ manne,a la b rɩ-a-la yʋʋm 40.—Yikri 16:4, 13-15, 31.

Israyɛll nebã sẽn wa n yã mannã Wẽnnaam sẽn kõ-b ne yel-solemdã, sɩngrẽ wã, b sũur yɩɩ noog wʋsgo. A ra ‘nooma wa bur sẽn maan ne sɩɩdo.’ Nin-buiidã fãa ra paamd-a lame tɩ sekd-ba. (Yikri 16:18) La tarẽ-n-tarẽ, b wa n sɩnga yẽgengo, n dat rɩbd nins b sẽn da paamd Eziptã. B yeela woto: “Tõnd ka tar dɩɩb ye, sã n ka mann-kãngã bala.” (Sõdbo 11:6) B pʋd n wa yika b sũy n yeele: “Tõnd yam yii ne rɩ-yoodã.” (Sõdbo 21:5) Rẽnd nin-buiidã wa n pa le nong mannã sẽn yaa “rɩɩb sẽn yi saasẽ” wã ye.—Yɩɩl Sõamyã 105:40.

BUR NING SẼN KÕT VƖƖMÃ

Ned sã n pa gũusi, a tõe n wa sãbsa bur wall bũmb a taab nana-nana. La Biiblã goma bur buud a to yelle, n wilg tɩ d pa segd n sãbs-a ye. Bur-kãng a Zezi sẽn mak ne mannã Israyɛll nebã sẽn sãbsã tõe n kɩtame tɩ ned paam bark sẽn ka saabo.

Sɩd me, a Zezi yeela a kɛlgdbã woto: “Mam yaa bur sẽn kõt vɩɩm. Yãmb ba-rãmbã ra rɩɩ mann weoogã pʋgẽ, la b kiime. Bur sẽn yit arzãnã yaa woto, ned ning sẽn dɩt-a kõn ki ye. Mam yaa bur sẽn vɩ sẽn yi arzãna. Ned sã n dɩ bur-kãnga, a na n vɩɩ wakat sẽn ka sɛta. La bur ninga mam sẽn na n kõ wã yaa mam mengã mam sẽn na n kõ tɩ yɩ dũniyã vɩɩmã.”—Zã 6:48-51.

A Zezi sẽn yeel tɩ yẽ yaa “burã,” a kɛlgdbã wʋsg pa wʋm a gomdã võor ye. La a sẽn yeelã zemsame. Bala, burã zʋɩf-rãmbã sẽn wãbdã ne mannã Israyɛll nebã sẽn dɩ rasempʋɩɩgẽ wã yʋʋm 40 tõrã sõng-b lame tɩ b vɩɩmde. Baa mannã sẽn da yaa Wẽnnaam kũunã, a pa kɩt tɩ ned paam vɩɩm sẽn pa sat ye. La a Zezi maoongã kɩtdame tɩ ned ning fãa sẽn tẽed-a tõe n wa paam vɩɩm sẽn pa sate. Rẽnd a Zezi sɩd yaa “bur sẽn kõt vɩɩm.”

Tõe tɩ kom sã n wa tar-yã, y rata buri. Sẽn paase, y pʋʋsda Wẽnnaam bark a sẽn kõt-y ‘rɩɩb daar fãa wã.’ (Matɩe 6:11) Yaa sɩd tɩ d nonga rɩ-noogo, la d pa segd n yĩm tɩ “bur sẽn kõt vɩɩmã” sẽn yaa Zezi Kiristã yõod ka to ye.

D sẽn paam bur-kãngã sẽn ka mak-n-taagã, wãn-wãn la d tõe n wilg tɩ d pa rat n yɩ sõm-zɩtb wa Israyɛll neb nins sẽn zĩnd a Moiiz wakatã? A Zezi yeela woto: “Yãmb sã n nong maam, bɩ y sak mam tõodo.” (Zã 14:15) D sã n sak a Zezi tõodã, d na n wa paam n vɩɩmda wakat sẽn kõn sa.—Tõodo 12:7.

[Tẽngr note]

[Zĩ-gũbri, seb-neng 29]

Pĩnd wẽndẽ dãmbã sẽn da werd zom la b wẽed burã to-to

B sẽn da werd zomã to-to. Pagbã pipi tʋʋmd yibeoog fãa ra yaa zom werbo, la b ra werda neerẽ. (Yelbũna 31:15; Matɩe 24:41) Pĩnd wẽndẽ, bõn-buud ning nebã sẽn da wae n kood yaa ble, t’a fʋkr da yaa toogo. B ra fʋkd-a-la toorẽ wall neerẽ. B ra zãgsd-a-la koom n pãbe, tɩ rẽ poor tɩ b yadg-a wĩntoogẽ. B wat n tũusa bɛɛlã n yaool n were.

Yɩl n wer zom tɩ sek zak tõr dɩɩb ra tõe n kaoosa lɛɛr-dãmba. Woto kɩtame tɩ nebã ra wae n wʋmd pagb sẽn ‘koosd ney’ tẽnsã pʋsẽ. (Zeremi 25:10) Kaoosg zugẽ, b maana ney sẽn yaa pĩig kug b sẽn sog ne rũms tɩ b werd zomã.—Matɩe 18:6.

B sẽn da wẽed burã to-to. B sã n da wer zomã n sa, lebga burã wẽebo. Pagbã sã n da na n wẽ burã, b zãgsda zomã koom n nage. (Sɩngre 18:6) Zags kẽer da tara wʋms n maand burã tɩ sãnda maand b rẽnd kug-tʋʋls zugu. (Maankʋʋre 2:4; Ezai 44:15) Nin-kãsems kẽer wa a Faraõ rãmb da tara b toorẽ bur-wẽedba. La kaoosg zugẽ, bur-wẽedbã ra bee zĩig zãnga, tɩ baa talsã tõe n da buri. (Sɩngre 40:17; 1 Sãmwɛll 8:13; Ezai 55:2) A Zeremi wakatẽ wã, Zerizalɛm da tara sor b sẽn boond tɩ ‘bur-wẽedbã sore.’ A Nehemi me wakatẽ wã, Zerizalɛm gasg a ye me la b ra boond tɩ “gasg ning sẽn be wʋmsã sʋkã.”—Zeremi 37:21, Sebr Sõngo; Nehemi 12:38.