Eżodu

4 Madankollu, Mosè wieġeb u qal: “Imma suppost li ma jemmnunix u ma jisimgħux minn kliemi,+ għaliex jgħiduli, ‘Ġeħova ma deherlekx.’” 2 Imbagħad Ġeħova qallu: “X’għandek f’idek?” u hu wieġbu: “Ħatar.”+ 3 Imbagħad qallu: “Ixħtu fl-​art.” Għalhekk, xeħtu fl-​art, u l-​ħatar sar serp;+ u Mosè ħarab minnu. 4 Ġeħova issa qal lil Mosè: “Midd idek u aqbdu minn denbu.” Għalhekk, medd idu u qabdu, u sar ħatar fil-​pala taʼ idu. 5 U kompla jgħidlu, “Sabiex huma jemmnu li deherlek Ġeħova,+ l-​Alla taʼ missirijiethom,+ l-​Alla t’Abraham,+ l-​Alla taʼ Iżakk,+ u l-​Alla taʼ Ġakobb.”+

6 Imbagħad Ġeħova qallu għal darb’oħra: “Daħħal idek, jekk jogħġbok, f’ħobbok.” Għalhekk, daħħal idu f’ħobbu. Meta ħariġha, ara, idu kienet milquta mill-​ġdiem u saret lewn il-​borra!+ 7 Imbagħad qallu: “Daħħal idek lura f’ħobbok.” Għalhekk, daħħal idu lura f’ħobbu. Meta ħariġha minn ħobbu, ara, reġgħet saret bħall-​bqija taʼ ġismu!+ 8 U kompla jgħidlu, “U jrid iseħħ li, jekk ma jemmnukx u ma jisimgħux mix-​xiehda taʼ l-​ewwel sinjal, allura jemmnu x-​xiehda tat-​tieni sinjal.+ 9 Xorta waħda, irid iseħħ li, jekk ma jemmnux saħansitra dawn iż-​żewġ sinjali u ma jisimgħux minn kliemek,+ allura jkollok tieħu ftit ilma mix-​Xmara Nil u tferrgħu fuq l-​art niexfa; u l-​ilma li tieħu mix-​Xmara Nil isir, iva, tabilħaqq li jsir demm fuq l-​art niexfa.”+

10 Mosè issa qal lil Ġeħova: “Skużani, Ġeħova, imma jien m’iniex kelliemi tajjeb, la mill-​bieraħ, la minn qabel il-​bieraħ, u lanqas minn meta int tkellimt mal-​qaddej tiegħek, għax jien fommi tqil u lsieni tqil.”+ 11 Ġeħova wieġbu: “Min għamel fomm il-​bniedem jew min jagħmel* li xi ħadd ikun mutu jew trux jew jara ċar jew agħma? Mhux jien, Ġeħova?+ 12 Mela issa mur, u jien inkun maʼ fommok u ngħallmek dak li għandek tgħid.”+ 13 Imma hu qallu: “Skużani, Ġeħova, imma ibgħat lil xi ħadd ieħor, jekk jogħġbok, lil min trid int.” 14 Imbagħad ir-​rabja taʼ Ġeħova xegħlet kontra Mosè u qallu: “Aron il-​Levita m’huwiex ħuk?+ Naf li tassew jaf jitkellem. U, ara, ħiereġ biex jiltaqaʼ miegħek. Meta jarak, żgur li qalbu tithenna.+ 15 U int trid tkellmu u tqegħedlu l-​kliem f’fommu;+ u jien inkun maʼ fommok u fommu,+ u ngħallimkom x’għandkom tagħmlu.+ 16 U jrid ikellem lin-​nies għalik; u jrid iseħħ li hu jkun bħala fomm għalik,+ u int tkun bħala Alla għalih.+ 17 U dan il-​ħatar trid tieħdu f’idek biex bih twettaq is-​sinjali.”+

18 Għaldaqstant, Mosè telaq u mar lura għand il-​kunjatu tiegħu Ġetro u qallu:+ “Jekk jogħġbok, irrid immur u nerġaʼ lura għand ħuti li qegħdin l-​Eġittu sabiex nara jekk għadhomx ħajjin.”+ Għalhekk, Ġetro qal lil Mosè: “Mur bis-​sliem.”+ 19 Imbagħad Ġeħova qal lil Mosè f’Midjan: “Mur, erġaʼ lura lejn l-​Eġittu, għax l-​irġiel kollha li kienu qed jipprovaw joqtluk* mietu.”+

20 Imbagħad Mosè ħa lil martu u lil uliedu u rikkibhom fuq ħmar, u mar lura lejn l-​art taʼ l-​Eġittu. Iktar minn hekk, Mosè ħa f’idu l-​ħatar taʼ l-​Alla l-​veru.+ 21 U Ġeħova ssokta jgħid lil Mosè: “Wara li titlaq u tmur lura l-​Eġittu qis li twettaq quddiem il-​Fargħun il-​mirakli kollha li fdajt f’idek.+ U jien inħallih iwebbes qalbu;+ u lin-​nies ma jibgħathomx.+ 22 U trid tgħid lill-​Fargħun, ‘Hekk qal Ġeħova: “Israel hu ibni, l-​ewwel imwieled tiegħi.+ 23 U jien ngħidlek: Ibgħat lil ibni sabiex jaqdi lili. Imma jekk tirrifjuta li tibagħtu, ara, noqtollok lil ibnek, l-​ewwel imwieled tiegħek.”’”+

24 Issa ġara li, fi triqtu, fil-​post fejn waqaf għal-​lejl,+ Ġeħova ltaqaʼ miegħu+ u baqaʼ jfittex mod kif joqtlu.+ 25 Fl-aħħar, Sefora+ ħadet biċċa żnied u biha qatgħet il-​prepuzju taʼ binha+ u messitu maʼ saqajh u qalet: “Għaliex int għarus id-​demm għalija.” 26 Għaldaqstant ħallieh imur. Dak il-​ħin qalet: “Għarus id-​demm,” minħabba ċ-​ċirkonċiżjoni.

27 Imbagħad Ġeħova qal lil Aron: “Mur iltaqaʼ maʼ Mosè fix-​xagħri.”+ U hu mar u ltaqaʼ miegħu fuq il-​muntanja taʼ l-​Alla l-​veru+ u biesu. 28 U Mosè qal lil Aron il-​kliem kollu taʼ Ġeħova, li kien bagħtu,+ u s-​sinjali kollha li kien ikkmandah jagħmel.+ 29 Imbagħad Mosè u Aron telqu u ġabru lix-​xjuħ kollha taʼ wlied Israel.+ 30 U Aron lissen il-​kliem kollu li Ġeħova kien qal lil Mosè,+ u wettaq is-​sinjali+ quddiem għajnejn il-​poplu. 31 U n-​nies emmnu.+ Meta semgħu li Ġeħova kien dawwar l-​attenzjoni tiegħu+ lejn ulied Israel u li hu kien ra s-​sofferenza tagħhom,+ imbagħad mielu u nxteħtu fl-​art.+