Karemdbã sogsgo

A Poll sẽn yeel bũmb ning 1 Korẽnt rãmb 15:29 wã rat n yeelame tɩ pipi kiris-neb kẽer ra reegda lisg kũ-rãmb yĩng bɩ?

Ayo. Biiblã la kʋdemdã sɛb zɩ n wilg tɩ b ra maanda woto ye.

Biibl kẽer pʋgẽ, b sẽn lebg vɛrse-kãngã to-to wã kɩtame tɩ neb kẽer tagsdẽ t’a Poll wakatẽ wã, b ra lisda neb kũ-rãmb yĩnga. Wala makre, Wẽnnaam Sebr ning b sẽn yiis yʋʋmd 2014 pʋgẽ, b yetame: “Sã n ka yɩ a woto, neb nins sẽn deegd kiidbã zĩig tɩ b lisd-bã na n maana a wãna?”

La ges-y Biibl-mitb a yiib sẽn yeele. A Gregory Lockwood yeelame tɩ bũmb pa be Biiblã wall kʋdemdã sɛb pʋsẽ, n wilgdẽ tɩ ned reegã lisg kũum yĩng ye. A Gordon Fee me yeelame tɩ b pa gomd lisg a woto buud yell Biiblã wall pĩnd wẽndẽ sɛbã pʋsẽ ye. A paasame tɩ Kãab-paalgã pa tol n gom rẽ yelle, la tɩ bũmb pa be n wilgdẽ tɩ pipi kiris-nebã maana woto ye. A yeelame me tɩ egiliiz nins b sẽn lugl tʋm-tʋmdbã kũum poor bilfã baa a ye pa maan woto ye.

Biiblã yetame tɩ sẽn tũud-b a Zeezi wã segd n ‘sõnga buud fãa neb tɩ b lebg yẽ karen-biisi, n lis bãmb la b zãms bãmb tɩ b sak bũmb nins fãa’ yẽ sẽn yeelã. (Mat. 28:19, 20) Nand tɩ ned wa tõog n deeg lisgu, yaa tɩlɛ t’a reng n bao n bãng a Zeova ne a Bi-riblã sõma, n sak-b la a tẽ-ba. Ned sẽn ki yaool n pa tõe n maan woto ye. Kiris-ned sẽn ket n vɩ me pa tõe n maan woto nin-kãng yĩng ye.—Koɛ. 9:5, 10; Zã 4:1; 1 Kor. 1:14-16.

Dẽnd a Poll gomdã rat n yeelame tɩ bõe?

Korẽnt kiris-neb kẽer ra yetame tɩ kũum vʋʋgr kae ye. (1 Kor. 15:12) A Poll wilg-b lame tɩ b tagsgã yaa kɛgre. Wãn to? A yeelame tɩ daar fãa, yẽ ‘segda yɛl sẽn tõe n tũ ne a yõore.’ Baa ne a sẽn da gẽnegd a yõorã, a ra kɩsa sɩd t’a kũumã poore, a na n vʋʋgame n tɩ vɩɩmd saasẽ wa a Zeezi.—1 Kor. 15:30-32, 42-44.

Korẽnt kiris-nebã ra segd n bãngame tɩ kiris-ned sẽn paam vʋʋsem sõngã zaeeb na n maoo ne zu-loees daar fãa, n ki n yaool n vʋʋge. Ned sã n “lis Kirist Zeezi pʋgẽ,” wilgdame tɩ b lis-a-la Kiristã “kũumã pʋgẽ” me. (Rom. 6:3) Rat n yeelame tɩ wa a Zeezi, yẽ me na n maoo ne zu-loeese, n ki n yaool n vʋʋg n kẽng saasẽ.

A Zeezi sẽn deeg lisg tɩ yʋʋm a yiib poore, a yeela a tʋm-tʋmdb a yiib yaa: “Y na n deega lisg ning b sẽn lisd maamã.” (Mark 10:38, 39) A Zeezi ra pa reegd lisg wakat kãng ye. A ra rat n yeelame t’a sẽn maan sɩd ne Wẽnnaamã, na n wa baasa ne a kũum. A Poll yeelame tɩ sẽn paam-b vʋʋsem sõngã zaeebã na n ‘naaga a Zeezi n namse, la b naag-a n paam ziir me.’ (Rom. 8:16, 17; 2 Kor. 4:17) Dẽnd bãmb me segd n deng n kiime, n yaool n vʋʋg n kẽng saasẽ.

Woto yĩnga, d tõe n lebga a Poll goamã tɩ: “Sã n pa rẽ, neb nins sẽn deegd lisg n na n wa yɩ kũ-rãmbã na n maana bõe? Kũum sã n pa tol n vʋʋgdẽ, bõe yĩng masã tɩ b reegd lisg n na n wa yɩ kũ-rãmb bala?”