Wẽnnaam no-rɛɛsdbã sõnga tõnd tɩ d bãng Wẽnnaam sõma
Pĩndã, Wẽnnaam tũnuga ne a no-rɛɛsdbã n taas ninsaalbã a koeese. Wẽnnaam sẽn togs-b goam ninsã tõe n sõnga tõnd tɩ d bãng d sẽn tõe n maan to-to n paam Wẽnnaam barka. D gom no-rɛɛsdb a tãab yelle, n ges d sẽn tõe n bãng bũmb ning b nengẽ.
A ABRAHAAM
Wẽnnaam ratame tɩ nebã fãa paam a barkã, a pa tũusd neb ye.
Wẽnnaam ra pʋlma no-rɛɛs a Abrahaam t’a “zug maasem yĩnga, dũniyã nebã buud fãa na n paama barka.”—Sɩngre 12:3.
Wilgda tõnd bõe? Wilgdame tɩ Wẽnnaam nonga tõnd hal wʋsgo, n dat tɩ neb nins fãa sẽn sakd-a wã, rat n yeel tɩ rapã, pagbã, la kambã paam a barkã.
A MOYIIZ
Wẽnnaam yaa nimbãan-zoɛta, n ningd neb nins sẽn modgd n na n bãng-a wã barka.
Wẽnnaam Sẽn-tõe-a-fãa wã kõo no-rɛɛs a Moyiiz tõog t’a maan yel-soalma. Baa ne rẽ, a Moyiiz pʋʋsa Wẽnnaam n yeel yaa: “Mam kotame tɩ y kɩt tɩ mam bãng yãmb soayã, dẽ, mam na bãng yãmba, n kell n paam bark yãmb nifẽ.” (Yikri 33:13) Wẽnnaam sũur yɩɩ noog ne a Moyiiz kosgã, t’a kõ-a yam wʋsgo, la a sõng-a t’a sɩd bãng a zʋg-sõma wã, la a bãng a soayã sõma. Wala makre, a Moyiiz bãngame tɩ Naandã yaa Wẽnnaam sẽn yaa “nimbãan-zoɛta, la bark kõata.”—Yikri 34:6, 7.
Wilgda tõnd bõe? Wilgdame tɩ Wẽnnaam ratame tɩ tõnd fãa, rat n yeel tɩ rapã, pagbã, la kambã paam a barkã, d sã n modg n bao n bãng-a sõma. Wẽnnaam wilga a sebrã pʋgẽ d sẽn tõe n maan to-to n tũ-a, la a wilg me t’a nong-d lame, n dat tɩ d paam a barkã.
A ZEEZI
A Zeezi zoee nebã nimbãanega, n maag bãas buud toor-toore
D sã n bao n bãng a Zeezi sõma, a sẽn maane, la a sẽn zãms nebã bũmb ninsã, d na n paama bark wakat fãa yĩnga.
Wẽnnaam Gomdã togsda bũmb wʋsg a Zeezi vɩɩmã zugu, la bũmb wʋsg a sẽn zãms nebã. Wẽnnaam kõo a Zeezi tõog t’a maan yel-soalem wʋsgo, wala makre, a sãooga zoense, wʋmse, la põyã. A pʋd n vʋʋga neb sẽn da ki menga. A Zeezi sẽn maan woto wã wilgda Wẽnnaam sẽn na n ning ãdem-biisã bark to-to beoog-daarã. A wilga ned kam fãa sẽn tõe n maan n wa paam bark-kãensã. A yeelame: “Sẽn na yɩl n paam vɩɩm sẽn ka sɛtã, b segd n bãnga yãmb y ye bal sẽn yaa Wẽnnaam sɩd-sɩdã, la a Zeezi Kirist yãmb sẽn tʋm a soabã.”—Zã 17:3.
A Zeezi ra yaa nimbãan-zoɛta, sũ-maasem soaba, la maan-neer soaba. Pagb la rapa, n paas kãsemb la kamb ra wata a nengẽ, n na n sak n tũ-a wa a sẽn yeelã. A yeelame: ‘Tũ-y mam naoã tɩ y na n paama yolsgo. Bala mam yaa sũ-maasem soab la sik-m-meng soaba.’ (Matiye 11:29) A ra nanda pagbã, n maand b neer la a waoogd-ba, tɩ rẽ kɩt t’a ra yaa toor ne a wakatẽ neb nins sẽn da namsd pagbã.
Wilgda tõnd bõe? A Zeezi ra nonga nebã hal wʋsgo. Sẽn paase, a kõo tõnd mak-sõngo, sẽn wilgd tõnd sẽn segd n tall manesem ning ne d taabã.
A ZEEZI PA WẼNNAAM YE
Wẽnnaam sebrã wilgdame tɩ “sɩd-sɩda, Wẽnnaam-yɛng n be,” la t’a Zeezi Kirist yɩɩ Wẽnnaam tʋm-tʋmd sẽn yaa sik-m-meng soaba. (1 Korẽnt rãmbã 8:6) A Zeezi togsa vẽeneg tɩ Wẽnnaam yaa kãseng n yɩɩd yẽ, la tɩ Wẽnnaam n tʋm yẽ tẽngã zugu.—Zã 11:41, 42; 14:28.a