Ġenesi

22 Issa wara dan kollu ġara li l-​Alla l-​veru għadda lil Abraham minn prova.+ Għaldaqstant qallu: “Abraham!” u dan wieġeb: “Hawn jien!”+ 2 U Alla ssokta jgħidlu: “Jekk jogħġbok, ħu lil ibnek Iżakk,+ l-​uniku iben tiegħek li tant tħobb,+ u vvjaġġa lejn l-​art taʼ Morija+ u hemmhekk offrih bħala offerta tal-​ħruq fuq waħda mill-​muntanji li ngħidlek jien.”+

3 Għalhekk, Abraham bakkar fil-​għodu u xedd is-​sarġ lill-​ħmar tiegħu u ħa miegħu lil tnejn mill-​qaddejja tiegħu u lil ibnu Iżakk;+ u qattaʼ l-​ħatab għall-​offerta tal-​ħruq. Imbagħad qam u telaq lejn il-​post li qallu bih l-​Alla l-​veru. 4 Kien fit-​tielet jum li Abraham għall-​ewwel darba refaʼ għajnejh u beda jara l-​post mill-​bogħod. 5 Issa Abraham qal lill-​qaddejja tiegħu:+ “Intom ibqgħu hawnhekk mal-​ħmar, imma jien u t-​tifel irridu mmorru hemmhekk u nqimu+ u niġu lura ħdejkom.”

6 Imbagħad Abraham qabad il-​ħatab taʼ l-​offerta tal-​ħruq u għabbieh fuq ibnu Iżakk+ u ħa f’idejh in-​nar u s-​sikkina tal-​biċċiera, u t-​tnejn li huma telqu flimkien.+ 7 U Iżakk qal lil missieru Abraham: “Missier!”+ U dan wieġeb: “Hawn jien, ibni!”+ U Iżakk kompla: “Hawn huma n-​nar u l-​ħatab, imma fejn hi n-​nagħġa għall-​offerta tal-​ħruq?”+ 8 Abraham qal: “Alla jipprovdiha hu n-​nagħġa għall-​offerta tal-​ħruq,+ ibni.” U t-​tnejn li huma komplew mexjin flimkien.

9 Sa fl-​aħħar waslu fil-​post li qallu bih l-​Alla l-​veru, u Abraham bena artal+ hemmhekk u rranġa l-​ħatab u rabat lil ibnu Iżakk minn idejh u minn saqajh u poġġieh fuq l-​artal, fuq il-​ħatab.+ 10 Imbagħad Abraham medd idu u qabad is-​sikkina tal-​biċċiera biex joqtol lil ibnu.+ 11 Imma l-​anġlu taʼ Ġeħova beda jsejjaħlu mis-​smewwiet u jgħidlu:+ “Abraham, Abraham!” u dan wieġbu: “Hawn jien!” 12 U l-​anġlu ssokta jgħidlu: “Tmiddx idek fuq it-​tifel u tagħmillu xejn,+ għax issa naf li int tibżaʼ minn Alla billi ma ċaħħadtnix minn ibnek, l-​uniku wieħed li għandek.”+ 13 Malli semaʼ dan, Abraham refaʼ għajnejh u ħares u hemmhekk, ftit ’il bogħod quddiemu, kien hemm muntun maqbud minn qrunu fil-​friegħi tas-​siġar. Għalhekk, Abraham mar u ħa l-​muntun u offrieh bħala offerta tal-​ħruq minflok ibnu.+ 14 U Abraham semma dan il-​post Ġeħova-jire.* Huwa għalhekk li llum għadu jingħad: “Fuq il-​muntanja tiegħu, Ġeħova jipprovdi.”+

15 U l-​anġlu taʼ Ġeħova sejjaħ lil Abraham it-​tieni darba mis-​smewwiet 16 u qallu: “‘Bija nnifsi naħlef,’ hija l-​kelma taʼ Ġeħova,+ ‘li minħabba l-​fatt li int għamilt din il-​ħaġa u ma ċaħħadtnix minn ibnek, l-​uniku wieħed li għandek,+ 17 jien żgur li nbierkek u żgur li nkattar lil nislek bħall-​kwiekeb tas-​smewwiet u bħar-​ramel li hemm f’xatt il-​baħar;+ u nislek għad jieħu f’idejh bieb* l-​għedewwa tiegħu.+ 18 U permezz taʼ nislek+ il-​ġnus kollha taʼ l-​art se jitbierku minħabba l-​fatt li int smajt minn kliemi.’”+

19 Imbagħad Abraham mar lura ħdejn il-​qaddejja tiegħu, u dawn qamu u telqu flimkien lejn Bir-​xeba;+ u Abraham baqaʼ jgħammar f’Bir-xeba.

20 Issa wara dan kollu ġara li lil Abraham waslitlu din l-​aħbar: “Ara! Milka+ wkoll wildet ulied lil ħuk Naħor:+ 21 Uż l-​ewwel imwieled tiegħu, ħuh Buż,+ Kemwel missier Aram, 22 Kesed, Ħażo, Pildas, Ġidlaf, u Betwel.”+ 23 U Betwel nissel lil Rebekka.+ Dawn it-​tmienja wildithom Milka lil Naħor, ħu Abraham. 24 Kien hemm ukoll il-​konkubina tiegħu, li kien jisimha Rewma. Maż-​żmien, din ukoll wildet lil Tebaħ, Gaħam, Taħas, u Magħka.+