D Naandã sẽn nong-dã geta d yelle

1. D NAANDÃ KƖTDAME TƖ WĨNDGÃ PUKDẼ

Wĩndgã sã n da pa pukdẽ, bũmb kõn tõog n vɩɩmd dũniyã zug ye. Wĩndgã vẽenemã kɩtdame tɩ tɩɩsã paamd vãado, puudu, la biisi. Kɩtdame me tɩ tɩɩsã yẽgã tõe n fõog koom hal tɩ ta vãadã, tɩ wa lebg walem n kul yĩngri.

2. D NAANDÃ KƖTDAME TƖ SAAGÃ NIIDA

Saagã yaa Wẽnnaam kũun sẽn yaa kãsenga. Kɩtdame tɩ d paamd rɩɩbo. Wẽnnaam kɩtdame tɩ d paamd saag sẽn yit saasẽ la bõn-bɩʋʋng wakate, tɩ rɩɩb sekd tõnd la b pidsd d sũyã ne sũ-noogo.

3. D NAANDÃ KÕT-D-LA RƖƖB LA FUTU

Roagdb wʋsg maanda yɩɩr ne b sẽn na n maan to-to n paam rɩɩb la fut n kõ-b zagsã rãmba. Ges-y Biiblã sẽn yete: “Maag-y y yĩng n ges bõn-yɩgdɩ wã sẽn yɩgd yĩngrã. Bãmb pa bʋte, b pa kẽebde, la b pa tigsd bao pʋsẽ me ye. La yãmb Ba sẽn be saasẽ wã rɩlgd-b lame. Yãmb yõod pa yɩɩd bõn-yɩgdɩ wã sɩda?”—Matiye 6:25, 26.

‘Ges-y rulg-lɛlmã sẽn be weoogẽ wã sẽn bɩt to-to wã, n dɩk yam. La mam yeta yãmb tɩ baa [Rĩm] a Salomo ne a ziirã fãa, a pa tõog n maneg a meng wa rulg-lelem-kãensã a yembr ye. Wẽnnaam sã n nagsd mood sẽn be weoogẽ rũndã, b kõn sõng yãmb n yɩɩg tɩ y paam fut sɩda?’—Matiye 6:28-30.

Wẽnnaam sã n tõe n kõo tõnd rɩɩb la futu, rẽnd sãmbg kae t’a tõe n sõng-d lame tɩ d paam bũmb a taab sẽn yaa tɩlɛ d vɩɩmã pʋgẽ. D sã n bao n maan Wẽnnaam daabã, a na n ninga d modgrã bark tɩ d sã n ko bɩ d paam dɩɩbo, wall a sõng-d tɩ d paam tʋʋmde, n tõog n da sẽn yaa tɩlɛ ne-dã.—Matiye 6:32, 33.

D sã n ges wĩndgã, saagã, bõn-yɩgdɩ wã, la fɩlɛɛr-dãmbã, yaa bʋʋm sẽn sek d na nong Wẽnnaam. Sõsg ning sẽn pʋgdã pʋgẽ, d na n yãa d Naandã sẽn maan to-to n taas ãdem-biisã a goamã.