A Pɩɛɛr tɩ gesa a Korney

RAO ning sẽn tees a nugã yaa a Pɩɛɛre, tɩ sẽn yas-⁠b a poorẽ wã yaa a zo-​rãmba. Yãmb mii ned ning sẽn yĩg a Pɩɛɛr taoorã bɩ? A sẽn maanã segdame sɩda? La bõe yĩng meng t’a maand woto?

Sẽn yĩg-⁠a wã yʋʋr la a Korney. Yaa Rom sodaas naaba. A Korney ra pa mi a Pɩɛɛr ye. La koɛɛg n yeel-⁠a t’a bool a Pɩɛɛr t’a wa a zakẽ wã. Bõe yĩnga?

A Zezi pipi karen-​biisã fãa ra yaa Zʋɩf rãmba. A Korney yẽ ra pa Zʋɩf ye. La a ra nonga Wẽnnaam, n pʋʋsd-⁠a wakat fãa, la a maand nebã neere. Daar a yembr zaabre, malɛk n puk a taoor n yeel-⁠a yaa: ‘Fo taa Wẽnnaam yam, la a reega f pʋʋsgã. Tʋm neb Zope tɩ b tɩ bool a Pɩɛɛr t’a wa. Yẽ siga a Sɩmo yirã sẽn be ko-​kãsengã noorã.’

Tao-​tao bala, a Korney tʋma neb tɩ b tɩ bool a Pɩɛɛre. Vẽkembeoogã, rap nins a Korney sẽn tʋmã sẽn wa n kolgd Zope wã t’a Pɩɛɛr da bee a Sɩmo roogã zugu. Wẽnnaam maana yel-​solemd t’a Pɩɛɛr yã fu-​goabg sẽn yit saasẽ n sigda. Rũms buud toor-​toor n da be fuugã pʋgẽ. Yaa rũms Wẽnnaam noyã sẽn da gɩdg tɩ b ra wãbe, tɩ bala b yaa rẽgdo. La koɛɛg n yeel a Pɩɛɛr yaa: ‘Yik n kʋ n dɩ.’

La a Pɩɛɛr yeelame yaa: ‘Ayo, mam zɩ n dɩ bõn-​dẽgd ye.’ La koɛɛgã yeela a Pɩɛɛr yaa: ‘Da le bool bũmb ning Wẽnnaam sẽn yeel tɩ yaa sõma wã tɩ rẽgd ye.’ Bõn-​kãngã maana woto naoor a tãabo. A Pɩɛɛr sẽn nan bʋgsd n dat n bãng bũmb ning a sẽn yã wã võorã, la rap nins a Korney sẽn tʋmã sẽn ta zakẽ wã n sok a yelle.

A Pɩɛɛr sigame n yeel-⁠b yaa: ‘Yaa maam la yãmb sẽn baoodã. Bõe yĩng tɩ yãmb baood maam?’ Rapã sẽn togs tɩ malɛk n yeel a Korney t’a bool a Pɩɛɛr t’a wa a zakẽ wã, a Pɩɛɛr sakame. Vẽkembeoogã, a Pɩɛɛr ne a zo-​rãmbã yikame n tũ rapã n kẽng a Korney nengẽ Sezaare.

A Korney ra tigma a zakã neb ne a zo-​rãmba. A Pɩɛɛr sẽn wa n ta wã, a Korney seg-⁠a lame n wõgemd a taoore. Yãmb pa ne rẽnda fotã zug sɩda? La a Pɩɛɛr yeelame yaa: ‘Yik tɩ ma-⁠me yaa ninsaal wa foo.’ Biiblã wilgame tɩ d pa segd n wõgemd n waoog ned wa Wẽnd ye. Yaa a Zeova bal n segd ne waoog-​kãng buudu.

A Pɩɛɛr sɩngame masã n na n togs neb nins sẽn da tigmã koe-​noogã. A yeela woto: ‘Mam bãngame tɩ Wẽnnaam nonga neb nins fãa sẽn dat n tũ yẽ wã.’ A Pɩɛɛr sẽn wa n gomdã, Wẽnnaam kɩtame t’a vʋʋsem sõngã sig nebã zut tɩ b sɩng masã n gomd goam toɛy-​toɛya. Woto linga Zʋɩf nins sẽn da tũ a Pɩɛɛr n wa wã, bala b ra tẽedame tɩ yaa Zʋɩf rãmbã bal la Wẽnnaam nonga. B bãngame masã tɩ Wẽnnaam pa yãk buud a ye neb n yet tɩ bãmb n yaa sõma bɩ bãmb n yɩɩd buud a taabã neb ye. Tõnd fãa me segd n maana wa Wẽnnaam.