Salmi

39 Jien għedt: “Se ngħasses triqati+

Biex ma nidnibx bi lsieni.+

Se nagħmel sarima biex ngħasses fommi,+

Sakemm ikun hemm quddiemi xi ħadd mill-​agħar.”+

 2 Jien tbikkimt u qgħadt sieket;+

Bqajt kwiet dwar dak li hu tajjeb ukoll,+

U rażżant l-​uġigħ tiegħi.

 3 Qalbi saħnet ġewwa fija;+

Matul it-​tnehid tiegħi n-​nar baqaʼ jaqbad.

Għedt bi lsieni:

 4 “O Ġeħova, għarrafni tmiemi,+

X’inhu t-​tul taʼ jiemi,+

Biex inkun naf kemm hi qasira ħajti.+

 5 Ara! Jiemi int għamilthom ftit biss;+

U quddiemek it-​tul taʼ ħajti qisu m’hu xejn.+

Żgur li kull bniedem taʼ l-​art, għalkemm hu wieqaf fis-​sod, m’hu xejn ħlief nifs.+ Sela.

 6 Tassew li l-​bniedem jimxi ’l hemm u ’l hawn bħal dell.+

Tassew li n-​nies jagħmlu storbju għalxejn.+

Wieħed igeddes l-​affarijiet u ma jafx min se jiġborhom.+

 7 U issa għalxiex ittamajt jien, O Ġeħova?

Lilek qed nistenna.+

 8 Eħlisni min-​nuqqasijiet kollha tiegħi.+

Tħallinix niġi mżeblaħ mill-​bniedem bla sens.+

 9 Bqajt imbikkem;+ ma stajtx niftaħ fommi,+

Għax int aġixxejt.+

10 Warrab minn fuqi l-​kastig tiegħek.+

Minħabba li idek hi kontrija jien intemmejt.+

11 Int ikkoreġejt lill-​bniedem billi widdibtu għall-​iżball tiegħu,+

U tikollu l-​affarijiet mixtiqin bħalma tagħmel il-​kamla.+

Tassew li kull bniedem taʼ l-​art hu nifs.+ Sela.

12 Ismaʼ talbi, O Ġeħova,

U agħti widen għall-​għajta tiegħi għall-​għajnuna.+

Tibqax sieket għad-​dmugħ tiegħi.+

Għax ma jien xejn ħlief resident barrani miegħek,+

Immigrant bħal missirijieti kollha.+

13 Tħarisx lejja fir-​rabja tiegħek, biex inkun nistaʼ nifraħ mill-​ġdid+

Qabel ma nitlaq u ma nkunx iktar.”+