Ġenesi

21 U Ġeħova dawwar l-​attenzjoni tiegħu lejn Sara bħalma kien qal, u Ġeħova lil Sara għamlilha bħalma kien tkellem.+ 2 U Sara ħarġet tqila+ u mbagħad wildet iben lil Abraham fi xjuħitu, fiż-​żmien stabbilit li kien qallu Alla.+ 3 Għaldaqstant, Abraham semmieh Iżakk+ lil ibnu li kien twilidlu, li kienet wilditlu Sara. 4 U Abraham għamel iċ-​ċirkonċiżjoni lil ibnu Iżakk meta dan kellu tmint ijiem, bħalma kien ordnalu Alla.+ 5 U Abraham kellu mitt sena meta twilidlu ibnu Iżakk. 6 U Sara qalet: “Alla ġegħelni nidħaq bil-​ferħ: kulmin jismaʼ b’dan jidħaq flimkien miegħi.”+ 7 U żiedet: “Min kellu jgħidlu lil Abraham, ‘Sara se treddaʼ t-​tfal,’ meta fil-​fatt jien ulidtlu iben fi xjuħitu?”

8 Issa t-​tifel kompla jikber u qataʼ l-​ħalib;+ u Abraham ħejja festa kbira dakinhar li Iżakk qataʼ l-​ħalib. 9 U Sara bdiet tinnota lil bin Ħagar l-​Eġizzjana,+ dak li kienet wildet lil Abraham, iwaqqaʼ għaċ-​ċajt lil Iżakk.+ 10 Għalhekk, bdiet tgħid lil Abraham: “Keċċihom ’il barra lil din l-​ilsira u lil binha, għax bin din l-​ilsira mhux se jkun werriet maʼ ibni, maʼ Iżakk!”+ 11 Imma din il-​ħaġa m’għoġbitu xejn lil Abraham rigward ibnu.+ 12 Imbagħad Alla qal lil Abraham: “Tħallihx idejqek dak li qed tgħidlek Sara dwar it-​tifel u dwar l-​ilsira tiegħek. Ismaʼ minn kliemha, għaliex hu permezz taʼ Iżakk li se jiġi dak li jissejjaħ nislek.+ 13 U inkwantu għal bin l-​ilsira,+ jien se nagħmlu wkoll ġens, għaliex hu ibnek.”+

14 Għalhekk, Abraham qam kmieni fil-​għodu u ħa l-​ħobż u flixkun tal-​ġild bl-​ilma u tahom lil Ħagar,+ u qegħedhomlha fuq spallitha, u taha wkoll it-​tifel,+ u bagħatha. U hi telqet u qagħdet tiġġerra fix-​xagħri taʼ Bir-​xeba.+ 15 Fl-aħħar spiċċa l-​ilma+ li kien hemm fil-​flixkun tal-​ġild u hi ħalliet+ lit-​tifel taħt waħda mis-​siġar. 16 Imbagħad marret u qagħdet bil-​qiegħda waħedha, daqs tefgħa taʼ qaws ’il bogħod, għax qalet: “Ma rridx narah imut lit-​tifel.”+ Għalhekk, qagħdet bil-​qiegħda ftit ’il bogħod u bdiet tgħolli leħinha u tibki.+

17 U Alla semaʼ leħen it-​tifel,+ u l-​anġlu t’Alla sejjaħ lil Ħagar mis-​smewwiet u qalilha:+ “Xi ġralek, Ħagar? Tibżax, għax Alla semaʼ leħen it-​tifel minfejn kien mimdud. 18 Qum, qajjem lit-​tifel u żommu sew b’idek, għax se nagħmlu ġens kbir.”+ 19 Imbagħad Alla fetħilha għajnejha u lemħet bir bl-​ilma;+ u marret u mliet il-​flixkun tal-​ġild bl-​ilma u tat jixrob lit-​tifel. 20 U Alla kien mat-​tifel,+ u dan baqaʼ jikber u jgħammar fix-​xagħri; u sar arċier.+ 21 U beda jgħammar fix-​xagħri taʼ Faran,+ u ommu kisbitlu mara mill-​art taʼ l-​Eġittu.

22 Issa ġara dak iż-​żmien li Abimelek flimkien maʼ Fikol, il-​kap taʼ l-​armata tiegħu, qalu lil Abraham: “Alla hu miegħek f’kulma qed tagħmel.+ 23 Mela issa aħlifli hawn b’Alla+ li ma timxix bil-​qerq miegħi u maʼ wliedi u mad-​dixxendenti tiegħi;+ li, skond l-​imħabba leali li biha aġixxejt miegħek,+ hekk int taġixxi miegħi u maʼ l-​art li kont qed tgħix fiha bħala barrani.”+ 24 Għalhekk, Abraham qal: “Naħlef.”+

25 Meta Abraham ikkritika bl-​aħrax lil Abimelek minħabba l-​bir taʼ l-​ilma li l-​qaddejja t’Abimelek kienu ħadu bil-​forza,+ 26 Abimelek qal: “Ma nafx min għamilha din il-​ħaġa, u lanqas int m’għedtli biha, u jien ma smajtx biha ħlief illum.”+ 27 U Abraham ħa nagħaġ u baqar u tahom lil Abimelek,+ u t-​tnejn għamlu patt bejniethom.+ 28 Meta Abraham qiegħed sebat iħrief nisa mill-​merħla għalihom, 29 Abimelek staqsa lil Abraham: “Xi jfissru dawn is-​sebat iħrief nisa li int qegħedt għalihom?” 30 Dan wieġbu: “Trid taċċetta s-​sebat iħrief nisa minn idi, biex dan iservi bħala xiehda+ għalija li jien ħaffirtu dan il-​bir.” 31 Huwa għalhekk li dan il-​post semmieh Bir-​xeba,*+ għaliex hemmhekk kienu ħalfu t-​tnejn li huma. 32 Għalhekk, għamlu patt+ f’Bir-xeba, u mbagħad Abimelek qam flimkien maʼ Fikol, il-​kap taʼ l-​armata tiegħu, u marru lura lejn art il-​Filistin.+ 33 U Abraham ħawwel siġra tat-​tamarisk f’Bir-xeba u hemmhekk sejjaħ isem Ġeħova,+ l-​Alla li jibqaʼ għal dejjem.*+ 34 U Abraham kompla jgħix bħala barrani f’art il-​Filistin għal ħafna żmien.+