Yãmb segl n saame n “na n soog tẽngã” bɩ?

YÃMB SEGL N SAAME N NA N TƲM TƖ TẼNGÃ LEBG ARZÃN BƖ?

A Zeova sẽn wa n yeel ninsaalbã tɩ ‘b rog kamb n fɩɩg n pid dũniyã, la b soog-a’ wã, a gomdã wilgame tɩ tẽngã tõr ra na n wa lebga arzãna. (Sɩng. 1:28) Neb nins sẽn na n vɩɩmd wakat sẽn kõn sa wã segd n maana bũmb ning a Zeova sẽn yeelã. Sɩngrẽ wã tẽngã pa na n yɩ arzãna, bala Edɛn zẽedã zĩig ka le be ye. Armagedõ poore, d segd n tʋma wʋsg n maneg tẽngã zĩis nins b sẽn sãamã. Sãmbg kae tɩ na n yɩɩ tʋʋm-kãseng ye!

Rẽ tẽegda tõnd tʋʋmd ning Israyɛll nebã sẽn da segd n tʋme, b sẽn wa n yi Babilon n lebg n wa wã. B soolmã paa vɩʋʋg yʋʋm pis-yopoe. La a Ezayi pĩnd n togsame tɩ ne a Zeova sõngre, b na n tõog maneg-a lame t’a le yɩ neere. Bãngr-gomdã yeelame yaa: “Bãmb na n kɩtame t’a we-raoogã lebg wa Edɛn, la b kɩt t’a tẽn-nabd-koɛɛngẽ lebg wa Sẽn-Ka-Saab zẽed zĩiga.” (Eza. 51:3) Israyɛll nebã tõog n maana rẽ. Woto me, ne a Zeova sõngre, neb nins sẽn na n soog tẽngã na n tõog n kɩtame t’a lebg arzãna. Bũmb kẽer la y tõe n maan masã menga, n wilg tɩ y rat n wa naag n tʋma tʋʋm-kãnga.

Bũmb a ye y sẽn tõe n maan yaa y ges tɩ y zakã pʋgẽ la a yɩngã maneg tɩ yaa sõma la yɩlemde. Y tõe n maanda rẽ, baa y yagsã sã n nong rẽgdo. Y tõe n sõngdame me n yɩlgd y Rĩungã roog la tigis-kãsengã roogo. Y tõeeme me n gʋls n kos n naag sull ning sẽn sõngd sabab-wẽng sẽn paam-b rãmbã. Y sã n maan woto, y wilgdame tɩ y rat n sõnga y tẽed-n-taasã, b sã n wa be yel-pakr pʋgẽ. Sok-y y meng yaa: ‘Bõe la m tõe n zãmse, tɩ m sã n wa paam n kẽ dũni-paalgã pʋgẽ bɩ m tõog n tʋm ne minim-kãnga?’

YÃMB SEGL N SAAME N NA N SÕNG SẼN NA N VƲƲG-BÃ BƖ?

A Zeezi sẽn vʋʋg a Zayirus bi-puglã poor bala, a yeelame tɩ b kõ biigã rɩɩb t’a rɩ. (Mark 5:42, 43) Yʋʋm piig la yiib bi-puglã yell gesg tog n da pa toog wʋsg ye. La tags-y n ges-y tʋʋm-kãseng ning d sẽn segd n tʋme, a Zeezi sã n wa pids a sẽn pʋlem tɩ “sẽn be-b yaad pʋsẽ wã fãa na n wʋma bãmb koɛɛg n yi” wã. (Zã 5:28, 29) Baa b sẽn pa wilg yɛlã sẽn na n yɩ to-to vʋʋgrã sasa ball-ball Biiblã pʋgẽ wã, d miime tɩ sẽn na n vʋʋg-bã na n datame tɩ b sõng-b tɩ b paam dɩɩbo, gãag zĩig la futu. Baa masã menga, y tõe n wilgame tɩ y ratame tɩ wakat kãng sã n ta bɩ mik tɩ y segl n saame n na n sõnge. Ad bũmb a wãn y sẽn tõe n maane:

B sã n togs tɩ tigims sull yel-gɛtã wat n na n kaaga yãmb tigingã, y tõe n kos n bool-a lame t’a wa rɩ. B sã n wa kɩt tɩ Betɛllẽ tʋm-tʋmdb bas b tʋʋmdã n wa yãmb tigingẽ wã wall y babgẽ wã, pa rẽ bɩ tigims sull yel-gɛt sã n wa bas a tʋʋmdã, y tõe n sõng-a lame t’a paam ro-gãaga. B sã n na n maan rasem a tãab tigis-kãseng wall tigis-kãseng sẽn yaa zall y babgẽ wã, y tõe n sak n sõngame n tʋm nand tɩ tigis-kãsengã sɩng la tigis-kãsengã poore, pa rẽ bɩ y naag n deeg saam-biis nins sẽn na n yi tẽns a taab n wa wã.

YÃMB SEGL N SAAME N NA N ZÃMS SẼN NA N VƲƲG-BÃ BƖ?

Goam nins sẽn be Tʋʋm 24:15 pʋgẽ wã kɩtame tɩ d miẽ tɩ neb milyaar-dãmb n na n vʋʋge. B wʋsgã na n yɩɩ neb sẽn pa paam n bãng a Zeova nand tɩ b ki. B vʋʋgrã poore, b na n paama weer n bãng-a.a Wẽn-tũudb sẽn maand sɩd la sẽn tar minim n na n sõng n zãms-ba. (Eza. 11:9) A Sarlot sẽn yaa saam-bi-poak sẽn moon koɛɛgã Erope, Amerikdisiid la Afirikã gũuda rẽ ne yãgbo. Ne sũ-noogo, a yeelame yaa: “Mam yãgdame n na n wa zãms sẽn na n vʋʋg-bã Wẽnnaam daabã. Mam sã n wa karemd kibar sẽn gomd ned sẽn vɩɩmd pĩnd wẽndẽ yelle, mam wae n yeta m sũurẽ yaa: ‘Nin-kãngã sã n da bãngẽ-la a Zeova, a vɩɩmã ra tõe n yɩɩ toor fasɩ.’ Mam yãgdame n na n gom a Zeova yell ne sẽn na n vʋʋg-bã, la m wilg-b b vɩɩmã sẽn na n yɩ sõma to-to, b sã n sak n na n tũ-a.”

Na n yɩɩ tɩlɛ tɩ b zãms neb nins sẽn tũ a Zeova ne b sũy fãa nand t’a Zeezi wa tẽngã zugã meng bũmb wʋsgo. Tags-y n ges-y sũ-noog ning d sẽn na n paame, d sã n wa wilgd a Dãniyɛll bãngr-goam nins a sẽn gʋls n yaool n da pa wʋmd b võorã. Na n yɩɩ zu-zẽkr tɛkẽ! (Dãn. 12:8) Na n yɩɩ woto me, d sã n wa wilgd a Rut ne a Naomi tɩ Mesi wã yaa b yagenga. D sã n wa paam n zãmsd neb dũniyã gill zug tɩ dũni-kãngã sẽn wat ne weoogr la tiisg ningã ka le beẽ, na n yɩɩ sũ-noog tɛkẽ!

Bõe la y tõe n maan masã n wilg tɩ y ratame tɩ wakat kãng sã n ta bɩ mik tɩ y segl n saame n na n zãms sẽn na n vʋʋg-bã? Bũmb a ye y sẽn tõe n maan yaa modgd n paasd y minimã nebã zãmsgã wɛɛngẽ, la y moond koɛɛgã n pa vaandẽ ye. (Mat. 24:14) Baa y yʋʋmã wall yɛl a taab sã n kɩt tɩ y pa tõe n moon koɛɛgã wʋsg wa y sẽn datã, y sã n maand y sẽn tõe fãa, y wilgdame tɩ y rat n wa zãmsa sẽn na n vʋʋg-bã.

Yɩta sõma tɩ y tags sogs-kãensã sẽn tar yõod wʋsgã zugu: Yãmb sɩd yãgdame n na n wa soog tẽngã bɩ? Yãmb yãgdame n na n wa naag n kɩt tɩ tẽngã lebg arzãna, n ges tɩ sẽn na n vʋʋg-bã paam bũmb nins sẽn yaa tɩlɛ ne-bã, la y zãms-b bɩ? Y wilgdame tɩ y segl n saame n na n vɩɩmd wakat sẽn kõn sa tẽngã zugu, y sã n tʋmd tʋʋm sẽn wõnd b rãmb nins y sẽn na n tʋme, y sã n wa soog tẽngã.